Magpadayon sa Paglinig-onay sa Usag Usa
1 Gibuhat ni apostol Pablo ang tanan niyang maarangan sa pagpalig-on sa iyang mga isigkamagtutuo. (2 Cor. 11:28, 29) Sa samang paagi, kita mabalaka kon ang atong mga igsoon mag-atubang ug malisod nga mga kahimtang, ug buot natong tabangan sila. Gipakita sa Bibliya nga ang tanan, dili lang mga ansiyano, ang angayng mahingawa sa uban. (Roma 15:1, 2) Tagda ang duha ka paagi nga atong matuman kining mahigugmaong tambag: “Magpadayon sa paghupay sa usag usa ug sa paglinig-onay sa usag usa.”—1 Tes. 5:11.
2 Pag-ila sa mga Panginahanglan sa Uban: Ang Pulong sa Diyos nagtaho nga si Dorcas “daghag maayong mga buhat ug mga gasa sa kaluoy.” (Buh. 9:36, 39) Nagpakabana siya sa mga nanginahanglan ug gihimo ang iyang maarangan sa pagtabang kanila. Pagkamaayong panig-ingnan ang iyang gihatag kanato! Masayran mo tingali nga may edarang igsoon nga nanginahanglag kasakyan paingon sa tigom. O tingali may payunir nga walay kauban sa pagsangyaw sa usa ka hapon sa dili pa ang Sabado ug Dominggo. Kon imong mahibaloan ang maong panginahanglan ug motanyag kag praktikal nga tabang, madasig gayod ang maong igsoon.
3 Espirituwal nga Panag-estoryahay: Kita makapalig-on usab sa uban pinaagi sa atong pagpanulti. (Efe. 4:29) Ang usa ka eksperyensiyadong ansiyano miingon: “Kon buot kang makapadasig, pakig-estorya bahin sa espirituwal nga mga butang. Aron makasugod kag makapalig-ong panag-estoryahay, makagamit kag yanong pangutana sama sa, ‘Sa unsang paagi ka na-Saksi?’” Ipakita ang sinserong interes sa mga batan-on diha sa kongregasyon. Pakigsultihi ang mga naluya ug mga maulawon. (Prov. 12:25) Ayawg tugoti nga ang panag-estoryahay bahin sa kalibotanong mga kalingawan mopatigbabaw sa makapalig-ong espirituwal nga panag-estoryahay uban sa mga isigkamagtutuo.—Roma 1:11, 12.
4 Apan unsay imong ikasulti aron mapalig-on ang uban? Sa imong personal nga pagbasa ug pagtuon sa Bibliya, nakakaplag ka bag prinsipyo nga nakapalalom sa imong gugma ug pagpabili kang Jehova? Duna bay impormasyon nga imong nadunggan sa usa ka pakigpulong publiko o sa Pagtuon sa Bantayanang Torre nga nakapadasig kanimo? O natandog ba ang imong kasingkasing sa usa ka kasinatian nga makapalig-on sa pagtuo? Kon atong pabilhan kining espirituwal nga mga mutya, kita adunay makapadasig nga butang nga ikapaambit kanunay sa uban.—Prov. 2:1; Luc. 6:45.
5 Pinaagi sa pagtanyag ug praktikal nga tabang ug paggamit nga maalamon sa atong dila, hinaot magpadayon kita sa paglinig-onay sa usag usa.—Prov. 12:18.