“Mga Butang nga Nagalig-on sa Among mga Pagdahom”
KADTO maoy mainit nga buntag sa Dominggo, Septiyembre 10, sa dihang 4,155 nagtigom sa matahom nga Assembly Hall of Jehovah’s Witnesses sa Jersey City, New Jersey, alang sa programa sa graduwasyon sa ika-87ng klase sa Watchtower Bible School of Gilead. Mitambong mao ang 24 ka estudyante ug ilang dinapit nga mga bisita uban sa mga membro sa pamilyang Bethel sa Brooklyn ug sa kaumahan sa Sosyedad.
Ang mamiminaw nahusay sa gilayon sa alas 10:00 s.b. pinaagi ni Albert Schroeder, kinsa nagsilbing tsirman alang sa adlaw. Tapos sa usa ka pang-abling kanta, ang pag-ampo gitanyag ni John Barr. Ang duruha ka igsoon maoy mga membro sa Nagamandong Lawas. Gipahayag ni Brader Schroeder ang mubong kasaysayan bahin sa klase ug mikomento nga ang mga graduwado “andam nga makig-ambit sa tibuok-yutang kalihokan sa mga Saksi ni Jehova, nga karon anaa sa 210 ka kayutaan.” Dayon mipadayon siya sa pagpailaila sa pito ka laing mamumulong.
Si Robert Wallen, kinsa nagatrabaho sa Ehekutibong mga Opisina sa Brooklyn nga hedkuwarter, nagbase sa iyang tema, “Magbaton ug Mainitong Gugma sa Usag Usa,” sa 1 Pedro 4:8. Siya miingon nga ang mga misyonaryo kinahanglang motabang sa usag usa, ug sanglit ang tanang estudyante sa maong klase minyo man, gitumong niya ang iyang mga komento ngadto ilabina sa mga magtiayon. “Ang usa ka asawa kinahanglang mahigugma sa iyang bana bisan pag siya tingali mas daling makatuon sa usa ka langyawng pinulongan kay kaniya,” siya mitambag. “Siya angay nga magmasinabtanon ug maluluy-on. Gawas pa, siya kinahanglang maningkamot sa pagsabot kaniya sa dihang siya may senemanang adlaw sa pagluto!” (Kasagaran, ang matag usa ka misyonaryo itudlog regular nga adlaw sa pagdegamo sa mga pagkaon sa adlaw alang sa tanang nagapuyo sa usa ka balayng misyonaryo.) Dayon gibatbat sa mamumulong ang mga kapakyasan ug kataw-anang mga kasinatian nga mabatonan sa pila ka bana sa dihang magtuon sa pagluto, sama sa kasinatian sa bana nga migamit sa baking soda inay sa baking powder. Gipunting usab ni Brader Wallen nga ang bana angay “nga makaila sa mga panginahanglan sa iyang asawa,” sanglit daghan kaayo sa panahon sa bana basin magugol nga mag-atiman sa mga responsabilidad sa kongregasyon. Ngadto sa mga bana ug mga asawa, siya miingon: “Mahimong makapalig-on sa kanunay; ayaw paghimog negatibong mga komento, bisan sa usag usa. Likayi nga magpalain. Ug kon kamo makahimog mga sayop, admitiha kana.”
Ang sunod nga mamumulong, si Daniel Sydlik, usa ka membro sa Nagamandong Lawas, mipili sa tema: “Pasigaha Kanunay ang Espiritu sa Diyos,” nga gibase sa 1 Tesalonica 5:19. “Ang kalayo mahimong makapainit ug makadaot,” siya miingon. “Usahay ang mga misyonaryo nagadasig ug usahay sila nagapanghadlok. Ang usa ka tigulang Aprikanong lalaki kas-a miingon: ‘Huyop nga hinay,’ sama sa usa ka aligato nga buot nimong pasigaon! Kon maghisgot sa mga butang imo tingaling hikaplagan sa imong asaynment—abling mga imburnal, mga langaw, sabang trapiko, usa ka bag-ong nasod, disinating relihiyon—ipakita ang pagtahod. Makadakop kag mas daghang langaw pinaagi sa dugos inay sa suka. Pagtuon sa ‘paghuyop nga hinay’ ug pasigaa nga kanunay ang kalayo sa espiritu ni Jehova.”
Unya ang temang “Nabugkos sa Inyong Asaynment Uban ang Kadasig ug Pagbantay” gihan-ay ni Kenneth Flodin, magtatan-aw sa Balayng Bethel sa Watchtower Farms. Sanglit ang Tunghaang Gilead karon anaa na sa Watchtower Farms, ang tanang graduwado nakaila kaayo kang Brader Flodin. Ang duha ka natad nga pagabantayan gihan-ay sa iyang pakigpulong: (1) materyalismo ug (2) negatibong sinultihan ug negatibong panghunahuna. “Likayi ang pagkahakog ug mahimong dili mahunahunaon sa kaugalingon” mao ang tambag. “Panan-aw sa unahan sa mga kaharuhay ug maayong mga butang sa bag-ong kalibotan; ayaw silag pangitaa karon,” matud niya. Sa pagtabang sa mga estudyante sa paglikay sa sobrang pagkanegatibo, ang mamumulong mikutlo sa Numeros 13:28, 32. “Usahay,” siya miingon, “ang mga tawo makakita sa samang butang, ang pipila magbaton ug negatibong hunahuna, ang uban sa positibong hunahuna. Sama kang Caleb sa kakaraanan, salig kang Jehova. Sultihi ang uban sa imong positibong mga hunahuna. Ug kon mahibalag ang negatibong sinultihan, ilisi ang ulohan aron malikayan ang negatibong mga hunahuna.”
Si Lloyd Barry, usa ka membro sa Nagamandong Lawas ug mismo kanhi misyonaryo, mihatag ug praktikal nga tambag. “Ang gugma, kalipay, ug pakigdait maoy kinahanglanong mga hiyas alang sa bag-ong mga misyonaryo,” matud niya. “Mailhan nimo ang mga kahuyangan sa uban diha sa inyong balayng misyonaryo, apan ihatag ang pagtagad sa imong kaugalingong mga kahuyangan.” Nahinumdom siya sa iyang unang mga adlaw sa Hapon sa dihang ang mga misyonaryo gustog isda kada adlaw, apan unya miabot ang bag-ong mga misyonaryo nga alerdyik sa isda. Busa ang menu giusab tungod sa gugma alang sa mga bag-ohan. Mitambag usab siya: “Hupti padayon ang inyong pagkasiawan; ayaw pasalopi sa adlaw ang inyong mga suliran. Hupti ang pakigdait diha sa balay, ug kamo magmalipayon sa inyong misyonaryong kinabuhi.”—Efeso 4:26.
Si Jack Redford, usa sa mga instruktor sa Gilead, unya namulong bahin sa ulohan: “Si Jehova Magahuman sa Inyong Pagbansay,” nga nagbase sa iyang mga komento sa 1 Pedro 5:10. Matud niya: “Si Jehova makabansay kaninyo pinaagi sa pagtugot nga motungha ang mga kahimtang nga lisod atubangon. Sama nga iyang gibansay ang mga apostol sa pag-atubang sa mga kasungian sa personalidad, siya magabansay kaninyo. Ayaw pagkaguol kon adunay mga kalainan sa opinyon. Magmaandam nga ipasibo ang imong personalidad. Ang garbo mopalisod niini, apan ang pagpaubos mopaposible niini. Pagtuon nga magmapailin-ilinon. Si Jehova magabansay usab kaninyo nga makasinabot sa uban. ‘Ayaw lamang ihatag ang inyong kasingkasing sa tanang pulong nga isulti tingali sa mga tawo’ mahitungod kaninyo.” (Ecclesiastes 7:21, 22) Ang paglutos nagasilbi usab nga pagbansay. Ang mga misyonaryo nga nakaantos sa paglutos malipayon ug walay mga pagbasol, kalipay lamang tungod kay nabansay sa paglutos.
Si Ulysses Glass, laing instruktor, dayon mihatag sa iyang pangataposang mga pulong ngadto sa mga graduwado. Gihatag niya ang pagtagad sa Efeso 4:1-3, nga nagdayeg sa klase tungod sa pagpasundayag sa nagapahiusang mga hiyas nga gibatbat dinha ug nagdasig kanila sa pagpadayon niana, nga miingon: “Ang pakigdait makapabugkos, ug kini kinahanglanon alang sa panaghiusa.” Dayon siya mipadayon sa Efeso 4:4-6 ug gisubli ang pagkakatingalahan sa espiritu sa Diyos, nga nagpahinumdom sa tanan nga “si Jehova mao ang Tinubdan sa tanang dinamikong kusog. Angay nga kita malisang kaniya; makahahadlok nga butang nga mahulog sa iyang mga kamot.”—Hebreohanon 10:31.
Dagkong mga Pagdahom
Dayon ang tanan namating maikagon kaayo kang Theodore Jaracz, usa ka membro sa Nagamandong Lawas sa mga Saksi ni Jehova, kinsa namulong bahin sa pangunang tema: “Mga Butang nga Nagalig-on sa Atong mga Pagdahom.” Sa pagpangatarongan pinasukad sa 1 Corinto 2:9, siya miingon: “Kining bersikuloha wala maghisgot sa mga butang nga materyal ang matang, kay ang sunod nga bersikulo, 1 Corinto 2:10, nagahisgot bahin sa ‘laglom nga mga butang sa Diyos.’ Kini naglangkit sa ‘kaalam sa Diyos’ nga maylabot sa ‘sagradong tinagoan,’ ang iyang ‘tinagoang kaalam’ nga nagagikan sa lapaw pa niining sistema solar, oo, gikan sa Diyos mismo.” (1 Corinto 2:7) Unya ang mamiminaw gitumong sa Isaias 64:4, nga pahinumdom sa ‘pagpaabot’ sa Diyos ug sa mga butang iyang giandam.
Pagkadagko ang mga pagdahom sa katawhan sa Diyos! Si Brader Jaracz mipunting sa mosunod: “Niadtong 1919 diha ang pagkahulog sa Dakong Babilonya; sa 1922 ang makalipayng awhag nga ‘ipahibalo ang Hari ug ang Gingharian,’ isangyaw ang natukod nga Gingharian sa tibuok kalibotan; sa 1935 nasayran sa katawhan sa Diyos ang kahulogan sa ‘dakong panon’ sa Pinadayag 7:9; sa 1943 nakita nila nga ang Tunghaang Gilead misugod sa pagpadalag mga misyonaryo ngadto sa mga kinatumyan sa yuta; karong adlawa, sa 1989, kamong mga graduwado may pribilehiyo sa pagsugilon sa maayong mga butang ngadto sa katawhan sa inyong mga asaynment nga ikag mamati.”
Tapos ipanghatag ang mga diploma, usa sa mga estudyante nagbasag makapatandog-sa-kasingkasing nga sulat sa apresasyon gikan sa klase.
Sa hapon, si Lon Schilling, koordinator sa Watchtower Farms Committee, midumala sa pinamubong Pagtuon sa Watchtower. Dayon ang mga estudyante mipasundayag sa makalingawng programang musikal ug midula sa pipila sa ilang mga kasinatian sa pagsangyaw sa kanataran. Human niadto, ang lokal nga mga magmamantala mipasundayag sa tukma-sa panahong drama nga nag-ulohan: “Pag-atubang sa Malalangong mga Buhat ni Satanas.” Sa kataposan, ang malipayong panon miawit sa paniklop nga awit ug nalipay nga miduyog sa pag-ampo uban sa 96-anyos nga presidente sa Tunghaang Gilead, si Frederick Franz.
[Kahon sa panid 23]
MGA ESTADISTIKA SA KLASE
Gidaghanon sa mga nasod nga gihawasan: 5
Gidaghanon sa mga nasod nga giasaynan: 10
Gidaghanon sa mga magtiayon: 12
Total nga gidaghanon sa mga estudyante: 24
Aberids nga edad: 30.9
Aberids nga katuigan sa kamatuoran: 13.4
Aberids nga katuigan sa bug-os-panahong ministeryo: 9.2
[Larawan sa panid 23]
Ika-87ng Migraduwar nga Klase sa Watchtower Bible School of Gilead
Sa listahan sa ubos, ang mga lumbay ginumerohan gikan sa atubangan ngadto sa likod, ug ang mga ngalan gilista gikan sa wala patuo sa matag lumbay.
(1) Heindel, E.; Andrews, D.; Casavant, D.; Montanez, E.; Nale, P.; Koukaras, S. (2) Miell, T.; Heithaus, M.; Melton, T.; Hagberg, N.; Kettinen, M. (3) Kettinen, L.; Andrews, W.; Koukaras, E.; McCollough, S.; Melton, G.; McCollough, J. (4) Heindel, W.; Casavant, G.; Miell, G.; Montanez, J.; Nale, M.; Hagberg, I.; Heithaus, K.