“Ayaw Paghunong sa Pagbuhat ug Matarong”
Mga Pangunang Punto sa Ikaduhang Tesalonica
ANG kabalaka ni apostol Pablo alang sa mga Kristohanon sa siyudad sa Tesalonica sa Macedonia nagtukmod kaniya sa pagsulat sa iyang ikaduhang sulat ngadto kanila, sa mga tuig 51 K.P. Ang pipila diha sa kongregasyon sa pagkasayop nanag-ingon nga ang presensiya ni Jesu-Kristo nadayag na. Bisan gani ang usa ka sulat nga sa pagkasayop gituohan nga gikan kang Pablo gihubad nga nagpaila nga “ang adlaw ni Jehova” miabot na.—2 Tesalonica 2:1, 2.
Busa ang panghunahuna sa pipila ka mga taga Tesalonica nagkinahanglag kausaban. Sa iyang ikaduhang sulat, si Pablo nagdayeg kanila sa ilang nagatubong pagtuo, nagauswag nga gugma, ug matinumanong paglahutay. Apan iyang gipakita usab nga ang apostasiya moabot sa dili pa ang presensiya ni Jesus. Busa adunay malisod nga mga panahon sa unahan, ug ang sulat sa apostol motabang kanila sa pagpatalinghog sa iyang tambag: “Ayaw paghunong sa pagbuhat ug matarong.” (2 Tesalonica 3:13) Ang mga pulong ni Pablo motabang usab kanato sa samang paagi.
Ang Pagpadayag ug ang Presensiya ni Kristo
Una si Pablo naghisgot ug kahupayan gikan sa kasakitan. (1:1-12) Kini moabot “sa pagpadayag ni Jesus nga Ginoo gikan sa langit uban sa iyang gamhanang mga manulonda.” Ang kalaglagan nga walay kataposan ipakanaog unya niadtong wala magmasinugtanon sa maayong balita. Makalilipay nga hinumdoman kini sa dihang atong mahiagoman ang kasakitan diha sa mga kamot sa mga maglulutos.
Sunod, gipunting ni Pablo nga “ang tawo sa kalapasan” igapadayag sa dili pa ang presensiya ni Kristo. (2:1-17) Ang mga taga Tesalonica angay nga dili malipay sa bisan unsang mensahe nga nag-ingong “ang adlaw ni Jehova” nahiabot na kanila. Una, ang apostasiya mahitabo ug ang tawo sa kalapasan igapadayag. Human niana, si Jesus maglaglag kaniya, himoon kini sa pag-abot sa Iyang presensiya. Kasamtangan, si Pablo nag-ampo nga ang Diyos ug si Kristo maglipay sa mga kasingkasing sa mga taga Tesalonica ug maghimo kanilang “malig-on diha sa tanang maayong binuhatan ug pulong.”
Pakiglabot Uban sa mga Samokan
Taliwala sa dugang nga mga pulong ni Pablo mao ang mga instruksiyon sa pagpakiglabot sa samokang mga indibiduwal. (3:1-18) Siya nagpahayag ug pagsalig nga ang Ginoo magalig-on sa mga taga Tesalonica ug magapanalipod kanila gikan sa daotang usa, si Satanas nga Yawa. Apan ilang gikinahanglan ang pagkuhag mga lakang alang sa ilang kaugalingong kaayohan sa espirituwal. Sila angay nga magpahilayo gikan sa mga samokan, kadtong manghilabot sa mga butang nga dili ilaha ug modumili sa pagtrabaho. “Kon adunay dili buot nga motrabaho,” matud ni Pablo, “ayaw siyag pagkan-a.” Ang maong mga tawo angay nga markahan, ug walay makighugoyhugoy uban kanila, bisan pag sila badlongon ingong mga igsoon. Ang matinumanong mga Kristohanon sa Tesalonica dili mohunong sa pagbuhat ug matarong, ug gitinguha ni Pablo nga ang dili takos nga kalulot sa atong Ginoong Jesu-Kristo maanaa kanilang tanan.
Ang ikaduhang sulat ni Pablo ngadto sa mga taga Tesalonica naghatag sa mga Saksi ni Jehova ug pasalig nga ang kahupayan gikan sa ilang kasakitan moabot sa dihang si Kristo ug ang iyang mga manulonda magapanimalos niadtong wala magasugot sa maayong balita. Makapalig-on sa pagtuo usab ang pagkasayod nga “ang tawo sa kalapasan” (ang klerong matang sa Kakristiyanohan) ug ang tanang bakak nga relihiyon sa dili madugay pagataposon. Kasamtangan, atong patalinghogan ang tambag ni Pablo nga dili mohunong sa pagbuhat ug matarong.
[Kahon/Hulagway sa panid 23]
Ang Pulong ni Jehova Nagmatulin: “Pag-ampo kamo alang kanamo,” misulat si Pablo, “aron ang pulong ni Jehova unta magmatulin [o, “unta magadagan”] ug magmadaogon ingon sa nahimo niini diha kaninyo.” (2 Tesalonica 3:1; Kingdom Interlinear) Ang pipila ka mga eskolar nagsugyot nga ang apostol nagpasabot ngadto sa mga magdadagan nga matulin diha sa usa ka lumba. Samtang kana dili piho, si Pablo naghangyo sa mga pag-ampo sa mga Kristohanon sa Tesalonica aron siya ug ang iyang kaubang mga magbubuhat magapakaylap sa pulong sa kamatuoran uban ang pagkadinalian ug walay kababagan. Tungod kay ang Diyos magatubag sa maong mga pag-ampo, ang iyang pulong “nagmatulin” samtang kining maayong balita ginasangyaw nga may pagkadinalian niining kataposang mga adlaw. Ang pulong ni Jehova usab “nagmadaogon,” gipabilhan pag-ayo sa mga magtutuo ingong “ang gahom sa Diyos alang sa kaluwasan,” ingon sa gibati sa mga taga Tesalonica nga midawat niini. (Roma 1:16; 1 Tesalonica 2:13) Pagkamalipayon nato nga ang Diyos nagapanalangin sa mga tigmantala sa Gingharian ug matuling nagapauswag sa mga panon sa iyang mga magsisimba!—Isaias 60:22.