Ang Hunahuna sa Bibliya

Ang Pulpito Dapit ba sa mga Babaye?

“ANG kadaghanang Kristohanon dili makasabot ngano, kon ang mga babaye mahimong mga monarko, mga primer ministro, mga huwes, mga siruhano, mga siyentipiko, sila pugngan sa paghimo sa Balaang Komunyon ug sa mga kasal,” misulat ang klerigong si Nicholas Stacey sa Iglesya sa Inglaterra o Church of England diha sa The Times sa London.

Bisan tuod ang Iglesya sa Inglaterra nagabansay sa mga babaye alang sa espesyal nga serbisyo, hangtod karon kini dili motugot nga ang mga babaye mag-alagad nga mga pari aron sa pag-administrar sa mga sakramento niini. Uyon ka ba sa baroganan sa iglesya, o nagtuo ka ba nga ang mga babaye igabutang sa pulpito?

Makabahin sa mga Iglesya

Ang isyu bahin sa mga babaye ingong klero nakabahin sa mga membro sa samang relihiyon. Ang Iglesya sa Inglaterra daling mabahin ngadto sa duha ka separadong institusyon tungod sa isyu, nagpasidaan si Dr. Graham Leonard, Obispo sa London, ang pangunang klero nga nagsupak sa pag-ordinar sa mga babaye. Gipasanginlan sa pila ka tawo ang pagkamadapigon sa pagpahigawas sa mga babaye sa pulpito, apan labaw pa ang nalangkit.

Sa tinagpulo na ka katuigan, gipaningkamotan sa Iglesya sa Inglaterra ang paghusay sa mga kabangian niini batok sa Roma. Apan sa usa ka bag-ong sulat ngadto sa Arsobispo sa Canterbury, ang papa miingong ang pagdawat sa mga babaye sa pagkapari “sa mga mata sa Iglesya Katolika, maoy nagakaseryosong babag sa maong progreso.”

Hinuon, ang usa ka importanteng elemento wala iapil sa maong panaglalis—ang Bibliya. Sa unsang paagi ang mga babaye nag-alagad sa unang Kristohanong kongregasyon, ug angay unsa ang ilang papel karong adlawa?

Managsama Apan Lahi

Sa pagkahimugso sa Kristohanong kongregasyon sa tuig 33 K.P., ang mga babaye uban sa mga lalaki nakadawat sa balaang espiritu. Kini sa tukma mao ang gitagna sa manalagnang Joel kasiglohang miagi, mipatin-aw si apostol Pedro.—Buhat 1:13-15; 2:1-4, 13-18.

Sa ulahi, si Pedro nahidangat sa bug-os nga kaamgohan sa lain pang hinungdanong kamatuoran: “Ang Diyos walay pinalabi.” (Buhat 10:34) Sa literal, kanang kasulatana nagkahulogang ang Diyos dili “tigtan-aw sa nawong.” Ang usa ka “tigtan-aw sa nawong” nagapadayag sa pagkaila ug pagpalabi sa laing tawo. Sa karaang panahon, daghang maghuhukom ang modapig sa mga dato kay sa kabos. O ang mga hukom ipakanaog nga ipasukad sa nasyonalidad, sosyal nga ranggo, pamilya, o pakighigala inay sa mga kamatuoran. Apan si Jehova nagahimo sa kaatbang. Siya nagadapig lamang niadtong nahadlok kaniya ug nagabuhat sa pagkamatarong. Kon bahin sa kaluwasan, ang Diyos dili motamod sa ‘nawong’ sa usa ka lalaki kay sa ‘nawong’ sa usa ka babaye. Ang duruha managsama alang kaniya.—Buhat 10:35.

Busa, ang Kasulatan nagahatag sa Kristohanong mga lalaki ug mga babaye sa managsamang sukod sa kadungganan ingong mga membro sa kongregasyon. Si apostol Pablo misulat ngadto sa mga Kristohanon sa Galacia nga “walay ulipon o tawong may kagawasan, walay pagkalalaki o pagkababaye; kay kamong tanan maoy usa ka tawo nga nahiusa kang Kristo Jesus.” Ang tanan may independenteng espirituwal nga pagbarog atubangan sa Diyos; bisan pa niana ang tanan nahiusa ingong usa ka pundok sa iyang mga alagad. Ang tanan managsama sa panimalay sa Diyos.—Galacia 3:26-28.

Bisan pa niana, adunay mga kalainan tali sa mga lalaki ug mga babaye sulod sa kongregasyon apan maingon nga ang kinaiyanhong mga kalainan tali sa lalaki ug babaye dili babag sa ilang pagkomplemento sa usag usa, sa ingon ang nagkalainlaing mga pribilehiyo nga gipahimuslan sa mga lalaki ug mga babaye sulod sa Kristohanong kongregasyon angay dili mahimong babag sa panaghiusa sa kongregasyon. Unsa ba ang maong mga kalainan?

Mga Magtutudlo—Kanus-a ug Kang Kinsa?

Ang mga kalainan nahasentro sa pagpanudlo ug sa pagbulot-an. Ang mga babaye gidid-an sa pag-alagad diha sa opisyal nga katungdanan sa pagpanudlo sa kongregasyon ug paggamit sa espirituwal nga pagbulot-an ibabaw sa isigkamembro sa kongregasyon. Sa iyang pastoral nga sulat kang Timoteo, tin-awng miingon si Pablo: “Dili ako motugot nga ang usa ka babaye magtudlo, o magbaton ug pagbulot-an ibabaw sa usa ka lalaki, kondili magpakahilom lamang.”—1 Timoteo 2:12.

Sunod gipunting ni Pablo ang pasikaranan sa dili pagtugot sa babayeng mga magtutudlo—usa ka balaanong pagkatudlo nga relasyon tali sa lalaki ug babaye. “Kay si Adan ang unang giumol, dayon si Eva,” siya misulat. (1 Timoteo 2:13) Ang Diyos makalalang unta kang Adan ug Eva sa samang gutlo, apan wala niya buhata kana. Si Adan naglungtad na sa taastaas nga panahon una kang Eva. Wala ba kini magpadayag sa katuyoan sa Diyos nga si Adan maoy magdumala, mahimong ulo, inay kay si Eva? (1 Corinto 11:3) Ug ang pagtudlo, sa pagkamatuod, mao ang pagsilbing usa ka agalon, o ulo, ibabaw niadtong gitudloan. Kadtong tudloan magapamati ug mahilomong makakat-on. Busa, diha sa kongregasyon ang mga lalaki lamang mao ang mahimong mga magtutudlo ug mga magtatan-aw.

Ang kamatuorang ang mga babaye dili magtudlo sulod sa kongregasyon angay bang magpahinabog pagbati sa kapakyasan ug kayugot? Dili. Ang mga babaye may kagawasan sa pagtudlo sa Kristohanong doktrina ug gidapit sa pagbuhat niana. Sa unsang konteksto ug ilalom sa unsang mga kahimtang? Ang tigulang nga mga babaye mahimong “mga magtutudlo kon unsay maayo” ngadto sa batan-ong mga babaye. Ug maingon nga si Eunice ug ang iyang inahan si Loida nagtudlo kang Timoteo, ang Kristohanong mga babaye usab nagasunod pa sa ilang panig-ingnan sa pagbansay sa mga anak sa “Ang Dalan” sa kamatuoran.—Tito 2:3-5; Buhat 9:2; 2 Timoteo 1:5.

Karong adlawa, ang Kristohanong mga babaye nagasunod usab sa mga panig-ingnan ni Euodia ug ni Sintique pinaagi sa pagwali sa dayag sa maayong balita. (Filipos 4:2, 3) Sila mahimong mga magtutudlo pinaagi sa pagdumalag mga pagtuon sa Bibliya uban sa mga tawong interesado. (Mateo 28:20) Ginatos ka libong babaye ang nakakaplag ug espirituwal nga katagbawan niining dinaliang buluhaton sa pagwali ug sa pagtudlo. Ilang ginatumong ang uban ngadto sa pagkatukod sa usa ka kalibotan nga may pagkamatarong ug kalinaw ilalom sa pagmando ni Jesu-Kristo—usa ka paglaom nga samang gihuptan uban sa ilang Kristohanong mga igsoong lalaki.—Salmo 37:10, 11; 68:11.

[Blurb sa panid 16]

Ang isyu bahin sa mga babaye ingong klero nakabahin sa mga membro sa samang relihiyon