‘Apan Wala Ako Mahigugma Kang Jehova!’
SI Bob batan-on pa nga ulitawo sa dihang nahimo ang iyang inahan nga usa sa mga Saksi ni Jehova. Sa daghang tuig, tig-uban siya kaniya sa Kingdom Hall ug sa buluhatong pagsangyaw, bisag wala pa siyay bawtismo. Hinunoa, sa dihang miabot siya sa iyang ulahing mga tuig sa pagkatin-edyer, mihunong siya sa pakig-uban sa mga Saksi. Nahisukamod gikan sa usa ka daotang kahimtang ngadto sa lain, iyang gidaot ang iyang kinabuhi. Bisan pa nga nag-angkon siya nga nagtuo sa daghang butang nga iyang nakat-onan gikan sa Bibliya, dili kini igo sa pagpabalik kaniya sa organisasyon ni Jehova. Nganong mibati ug ingon niini si Bob?
Palandonga ang laing pananglitan. Si David maoy bug-os panahon nga ministro sa daghang tuig niadto. Usahay, may mga pangutanang motungha sa iyang hunahuna mahitungod sa pila ka mga pagtulon-an sa Bibliya. Apan iyang tan-awon kanunay ang problema pinaagi sa pagpangatarongan nga sama kini sa pagsulbad ug jigsaw puzzle, ang tawo dili mohunong tungod lamang sa usa o duha ka bahin nga daw dili mohaom sa sinugdan. Siya kontento sa paghulat kang Jehova alang sa katin-awan. Apan sa usa ka bahin, si David miingon nga wala niya mapatagbaw ang iyang kaugalingon nianang paagiha. Mihunong gikan sa iyang mga pribilehiyo sa pag-alagad, siya sa ulahi mibiya sa kamatuoran. Unsay hinungdan sa kausaban sa iyang panghunahuna?
Sa pagkamatuod, makasubo ang pagtan-aw niadtong atong gimahal nga mohunong sa lumba sa kinabuhi. Sa walay duhaduha, atong buhaton ang atong labing maarangan sa pagtabang kanila. (2 Corinto 12:15; Galacia 5:7) Apan unsa gayoy nagpahimo sa usa ka tawo sa pagkaluya gikan sa kamatuoran? Unsay mahimo aron matabangan ang maong mga tawo sa pagbalik sa lumba? Ug unsay angay buhaton sa usa ka tawo kon kini nga mga tendensiya mosugod sa pag-ugmad diha kaniya?
Kasingkasing, Konsensiya, ug Pagtuo
Dunay usa ka bililhong butang mahitungod niadtong mihunong sa kamatuoran. Ang kadaghanan nila wala mohunong tungod kay wala na sila magtuo sa kamatuoran. Sa kasukwahi, ang kadaghanan nila moingon, “Ako nahibalo nga mao kini ang kamatuoran, apan . . . ” o, “Kon duna may kamatuoran, ako nahibalo nga mao na kini.” Sulod sa ilang mga kasingkasing, daghan kanila nagtuo gihapon nga ang ilang nakat-onan gikan sa Bibliya mao ang kamatuoran. Apan sa usa ka paagi sila mihunong ug nawad-an sa ilang kadasig. Si Santiago miingon: “Patay ang pagtuo nga walay binuhatan.”—Santiago 2:26.
Ang matuod nga pagtuo nag-apil ug labaw pa kay sa pagkabaton sa kahibalo o pagtuo nga dunay laing butang matuod. Inay usa lamang ka palakaw sa hunahuna, nalangkit ang pagtuo sa mahulagwayong kasingkasing, kay ang Bibliya nagsulti kanato: “Pinaagi sa kasingkasing ang usa magatuo alang sa pagkamatarong.” (Roma 10:10) Nan, makataronganon, ang Bibliya nagpunting sa kasingkasing ingong tuboran sa suliran sa dihang ang tawo mosugod sa pagtipas. Sama sa gipasidaan ni Pablo: “Magmatngon kamo, mga igsoon, nga basin dunay usa kaninyo nga magbaton ug daotan ug kulang sa pagtuo nga kasingkasing ug unya mobiya gikan sa buhi nga Diyos.”—Hebreohanon 3:12.
Sa pagpamatuod nga ang kasingkasing dulot nga nalangkit, mamati kita kang Diane, kinsa mibiya. Sa dihang ang kaubang mga Kristohanon misulay sa pagtabang kaniya, siya prangkang miingon, “Dili ako makabalik kang Jehova. Wala ako mahigugma kaniya!” Siya nahibalo nga ang bugtong butang nga makatabang niya sa pagpabiling suod kang Jehova nga Diyos mao ang gugma alang kaniya ingong Persona ug ingong Usa nga takos sa iyang debosyon. Sa pagkamatuod, kining matanga sa gugma ang nagpukaw kaniya sa pagpahinungod sa iyang kinabuhi kang Jehova sa sinugdan. Apan sa usa ka paagi iyang gibati nga wala na kanang maong gugma. Kon wala niana, siya nahibalo nga magpakaaron-ingnon lamang siya kon siya mobalik. Apan sa unsang paagi mawala sa usa ka tawo ang gugma nga niadto dulot nga gibati?
Buweno, naghisgot si Pablo ug usa ka “daotan ug kulang sa pagtuo nga kasingkasing.” Diha sa ubang mga kaso, ang maong kakulang sa pagtuo maoy resulta sa pagtugot sa kasingkasing sa pagkaibog nianang gidili ni Jehova nga Diyos o sa paglapas sa usa ka butang nga iyang gisugo. Busa ang kasingkasing nabahin ug dili na bug-os kang Jehova. Unya, nakamatikod nga ang kurso sa lihok sa usa wala kahimut-i sa Diyos, ang dali nga paagi sa paglikay ug dugang komprontasyon mao ang ‘pagbiya gikan sa buhi nga Diyos.’ (Itandi ang Genesis 3:8-10.) Inay maghinulsol, ang “daotan nga kasingkasing” mopalihok sa usa sa pagpanas kang Jehova ug sa iyang katuyoan gikan sa iyang kinabuhi. Busa ang walay pagtuo nga tawo mohunong sa kamatuoran.
Diha sa ubang mga kaso, inay antuson ang mga tulisok sa konsensiya tungod sa usa ka dalan, pasagdan sa usa ka tawo ang iyang kasingkasing sa mabudhiong pagpalihok kaniya sa pagpangitag kaikyasan sa hunahuna pinaagi sa pagduhaduha, sa pagpangitag sayop, o bisan apostasiya. Kon iyang makombinsir ang iyang kaugalingon nga ang bug-os nga gambalay sa iyang pagtuo sayop, dili na niya bation ang obligasyon sa pagkinabuhi sulod sa mga utlanan niini. Kining mga tawhana nagasalikway sa maayong konsensiya ug ‘nakaagi sa pagkalunod sa ilang pagtuo.’—1 Timoteo 1:19.
Sa pagkamatuod, ang usa ka tawo tingali mohunong sa kamatuoran alang sa ubang katarongan. Apan kon unsa man kana, kanunay nga nalangkit ang kasingkasing niini. Alang niini nga katarongan, tukma gayod sa panahon ang tambag: “Labaw sa tanang butang nga pagaampingan, ampingi ang inyong kasingkasing, kay gikan niini magagula ang mga tuboran sa kinabuhi.”—Proverbio 4:23.
Posible nga Maulian
Ang pagdawat nga ang atong sayop nga mga kiling mao ang gamot sa pagkawala sa atong pagtuo nagkinahanglag kaisog. Apan ang pagbuhat niini mao ang unang lakang paingon sa atong paningkamot nga mabalik ang malig-on nga relasyon kang Jehova. Ang kasinatian ni Steve, usa ka payunir sa Inglaterra, maoy maayong ilustrasyon niining puntoha.
Bisan pa nga si Steve wala gayod mahulog gikan sa kamatuoran, sa usa ka punto misugod siya sa pagbati sa pagkahaw-ang ug kakulang sa pagtuo. Sa dihang mosangyaw siya sa uban, ang iyang mga pulong walay kahulogang pamation sa iyang kaugalingong mga dalunggan. Kon makauban si Steve sa iyang espirituwal nga mga igsoong lalaki ug babaye, mobati siya nga wala sa lugar, nga maorag siya dili usa kanila.
Makapalipay alang kang Steve, siya miila nga ang suliran anaa kaniya. “Wala ako mohimog sayop sa paglain sa akong kaugalingon aron sa pagtul-id sa mga butang, maorag dunay usa ka tuboran sa pagdasig sulod sa dili-hingpit nga unod nga mohatag sa hustong mga tubag,” panumdom pa ni Steve. (Itandi ang Roma 7:18.) Hinunoa, iyang naamgohan nga kinahanglang iyang usisaon ang iyang kasingkasing ug lukahon ang malimbongong mga pangibog nga moagak kaniya palayo sa kamatuoran. Misugod mismo sa pundasyon, siya milihok sa paglig-on pag-usab sa iyang gugma sa Diyos ug pagtuo sa Iyang Pulong. Karon, si Steve malipayong nag-alagad ingong misyonaryo.
Kon sa Unsang Paagi Makatabang ang Uban
Dili tanan niadtong kinsa nawad-an o nagakawala sa iyang paghawid sa kamatuoran makakita sa mga butang nga matin-aw sama kang Steve. Sa pagkamatuod, kasagaran ang pagkawala sa tin-awng espirituwal nga panan-awon ang motultol sa kataposang pagkapukan. Niining bahina makatabang ang kaubang mga Kristohanon. (Roma 15:1; Galacia 6:1) Apan sa unsang paagi kini himoon sa labing maayo?
Sa dayag, dili igo ang pagdapit o pagdasig niining matanga sa tawo sa pagbalik. Ang mga babag kinahanglang mahibaloan ug mawala. Kinahanglang himoon ang mga paningkamot sa pagdani sa kasingkasing sa naluya o dili-aktibong mga indibiduwal. Ang prangka, apan maluluton, kinasingkasing nga panaghisgot tingali makatabang sa tawo. Ang paggamit sa kasulatan sama sa 1 Timoteo 1:19, Hebreohanon 3:12, ug Jeremias 17:9, 10 hayan makatabang niya sa pagsusi sa kinailadman sa iyang kasingkasing ug sa pagtan-aw kon unsay nagtukmod kaniya sa ‘pagbiya gikan sa buhi nga Diyos.’
Sa dihang mahibaloan ang mga hinungdan, ang mga paningkamot kinahanglang isentro sa pag-atubang niini. Ang masakiton sa pisikal nga kasingkasing nagkinahanglag pag-atiman ug tingali masakit nga operasyon aron mabuhi ang pasyente. Ingon usab niini ang usa ka masakiton mahulagwayong kasingkasing. Ang daotan nga mga pangibog, mga kiling sa pagkinaugalingon, o ubang mga butang nga nagpahimo sa kasingkasing nga maduhaduhaon kinahanglang wad-on aron kini mahimong masanongon pag-usab. Ang aktibong mga Kristohanon mahimong makaampo uban sa dili-aktibong tawo, bisan ang pagtuon sa Bibliya uban niya kon nakita sa mga ansiano nga kini maayo. Sa mao lamang nga paagi maulian ang kasingkasing ug ang indibiduwal modangat sa paghigugma kang Jehova pag-usab.—Provebio 2:1-5.
Tinuod kini sa kaso ni Diane. Ang panagsulti uban sa hamtong nga mga Kristohanon nakatabang niya sa pag-ila kon unsay iyang kinahanglang buhaton aron mapukaw pag-usab ang iyang gugma alang kang Jehova. Nakaamgo nga siya kinahanglan makaila nga suod kang Jehova pag-usab, gidawat ni Diane ang tabang nga gitanyag. Human nagtuon sa Bibliya sa usa ka tuig, siya ug ang iyang bana nahimong aktibo nga mga magdadayeg ni Jehova pag-usab.
Sanglit ang gugma nag-apil ug aksiyon, kasagaran ang pagbuhat sa gipamulong ni Jehova ug sa pagsinati sa iyang mahigugmaong tabang ang nakitang labing epektibo. Oo, ang kalihokan makatabang sa usa ka tawo nga mabalikan pag-usab sa gugma nga nakapalihok sa iyang kasingkasing niadto. (Salmo 34:8) Kini mahimong magsugod pinaagi sa paghimog aktibong mga lakang sa pakig-away sa daotang mga pangibog o sa pagtul-id sa dili-maayong mga kiling sa kasingkasing. Ang matag kadaogan niini nga pakig-away maoy usa ka lakang nga mas mapaduol ang kasingkasing balik kang Jehova. (Proverbio 23:26; 1 Pedro 2:1-3) Sa dihang madaog ang kasingkasing, ang pangibog motubo sa pag-ambit kon unsa ang anaa sa uban. Busa, sa dihang mahimong kuwalipikado ang dili-aktibo nga mga magmamantala sa Gingharian niadto, sila kinahanglan tabangan aron makaambit sa buluhaton sa pagwali, kay “pinaagi sa kasingkasing ang usa magatuo alang sa pagkamatarong, apan siya magasugid sa katilingban pinaagi sa baba alang sa kaluwasan.”—Roma 10:10.
Alang kang bisan kinsa nga mibati nga sila wala na mahigugma kang Jehova, ang dalan balik sa diyosnong kinabuhi taas ug malisod. Apan, ang espirituwal nga pagkaayo ni Steve ug Diane maoy pamatuod nga ang kausaban sa kasingkasing mahitabo. Oo, ang pagpasig-uli mahimong posible pinaagi sa paglihok sa espiritu ni Jehova, sa pagpadapat sa iyang Pulong, ug sa nabag-ong kooperasyon uban sa iyang organisasyon. Maoy among sinserong paglaom ug pag-ampo nga kining matanga sa tawo matabangan sa pagkalipay pag-usab sa pagsimba kang Jehova ug sa balaang pag-alagad sama niadtong kinsa bug-os nahigugma kang Jehova.—Marcos 12:30; 1 Corinto 13:8; 3 Juan 1-4.