Nagsakit Ka ba Tungod sa Pagpangamas nga Masapian?
KON pananglitan mahimo kang dato kaayo ugma, unsay imong himoon? Magrelaks-relaks ug maglipaylipay? Moundang sa imong trabaho ug mogugol ug mas daghang panahon uban sa imong pamilya ug mga higala? Sugdan ang usa ka karera nga gusto kaayo nimo? Sa tinuod lang, dili mohimo ug ingon niana ang daghang tawo nga nadato. Ila hinuong gigugol ang ilang tibuok kinabuhi sa pagpangitag dugang nga salapi—tingali aron mabayran ang ilang bag-ong mga utang o kaha aron mas modato pa.
Apan ang ubang naningkamot nga masapian nakamatikod sa daotang epekto sa materyalismo diha sa ilang panglawas, sa ilang pamilya, ug sa kinaiya sa ilang mga anak. Dili pa dugay, dunay mga libro, mga artikulo, programa sa telebisyon, ug mga video nga nagpasidaan batok sa pagpatuyang ug nagpasiugda hinuon sa pagpasimple sa kinabuhi. Ubay-ubayng mga reperensiya nag-ingon nga ang pagkalinga sa pagpangagpas ug materyal nga mga butang makahatag kanimog sakit—sa mental, emosyonal, ug bisan sa pisikal.
Sa pagkatinuod, dugay na nga may mga pasidaan nga gihatag maylabot sa mga kapeligrohan sa materyalismo. Halos 2,000 ka tuig kanhi ang Bibliya nag-ingon: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan. Kay ang gugma sa salapi maoy gamot sa tanang matang sa makadaot nga mga butang, ug tungod sa pagpangab-ot niini nga gugma ang pipila nahisalaag gikan sa pagtuo ug nagtusaktusak sa ilang kaugalingon sa daghang kasakitan.”—1 Timoteo 6:9, 10.
Apan tinuod ba kana? Mag-antos ba gayod ang mga tawo kon ilang himoong pangunang tumong sa kinabuhi ang pagbaton ug salapi ug materyal nga mga butang? O basin ang tanan naangkon na nila—bahandi, maayong panglawas, ug malipayong pamilya? Atong tan-awon.