Kini nga tagna natuman gayod. Daghang tawo karon ang nagpokus lang sa ilang kaugalingon, sa kon unsa kunoy makahatag nilag kaayohan, katagbawan, kalamposan, ug uban pa. Kini nga mga kinaiya komon kaayo ug nagkagrabe karon. Daghang tawo ang taas ug panglantaw sa ilang kaugalingon mao nga sila “walay gugma sa pagkamaayo,” buot pasabot, walay pagpabili sa maayong mga hiyas. Sila “dili mapasalamaton” ug gibati nila nga dili na sila kinahanglang magpasalamat sa kon unsay ilang nabatonan o sa gibuhat sa uban para nila.—2 Timoteo 3:2, 3.

• Mabutangbutangon. Bisag asa dunay “mapasipalahon” ug “tigbutangbutang.” (2 Timoteo 3:2, 3, footnote) Kini nga mga ekspresyon nagtumong niadtong nanginsulto sa ubang tawo o sa Diyos o nagsultig bakak bahin kanila.

• Gahig ulo. Daghan ang “dili maunongon,” “dili ikasabot,” “traydor,” ug “gahig ulo.” (2 Timoteo 3:2-4) Sila dili makigsabot, dili makigkooperar sa pagsulbad sa problema, o dili motuman sa mga kasabotan.

• Bayolente. Daghan karon ang “bayolente” ug putong, nga sagad moresultag pintas kaayo nga mga buhat.—2 Timoteo 3:3.

• Walay gugma sa pamilya. Tungod kay daghan kaayo ang “dili masinugtanon sa ginikanan” ug “walay pagmahal sa [pamilya],” midaghan ang membro sa pamilya nga napasagdan, giabusohan, ug gimaltratar.—2 Timoteo 3:2, 3.