Pag-abot sa mga Kasingkasing Pinaagi sa Arte sa Pagdani

DAGHANG tawo mag-isip sa pulong nga “pagdani” uban ang katahap. Mahimong mosantop sa hunahuna sa usa ang usa ka agresibo nga tigbaligya o usa ka panganunsiyo nga gidisenyo aron sa paglimbong o pagkontrolar sa tigkonsumo. Bisan diha sa Bibliya, ang ideya sa pagdani usahay adunay dili-maayong mga kahulogan, nga nagpasabot ug pagdaot o pagpahisalaag. Pananglitan, ang Kristohanong apostol Pablo misulat sa mga taga-Galacia: “Maayo ang inyong pagdagan. Kinsa ang nagbabag kaninyo sa pagpadayon sa pagsunod sa kamatuoran? Kining matanga sa pagpangdani dili gikan sa Usa nga nagatawag kaninyo.” (Galacia 5:​7, 8) Gipasidan-an usab ni Pablo ang mga taga-Colosas batok sa pagtugot kang bisan kinsa nga ‘molingla kanila pinaagi sa makapadaning mga argumento.’ (Colosas 2:4) Ang maong pagdani nagdepende sa inabtik nga mga argumento nga gitukod diha sa bakak nga mga patukoranan.

Apan, sa iyang ikaduhang sulat ngadto kang Timoteo, si apostol Pablo migamit sa ideya sa pagdani sa laing diwa. Siya misulat: ‘Padayon sa mga butang nga imong nakat-onan ug nakapadani kanimo sa pagtuo, nga nahibalo kon gikan sa unsa nga mga tawo ikaw nakakat-on niini nila.’ (2 Timoteo 3:14) Sa ‘pagkanadani sa pagtuo,’ si Timoteo wala kontrolaha sa iyang inahan ug sa iyang apohang babaye, nga pinaagi kang kinsa iyang nakat-onan ang mga kamatuoran sa Kasulatan.​—2 Timoteo 1:5.a

Bisan tuod nabilanggo diha sa balay sa Roma, si Pablo bug-os nga nagsangyaw ngadto sa daghan, ‘nga naggamit ug pagdani kanila mahitungod kang Jesus gikan sa balaod ni Moises ug ingon man sa mga Propeta, sukad sa buntag hangtod sa gabii.’ (Buhat 28:23) Gilimbongan ba ni Pablo ang iyang mamiminaw? Wala gayod! Nan, tin-aw, ang pagdani dili kanunayng daotan.

Gigamit sa positibong diwa, ang Gregong lintunganayng pulong nga gihubad ug “dani” nagkahulogang pagkombinsir, pagpahinabog kausaban sa hunahuna pinaagi sa maayo, lohikong pangatarongan. Ang usa ka magtutudlo sa ingon makatukod diha sa usa ka Kasulatanhong patukoranan, nga maggamit sa pagdani aron sa pagpasilsil diha sa uban ug hugot nga pagtuo sa kamatuoran sa Bibliya. (2 Timoteo 2:15) Sa pagkatinuod, kini maoy ilhanan sa ministeryo ni Pablo. Bisan si Demetrio nga platero, nga nag-isip sa Kristohanong mga pagtulon-an nga bakak, nag-ingon: ‘Dili lamang sa Efeso kondili halos sa tanang distrito sa Asia kini nga Pablo nakadani ug dakodakong panon sa katawhan ug nagpaliso kanila ngadto sa laing opinyon, nga nag-ingon nga ang mga hinimog mga kamot dili mga diyos.’​—Buhat 19:26.

Paggamit ug Pagdani Diha sa Ministeryo

Gisugo ni Jesu-Kristo ang iyang mga sumusunod: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo. Ug, tan-awa! ako uban kaninyo sa tanang mga adlaw hangtod sa katiklopan sa sistema sa mga butang.” (Mateo 28:​19, 20) Sa kapin sa 230 ka kayutaan, ang mga Saksi ni Jehova nagtuman niining sugoa. Kada bulan sulod sa ilang 1997 nga tuig sa pag-alagad, sila nagdumala sa aberids nga 4,552,589 ka panagtuon sa Bibliya sa balay sa tibuok kalibotan.

Kon ikaw nakapribilehiyo sa pagdumala ug panagtuon sa Bibliya sa balay, mahimong makadahom ka ug mga suliran nga magkinahanglang gamiton ang arte sa pagdani. Pananglitan, ibutang ta nga sa imong sunod nga sesyon sa pagtuon, usa ka pangutana ang motungha mahitungod sa Trinidad. Komosta kon imong mahibaloan nga ang imong gitun-an nagtuo niining doktrinaha? Mahimong hatagan nimo siya ug usa ka publikasyon nga naghisgot nianang ulohana. Human niya mabasa kana, basin makaplagan nimo nga nadani siya nga ang Diyos ug si Jesus dili managsama. Apan kon ang pipila ka pangutana magpabilin, unsaon nimo pagpadayon?

Paminaw pag-ayo. Kini motabang kanimo sa pagtino kon unsa nay gituohan sa imong estudyante bahin sa gihisgotan nga ulohan. Pananglitan, kon ang imong estudyante moingon, “Nagtuo ako sa Trinidad,” ikaw makasugod dayon ug panaghisgot sa Kasulatan aron sa pagpanghimakak niining doktrinaha. Apan adunay nagkalainlaing mga pagtuo bahin sa Trinidad. Mahimong lahi kaayo ang gituohan sa imong estudyante sa imong paghubit sa doktrina sa Trinidad. Ang susama ikaingon bahin sa ubang mga pagtulon-an, sama sa reinkarnasyon, pagkadili-mamatay sa kalag, ug kaluwasan. Busa paminaw pag-ayo una mosulti. Ayawg hunahunaang nakahibalo ka na kon unsay gituohan sa estudyante.​—Proverbio 18:13.

Pagpatunghag mga pangutana. Kini mahimong maglakip sa: ‘Kanunay ka bang nagtuo sa Trinidad? Nakahimo ka na ba sukad ug bug-os nga pagtuon bahin sa kon unsay giingon sa Bibliya mahitungod niining ulohana? Kon ang Diyos bahin sa usa ka trinidad, dili ba ang iyang Pulong, ang Bibliya, tin-aw ug laktod nga magtug-an kanato bahin niana?’ Sa pagtudlo sa estudyante, matag karon ug unya hunong aron sa pagpatungha ug mga pangutana sama sa: ‘Ang ato bang nakobrehan na makataronganon alang kanimo?’ ‘Mouyon ka ba niini nga katin-awan?’ Pinaagi sa imong batid nga paggamit sa mga pangutana, imong gilangkit ang estudyante sa proseso sa pagkat-on. Kinahanglang dili siya mamati lamang kanimo nga nagsaysay sa ulohan.

Gamit ug maayong pangatarongan. Pananglitan, sa paghisgot sa doktrina sa Trinidad makaingon ka sa imong estudyante: ‘Sa dihang nabawtismohan si Jesus, usa ka tingog gikan sa langit ang nag-ingon: “Ikaw mao ang akong Anak, ang hinigugma.” Kon ang Diyos tinuod pa nga dinhi sa yuta nga gibawtismohan, iya bang ipatugbaw ang iyang tingog ngadto sa langit ug pabandahon aron nga kadtong mga pulonga madungog dinhi sa yuta? Dili ba makapahisalaag kana? Ang Diyos ba, “kinsa dili makabakak,” mohimo sa maong malimbongong buhat?’​—Lucas 3:​21, 22; Tito 1:​1, 2.

Ang maayong pangatarongan nga gipresentar diha sa mataktikanhong paagi kasagarang epektibo kaayo. Tagda ang pananglitan sa usa ka babaye nga atong tawgong Barbara. Sa tibuok niyang kinabuhi, nagtuo siya nga si Jesus mao ang Diyos ug bahin sa usa ka trinidad nga naglakip sa balaang espiritu. Apan unya giingnan siya sa usa sa mga Saksi ni Jehova nga ang Diyos ug si Jesus maoy duha ka lahing mga indibiduwal, ug gipakitaan niya siya ug mga kasulatan aron sa pagsuportar sa iyang giingon.b Si Barbara dili makapanghimakak sa Bibliya. Sa samang panahon, nahigawad siya. Siyempre, gimahal niya ang doktrina sa Trinidad.

Ang Saksi mapailobong nangatarongan kang Barbara. “Kon naningkamot ka sa pagtudlo kanako nga ang duha ka tawo managsama,” siya nangutana, “unsang relasyon sa pamilya ang imong gamiton sa pag-ilustrar niana?” Naghunahuna siya sa makadiyot ug dayon mitubag: “Mahimong gamiton nako ang duha ka managsoong lalaki.” “Husto,” mitubag ang Saksi. “Tingali bisan ang managsama nga kaluha. Apan sa pagtudlo kanato nga isipon ang Diyos ingong ang Amahan ug ang iyang kaugalingon ingong ang Anak, unsang mensahe ang gipasa ni Jesus?” “Akong nasabtan,” mitubag si Barbara, nga nanagko ang iyang mga mata. “Gihubit niya ang usa ingong mas tigulang ug nakabaton ug labawng awtoridad.”

“Oo,” mitubag ang Saksi, “ug ang Hudiyong mga mamiminaw ni Jesus, nga nagkinabuhi sa usa ka patriarkal nga katilingban, ilabinang modangat sa maong konklusyon.” Sa pagpasiugda sa iyang punto, mihinapos ang Saksi: “Kon nakab-ot nato ang maong haom nga ilustrasyon sa pagtudlog pagkamanagsama​—nianang sa mga managsoon o managsamang mga kaluha​—tino nga si Jesus, ang Dakong Magtutudlo, makahimo usab unta niana. Hinunoa, gigamit niya ang mga terminong, ‘amahan’ ug ‘anak’ sa paghubit sa relasyon tali kaniya ug sa Diyos.”

Sa kataposan si Barbara nakasabot, ug gidawat niya kana. Ang iyang kasingkasing naabot pinaagi sa arte sa pagdani.

Pagdumala sa mga Emosyon

Ang lig-ong pagkasukad nga relihiyosong mga pagtulon-an kasagarang maglangkit ug emosyonal nga bahin. Tagda ang kaso ni Edna, usa ka debotadang Katoliko. Ang iyang tin-edyer nga mga apong lalaki nagpresentar kaniya ug tin-aw nga pamatuod gikan sa Kasulatan nga ang Diyos ug si Jesus dili managsamang persona. Nakasabot si Edna sa iyang nadungog. Bisan pa niana, siya maluloton apan hugot nga miingon: “Nagtuo ako sa balaang Trinidad.”

Tingali duna kay susamang kasinatian. Daghan ang nag-isip sa mga doktrina sa ilang relihiyon nga daw kini maoy bahin sa ilang pagkamao. Aron sa pagdani niana nga mga estudyante sa Bibliya, labaw pa ang gikinahanglan kay sa walay dapigdapig nga pangatarongan o bisan usa ka serye sa mga kasulatan nga nagpamatuod sa panglantaw sa usa ka tawo nga sayop. Ang maong mga kahimtang masulbad pinaagi sa pagtimbang sa arte sa pagdani ug pagkamabination. (Itandi ang Roma 12:​15; Colosas 3:12.) Ang tinuod, ang usa ka epektibong magtutudlo kinahanglang adunay hugot nga mga kombiksiyon. Pananglitan, si Pablo naggamit sa mga prase sama sa “Ako kombinsido” ug ‘Ako nahibalo ug ako nadani diha sa Ginoong Jesus.’ (Roma 8:​38; 14:14) Bisan pa niana, sa pagpahayag sa atong mga kombiksiyon, dili nato buhaton kana sa dogmatiko, nagpakamatarong sa kaugalingon nga tono, ni kita magmakantalitahon o mapakaulawon sa pagpresentar sa mga kamatuoran sa Bibliya. Dili gayod nato buot nga masilo o mainsulto pa ang estudyante.​—Proverbio 12:18.

Labi pa kaayong epektibo ang pagtahod sa mga gituohan sa estudyante ug pag-ila sa iyang katungod sa pagbaton niana. Ang pagkamapaubsanon mao ang yawi. Ang usa ka magtutudlo nga adunay mapaubsanong hunahuna dili mobati nga sa kinaiyanhon labaw siya sa iyang estudyante. (Lucas 18:​9-14; Filipos 2:​3, 4) Ang diyosnong pagdani naglakip sa pagkamapaubsanon nga, ingong sangpotanan, nag-ingon: ‘Si Jehova maluluy-ong mitabang kanako sa pagkasabot niini. Ipaambit ko kini kanimo.’

Ngadto sa iyang kaubang mga Kristohanon sa Corinto, si Pablo misulat: “Ang mga hinagiban sa among pagpakiggubat dili unodnon, apan gamhanan pinaagi sa Diyos alang sa pagpamukan sa lig-ong pagkatarok nga mga butang. Kay among ginapamukan ang mga pangatarongan ug ang matag tugbawng butang nga gibangon batok sa kahibalo sa Diyos; ug among ginadala ang tanang hunahuna ngadto sa pagkabihag aron himoon kining masinugtanon sa Kristo.” (2 Corinto 10:​4, 5) Karong adlawa, ang mga Saksi ni Jehova nagagamit sa Pulong sa Diyos sa pagpukan sa lig-ong pagkasukad nga bakak nga mga doktrina maingon man sa nakagamot pag-ayong mga binuhatan ug mga kinaiya nga dili-makapahimuot kaniya. (1 Corinto 6:​9-​11) Sa pagbuhat niini, ang mga Saksi nahinumdom nga si Jehova mahigugmaong nagpailob kanila. Pagkadako sa ilang kalipay nga nakabaton sa iyang Pulong, ang Bibliya, ug naggamit niining gamhanang himan sa pagluka sa bakak nga mga pagtulon-an ug pag-abot sa mga kasingkasing pinaagi sa arte sa pagdani!

[Mga footnote]

[Kahon sa panid 23]

Pag-abot sa Kasingkasing sa Imong Estudyante

◻ Pag-ampo alang sa giya ni Jehova sa pag-abot sa kasingkasing sa estudyante sa Bibliya.​—Nehemias 2:​4, 5; Isaias 50:4.

◻ Sabta kon unsay gituohan sa estudyante ug nganong makaplagan tingali niyang madanihon ang usa ka bakak nga pagtulon-an.​—Buhat 17:​22, 23.

◻ Sa maluloton, mapailobong paagi, pagtukod ug usa ka makataronganon, Kasulatanhong argumento samtang gimentinar ang puntong giuyonan.​—Buhat 17:​24-​34.

◻ Kon mahimo, palig-ona ang mga kamatuoran sa Bibliya pinaagi sa epektibong mga ilustrasyon.​—Marcos 4:​33, 34.

◻ Ipakita sa estudyante ang mga kaayohan sa pagdawat sa tukmang kahibalo gikan sa Bibliya.​—1 Timoteo 2:​3, 4; 2 Timoteo 3:​14, 15.