“Sukad pa sa Pagkagamayng Bata Ikaw Nahibalo Na”

SUMALA sa dili pa dugayng mga pagtuon sa siyensiya, ang pagpakigsultig maayo sa mga bata nag-impluwensiya sa kaugmaran sa ilang mga utok, nagtukod sa ilang katakos sa paghunahuna, pangatarongan, ug pagsulbad sa mga suliran. Kini maoy kahimtang ilabina sa unang tuig sa kinabuhi sa bata. Ang International Herald Tribune nagtaho nga ang pila ka mga tigdukiduki karon nagtuo nga “ang gidaghanon sa mga pulong nga madungog sa bata kada adlaw maoy bugtong labing hinungdanong magtatag-an sa umaabot nga intelihensiya, kalamposan sa tunghaan ug sosyal nga kahanas.”

Apan, ang gisulting mga pulong kinahanglang nagagikan sa usa ka tawo. Mopatim-aw nga ang telebisyon o radyo dili gayod mahimong kapuli.

Nag-ingon ang siyentipiko sa utok sa University of Washington sa Seattle, T.B.A.: “Kita nahibalo na karon nga ang mga koneksiyon sa utok naporma nga sayo kaayo sa kinabuhi ug nga ang utok sa bata sa literal nagpaabot sa mga kasinatian aron matino kon sa unsang paagi nahimo ang mga koneksiyon. Kita wala mahibalo hangtod niining bag-o lamang kon unsa ka sayo magsugod kini nga proseso. Pananglitan, ang mga bata nakakat-on sa mga tingog sa ilang lumad nga pinulongan sa edad nga unom ka bulan.”

Gisaway sa panukiduki ang kaylap nga hunahuna nga ang mga bata molambo sa intelektuwal nga paagi kon sila yanong pakitaag tugob nga gugma. Kini usab nagpasiugda sa kahinungdanon sa mga ginikanan sa kaugmaran diha sa bata.

Kini magpahinumdom sa mga pulong sa dinasig nga sulat ni apostol Pablo ngadto kang Timoteo: “Sukad pa sa pagkagamayng bata ikaw nahibalo na sa balaang mga sinulat, nga makapahimo kanimong maalamon alang sa kaluwasan.” Lagmit nga ang balaang mga sinulat, nga gisulti ngadto sa batang si Timoteo pinaagi sa iyang magtutuong inahan ug apohan nga babaye, nagdulag hinungdanong papel sa iyang kaugmaran ingong talagsaong alagad sa Diyos.​—2 Timoteo 1:​5; 3:15.