GANGRENA

Ang pagkamatay sa mga tisyu sa usa ka bahin sa lawas, sama sa usa ka tudlo sa tiil o sa tiil mismo, tungod sa baradong sirkulasyon sa dugo. Sa uga nga gangrena, diin ang mga arteriya barado o nasampongan (sama pananglitan sa arteriosclerosis), ang apektadong bahin moitom ug mouga ug dili na mobati. Ang basa nga gangrena kasagarang makaapektar sa gagmay kaayong mga ugat sa dugo​—sa mga kapilarya ug sa gagmayng kaugatan. Sa gas o hangin nga gangrena, ang mga bakterya nga anaa sa patay o himalatyon nga tisyu tingali magpormag mga bulabula sa ilalom sa panit, nga mosangpot sa daling pagkahup-ak sa mga tisyu. Tungod kay ang mga bakterya kasagarang nalangkit sa gangrena, ang moresultang impeksiyon sagad nga kusog magpakanap sa pagkamatay sa mga selula. Kon ang mga bakterya mokanap nganha sa dugo, mograbe pa ang kahimtang, nga mopahinabog kamatayon gawas kon matambalan dayon sa hustong paagi.

Gigamit ni apostol Pablo kini nga pulong sa mahulagwayong paagi bahin sa pagtulon-an sa bakak nga doktrina ug sa “mga sulting walay-pulos nga nagpasipala kon unsay balaan.” Iyang gipasiugda ang kapeligrohan nga ikapahinabo sa maong mga pulong ngadto sa tibuok kongregasyon, nga nag-ingon: “Kay sila mosamot pa gayod pagkadili-diyosnon, ug ang ilang pulong mokanap samag gangrena.” Dayon siya naghatag ug mga pananglitan: “Apil kanila si Himeneo ug si Fileto. Kining mga tawhana mismo mitipas gikan sa kamatuoran, nga nag-ingon nga ang pagkabanhaw nahitabo na; ug ilang gidaot ang pagtuo sa pipila.” (2Ti 2:16-18) Tungod sa nahaunang simbolismo nga gihatag ni Pablo, nga naghulagway sa kongregasyon ingong usa ka lawas nga may daghang sangkap​—mga tiil, kamot, ug uban pa (1Co 12)​—ang iyang mahulagwayong paggamit sa gangrena, nga nagpahinabog kapeligrohan sa lawas sa tawo, kusganong nagpasiugda sa kahinungdanon sa paghanaw sa bakak nga doktrina ug sa dili-diyosnong sinultihan gikan sa Kristohanong kongregasyon.