Mga Pangutana Gikan sa mga Magbabasa
◼ Nganong ang mga Saksi ni Jehova nagapalagpot (nagaekskomunikar) tungod sa apostasiya sa pila ka tawo nga nagaangkon gihapong may pagtuo sa Diyos, sa Bibliya, ug kang Jesu-Kristo?
Kadtong nagapahayag sa maong pagsupak nagapunting nga daghang relihiyosong organisasyong nagaangkong Kristohanon nagatugot sa rebelyosong mga pagtuo. Bisan ang pila ka klerigo nagasupak sa paninugdang mga pagtulon-an sa ilang simbahan, apan sila nagapabiling maayog baroganan. Diha sa halos tanang denominasyon sa Kakristiyanohan, adunay mga makimoderno ug mga pundamentalista, kinsa nagasupak ug dako sa usag usa bahin sa pagkadinasig sa Kasulatan.
Ugaling, ang maong mga pananglitan wala maghatag ug mga hinungdan nga atong buhaton ang sama. Ngano man? Daghan sa maong mga denominasyon nagatugot sa nagkalain kaayong mga pagtuo taliwala sa klero ug ginsakpan kay ilang gibating sila dili makatino kon unsa gayod ang kamatuoran sa Bibliya. Sila nahisama sa mga eskriba ug mga Pariseo sa adlaw ni Jesus nga wala makapahayag ingong mga tawong may awtoridad, nga mao ang paagi sa pagtudlo ni Jesus. (Mateo 7:29) Dugang pa, sa gidak-ong ang mga relihiyonista nagtuo sa sagol nga mga pagtuo (interfaith), sila obligadong dili isipong seryoso ang nagkalaing mga pagtuo.
Apan ang pagbaton sa maong pagtuo walay pasikaranan diha sa Kasulatan. Si Jesus wala makighiusa sa usa ka kawsa uban sa bisan unsang sekta sa Judaismo. Ang mga Hudiyong sakop niadtong mga sektaha nag-angkong nagtuo sa Diyos nga maglalalang ug sa Hebreohanong Kasulatan, ilabina ang Kasugoan ni Moises. Bisan pa niana, giingnan ni Jesus ang iyang mga tinun-an nga “pagbantay kamo . . . sa pagtulon-an sa mga Pariseo ug mga Saduseo.” (Mateo 16:11, 12; 23:15) Matikdi unsa ka kusganon ang pagpahayag ni apostol Pablo bahin niana: “Bisan pag kami o usa ka manulonda gikan sa langit magpahayag kaninyo ingong maayong balita sa butang lapas sa among gipahayag kaninyo ingong maayong balita, ipatunglo siya.” Unya gisubli ni Pablo ang maong pamahayag alang sa pasiugda.—Galacia 1:8, 9.
Ang pagtudlog masupakon o laing mga pagtuo dili uyon sa matuod nga Kristiyanidad, kay si Pablo nagtin-aw sa 1 Corinto 1:10: “Ako nagahangyo kaninyo, mga igsoon, sa ngalan sa atong Ginoong Jesu-Kristo, nga kamong tanan magkauyon sa usag usa aron walay pagkabahinbahin sa inyong taliwala ug kamo sa hingpit magkahiusa sa kaisipan ug hunahuna.” (New International Version) Sa Efeso 4:3-6 siya dugang mipahayag nga ang mga Kristohanon angay nga “maikagong maningkamot sa pagbantay sa pagkausa sa espiritu diha sa nagapahiusang bugkos sa pakigdait. Adunay usa ka lawas, ug usa ka espiritu, maingon nga kamo gitawag sa usa ka paglaom; usa ka Ginoo, usa ka pagtuo, usa ka bawtismo; usa ka Diyos ug Amahan sa tanang tawo.”
Kining panaghiusaha nakab-ot ug nahuptan ba pinaagi sa independenteng pagsusi sa matag usa sa Kasulatan, nga mahidangat sa kaugalingon niyang mga konklusyon, ug dayon pagtudlo niana? Dili gayod! Alang sa maong katuyoan gitagana ni Jehova nga Diyos pinaagi ni Jesu-Kristo “ang pipila ingong mga apostol, ang pipila ingong mga ebanghelista, ang pipila ingong mga magbalantay ug mga magtutudlo . . . hangtod kitang tanan makakab-ot sa pagkausa sa pagtuo ug sa tukmang kahibalo sa Anak sa Diyos, ngadto sa bug-os nga pagkahamtong nga tawo.” Oo, sa tabang sa maong mga ministro, ang panaghiusa sa kongregasyon—pagkausa sa pagtudlo ug buluhaton—maposible.—Efeso 4:11-13.
Dayag, ang pasikaranan sa inuyonang pagpakig-uban sa mga Saksi ni Jehova yanong dili ikasandig sa pagtuo sa Diyos, sa Bibliya, kang Jesu-Kristo, ug sa uban pa. Ang Romano Katolikong papa, ingon man ang Anglikanong Arsobispo sa Canterbury, nag-angkon sa maong mga pagtuo, apan ang ilang mga sakop sa iglesya wala mag-apil sa usag usa. Sa samang paagi, ang yanong pag-angkon sa maong mga pagtuo dili mag-awtorisar sa usa nga mailhang usa sa mga Saksi ni Jehova.
Ang aprobadong pakig-uban sa mga Saksi ni Jehova nagkinahanglan sa pagtuo sa kabug-osan sa matuod nga mga pagtulon-an sa Bibliya, apil ang Kasulatanhong mga pagtuo nga linain sa mga Saksi ni Jehova. Unsay nahiapil sa maong mga pagtuo?
Nga ang dakong isyu atubangan sa katawhan mao ang pagkamatarong sa pagkasoberano ni Jehova, nga kana ang hinungdang iyang gitugotan ang pagkadaotan sa dugay kaayong panahon. (Ezekiel 25:17) Nga si Jesu-Kristo may una-tawhanong paglungtad ug maoy ubos sa iyang langitnong Amahan. (Juan 14:28) Nga adunay usa ka “matinumanon ug maalamong ulipon” ibabaw sa yuta karong adlawa ‘nga gisaligan sa tanang yutan-ong intereses ni Jesus,’ nga ang maong ulipon nakig-uban sa Nagamandong Lawas sa mga Saksi ni Jehova. (Mateo 24:45-47) Nga ang 1914 nagtimaan sa kataposan sa Hentil nga mga Panahon ug sa pagkatukod sa Gingharian sa Diyos sa mga langit, ingon man sa panahon sa gitagnang presensiya ni Kristo. (Lucas 21:7-24; Pinadayag 11:15–12:10) Nga 144,000 lamang ka Kristohanon ang magadawat sa langitnong ganti. (Pinadayag 14:1, 3) Nga ang Armageddon, nga nagatumong sa gubat sa dakong adlaw sa Diyos nga Makagagahom sa Tanan, haduol na. (Pinadayag 16:14, 16; 19:11-21) Nga kini sundan sa Milenyong Pagmando ni Kristo, nga maoy magpasig-uli sa tibuok-yutang paraiso. Nga ang unang magpahimulos mao unya ang “dakong panon” karon sa “ubang mga karnero” ni Jesus.—Juan 10:16; Pinadayag 7:9-17; 21:3, 4.
Kita ba may Kasulatanhong pasikaranan sa pagbaton nianang estriktong baroganan? Duna gayod! Si Pablo misulat mahitungod sa pipila sa iyang adlaw: “Ang ilang pulong mokaylap sama sa gangrena. Si Himeneo ug si Pileto apil kanila. Kining mga tawhana mismo mibulag sa kamatuoran, nga nag-ingong nahitabo na ang pagkabanhaw; ug sila nagadaot sa pagtuo sa pipila.” (2 Timoteo 2:17, 18; tan-awa usab ang Mateo 18:6.) Walay nagapailang kining mga tawhana wala magtuo sa Diyos, sa Bibliya, sa halad ni Jesus. Apan, sa maong paninugdang punto, ang ilang gitudlo bahin sa panahon sa pagkabanhaw, tukmang gitawag sila ni Pablo nga mga apostata o mibulag sa pagtuo, nga kanila ang matinumanong mga Kristohanon dili makig-uban.
Sa susama, ginganlan ni apostol Juan nga mga antikristo kadtong wala magtuo nga si Jesus mianhi sa unod. Sila mahimong nagtuo sa Diyos, sa Hebreohanong Kasulatan, kang Jesus ingong Anak sa Diyos, ug padayon. Apan sa maong punto, nga si Jesus mianhi gayod sa unod, sila misupak ug sa ingon gitawag “antikristo.” Si Juan mipadayon sa pag-ingon mahitungod niadtong nagbaton nianang lahing mga pagtuo: “Kon may moanha kaninyo ug dili magdala niini nga pagtulon-an, ayaw gayod ninyo siya dawata sa inyong mga balay o timbayaa siya. Kay siya nga magatimbaya kaniya maoy umalambit sa iyang daotang mga buhat.”—2 Juan 7, 10, 11.
Sa pagsunod sa maong Kasulatanhong mga sumbanan, kon ang Kristohanon (nga nagaangkong nagtuo sa Diyos, sa Bibliya, ug kang Jesus) sa pagkadili-mahinulsolon nagapasiugda sa bakak nga mga pagtulon-an, kinahanglan tingaling siya palagpoton gikan sa kongregasyon. (Tan-awa ang Tito 3:10, 11.) Hinuon, kon ang usa ka tawo may mga pagduhaduha lamang o wala masayod sa usa ka punto, ang may-katakos nga mga ministro mahigugmaong magtabang kaniya. Kini nahiuyon sa tambag: “Magpadayon kamo sa pagpakitag kaluoy sa pipila nga may mga pagduhaduha; luwasa sila pinaagi sa pagsakmit kanila gikan sa kalayo.” (Judas 22, 23) Busa, ang matuod Kristohanong kongregasyon sa tukma dili ikasumbong nga dogmatiko nga may pagkamapintas, kondili kini nagapabili kaayo ug nagabuhat alang sa panaghiusa nga gidasig diha sa Pulong sa Diyos.