Mga Batan-on Nangutana . . .

Sa Unsang Paagi Ako Makalikay sa Pagpakigsuod sa Kuwestiyonableng mga Tawo?

“Nagsugod ako sa pagkuyog-kuyog sa usa ka batan-ong babaye sa eskuylahan. . . . Siya dili magdroga, dili moapil sa mapatuyangong mga parti, ug dili imoral. Dili gani siya mamalikas, ug taas kaayo ang iyang mga grado. Apan dili gayod maayong makighugoyhugoy kaniya kay daotan siya nga impluwensiya.”​—Beverly.a

NGANONG nasulti man ni Beverly ang mga pulong sa ibabaw? Namatikdan man god niya nga giimpluwensiyahan siya niining babayhana sa pag-apil-apil sa dili-maayong mga kalihokan. “Sa tanto nakong uban-uban niya,” matod ni Beverly, “naimpluwensiyahan na sab ako sa pagbasa ug mga libro sa espiritismo, ug misulat pa gani ako ug estorya bahin niini.”

Usa ka batan-ong ginganlag Melanie nadaldal usab sa daotang paggawi​—apan tungod sa usa nga nag-angkong isigka-Kristohanon! Unsaon man nimo pagkahibalo kon maayong kauban ang usa ka tawo? Kanunay bang peligroso ang pagpakigsuod sa mga dili-magtutuo? Ang panaghigalaay ba sa parehas nga mga Kristohanon kanunayng dili makadaot?

Komosta ilabina ang pagpakighigala sa kaatbang nga sekso? Kon ikaw adunay naibgan nga gusto tingali nimong minyoan sa ulahi, unsaon man nimo pagkahibalo kon ang inyong relasyon may maayo unyang epekto sa inyong espirituwalidad? Atong tan-awon kon sa unsang paagi makatabang ang mga prinsipyo sa Bibliya sa pagtubag niining mga pangutanaha.

Unsang Matanga sa mga Tawo ang Maisip nga Maayong mga Higala?

Angay ba nga managana si Beverly sa pagpakighigala sa iyang eskolmet tungod kay siya dili magsisimba sa matuod nga Diyos? Tinuod, ang matuod nga mga Kristohanon dili maghunahuna nga ang usa ka tawo malaw-ay ug kinabuhi o imoral tungod lang kay siya dili isigkamagtutuo. Apan kon bahin na sa pagpakigsuod, aduna gayoy katarongan nga magbantay. Si apostol Pablo nagpasidaan sa unang-siglong kongregasyon sa Corinto: “Ang daotang mga kauban makadaot ug batasan.” (1 Corinto 15:​33, The Bible​—An American Translation) Unsay iyang gipasabot?

Ang pipila ka mga Kristohanon sa Corinto lagmit nakig-uban sa mga Epicureo, nga mga sumusunod sa Gregong pilosopo nga si Epicurus. Tinuod, gitudloan ni Epicurus ang iyang mga sumusunod nga magmabuot, magmaisogon, magmapugnganon sa kaugalingon, ug magmakataronganon. Gisultihan pa gani niya sila sa paglikay sa paghimog daotang buhat sa tago. Busa nganong giisip man ni Pablo ang mga Epicureo, ug bisan kadtong mga membro sa kongregasyon nga may samang hunahuna, ingong “daotang mga kauban”?

Ang mga Epicureo wala magsimba sa matuod nga Diyos. Kay dili man sila motuo sa pagkabanhaw sa mga patay, ang ilang gihatagag pagtagad mao ang pagpahimulos sa bug-os sa ilang presenteng kinabuhi. (Buhat 17:​18, 19, 32) Busa, dili ikatingala nga tungod sa pagpakighugoyhugoy uban nianang mga tawhana, ang pipila diha sa kongregasyon sa Corinto dili na motuo sa pagkabanhaw. Maoy hinungdan nga ang 1 Corinto kapitulo 15​—diin atong mabasa ang pasidaan ni Pablo batok sa daotang pagpakig-uban​—naundan ug daghang pangatarongan nga gituyo aron makombinsir pag-usab ang unang mga Kristohanon nga tinuod ang paglaom sa pagkabanhaw.

Ang punto? Bisan ang mga tawong dili diyosnon nagpasundayag ug maayong mga kinaiya. Apan kon mopili ka sa pagpakigsuod kanila, ang imong panghunahuna, pagtuo, ug paggawi maimpluwensiyahan. Busa, diha sa iyang ikaduhang sulat ngadto sa mga taga-Corinto, si Pablo nag-ingon: “Ayaw pagpayugo nga dili timbang sa mga dili-magtutuo.”​—2 Corinto 6:14-18.

Si Fred, nga nag-edad ug 16, nakakat-on sa pagkamaalamon sa mga pulong ni Pablo. Sa sinugdanan misugot siya sa pag-apil sa ekstrakurikular nga kalihokan sa eskuylahan nga mao ang pag-adto sa usa ka kabos nga nasod aron makatabang sa pagtudlo sa mga bata didto. Apan, nausab ang hunahuna ni Fred samtang nangandam sila sa iyang mga kaubang estudyante. Siya miingon: “Akong nakita nga makadaot sa akong espirituwalidad ang paggugol ug daghan kaayong panahon uban kanila.” Tungod niini si Fred wala na moapil sa proyekto ug midesidir sa pagtabang sa pagtudlo sa mga tawo sa laing mga paagi.

Panaghigalaay Taliwala sa mga Isigka-Kristohanon

Apan, komosta ang panaghigalaay sa sulod sa Kristohanong kongregasyon? Sa dihang iyang gisulatan ang batan-ong si Timoteo, si Pablo nagpasidaan: “Sa usa ka dakong balay adunay mga sudlanan nga dili lamang hinimo sa bulawan ug plata kondili usab sa kahoy ug kulonon, ug ang pipila alang sa katuyoang dungganon apan ang uban alang sa katuyoang dili dungganon. Busa, kon ang usa magpahilayo gikan niining naulahi, siya mahimong sudlanan alang sa katuyoang dungganon, binalaan, mapuslanon sa iyang tag-iya, andam alang sa tanang maayong buhat.” (2 Timoteo 2:​20, 21) Busa wala ililong ni Pablo ang tinuod nga kahimtang nga bisan taliwala sa mga Kristohanon, adunay pipila tingali nga dili dungganon ug panggawi. Ug prangka usab siya sa pagtambag kang Timoteo sa pagpahilayo kanila.

Kini ba nagpasabot nga magtahap ka sa imong mga isigka-Kristohanon? Dili. Ayaw usab paghunahuna nga dili na masayop ang imong mga higala. (Ecclesiastes 7:16-18) Sa laing bahin, tungod kay ang usa ka batan-on tigtambongan sa Kristohanong mga tigom o dunay mga ginikanang masiboton diha sa kongregasyon, kini wala magpasabot nga siya maayo na nga himoong suod nga higala.

“Pinaagi sa iyang mga binuhatan ang usa ka bata magpaila sa iyang kaugalingon kon ang iyang kalihokan maoy lunsay ug matul-id,” matod sa Proverbio 20:11. Busa, maalamong palandongon kini: Ang relasyon ba niining tawhana kang Jehova mao gayod ang labing importanteng butang sa iyang kinabuhi? O may pamatuod ba nga ang iyang hunahuna ug tinamdan naimpluwensiyahan sa “espiritu sa kalibotan”? (1 Corinto 2:12; Efeso 2:2) Ang imo bang pagpakig-uban kaniya nakadasig kanimo sa pagsimba kang Jehova?

Kon mopili ka ug mga higala nga may dakong gugma kang Jehova ug sa espirituwal nga mga butang, dili lang makalikay ka sa mga problema kondili mas madasig ka pa sa pag-alagad sa Diyos. Si Pablo miingon kang Timoteo: “Tinguhaa ang pagkamatarong, pagtuo, gugma, pakigdait, uban niadtong nagatawag sa Ginoo gikan sa usa ka hinlong kasingkasing.”​—2 Timoteo 2:22.

Pagpakighigala sa Kaatbang nga Sekso

Kon ikaw husto na sa edad ug gusto nang magminyo, imo bang gipamalandong pag-ayo kon sa unsang paagi kining mga prinsipyoha makaimpluwensiya sa imong pagpilig kapikas? Daghang butang ang makapadani kanimo sa usa nga gusto nimong minyoan, apan wala nay mas importante pa kay sa espirituwalidad sa maong tawo.

Busa, ang Bibliya balikbalik nga nagpasidaan batok sa pagpakigminyo sa usa nga dili “sa Ginoo.” (1 Corinto 7:39; Deuteronomio 7:​3, 4; Nehemias 13:25) Tinuod, ang mga tawong dili nimo isigkamagtutuo malagmit responsable, desente, ug mahunahunaon. Apan, sila walay motibasyon sama nianang imong nabatonan sa pagpalig-on niini nga mga hiyas ug sa paghimo sa kaminyoon nga malig-on sa pagdagan sa mga tuig.

Sa laing bahin, ang usa nga nagpahinungod kang Jehova ug maunongon kaniya determinado sa pag-ugmad sa Kristohanong mga hiyas ug pag-amping niana, bisag unsa pay mahitabo. Siya nahibalo nga ang Bibliya nagtudlo nga ang paghigugma sa imong kapikas nag-apektar sa imong maayong relasyon kang Jehova. (Efeso 5:​28, 33; 1 Pedro 3:7) Busa, kon ang magtiayon parehas nga nahigugma kang Jehova, lig-on kaayo ang ilang panukmod sa pagpabiling maunongon sa usag usa.

Kini ba nagpasabot nga kon magminyo ang parehas nga magtutuo, kini garantisadong molampos? Dili. Pananglitan, kon makigminyo ka sa tawo nga wala kaayoy interes sa espirituwal nga mga butang, unsa may mahitabo? Kay walay katakos sa pagsukol batok sa impluwensiya niining sistemaha, ang tawong maluya sa espirituwal dakog purohan nga maanod palayo sa Kristohanong kongregasyon. (Filipos 3:18; 1 Juan 2:19) Handurawa ang kasakit ug gubot nga kaminyoon nga imong maagoman kon ang imong kapikas malambigit sa “mga kahugawan sa kalibotan.”​—2 Pedro 2:20.

Sa dili pa sugdan ang usa ka relasyon nga moresulta ug kaminyoon, hunahunaa kini: Napamatud-an ba niya nga siya usa ka espirituwal nga tawo? Siya ba nagpasundayag ug maayong panig-ingnan sa Kristohanong pagkinabuhi? Nakadulot ba pag-ayo ang kamatuoran sa Bibliya diha niining tawhana, o nagkinahanglan pa siya ug dakong panahon sa pagpauswag sa iyang espirituwalidad? Kombinsido ka ba nga ang pangunang panukmod sa iyang kinabuhi mao ang gugma kang Jehova? Ang pagkahibalo nga maayog reputasyon ang maong tawo makatabang. Apan, labaw sa tanan, kinahanglang segurado ka nga ang imong naibgan debotado kang Jehova ug may purohan nga mahimong maayong kapikas.

Hinumdomi usab nga kadtong madani sa pagpakigsuod sa “kuwestiyonableng mga tawo” madani una sa kuwestiyonableng mga butang​—sama sa pipila ka matang sa dili-maayong mga kalingawan o kalihokan. Ang sulondang mga batan-on sa Kristohanong kongregasyon dili gayod makigbahin sa maong mga kalihokan. Busa susiha ang imong kasingkasing.

Kon ikaw nakaamgo nga ang imong kasingkasing nagkinahanglan ug disiplina, ayawg kaguol. Ang kasingkasing puwedeng madisiplina. (Proverbio 23:12) Ang labing hinungdanong punto mao kini: Unsa ba gayod ang imong gusto? Gusto ka bang magpadani sa kon unsay maayo ug sa mga tawong naghimog maayo? Sa tabang ni Jehova, ikaw makaugmad ug ingon niana nga kasingkasing. (Salmo 97:10) Ug pinaagi sa pagbansay sa imong mga katakos sa pagsabot sa pag-ila sa husto ug sayop, dili ka maglisod sa pagpili kon kinsang mga tawhana ang mahimong maayo ug makapadasig nga mga higala.​—Hebreohanon 5:14.

[Footnote]

[Hulagway sa panid 26]

Ang maayong mga kauban adunay makapalig-ong impluwensiya sa espirituwalidad