Katukma sa Gisulti

NGANO mang ang usa ka Kristohanon makasulti tingalig dili tinuod? Mahimong gisulti lamang niya ang iyang nadungog, nga wala gahinig panahon ang pagsusi sa mga kamatuoran. O mahimong gipasobrahan niya pagsulti ang usa ka butang tungod kay, wala makaamgo niana, nasayop siya pagbasa sa gikuhaan sa iyang materyal. Sa dihang atong hatagan ug maampingong pagtagad ang katukma bisan diha sa gagmayng mga butang, makita sa atong mga tigpatalinghog nga sila makasalig sa katinuod sa mas hinungdanong mga bahin sa atong mensahe.

Diha sa Ministeryo sa Kanataran. Kay nakaamgo nga daghan pa silag angayng makat-onan, ang daghan mahadlok mosugod sa pagsangyaw sa kanataran. Bisan pa niana, dali silang makadiskobre nga makahatag silag epektibong pamatuod, bisan pag paninugdan lamang ang nahibaloan sa kamatuoran. Sa unsang paagi? Ang sekreto mao ang pagpangandam.

Sa dili pa mogula sa pagsangyaw sa kanataran, sinatia ang ulohang gusto nimong hisgotan. Sulayi ang pagdahom sa mga pangutanang ipatungha tingali sa imong mga tigpatalinghog. Pangitag makapatagbawng gibase-sa-Bibliya nga mga tubag. Kini makapaandam nimo nga ihatag ang hustong mga tubag nga may relaks nga hunahuna. Modumalahay ka ba sa usa ka pagtuon sa Bibliya? Repasoha pag-ayo ang tun-anang materyal. Tinoang nasabtan nimo ang Kasulatanhong pasikaranan sa mga tubag sa pinatik nga mga pangutana.

Unsa man kon ang tagbalay o kauban sa trabaho mosuknag usa ka pangutana nga dili ka andam nga motubag? Kon wala ka makatino sa mga kamatuoran, sukli ang tentasyon nga managhap. “Ang kasingkasing sa matarong nagapamalandong aron sa pagtubag.” (Prov. 15:28) Makaplagan mo tingali ang tabang nga imong gikinahanglan diha sa basahong Nangatarongan Pinasukad sa Kasulatan o sa “Mga Topiko sa Bibliya nga Kahisgotan.” Kon wala kay dalang kopya sa bisan hain niana, isugyot nga ikaw mohimog panukiduki ug mobalik ra. Kon sinsero ang nangutana, siya mosugot sa paghulat sa hustong tubag. Ngani, basin makadayeg pa siya sa imong pagkamapaubsanon.

Ang pagkuyog sa eksperyensiyadong mga magmamantala diha sa ministeryo sa kanataran makatabang nimo nga maugmad ang kahanas sa hustong paggamit sa Pulong sa Diyos. Panid-i kon unsang mga kasulatan ang ilang gigamit ug kon giunsa nila pagpangatarongan pinasukad niana. Sa pagkamapaubsanon dawata ang bisan unsang mga sugyot o pagtul-id nga ilang ihatag. Ang masibotong tinun-an nga si Apolos nakapahimulos sa tabang nga nadawat gikan sa uban. Si Lucas nagbatbat kang Apolos ingong “larino manulti,” “batid kaayo,” ug “mainiton sa espiritu,” usa ka tawong “nagsulti ug nanudlo sa hustong paagi sa mga butang bahin kang Jesus.” Bisan pa niana, kulang ang iyang pagsabot. Sa namatikdan kini ni Priscila ug Aquila, ilang “giuban siya kanila ug gipatin-aw kaniya ang dalan sa Diyos sa mas hustong paagi.”​—Buh. 18:24-28.

“Hugot nga Nangupot sa Kasaligang Pulong.” Ang atong mga presentasyon panahon sa mga tigom angayng mosumbalik-silaw sa dakong pagtahod alang sa papel sa kongregasyon isip “usa ka haligi ug tukod sa kamatuoran.” (1 Tim. 3:15) Aron matuboy ang kamatuoran, hinungdanon nga atong masabtan ang mga kasulatan nga gihunahuna natong gamiton diha sa mga pakigpulong. Tagda ang konteksto ug katuyoan niini.

Ang imong isulti panahon sa usa ka tigom sa kongregasyon basin kutloon. Siyempre, “kitang tanan mangapandol sa makadaghan.” (Sant. 3:2) Apan makabaton kag kaayohan pinaagi sa pag-ugmad sa mga batasan nga makatabang sa tukma nga panulti. Daghang igsoong lalaki nga nalista sa Teokratikanhong Tunghaan sa Ministeryo sa ngadtongadto mahimong mga ansiyano. “Labaw kay sa kasagaran” ang gidahom gikan niadtong gisaligan sa maong kaakohan. (Luc. 12:48) Kon ang usa ka ansiyano sa kadanghag mohatag ug sayop nga tambag nga moresulta sa seryosong mga suliran alang sa mga membro sa kongregasyon, makaagom ang ansiyano sa kasuko sa Diyos. (Mat. 12:​36, 37) Busa, ang usa ka igsoong lalaki nga kuwalipikado ingong ansiyano kinahanglang mailhan nga “hugot nga nangupot sa kasaligang pulong kon bahin sa iyang arte sa pagpanudlo.”​—Tito 1:9.

Pag-amping nga ang imong mga pangatarongan maoy uyon sa “sumbanan sa makapahimsog nga mga pulong” nga gipaila diha sa kahugpongan sa Kasulatanhong kamatuoran. (2 Tim. 1:13) Kini dili angayng makapahadlok kanimo. Tingali wala ka pa makahuman pagbasa sa tibuok Bibliya. Ipadayon ang pagpaningkamot nga himoon kana. Apan sa kasamtangan, matikdi kon sa unsang paagi ang mosunod nga mga sugyot makatabang nimo nga analisahon ang materyal nga imong gihunahunang gamiton sa imong pagpanudlo.

Una, suknaa ang imong kaugalingon: ‘Kini bang materyala nahiuyon sa ako nang nakat-onan gikan sa Bibliya? Mokabig ba kini sa akong mga tigpatalinghog nganha kang Jehova, o magtuboy ba kini sa kaalam sa kalibotan, nga magdasig sa mga tawo nga giyahan niini?’ Matod ni Jesus: “Ang imong pulong maoy kamatuoran.” (Juan 17:17; Deut. 13:1-5; 1 Cor. 1:19-21) Sunod, pahimusli pag-ayo ang mga galamiton sa pagtuon nga gitagana sa matinumanon ug maalamong ulipon nga matang. Kini motabang kanimo dili lamang sa pagsabot sa mga kasulatan sa hustong paagi kondili sa pagpadapat usab niini sa balanseng paagi ug uban ang pagkamakataronganon. Kon ipasukad nimo ang imong mga pakigpulong sa “sumbanan sa makapahimsog nga mga pulong” ug mosalig sa agianan sa komunikasyon ni Jehova sa dihang magpatin-aw ug magpadapat sa mga kasulatan, ang imong mga sulti mahimong tukma.

Pagsusi sa Katukma sa Impormasyon. Ang bag-ong mga taho, mga pangutlo, ug mga kasinatian makatabang sa dihang ikaw nagailustrar ug nagapadapat sa pipila ka punto. Sa unsang paagi makatino ka nga kini tukma? Ang usa ka paagi maoy pinaagi sa pagkuha nianang mga tahoa gikan sa kasaligang mga tinubdan. Hinumdomi ang pagsusi nga ang impormasyon maoy kinabag-ohan. Ang mga estadistika makaraan; ang siyentipikanhong mga diskobre daling malabwan; ug samtang mouswag ang pagsabot sa tawo sa kasaysayan ug sa karaang mga pinulongan, ang mga pangatarongan nga ipasukad sa nangaging kahibalo kinahanglang rebisahon. Pag-amping pag-ayo kon naghunahuna ka sa paggamit ug impormasyon gikan sa mga mantalaan, telebisyon, radyo, elektronik nga koreyo, o Internet. Ang Proverbio 14:15 nagtambag: “Si bisan kinsa nga walay kasinatian motuo sa tagsatagsa ka pulong, apan ang usa nga maalamon magapalandong sa iyang mga lakang.” Suknaa ang imong kaugalingon: ‘Ang tinubdan ba adunay reputasyon sa katukma? Ang impormasyon ba kapamatud-an sa laing paagi?’ Kon nagduhaduha sa pagkatinuod sa usa ka taho, ayaw kanag gamita.

Dugang pa sa pagsusi kon kasaligan ang mga tinubdan, hunahunaa pag-ayo kon unsaon nimo paggamit ang impormasyon. Tinoa nga ang imong paggamit sa mga pangutlo ug mga estadistika nahiuyon sa konteksto nga gikuhaan niana. Sa paningkamot nga ipasiugda ang imong punto, pag-amping nga “ang pipila ka tawo” dili mahimong “kinabag-ang mga tawo,” nga ang “daghang tawo” dili mahimong “tanang tawo,” ug nga ang “sa pipila ka kaso” dili mahimong “sa kanunay.” Ang pagsulting sobra bahin sa mga butang o pagpakapin sa mga taho nga naglangkit sa numero, gidak-on, o kaseryoso mopatunghag mga pagduhaduha sa pagkamasaligan.

Kon ikaw kanunayng tukma sa imong isulti, ikaw mailhan isip usa ka tawong may pagtahod sa kamatuoran. Maayo kining banaag diha sa mga Saksi ni Jehova isip grupo. Labaw nga hinungdanon, kini magpasidungog kang “Jehova nga Diyos sa kamatuoran.”​—Sal. 31:5.