Buhata ang Labaw pa Kay sa Pag-ingon: “Painiti ug Busga ang Inyong Kaugalingon”
“Kon . . . usa kaninyo moingon sa [nagkinahanglang mga igsoon]: ‘Panglakat kamo nga malinawon, ug painiti ug busga ang inyong kaugalingon,’ apan dili nimo sila hatagan sa mga panginahanglan sa ilang lawas, unsa may kapuslanan niana? . . . Ang pagtuo patay kon kini walay mga binuhatan.”—SANTIAGO 2:15-17.
1. Sa unsang paagi mitungha ang panginahanglan sa usa ka igsoon sa Nigeria?
GIBANABANA nga si Lebechi Okwaraocha natawo sa wala pay 1880, busa kapin na siya sa usa ka gatos ka tuig. Iyang napanunod ug gisimba ang juju sa iyang taga Nigeria nga mga ginikanan. Dayon, sa nagpanuigon siyag 80, misugod siya sa pagtuon sa Bibliya uban sa mga Saksi ni Jehova. Iyang giaplikar ang iyang nakat-onan ug gibawtismohan. Busa nahimong siyang Saksi hapit 30 ka tuig. Dili pa dugay, giduaw siya ug ang iyang 72-anyos nga asawang Anglikano sa mga ansiano sa iyang kongregasyon human sa kusog kaayong ulan. Naguol ang duha—ang salog sa ilang pawod ug atop nga payag nalubog sa tubig, ug wala silay mga paryente nga kasak-an o makatabang kanila sa pag-ayo sa payag. Kon didto ka pa, unsay imong buhaton? Sa dili pa susihon ang nahitabo, atong tagdon ang pila ka tambag sa Bibliya.
2. Nganong maikagon kita sa “maayong mga binuhatan”?
2 Si Kristo Jesus “mihatag sa iyang kaugalingon alang kanato aron kita iyang . . . mapaputli alang sa iyang kaugalingon, usa ka katawhan alang kaniya, nga madasigon sa maayong mga binuhatan.” (Tito 2:14) Kining buluhatona mao ang makaluwas ug kinabuhing pagsangyaw sa Gingharian. (Marcos 13:10; Pinadayag 7:9, 10) Apan, nagkinahanglan ug labaw pa ang “maayong mga binuhatan” sa Kristohanon, kay ang igsoon sa amahan ni Jesus si Santiago mibatbat: “Ang paagi sa pagsimba nga putli ug dili bulingon sa atubangan sa atong Diyos ug Amahan mao kini: ang pag-atiman sa mga ilo ug sa mga babayeng balo sa ilang mga pagkaguol, ug ang pag-amping sa kaugalingon nga dili mahugawan sa kalibotan.”—Santiago 1:27.
3, 4. Unsay atong nakat-onan gikan sa I Timoteo kapitulo 3-5 mahitungod sa “maayong mga binuhatan,” nga mitultol sa unsang mga pangutana?
3 Ang mga kongregasyon sa unang siglo nalangkit niining duha ka matang sa “maayong mga binuhatan.” Sa 1 Timoteo kapitulo 3, human sa paggambalay sa mga kuwalipikasyon sa mga magtatan-aw ug ministeryal nga mga alagad, si apostol Pablo misulat nga “ang kongregasyon sa buhi nga Diyos [mao] ang haligi ug pundasyon sa kamatuoran.” (1 Timoteo 3:1-15) Siya nagpakita nga ang mga Kristohanon nga magpabilin sa matuod nga mga pagpanudlo makaluwas sa ilang kaugalingon ug sa mopatalinghog kanila. (1 Timoteo 4:16) Dayon gihisgotan ni Pablo ang ‘maayong mga binuhatan’ bahin sa pag-atiman sa materyal nga paagi sa mga babayeng balo nga “timawa.”—1 Timoteo 5:3-5.
4 Busa, dugang pa sa atong pag-ebanghelyo, kinahanglang atong hatagan ug pagtagad ang “maayong mga binuhatan,” sama sa ‘pag-atiman sa mga ilo ug sa mga babayeng balo sa ilang nga pagkaguol.’ Unsay mahimo sa mga ansiano ug sa ministeryal nga mga alagad niining bahina, ingong “mao ang nagapanguna.”? (Hebreohanon 13:17) Sa unsang paagi ang pipila kanato makatabang kanila niini? Ug unsay atong mahimo sa personal sa paghimog “maayong mga binuhatan” niining matanga?
Mga Ansiano nga Maayog Pagpanguna
5. Sa unsang paagi giatiman ni Pablo ang linain nga panginahanglan, ug unsa ang modernong katugbang niini?
5 Dihang mitungha ang linain nga panginahanglan sa Judea, si Pablo, nga usa ka ansiano, nanguna sa paghikay ug ministeryo sa pagtabang. Ang maong pagpanguna nakawala sa kalibog; ang mga butang kinahanglang timbang nga pagkaapod-apod, sumala sa panginahanglan. (1 Corinto 16:1-3; Buhat 6:1, 2) Ang mga ansiano usab karon, nakapanguna sa mga ministeryo sa pagtabang tapos sa grabeng mga baha, pagdahili sa yuta, tidal wave, alimpulos, o linog, busa ‘nagatagad sa personal nga interes sa uban.’—Filipos 2:3, 4.
6. Dihang may katalagmang nahitabo sa California, U.S.A., unsay gihimo sa mga ansiano?
6 Ang Awake! sa Oktubre 8, 1986, mihatag ug pananglit sa samang Kristohanong buhat. Misanong ang mga ansiano dihang gibahaan ang California, U.S.A. gumikan sa paglumpag sa dike. Gisusi gilayon niining espirituwal nga mga magbalantay ang ilang panon sa pagtan-aw kon kinsay nangawala o nanginahanglag medikal nga pag-atiman, pagkaon, o kasak-an. Ang mga ansiano nakigtambayayong sa opisina sa mga hedkuwarter sa mga Saksi ni Jehova. Gitukod ang komite sa pagtabang, ug dihang nagpangabot ang kaubang mga Saksi sa pagtabang, giorganisar sila sa grupo-grupo aron sa paghinlo ug sa pag-ayo sa nangagubang mga balay. Ang mga ansiano usab ang nagdumala sa pagpamalit ug sa pag-apod-apod sa mga kinahanglanon. Kini nagpasundayag nga kon motungha ang mga panginahanglang sama niini, ‘tinoon sa matag usa ka tinun-an kon pilay iyang maarangang ihatag’ o buhaton, apan mas maayong mangutana una sa lokal nga mga magtatan-aw aron makabatog mga pagtultol gikan kanila.—Itandi sa Buhat 11:27-30.
7. Unsang mas komung mga panginahanglan nga angay usab kitang motabang?
7 May mga panahon nga ikaw (ansiano o dili) makasanong sa dakong panginahanglan human sa usa ka katalagman, adunay naandang mga kinahanglanon nga sama ka hinungdanon—kadtong anaa mismo sa inyong kongregasyon. Sanglit kining mga panginahanglana tingali wala kaayo mabalita sama sa usa ka dakong katalagman, dali kining masipyatan o dili kaayo mahatagag pagtagad. Apan ang lokal nga mga panginahanglan sa pagkatinuod mao ang matang sa panginahanglan nga gihisgotan sa Santiago 2:15-17. Oo, ang imong kongregasyon tingali makahatag labing dakong hagit kon ang imo bang ‘pagtuo may mga binuhatan, o patay sa iyang kaugalingon.’
8. Sa unsang paagi ikapakita sa mga magtatan-aw ang kaalam sa pag-atiman sa mga panginahanglan sa kongregasyon?
8 Sa pagpanguna, ang mga ansiano kinahanglang maningkamot nga mahimong “maalamon ug masinabtanon.” (Santiago 3:13) Pinaagi sa kaalam ilang mapanalipdan ang panon batok sa mga mini nga magapanuaw gikan sa usa ka igsoon ngadto sa laing igsoon (o kongregasyon ngadto sa laing kongregasyon) sa paghulam ug kuwarta o mangimbentog estorya aron makadawat ug “hinabang.” Sa maalamon ang mga ansiano dili mosimpatiya sa pagkatapolan, kay ang lagda sa Bibliya mao: “Kon adunay magadumili sa pagtrabaho, ayaw ninyo siya pakan-a.” (2 Tesalonica 3:10-15) Bisan pa niana, dili nila buot nga ‘ilang sirad-an ang ilang kaugalingong kahangawa’ o manguna sa ilang mga igsoon sa pagbuhat niana. (1 Juan 3:17) Laing rason nganong nagkinahanglang magpakita silag kaalam mao nga wala maghatag kanato ang Bibliya ug walay kataposang mga lagda mahitungod sa pag-atiman sa mga nanginahanglan ug sa sinakit. Nagkalainlain ang mga kahimtang gikan sa usa ka panahon ngadto sa laing panahon ug dapit ngadto sa laing dapit.
9. (a) Sa unsang paagi giatiman ang takos nga Kristohanong mga babayeng balo sa unang siglo? (b) Unsang matanga sa tabang ang matagamtam niadtong sama kanila karon?
9 Pananglitan, diha sa 1 Timoteo 5:3-10 gihisgotan ni Pablo ang takos nga mga babayeng balo nga “gibiyaang timawa.” Ang ilang magtutuong mga paryente mao ilabina ang responsabli sa pagtabang kanila; ang pagpasagad nianang obligasyona makadaot sa baroganan sa mga paryente diha sa Diyos. Apan, kon, ang nanginahanglan, takos nga babayeng balo dili makadawat ug hinabang niining paagiha, makahimo ang mga ansiano sa paghikay ug materyal nga hinabang gikan sa kongregasyon. Karong panahona, usab, ang ubang mga kongregasyon nakatabang ilabina sa mga nanginahanglan sa ilang taliwala. Apan, diha sa kadaghanang mga yuta karon adunay programang suportado sa buhis alang sa mga tigulang, sa mga masakiton, kadtong andam apan dili makakitag trabaho. Apan, ang Kristohanong mga ansiano makatabang sa laing paagi. Ang uban nga tinuod gayod nga nagkinahanglan ug kuwalipikado alang sa publikong mga benepisyo walay nadawat niini tungod kay dili sila mahibalo kon unsaon sa pag-aplay o kaha maulawng mohangyo. Busa ang mga ansiano mahimong makapangutana sa mga ahensiya sa kagamhanan o sa pakigkitag usa ka Saksi nga suheto niining mga butanga. Dayon makahikay sila ug kuwalipikadong igsoong lalaki o babaye sa pagtabang sa tawong nanginahanglan aron makadawat sa mabatonang mga benepisyo.—Roma 13:1, 4.
Pag-organisar ug Praktikal nga Tabang
10. Samtang ilang ginabantayan ang panon, unsay hatagag pagtagad sa mga ansiano?
10 Ang alistong mga magtatan-aw sagad mao ang yawi aron ang mga sinakit ug ang mga nagkinahanglan makadawat ug tabang gikan sa mahigugmaong mga igsoong lalaki ug babaye. Ang mga ansiano kinahanglang alisto sa espirituwal ug pisikal nga mga panginahanglan samtang ilang ginabantayan ang tanang panon. Siyempre, hatagan sa mga ansiano ug pagtagad ang “pag-ampo ug pag-alagad sa pulong.” (Buhat 6:4) Busa, ilang hikayon ang mga butang aron ang masakiton kun naospital nga mga membro sa panon mapakaon sa espirituwal. Mahimong iparekord sa mga ansiano ang mga miting alang sa dili makatambong. Ang mga ansiano ug ministeryal nga mga alagad nga nagpulihay sa ilang paghatod sa mga teyp nakakaplag nga ang ilang mga pagduaw nakahimo kanila sa pagpakig-ambit sa ubang espirituwal nga mga gasa. (Roma 1:11, 12) Sa samang panahon, ilang masusi ang dihadihang mga panginahanglan.
11. Iilustrar kon sa unsang paagi mahikay ang pagtabang alang sa usa ka igsoong babaye nga nagkinahanglan?
11 Tingali nakamatikod sila nga may mga panahong makatambong ang baldado kun tigulang nga igsoong babaye sa Kingdom Hall, o makakuyog sa mubong panahon sa pag-alagad sa kanataran, kon may igsoong babayeng motabang sa pagligo ug sa pag-ilis kaniya. (Itandi sa Salmo 23:1, 2, 5.) Makahimo ang mga magtatan-aw sa pagtudlo ug usa sa ilang sakop sa paghikay niini. Sa susama, mahimong makahangyo sila sa kongregasyon ug mga buluntaryo sa pagbiyahe uban sa masakiton o sa pagtaganag sakyanan. Ang paghimog iskedyol ning bahina makahapsay ning mga butanga.
12. Sa unsang paagi ang uban makabulig sa mga ansiano sa pagtabang sa mga masakiton o sa mga tigulang?
12 Tingali nakamatikod ang mga ansiano ug ubang mga butang diin mahatag ang tabang o mahimo ang mahigugmaong mga kahiyakan. Pananglitan, ang usa ka tigulang o masakitong igsoong babaye dili na makaatiman sa balay sama sa iyang naandan. Makahimo ba ang ubang ministeryal nga mga alagad ug uban sa pagtabang kaniya? Ang ilang paglimpiyo sa lagwerta o sa pagpanghabas sa tanom tingali makapabaskog pa kaniya, sa kasayoran nga ang iyang balay karon dili na matamay sa mga kasilinganan. Ang tanaman ba nagkinahanglag paghawan sa sagbot o pagbisbis? Andam ba ang mga igsoong babaye nga mangompra sa pagsusi kaniya ug sa pagpamalit sa mga kinahanglanon? Hinumdomi, ang mga apostoles interesado niining praktikal nga mga bahin, ug naghikay sila ug usa nga makaarang diha sa kongregasyon sa pagtabang.—Buhat 6:1-6.
13. Unsay miresulta sa pagtabang sa ansiano sa igsoong taga Nigeria nga gihisgotan sa sinugdan?
13 Ang sama niining Kristohanong pagtagad gipakita sa mga ansiano nga gihisgotan sa sinugdan kinsa, dihang miduaw ingong magbalantay, nakadiskobre kang Lebechi Okwaraocha ug sa iyang asawa diha sa makasubong kahimtang. Gisabotan dayon kini sa lawas sa mga ansiano ug gipahibalo ang kongregasyon sa ilang plano—sa pagtukod pag-usab sa balay. Nagkalainlaing mga igsoong lalaki ug babaye mihatag ug mga materyal sa pagtukod ug mainandamong mitabang sa proyekto. Sulod sa usa ka semana, sila nakatukod ug malig-on, yero ug atop nga gamayng balay. Ang taho gikan sa Nigeria mao:
“Natingala ang mga taga baryo ug sa walay pag-agda nagdalag pagkaon ug mga ilimnon alang sa mga igsoong lalaki ug babaye nga okupadong nagtrabaho sa taas nga oras aron matapos ang trabaho sa dili pa moabot ang sunod nga ulan. Daghang mga taga baryo nagreklamo bahin sa ubang relihiyosong grupo kinsa, sila miingon, nagapangawat sa mga tawo imbes tabangan ang mga kabus. Kining hitaboa nabantog sa komunidad. Nahimong masanongon kaayo ang mga taga baryo, ug daghang pagtuon sa Bibliya ang nasugdan.”
Ang Imong Bahin Niining “Maayong mga Binuhatan”
14. Unsang kaisipan ang kinahanglan natong huptan mahitungod sa pagbuhat ug “maayong mga binuhatan” sa atong mga igsoon?
14 Sa pagkatinuod, kita makatabang sa pribado ug direkta sa mga panginahanglan sa mga tigulang, sa masakiton, sa naospital, o sa mga sinakit nga anaa sa atong palibot. Kon makakita kitag paagi sa pagpakita sa tinuod nga Kristiyanidad, nganong dili kana himoon ug motabang? (Buhat 9:36-39) Ang atong motibo mao, dili tungod kay napugos sa uban, kondili tungod sa Kristohanong gugma. Ang unang sambog sa tanang praktikal nga tabang mao ang atong pagbaton ug tinuod nga kaikag ug kaluoy. Siyempre, walay usa kanato ang makapabata sa mga tigulang, makaayo sa sakit pinaagig mga milagro, o sa pagtimbang sa pinansiyal nga pagkabutang sa tanan diha sa kongregasyon. Apan kita kinahanglang may mabalak-on ug mahinatagong espiritu. Kon aduna kita niana, ug molihok dayon kita sumala niana, kini makalig-on sa gugma tali kanato ug sa atong gitabangan. Mao kini ang nahitabo kang Pablo ug Onesimus, usa ka bag-ong Kristohanon nga ‘mialagad kang Pablo sa iyang pagkabilanggo.’—Filemon 10-13; Colosas 3:12-14; 4:10, 11.
15. Sa unsang paagi makatabang kita sa mga takos nga tinuod gayod nga nagkinahanglan?
15 Usahay makatabang kita sa materyal nga panginahanglan pinaagig usa ka malulutong gasa, kon ipadala man kini nga dili magpaila kon kinsay naghatag o sekreto nga ihatag. May igsoon bang nawad-ag trabaho ug wala pay nakitang trabaho? Ang igsoon bang babaye nag-atubang ug wala damhang medikal nga balayranan; naaksidente ba siya o gikawatan? Ang mga situwasyon nga sama niini hayan motungha sa atong palibot. Kon mohatag kitag “mga gasa sa kaluoy,” ang atong Amahan nga nagatan-aw sa tago makakita ug malipay. (Mateo 6:1-4) O, imbes kuwarta ang ihatag, kita tingali, sama kang Job, makahatag senina sa kabus o kaha abiyong mga kalan-on kun pagkaong linuto sa balay alang sa mga babayeng balo ug mga ilo.—Job 6:14; 29:12-16; 31:16-22.
16. Unsang ubang praktikal nga paagi nga mahimong ikahatag ang tabang? Iilustrar.
16 Ang imong eksperyensiya o mga kaila mahimong tuboran sa praktikal nga tabang. Miduol ang igsoon kang Igsoong W——aron mangutang. Ang iyang malulutong tubag mao: ‘Nganong nagtuo ka nga may sobra akong kuwarta nga ipahulam?’ Ang tubag mao: ‘Tungod kay maayong kang mopalakaw sa imong kuwarta.’ Nakasabot niini, si Igsoong W——, nga kanunay nang nakapahulam ug kuwarta sa mga nanginahanglan, misugyot: ‘Tingali ang imo gayod nga gikinahanglan mao nga adunay usa nga motabang sa pagpalakaw sa imong kuwarta, ug malipay ako sa pagtabang kon nagkinahanglan ka sa akong tabang.’ Ang maong tabang ilabinang pabilhan sa mga igsoon nga nagkinahanglang magpasibo sa ilang sukdanan sa pagkinabuhi sa usa ka bag-ong mga sirkumstansiya o andam sa pagkugig trabaho sa dili kaayo tinamod nga matang sa trabaho. Siyempre, kon kinahanglan gayod nga mangutang, maayo nga maghimog pinirmahang rekord bahin niini aron walay problema unyang motungha sa ulahi. Apan daghang mga igsoon nga dili gustong mangutang ug kuwarta tinuod nga moapresyar sa personal nga tabang pinaagi sa pagtambag o pakigbahin sa eksperyensiya. (Roma 13:8) Gipakita kini sa usa ka eksperyensiya gikan sa West Africa bahin kang Emmanuel:
Bisag maayong barbero si Emmanuel, diyutay ra ang iyang kustomer, ug naguol siya sa iyang kakulang ug katakos sa pagpangitag kapangabuhian. Dayon ang usa ka alistong ansiano sa kongregasyon nangutana kang Emmanuel kon motrabaho ba siyag laing matang sa trabaho. Oo, ang iyang tubag, kay wala niya pasagding makababag ang garbo sa pagkahimong hanas nga barbero. Nakigsulti ang ansiano sa usa ka kauban ug nakakitag trabaho alang kang Emmanuel ingong attendant sa ospital. Maayo ang iyang lakat niining trabahoa ug nakatabang sa uban diha sa kongregasyon.
17. Sa unsang paagi makatabang ka sa usa ka igsoon nga naospital? (Salmo 41:1-3)
17 Kon ang isigka-Kristohanon masulod sa ospital o sa nursing home, kini maoy linaing mga higayon sa pagtabang. Sa makausa pa, ang tim-os nga kaikag ug kabalaka hinungdanon. Tingali imong ikapakita kini pinaagi sa imong pagkamainandamon sa pagbasa sa pasyente ug makapalig-ong Kristohanong basahon o sa pag-asoy ug makadasig nga mga eksperyensiya. Apan, aduna bay pisikal nga mga panginahanglan nga imong matabang? Diha sa ubang mga lugar, ang mga gamit sa ospital tingali kulang ra nga dili makaligoan o mapakaon ang pasyente gawas kon buhaton kini sa bisita. Busa, kon mosugot ang doktor, tingali makadala ka niyag lamiang pagkaon o kaha tabangan siya sa pagbubho sa iyang buhok ug sa pagkaligo. Gikinahanglan ba ang bata de banyo o sinelas? (2 Timoteo 4:13) O makatanyag ka ba sa pag-atiman sa ubang butang nga nakahatag kabalaka sa pasyente? Tingali nabalaka siya kon unsaon sa pag-ilis sa iyang tseke aron mabayran ang balayranan sa suga ug tubig. Makahimo ka sa pagtagana ug makahupayng tabang pinaagi sa pagbuhat bisan sa simpleng mga butang alang kaniya, sama sa pagseguro nga dili magtipun-og ang mga sulat sa iyang balay, ang mga tanom mabisbisan, o kun napalong ba ang painitan sa balay.
18. Unsay imong buhaton sa mga igsoon nga nagkinahanglan?
18 Sa walay duhaduha, ang matag usa kanato makakaplag ug mga paagi diin makapauswag kita sa atong pagbuhat ug labaw pa kay sa pag-ingon, “Painiti ug busga ang inyong kaugalingon.” (Santiago 2:16) Hunahunaa ang mga igsoong lalaki ug babaye sa imong kongregasyon. Ang pipila ba tinuod nga nagkinahanglag materyal, masakiton, baldado, o nagkasakit? Unsay imong mahimo sa praktikal nga paagi sa pagtabang niining minahal nga mga sakop sa kongregasyon nga gipakamatyan ni Kristo? Ang pagbaton ning kaisipana makatabang kanimo nga mas maandam pa sa pagtabang dayon kon may problemang motungha.
19. (a) Nganong hinungdanon ang pagkatimbang niining bahina? (b) Unsa ang labing maayo nga atong mahimo alang sa uban, ug ngano? (Salmo 72:4, 16)
19 Pinaagi sa atong pagpaningkamot sa pagtabang sa atong mga igsoon, makapamatuod kita nga ang atong pagtuo dili patay. Kanang pagtuoha mopalihok kanato sa pagkugi sa Kristohanong pagsangyaw. Kinahanglang atong huptan ang pagkatimbang tali sa pagtabang sa uban sa materyal nga paagi ug sa regular nga pakigbahin sa Kristohanong pag-ebanghelyo. (Itandi sa Mateo 15:3-9; 23:23.) Ang tambag ni Jesus kang Marta ug Maria nagpakita niana nga pagkatimbang. Siya miingon nga kon itimbang sa tawo ang materyal nga mga tagana sa espirituwal nga pagkaon, ang ulahi mao “ang maayong bahin,” nga dili makuha. (Lucas 10:39-42) Ang masakiton ug ang kabus anaa kanunay niining sistemaha sa mga butang. Kita makahimo, ug kinahanglang mohimo, ug maayong butang alang kanila. (Marcos 14:7) Hinunoa, ang labing maayo ug labing dumalayong kaayohan nga atong mahimo mao ang pagtudlo sa uban mahitungod sa Gingharian sa Diyos. Mao kana ang gihatagag pagtagad ni Jesus. (Lucas 4:16-19) Mao kanang paagiha diin ang kabus, ang masakiton, ang sinakit, makadawat ug dumalayong kahupayan. Pagkadakong kalipay ang pagtabang sa atong mga igsoon ug sa uban sa pagbutang sa ilang paglaom sa Diyos ug sa “paghawid ug hugot sa tinuod nga kinabuhi.”—1 Timoteo 6:17-19.
Makahinumdom Ka Ba?
◻ Unsa ang labing hinungdanon sa “maayong mga binuhatan” ang himoon sa Kristohanong kongregasyon?
◻ Sa unsang paagi makahatag ang lokal nga mga ansiano ug timbang nga pagtagad sa “maayong mga binuhatan” may labot sa materyal nga mga kahimtang sa ilang mga igsoon?
◻ Unsang praktikal nga mga lakang ang himoon sa mga ansiano?
◻ Unsang praktikal nga mga butang ang imong mahimo sa pagtabang sa imong mga igsoong lalaki ug babaye nga nagkinahanglan?
[Kahon sa panid 17]
Ang Kongregasyon Nagtagad
Ang magtiayon nga mibalhin sa usa ka gamayng kongregasyon sa banika mihatag ning makapukaw sa hunahuna nga taho:
‘Sa miaging tulo ka tuig gibaligya nako ug ang akong asawa ang among balay ug mibalhin sa usa ka layong kongregasyon nga nagkinahanglan ug hamtong nga pagtabang tungod kay may pipila ka problema. Wala magdugay nakabaton ako ug upat ka posisyon sa kaakohan. Among gimahal ang mga igsoon ug buot motrabaho uban kanila. Dihang milabay ang mga bulan miuswag ang espiritu sa kongregasyon, ug dihay duha ka maayong ansiano nga mitapon.
‘Nagkaproblema ang akong asawa sa panglawas, ug sa miaging tuig nagkinahanglan siyag dakong operasyon. Sa adlaw sa iyang pagsulod sa ospital, nagkasakit ako ug hepatitis. Duha ka bulan sa ulahi, gipaundang ako sa trabaho tungod kay malisod kaayo ang ekonomiya sa maong lugar. Nahurot na ang among kuwarta, ako walay trabaho, ug kaming duha nagpauli sa akong panglawas. Naguol ako tungod kay hapit na ang among distritong kombensiyon ug may bahin ako sa programa. May bahin usab ako sa sirkitong asembliya sa pipila na lang ka semana. Sanglit walay kuwarta, wala gayod akoy ideya kon unsaon sa pag-abot didto o sa pag-atiman sa akong pamilya. Usa ka adlaw niana migawas ang akong asawa sa pag-alagad sa kanataran, ug milingkod ako ug akong gipalandong ang among kahimtang.
‘Sa midungaw ako sa bentana, akong gipangutana ang akong kaugalingon, Hain hain ang akong pagsalig kang Jehova? Akong gisultihan ang akong asawa sa dili pagkabalaka, apan karon nagsugod na ako sa pagduhaduha. Dayon akong gipahayag ang akong “gamayng pagtuo” kang Jehova ug nagpakiluoy kaniya sa pagtabang kanako. Dihang hapit na akong matapos sa pag-ampo, usa ka igsoong lalaki mituktok sa pultahan. Buot niya akong paubanon kaniya aron manginom ug kape. Misaysay ako nga dili ako makahimo, tungod kay mangandam pa ako sa akong bahin alang sa tigom nianang gabhiona. Namugos siya, ug miingon nga pipila lang kini ka minuto. Busa nanglakaw kami. Namauli kami sa milabay ang tunga sa oras, ug sa mikawas ako sa iyang awto maayo ang akong panimati.
‘Dihang misulod ako sa balay, akong namatikdan nga napuno sa mga groseriya ang talad sa kosena. Abi kadto nako nga namalit ang akong asawa. “Apan hulat una, dili siya makahimo sa pagpamalit, kay kami wala may kuwarta.” Dayon akong namatikdan ang usa ka sobre. Sa atubangan kini ang mabasa:
‘“Gikan sa inyong mga igsoong lalaki ug babaye, nga nagmahal kaayo kaninyo. Ayaw ibutang ang bisan unsa niini sa kahon sa kontribusyon. Giatiman na kana alang kaninyo.”
‘Wala ako makapugong sa akong mga luha. Akong gipalandong ang akong “gamayng pagtuo,” ug misamot lang hinoon ako sa paghilak. Dayon miabot ang akong asawa sa balay. Akong gitudlo ang mga pagkaon ug ubang mga gasa. Mihilak usab siya, ug ang duha ka igsoong babaye nga mikuyog kaniya. Among gisaysay nga dili kami makadawat ug sobra ra ka daghan, apan gisultihan kami sa mga igsoong babaye nga walay nahibalo kon kinsay mihatag niadto. Ang tibuok kongregasyon may bahin, ug nagtinguha sila sa pagbuhat niini tungod kay ilang gibati nga among gitudloan sila kon unsaon sa paghatag sa uban. Nakapatulo lang hinoon kinig dugang mga luha!’
Sa ulahi, dihang iyang gisulat kining maong asoy, mibungag maayo ang binuhatan sa mga igsoon. Siya ug ang iyang asawa nakigbahin auxiliary payonir nga pag-alagad.
[Kahon sa panid 18]
Pamatuod sa Kristohanong Gugma
Usa ka kongregasyon sa mga Saksi ni Jehova sa kasadpang Tinipong Bansa nakaatubang ug tagsaong kahimtang nga nakahimo kanila sa pagpakita sa Kristohanong gugma, nga maoy gisugyot sa Kasulatan. Diha sa ilang teritoryo, nagbukas ang estado ug sentro aron maatiman ang grabeng mga biktima sa cerebral palsy. Ang una sa mga molupyo sa sentro mao si Gary, 25 anyos, nga dili na maatiman sa balay. Tungod sa sakit dili na siya makalihok sa iyang mga kamot ug tiil, ug naapektohan usab ang iyang sinultihan.
Bawtismadong Saksi si Gary sulod sa pito ka tuig. Kas-a diha sa bag-ong sentro, gusto niyang motambong sa mga tigom sa lokal nga kongregasyon. Dili ra kaayo layo ang balay sa iyang mga ginikanan, ug sa usa ka yugto ilang gidala siya. Apan tungod sa ilang edad, misugod ang ubang mga igsoon sa kongregasyon sa pagtabang. Ang usa adunay van. Busa siya, ang iyang asawa, ug ang ilang duha ka anak nga babaye mangandam ug mogikan sa balay 45 minutos sa dili pa magsugod ang tigom aron ilang mahapit si Gary. Ilang ihatod sila sa sentro pagkahuman, busa gabii na silang makaabot sa balay.
Apan may miugmad sa sentro. Ang ubang mga biktima sa cerebral palsy nagpakitag interes sa kamatuoran sa Bibliya. Sa ulahi may pipila kanila nga midawat sa pagtuon sa Bibliya. Dayon, ang uban mipakitag interes. Sa unsang paagi madala sila sa mga tigom? Laing pamilya sa kongregasyon mipalit ug van, ug ang negosyo nga gipanag-iya sa lokal nga mga Saksi mipalit ug laing ikatulong van. Apan, may mga panahon nga kini dili paigo ug dili kombenyente. May mahimo pa ba ang kongregasyon?
Gihisgotan kini sa mga ansiano ug dayon nagplano sa pagpalit ug van alang lamang sa pagdala sa mga baldado ngadto-nganhi sa mga tigom. Miuyon ang kongregasyon ug malipayong miamot. Ang ubang mga Saksi sa palibot nga nakadungog sa proyekto miamot usab. Napalit ang van ug gipaangay aron masulod diha niini ang mga wheelchair.
Karon, kada bulan nagkalainlaing grupo sa Pagtuon sa Libro sa Kongregasyon nagbanosbanos sa pagmaneho sa van ngadto sa mga tigom ug sa mga asembliya. Lima sa sentro sa cerebral palsy ang regular nga nagtambongan, ang upat kanila karon bawtismado nang mga Saksi. Nasuod ug napamahal sila sa daghang mga igsoong lalaki ug babaye, nga nakatagamtam sa kalipay sa pagtabang. Sa unsang paagi? Pinaagi sa paghawid sa libro sa awit ug sa pagpakli sa mga kasulatan sa panahon sa mga tigom. Diha sa sirkito mga asembliya ug distritong mga kombensiyon, nakatabang pa gani sila sa pagpakaon ug pag-atiman niadtong dili makahimo niini sa ilang kaugalingon. Kini nakapatunghag mutuwal nga kahangop nga tinuod nga makalilipay. Ug komusta si Gary? Siya karon nag-alagad ingong ministeryal nga alagad niining kongregasyona nga nakapamatuod sa gugma niini.—Buhat 20:35.