Mga Ansiano, Maghukom Kamo sa Minatarong

“Kon kamo may pagahusayon tali sa inyong mga igsoon, maghukom kamo sa minatarong.”​—DEUTERONOMIO 1:16.

1. Kon bahin sa paghukom, unsang pagtugyan sa gahom ang nahitabo, ug unsay ipasabot niini alang sa tawhanong mga maghuhukom?

INGONG Supremo nga Maghuhukom, gitugyanan ni Jehova ug gahom sa paghukom ang iyang Anak. (Juan 5:27) Sa baylo, ingon nga Ulo sa Kristohanong kongregasyon, gigamit ni Kristo ang matinumanon ug maalamong ulipon nga matang ug ang Nagamandong Lawas niini sa pagtudlo ug mga ansiano, nga usahay mag-alagad nga mga maghuhukom. (Mateo 24:45-47; 1 Corinto 5:12, 13; Tito 1:5, 9) Ingon nga puling mga maghuhukom, sila obligado sa pagsunod pag-ayo sa panig-ingnan sa langitnong mga Maghuhukom, si Jehova ug si Kristo Jesus.

Si Kristo​—Ang Sulundang Maghuhukom

2, 3. (a) Unsang Mesiyanikong tagna ang nagpadayag sa mga hiyas ni Kristo ingong Maghuhukom? (b) Unsang mga punto ang ilabinang angay matikdan?

² Bahin kang Kristo ingon nga Maghuhukom, sa matagnaon kini nahisulat: “Ang espiritu ni Jehova mopuyo sa ibabaw niya, ang espiritu sa kaalam ug pagsabot, ang espiritu sa pagtambag ug kagahom, ang espiritu sa kahibalo ug sa kahadlok kang Jehova; ug siya magakalipay sa kahadlok kang Jehova. Ug siya dili magahukom sumala sa panan-aw sa iyang mga mata, ni mosaway siya sumala sa mabati sa iyang mga igdulongog. Ug uban ang pagkamatarong siya magahukom sa mga kabos, ug uban ang katul-id siya magabadlong alang sa mga maaghop sa yuta.”​—Isaias 11:2-4.

³ Matikdi sa maong tagna ang mga hiyas nga nakapaarang kang Kristo sa “paghukom sa gipuy-an nga yuta diha sa pagkamatarong.” (Buhat 17:31) Siya magahukom sumala sa espiritu ni Jehova, balaang kaalam, pagsabot, pagtambag, ug kahibalo. Matikdi, usab, nga siya magahukom diha sa kahadlok kang Jehova. Busa, “ang hukmanan ni Kristo” maoy, sa hawasnon, “ang hukmanan sa Diyos.” (2 Corinto 5:10; Roma 14:10) Siya mabinantayon sa paghukom sa mga butang sumala sa paagi sa paghukom sa Diyos kanila. (Juan 8:16) Siya dili lamang magahukom sumala sa panagway o sa hungihong. Siya magahukom uban ang katul-id alang sa mga maaghop ug mga kabos. Pagkatalagsaon nga Maghuhukom! Ug pagkatalagsaon nga panig-ingnan alang sa dili-hingpit nga mga tawo nga gipaalagad sa hudisyal nga kapasidad karong adlawa!

Yutan-ong mga Maghuhukom

4. (a) Unsa ang usa sa mga buluhaton sa 144,000 panahon sa Milenyong Paghari ni Kristo? (b) Unsang tagna ang nagpakita nga ang pila ka dinihogang mga Kristohanon igatudlo nga mga maghuhukom samtang ania pa sa yuta?

⁴ Ang Kasulatan nagpaila nga diyutay ra nga dinihogang mga Kristohanon, sugod sa 12 ka apostoles, ang mahimong kaubang mga maghuhukom ni Kristo Jesus panahon sa Milenyo. (Lucas 22:28-30; 1 Corinto 6:2; Pinadayag 20:4) Ang usa ka salin sa dinihogang mga membro sa espirituwal nga Israel sa yuta mismo gihukman ug gipasig-uli sa 1918-19. (Malakias 3:2-4) Mahitungod sa maong pagpasig-uli sa espirituwal nga Israel, kini gitagna: “Igauli ko ang mga maghuhukom alang kaninyo sama sa una, ug mga magtatambag alang kaninyo sama sa sinugdan.” (Isaias 1:26) Busa, sumala sa iyang gibuhat “sa sinugdan” sa unodnong Israel, si Jehova naghatag sa napasig-uling salin sa matarong nga mga maghuhukom ug mga magtatambag.

5. (a) Kinsa ang “gibutang ingong mga maghuhukom” tapos sa pagkapasig-uli sa espirituwal nga Israel, ug giunsa sila paghulagway diha sa basahong Pinadayag? (b) Pinaagi ni kinsa ang dinihogang mga magtatan-aw karon ginatabangan sa hudisyal nga buluhaton, ug sa unsang paagi kini sila gibansay aron mahimong mas maayong mga maghuhukom?

⁵ Sa pagsugod, ang ‘mga tawong makinaadmanon’ nga “gibutang ingon nga mga maghuhukom” ngatanan maoy dinihogan nga mga ansiano. (1 Corinto 6:4, 5) Ang matinumanon, tinahod dinihogan nga mga magtatan-aw gihulagway diha sa basahong Pinadayag ingon nga gikuptan sa tuong kamot ni Jesus, nga mao, ilalom sa iyang paggahom ug pagdumala. (Pinadayag 1:16, 20; 2:1) Sukad sa 1935 ang mga dinihogan nakadawat ug maunongong pagpaluyo sa kanunay-nagauswag nga “dakong panon,” kansang paglaom mao ang paglabang-buhi sa “dakong kasakitan” ug magpuyo sa walay kataposan sa usa ka paraisong yuta. (Pinadayag 7:9, 10, 14-17) Samtang nagsingabot “ang kaminyoon sa Kordero,” dugang ug dugang kanila gitudlo sa dinihogang Nagamandong Lawas sa pag-alagad nga mga ansiano ug magahukom diha sa moabot ug 66,000 ka kongregasyon sa mga Saksi ni Jehova sa tibuok nga yuta.a (Pinadayag 19:7-9) Pinaagi sa espesyal nga mga tunghaan, sila ginabansay sa pagkupot ug responsabilidad diha sa “bag-ong yuta” nga kapunongan. (2 Pedro 3:13) Ang Tunghaan sa Ministeryo sa Gingharian, nga gidumala sa kataposan sa 1991 sa daghang nasod, nagpasiugda sa tukmang paghusay sa hudisyal nga mga kaso. Ang mga ansiano nga nagsilbing mga maghuhukom obligado sa pagsunod kang Jehova ug Kristo Jesus, kansang mga paghukom maoy matuod ug matarong.​—Juan 5:30; 8:16; Pinadayag 19:1, 2.

Mga Maghuhukom nga ‘Nagagawi nga Mahadlokon’

6. Nganong ang mga ansiano nga nagaalagad nga hudisyal nga mga komite ‘magagawi nga mahadlokon’?

⁶ Kon si Kristo mismo nagahukom sa kahadlok kang Jehova ug sa tabang sa Iyang espiritu, pagkalabaw pa nga kana himoon sa dili-hingpit nga mga ansiano! Kon itudlo sa pag-apil sa usa ka hudisyal nga komite, kinahanglang sila ‘magagawi nga mahadlokon,’ nga “magasangpit sa Amahan nga nagahukom nga walay pinalabi” aron tabangan sila sa paghukom sa minatarong. (1 Pedro 1:17) Angay silang mahinumdom nga sila nakiglabot sa mga kinabuhi sa mga tawo, sa ilang “mga kalag,” maingon kanila nga “magahatag ug husay.” (Hebreohanon 13:17) Tungod niini, tino nga magahatag usab silag husay sa atubangan ni Jehova tungod sa bisan unsa nga malikayan untang mga sayop sa paghukom nga ilang mahimo. Sa iyang komentaryo mahitungod sa Hebreohanon 13:17, si J. H. A. Ebrard misulat: “Katungdanan sa magbalantay nga bantayan ang mga kalag nga gipaatiman kaniya, ug . . . siya magahatag ug husay alang kanilang tanan, niadtong nawala usab tungod sa iyang sayop. Kini maugdang nga pulong. Ang matag ministro sa pulong angay magpalandong, nga siya sa kinabubut-on nagdawat niining [bug-at] kaayo nga katungdanan.”—Itandi ang Juan 17:12; Santiago 3:1.

7. (a) Unsay pagahinumdoman sa modernong-adlaw nga mga maghuhukom, ug unsa ang angay nga tumong nila? (b) Unsang mga pagtulon-an ang makuha sa mga ansiano gikan sa Mateo 18:18-20?

⁷ Ang mga ansiano nga nagsilbing mga maghuhukom angay mahinumdom nga ang tinuod nga mga Maghuhukom sa matag kaso mao si Jehova ug si Kristo Jesus. Hinumdomi kon unsay gisulti ngadto sa mga maghuhukom sa Israel: “Kamo dili magahukom alang sa tawo kondili alang kang Jehova; ug siya magauban kaninyo sa paghukom. Ug karon itugot nga ang kahadlok kang Jehova modangat kaninyo. . . . Kini ang inyong pagabuhaton aron kamo dili mahimong sad-an.” (2 Cronicas 19:6-10) Tungod sa balaanong kahadlok, ang mga ansiano nga magahukom sa usa ka kaso magabuhat sa ilang maarangan sa pagtino nga si Jehova sa pagkatinuod ‘nagauban kanila sa paghukom.’ Ang ilang desisyon angay sa tukma magsumbalik-silaw sa paagi sa pagtagad ni Jehova ug Kristo sa maong butang. Ang butang nga sa simboliko ‘gigapos’ (nakaplagan nga sad-an) o ‘gibadbaran’ (nakaplagan nga walay sala) sa yuta angay mao ang butang nagapos na o nabadbaran sa langit​—sumala sa gipadayag sa kon unsay nahisulat diha sa dinasig nga Pulong sa Diyos. Kon sila moampo kang Jehova diha sa ngalan ni Jesus, si Jesus maanaa “sa ilang taliwala” aron sa pagtabang kanila. (Mateo 18:18-20, potnot; Ang Bantayanang Torre, Pebrero 15, 1988, panid 9) Ang atmospera sa panahon sa hudisyal nga husay angay magpakita nga si Kristo sa pagkatinuod anaa sa ilang taliwala.

Bug-os-Panahong mga Magbalantay

8. Unsa ang pangunang responsabilidad sa mga ansiano ngadto sa panon maingon sa gipasundayag ni Jehova ug Jesu-Kristo? (Isaias 40:10, 11; Juan 10:11, 27-29)

⁸ Ang mga ansiano wala magahukom sa bug-os-panahon. Sila maoy bug-os-panahong mga magbalantay. Sila maoy mga mananambal, dili mga magsisilot. (Santiago 5:13-16) Ang pasukaranang ideya luyo sa Gregong pulong alang sa magtatan-aw (e·piʹsko·pos) maoy mapanalipdanong pag-atiman. Ang Theological Dictionary of the New Testament nagaingon: “Nga nagaabag sa magbalantay [sa 1 Pedro 2:25], ang termino [e·piʹsko·pos] nagasugyot sa pastoral nga buluhaton sa pagtan-aw o pagbantay.” Oo, ang ilang pangunang responsabilidad mao ang pagtan-aw sa mga karnero ug pagbantay kanila, paghupot kanila sulod sa toril.

9, 10. (a) Giunsa sa pagpasiugda ni Pablo ang unang katungdanan sa mga ansiano, busa unsang pangutana ang ikasukna? (b) Unsay ipasabot sa mga pulong ni Pablo sa Buhat 20:29, busa sa unsang paagi kaha ang mga ansiano maningkamot sa pagpaus-os sa gidaghanon sa hudisyal nga mga kaso?

⁹ Sa pagpakigsulti ngadto sa mga ansiano sa kongregasyon sa Efeso, si apostol Pablo nagbutang sa pasiugda sa dapit diin angay kini: “Tagda ang inyong kaugalingon ug ang tibuok nga panon, nga taliwala niana gitudlo kamo sa balaang espiritu nga mga magtatan-aw, aron sa pagbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.” (Buhat 20:28) Si Pablo nagapasiugda sa pagbantay, dili sa pagsilot. Ang pila ka ansiano maayo nga mamalandong sa mosunod nga pangutana: ‘Madaginot ba nato ang dakong panahon nga gikinahanglan sa pag-imbestigar ug paghusay sa mga kaso kon gideboto nato ang mas daghang panahon ug kahago sa pagbantay?’

¹⁰ Tinuod, si Pablo nagpasidaan batok sa “malupigong mga lobo.” Apan wala ba niya badlonga sila tungod sa ‘dili pagtagad sa panon uban sa kalumo’? (Buhat 20:29) Ug bisan tuod iyang gipasabot nga ang matinumanong mga magtatan-aw angay magpalagpot sa maong “mga lobo,” dili ba ang iyang mga pulong nagapakita nga ang mga ansiano angay magatratar sa ubang sakop sa panon “uban sa kalumo”? Sa diha nga ang usa ka karnero maluya sa espirituwal ug mapukan sa daplin sa dalan, unsa ang iyang gikinahanglan​—pagbunal o pagtambal, pagsilot o pag-atiman? (Santiago 5:14, 15) Busa, ang mga ansiano kinahanglang sa makanunayon moeskedyul ug panahon alang sa pag-atiman nga buluhaton. Kini mahimong modala sa malipayong sangpotanan sa dili daghang panahon nga igugol diha sa hudisyal nga mga kaso nga naglangkit sa mga Kristohanong hiapsan sa sala. Sa pagkatinuod, kinahanglang ang unang kabalak-an sa mga ansiano mao ang pagtaganag tinubdan sa kahupayan ug karepresko, mao nga mopasiugda sa kalinaw, kahapsay, ug seguridad taliwala sa katawhan ni Jehova.​—Isaias 32:1, 2.

Mag-alagad Ingong Maayohong mga Magbalantay ug mga Hukom

11. Nganong ang mga ansiano nga nagaalagad nga hudisyal nga mga komite nagkinahanglan sa pagkawalay-pinalabi ug sa “kaalam gikan sa itaas”?

¹¹ Ang dako pang pag-atiman una mahiligas ang usa ka Kristohanon mahimong makapaus-os sa gidaghanon sa hudisyal nga mga kaso taliwala sa katawhan ni Jehova. (Itandi ang Galacia 6:1.) Bisan pa niana, tungod sa tawhanong sala ug pagkadili-hingpit, ang Kristohanong mga magtatan-aw basin matag karon ug unya kinahanglang mohusay ug mga kaso sa buhat nga daotan. Unsang mga prinsipyo ang magagiya kanila? Kini wala mausab sukad sa panahon ni Moises o sa iya sa unang mga Kristohanon. Ang mga pulong ni Moises nga gitumong sa mga maghuhukom sa Israel angayan gihapon: “Sa diha nga may paghusay tali sa inyong mga igsoon, kamo magahukom sa minatarong . . . Dili kamo magpili ug tawo sa inyong paghukom.” (Deuteronomio 1:16, 17) Ang pagkawalay-pinalabi maoy kinaiyahan sa “kaalam gikan sa itaas,” ang kaalam nga hinungdanon kaayo alang sa mga ansiano nga nagsilbing hudisyal nga mga komite. (Santiago 3:17; Proverbio 24:23) Ang maong kaalam motabang nila sa pag-ila sa kalainan tali sa kahuyangan ug sa tumang pagkadaotan.

12. Sa unsang diwa ang mga maghuhukom kinahanglan nga dili lamang mga tawong matarong kondili mga tawong maayo?

¹² Ang mga ansiano “kinahanglang magahukom sa minatarong,” sumala sa mga sukdanan ni Jehova sa matarong ug daotan. (Salmo 19:9) Bisan pa, samtang naningkamot nga mahimong mga tawong matarong, angay usab silang maningkamot nga mahimong mga tawong maayo, sa diwa sa pagpalahi nga ginahimo ni Pablo sa Roma 5:7, 8. Sa pagkomento mahitungod niining mga bersikuloha diha sa artikulo niini bahin sa “Pagkamatarong,” ang basahong Insight on the Scriptures nagaingon: “Ang paggamit sa Gregong termino nagpakita nga ang tawo nga ilado, o mailhan pinaagi sa, pagkamaayo mao siya nga buotan (mahiligon sa pagbuhat ug maayo o makahatag kaayohan sa uban) ug matinabangon (aktibong nagapahayag sa maong pagkamaayo). Siya dili lang mabalak-on sa pagbuhat kon unsay gikinahanglan sa hustisya apan mosobra pa niini, kay gitukmod sa konsiderasyon alang sa uban ug sa tinguha nga makabenepisyo ug makatabang kanila.” (Tomo 2, panid 809) Ang mga ansiano nga dili lang matarong apan maayo usab magatratar sa mga mamumuhat ug daotan nga may konsiderasyon. (Roma 2:4) Gusto gayod nilang magpakita ug kaluoy ug kahangawa. Kinahanglang buhaton nila ang ilang maarangan sa pagtabang sa mamumuhat ug daotan nga makakita sa panginahanglan sa paghinulsol, ngani bisan siya tingali sa sinugdanan morag walay pagsanong sa ilang mga paningkamot.

Tukmang Tinamdan Panahon sa mga Paghusay

13. (a) Sa dihang ang usa ka ansiano magaalagad nga usa ka maghuhukom, siya wala mohunong sa pagkaunsa? (b) Unsang tambag ni Pablo ang mapadapat usab panahon sa hudisyal nga mga paghusay?

¹³ Sa dihang ang usa ka kahimtang magkinahanglan ug hudisyal nga paghusay, ang mga magtatan-aw angay dili malimot nga sila maoy mga magbalantay gihapon, nga nakiglabot sa mga karnero ni Jehova, ubos sa “maayong magbalantay.” (Juan 10:11) Ang tambag nga gihatag ni Pablo alang sa regular nga tabang nga gihatag ngadto sa mga karnero nga may suliran mapadapat uban ang samang gibug-aton sa panahon sa hudisyal nga mga paghusay. Siya misulat: “Mga igsoon, bisan pag ang usa ka tawo mahiligas sa dili pa siya makaamgo niana, kamo nga adunay espirituwal nga mga katakos maningkamot sa pagpasibo sa maong tawo sa espiritu sa kalumo, samtang ang matag usa kaninyo magabantay sa inyong kaugalingon, kay basi kamo usab matental. Magpadayon kamo sa pagpas-an sa mga lulan sa matag usa, ug sa ingon magatuman sa kasugoan ni Kristo.”​—Galacia 6:1, 2.b

14. Unsaon pag-isip sa mga magtatan-aw ang hudisyal nga mga paghusay, ug angay unsa ang ilang tinamdan bahin sa usa ka mamumuhat ug daotan?

¹⁴ Inay isipon ang ilang kaugalingon nga superyor nga mga maghuhukom nga nagtagbo aron ipadapat ang silot, ang mga ansiano nga nagaalagad sa hudisyal nga komite angay mag-isip sa paghusay ingon nga laing bahin sa ilang buluhaton sa pagkamagbalantay. Usa sa mga karnero ni Jehova may suliran. Unsay ilang mahimo sa pagtabang kaniya? Ulahi na ba kaayo ang pagtabang niining karnero nga nahisalaag gikan sa panon? Laoman nato nga dili. Ang mga ansiano kinahanglang maghupot ug positibong panlantaw sa pagpakita ug kaluoy diin kini haom. Dili ingon nga paubson nila ang mga sukdanan ni Jehova kon nakomitir ang usa ka grabeng sala. Apan ang ilang pagkamahunahunaon sa bisan unsang makapagaan sa silot nga mga kahimtang motabang nila sa pagpakitag kaluoy kon mahimo. (Salmo 103:8-10; 130:3) Ikasubong isulti, ang pila ka mamumuhat ug daotan gahian kaayo sa ilang tinamdan nga ang mga ansiano obligado sa pagpakitag kalig-on, bisan tuod dili gayod sa kapintas.​—1 Corinto 5:13.

Ang Katuyoan sa Hudisyal nga mga Paghusay

15. Sa dihang motungha ang seryosong suliran tali sa mga indibiduwal, unsay pagatinoon una?

¹⁵ Sa diha nga motungha ang usa ka seryosong suliran tali sa mga indibiduwal, ang maalamong mga ansiano magtino una kon kaha kadtong nalangkit nagsulay sa paghusay sa butang sa pribado, sa diwa sa Mateo 5:23, 24 o Mateo 18:15. Kon napakyas kini, tingali ang tambag pinaagi sa usa o duha ka ansiano igo na. Ang hudisyal nga aksiyon kinahanglanon lamang kon ang nahimong sala dako nga motultol sa pagpalagpot. (Mateo 18:17; 1 Corinto 5:11) Kinahanglang adunay lig-on Kasulatanhong pasikaranan sa pagporma ug hudisyal nga komite. (Tan-awa ang Bantayanang Torre, Septiyembre 15, 1989, panid 18.) Sa dihang usa ang naporma, ang labing kalipikado nga mga ansiano ang angayng pilion alang sa partikular nga kaso.

16. Unsay gipaningkamotan sa mga ansiano nga makab-ot pinaagi sa hudisyal nga mga paghusay?

¹⁶ Unsay gisulayan sa mga ansiano sa pagkab-ot pinaagi sa hudisyal nga mga paghusay? Nahauna, imposible ang paghukom sa minatarong gawas kon nasayran ang kamatuoran. Sama didto sa Israel, ang seryosong mga butang kinahanglang ‘sa bug-os masusi.’ (Deuteronomio 13:14; 17:4) Busa usa ka tumong sa paghusay mao ang pagsusi sa mga panghitabo sa kaso. Apan kini mahimong buhaton ug pagabuhaton uban sa gugma. (1 Corinto 13:4, 6, 7) Sa dihang masayran na ang mga panghitabo, buhaton sa mga ansiano kon unsay gikinahanglan aron sa pagpanalipod sa kongregasyon ug paghupot niini sulod sa hatag-as nga mga sukdanan ni Jehova ug sa libreng pag-agos sa iyang espiritu. (1 Corinto 5:7, 8) Ugaling lang, ang usa sa mga katuyoan sa paghusay mao ang pagluwas, kon posible ugaling, sa usa ka nameligrong makasasala.​—Itandi ang Lucas 15:8-10.

17. (a) Sa unsang paagi pagatratahon ang tawong gisumbong panahon sa paghusay, ug uban sa unsang katuyoan? (b) Kini magkinahanglan ug unsa sa bahin sa mga sakop sa hudisyal nga komite?

¹⁷ Ang usa ka tawong gisumbong dili gayod pagatratahon nga daw siya dili usa ka karnero sa Diyos. Siya pagatratahon uban sa kalumo. Kon nahimo ang usa ka sala (o mga sala), ang katuyoan sa matarong nga mga maghuhukom mao ang pagtabang sa makasasala sa pagpasibo, sa pagsabot sa kasayop sa iyang dalan, sa paghinulsol, ug sa ingon masakmit gikan sa “lit-ag sa Yawa.” Kinahanglan kinig “arte sa pagtudlo,” “nga magatudlo uban sa kalumo.” (2 Timoteo 2:24-26; 4:2) Unsa naman kon ang makasasala unya modawat nga siya nakasala, tinuod nga mibatig kasakit sa kasingkasing, ug mangayog pasaylo kang Jehova? (Itandi ang Buhat 2:37.) Kon ang komite nakombinsir nga siya sa sinsero buot matabangan, sa kasagaran wala nay panginahanglan sa pagpalagpot kaniya.​—Tan-awa ang Bantayanang Torre, Enero 1, 1983, panid 31, parapo 1.

18. (a) Kanus-a ang hudisyal nga komite magpakitag kalig-on sa pagpalagpot sa usa ka mamumuhat ug daotan? (b) Tungod sa unsang makapaguol nga kahimtang nga ang mga ansiano manlimbasog alang sa nahisalaag nga karnero?

¹⁸ Sa laing bahin, sa dihang ang mga membro sa usa ka hudisyal nga komite moatubang sa tin-awng kaso sa walay-paghinulsol nga apostasiya, tinuyong pagrebelde batok sa mga balaod ni Jehova, o tuman nga pagkadaotan, ang ilang katungdanan mao ang pagpanalipod sa ubang mga sakop sa kongregasyon pinaagi sa pagpalagpot sa dili-mahinulsolong nakasala. Ang hudisyal nga komite dili obligado sa sublisubli nga pagpakigkita uban sa nakasala o sa pagtudlo kaniya kon unsay isulti, sa pagsulay ug pugos kaniya sa paghinulsol, kon kana dayag nga siya walay diyosnong pagkasubo.c Sa bag-o pang katuigan ang mga pagpalagpot sa tibuok nga kalibotan hapit 1 porsiento sa mga magmamantala. Kana nagkahulogan nga sa mga usa ka gatos ka karnero nga nagpabilin sa toril, usa ang nawala​—labing menos sa temporaryo. Sa pagpalandong sa panahon ug kahago nga kinahanglanon aron pasudlon ang usa ka tawo sa toril, dili ba makapaguol ang pagkahibalo nga tinagpulo ka libo ang ‘gitugyan balik kang Satanas’ kada tuig?​—1 Corinto 5:5.

19. Unsay angay dili gayod kalimtan sa mga ansiano nga nagaalagad nga hudisyal nga komite, busa unsa man ang ilang tumong?

¹⁹ Ang mga ansiano nga nagsugod sa usa ka hudisyal nga kaso angay maghinumdom nga ang kadaghanang kaso sa pagpakasala diha sa kongregasyon naglangkit sa kahuyangan, dili sa tumang pagkadaotan. Sila angay dili malimot sa sambingay ni Jesus mahitungod sa karnero nga nawala, nga iyang gitapos pinaagi sa mga pulong: “Ako magaingon kaninyo nga sa maong paagi adunay labaw nga kalipay sa langit tungod sa usa ka makasasala nga naghinulsol kay sa tungod sa kasiyaman-ug-siyam nga wala magkinahanglan ug paghinulsol.” (Lucas 15:7) Sa pagkatinuod, “si Jehova . . . dili buot nga may malaglag kondili buot nga ang tanan mahidangat sa paghinulsol.” (2 Pedro 3:9) Uban sa tabang ni Jehova, hinaot ang hudisyal nga mga komite sa tibuok nga kalibotan mobuhat sa ilang maarangan nga mahitabo ang kalipay sa langit pinaagi sa pagtabang sa mga mamumuhat ug daotan sa pagkasabot sa panginahanglan sa paghinulsol ug pagsubay sa ilang mga lakang balik sa pig-ot nga dalan nga motultol sa kinabuhing walay kataposan.​—Mateo 7:13, 14.

[Mga footnote]

Mga Pangutana sa Pagsubli

◻ Sa pagsunod sa panig-ingnan sa Dakong Magbalantay ug sa Maayong Magbalantay, unsa ang angay pangunang interes sa mga ansiano?

◻ Sa unsang paagi ang mga ansiano makapaningkamot sa pagpaus-os sa gidaghanon sa hudisyal nga mga kaso?

◻ Sa unsang diwa ang mga maghuhukom kinahanglan dili lamang matarong kondili maayo usab?

◻ Sa unsang paagi ang mamumuhat ug daotan pagatratahon panahon sa paghusay, ug uban sa unsang katuyoan?

◻ Nganong ang pagpalagpot mao ang pangataposang aksiyon?

[Hulagway sa panid 16]

Diin gihimo pag-una ang pagbantay, daghang hudisyal nga mga kaso ang mahimong malikayan

[Hulagway sa panid 18]

Bisan panahon sa hudisyal nga paghusay, ang mga ansiano angay maningkamot sa pagpasibo sa usa ka mamumuhat ug daotan diha sa espiritu sa kalumo