Mga Magmamantala sa Gingharian Nagtaho
Ang Kamatuoran sa Bibliya “Gamhanan”
KINING kalibotana nagagugol ug dako kaayong panahon ug salapi sa paningkamot sa pagkontrolar sa mga lihok sa mga tawong daotan. Ang mga balaod gihimo batok sa mga krimen sama sa pag-abusar sa droga, pangawat, ug pagbuno; apan kining mga balaora dili makapamaayo sa mga tawong daotan. Sa laing bahin, ang Pulong sa Diyos, ang Bibliya, may gahom sa pagpabag-o, ug ang mga tawong nagapadapat sa mga balaod ug mga prinsipyo niini mahimong matul-id, matinud-anon, ug malumong mga tawo.—Roma 12:2.
◻ Pananglitan, duha ka Saksi sa Australia mibalik sa pagduaw sa ubay-ubayng batan-on, way-trabahong mga lalaki. Sa pagsulod nila sa balay nga gipuy-an sa mga lalaki, sila nakasulod sa ngitngit, punog-asong kuwarto. Dihay mga gamit sa marijuana ibabaw sa lamesa ug dagkong mga poster sa rock nga mga maglilingaw nga gipapilit sa mga bungbong. Ubay sa usa ka kilid sa kuwarto mao ang dagko kaayong mga amplipayer sa dekoryenteng mga sista. Kadto kuwarto diay nga bansayanan sa bandang rock. Nakasugod silag pagtuon sa Bibliya uban sa tulo sa maong mga lalaki nga managsoon sa unod. Pila ka tuig nga miagi ang ilang inahan nakatuon sa Bibliya kauban sa mga Saksi, ug sa tabang sa librong Ikaw Mabuhing Walay Kataposan sa Paraiso sa Yuta, iyang natudloan ang mga batang lalaki mahitungod sa saad sa Diyos sa umaabot nga paraiso. Dayon mibalhin ang pamilya, ug nahunong ang pagtuon. Karon, nga nabag-o ang ilang gugma sa kamatuoran, sila giduyogan sa wala madugay sa duha ka higala sa ilang pagtuon.
Sa tulo ka bulan, usa kanila nagsangyaw na, ug usa ka bulan sa ulahi siya giduyogan sa duha pa. Gibiyaan nila ang banda, ug sa upat ka bulan, silang tulo nakig-ambit sa buluhatong pagwali. Kasamtangan, ang ilang inahan, manghod nga lalaki, ug magulang minyong igsoong babaye misugod sa pagtuon sa Bibliya. Sa wala madugay human niadto ang laing higala mihangyo sa usa ka pagtuon sa Bibliya. Pagkamakalipay ang pagtan-aw kanilang lima nga gibawtismohan sa samang adlaw sa usa ka sirkitong asembliya! Duha pa ang nagabuhat padulong sa bawtismo, samtang ang inahan ug anak babaye nagapadayon sa paghimog maayong progreso. Sa pagkamatuod, ang Pulong sa Diyos gamhanan.
◻ Usa ka lalaki sa Argentina may empliyado nga tapolan ug limbongan ug dako niyag utang. Unya katuigan sa ulahi sa dalan duol sa iyang balay, nahibala sa lalaki ang kanhi niyang empliyado. Ang kanhi-empliyado mitimbaya kaniya, nga miingon: “Nagpadulong ako sa inyong balay aron bayran ko ikaw sa kuwartang akong nautang kanimo. Ania ang imong kuwarta. Salamat kaayo, ug pasayloa intawon ako nga wala ka nako kabayri dayon.” Kay natingala, ang lalaki nangutana kaniya nganong iyang gibuhat kadto. Mitubag siya: “Ako nagatuon na karon sa Bibliya, ug ako usa sa mga Saksi ni Jehova. Ang Bibliya nagaingon nga dili kita angay mangutang kang bisan kinsa gawas sa gugma. Mao kanay hinungdan akong gibalik kon unsay imoha.” Ang lalaki nangutana: “Unsa bay gahom sa Bibliya nga magpatunghag dakong kausaban diha sa usa ka tawo?” Nasugdan ang usa ka pagtuon sa Bibliya uban kaniya, ug karon siya nagatuon na usab sa kamatuoran, ang tanan tungod sa dakong kausaban nga gihimo sa kamatuoran sa Bibliya diha sa kanhi niya empliyado.
Daghang mga tawong buotan ug kasingkasing sa Argentina nagadawat sa makapagbag-o nga kamatuoran sa Bibliya ug nagausab sa ilang paagi sa kinabuhi, sumala sa gipakita sa mosunod nga kasinatian.
◻ “Usa ka adlaw samtang nanuktok kami sa usa ka pultahan samtang nagsangyaw,” miasoy ang usa ka Saksi, “nakadungog kamig mga singgit gikan sa sulod sa balay. Sa pagtubag sa among panuktok, ang usa ka lalaki migawas—nga labihang sukoa. Gisugdan namo ang pagsaysay sa katuyoan sa among pagduaw, apan gibaharan niya kaming iya kaming palayason gikan sa iyang propiedad. Nagpadayon kami sa pagsulting hinay ug kalmado. Sa anam-anam siya mikalma. Sa pagmatikod niadto, amo siyang gisaysayan bahin sa kahibulongang katuyoan ni Jehova alang sa katawhan. Kay nahibulong niadto, gipakalitan kami sa tawo sa pag-ingon: ‘Gipadala kamo dinhi sa Diyos.’ dayon iya kaming gipadayon sa balay. Didto, nga nagtapok sa usa ka suok sa balay, mao ang iyang ‘asawa’ ug mga anak, nga nanghilak. Dayon siya misugid: ‘Sa inyong pag-abot, hapit ko nang patyon ang akong pamilya ug ang akong kaugalingon. Ako nawad-ag paglaom! Nawad-an akog trabaho, ug karon kami papahawaon pa gikan sa among balay, uga ako daghag utang nga bayranan.’”
Kining kasinatiana may malipayong kataposan. Ang usa ka igsoong babaye nakakitag trabaho alang sa lalaki, ug siya nakakuhag laing balay. Siya ug ang iyang “asawa” misugod sa pagtuon sa Bibliya ug nagpakasal tapos sa pag-ipon sa 15 anyos.
Ang kamatuoran sa Bibliya “gamhanan” sumala sa gipakita niining mga kasinatiana, ug kini maoy ingon alang kang bisan kinsa nga may mapaubsanong kasingkasing nga motuon sa Bibliya ug magpadapat niini.
[Kahon sa panid 7]
“Ang pulong sa Diyos buhi ug gamhanan.”—HEBREO 4:12