Masagubang Nimo ang Pagkawalay-Katinoan
“SEGURADO!” “Tinuod gayod!” “Garantisado!” Tingali makadaghan ka nang nakadungog niining mga pulonga. Apan, diha sa atong adlaw-adlaw nga pagkinabuhi, walay bisan unsa nga atong ikapaneguro. Ang kinabuhi dili gayod matag-an nga tungod niana kita sagad mahibulong kon duna ba gayoy butang nga kita bug-os nga makapaneguro. Ang pagduhaduha ug pagkawalay-katinoan daw nahimo nang bahin sa kinabuhi.
Siyempre, ang kadaghanang tawo nangandoy ug kasegurohan ug kalipay alang sa ilang kaugalingon ug sa ilang pamilya. Sila nagkugi pag-ayo aron makabaton ug mga butang nga ilang gituohan nga makapalipay ug makahatag kanila ug kasegurohan—kasagaran salapi ug materyal nga mga kabtangan. Apan, ang linog, bagyo, aksidente, o mapintas nga krimen makapapha dihadiha sa maong mga kabtangan. Ang grabeng sakit, diborsiyo, o pagkawalay-trabaho kalit nga makabag-o sa mga kinabuhi. Tinuod, dili tingali kini mahitabo kanimo. Apan, ang pagkasayod lamang nga ang usa ka daotang butang puwedeng mahitabo sa bisan unsang panahon maoy usa ka makapatugaw ug makapaguol nga pagbati. Apan dili lang kana ang problema.
Ang pagkawalay-katinoan kaamgid sa pagduhaduha, ug gihubit sa usa ka diksiyonaryo ang “pagduhaduha” ingong “pagkawalay-katinoan sa pagtuo o opinyon nga kasagarang motungha panahon nga mohimog desisyon.” Dugang pa, sumala sa librong Managing Your Mind, “ang pagkawalay-katinoan bahin sa usa ka importanteng butang maoy usa ka pangunang hinungdan sa kabalaka ug kaguol.” Ang pagduhaduha nga dili-masulbad moresulta ug kabalaka, kahigawad, ug kasuko. Oo, ang pagkabalaka nga posibleng mahitabo o dili mahitabo makadaot sa atong mental ug pisikal nga panglawas.
Tungod niini, ang ubang mga tawo maghingapin. Sila nahisama sa usa ka batan-on nga taga-Brazil kinsa miingon: “Nganong mabalaka kon unsay mahitabo? Angay lamang natong kabalak-an ang sa karon, dili ang sa umaabot.” Ang maong mapanimpalaron “mangaon kita ug manginom” nga tinamdan mosangpot lamang ug kahigawad, kaguol, ug sa ngadtongadto kamatayon. (1 Corinto 15:32) Mas maayo pang modangop kita sa Maglalalang, si Jehova nga Diyos, nga bahin kaniya ang Bibliya nag-ingon, “walay pagkausab sa pagbahin sa landong.” (Santiago 1:17) Kon atong susihon ang Pulong sa Diyos, ang Bibliya, kita makakitag maayong tambag ug giya bahin sa kon sa unsang paagi masagubang ang pagkawalay-kasegurohan sa kinabuhi. Kini motabang usab kanato sa pagsabot kon nganong daghan kaayong mga butang nga walay-katinoan.
Hinungdan sa Pagkawalay-Katinoan
Ang Kasulatan nagtaganag realistikanhong panglantaw sa kinabuhi ug motabang kanato sa pag-ugmad ug hustong tinamdan sa pagkawalay-katinoan ug kausaban. Bisan tuod ang mga paryente, pagkabutang diha sa katilingban, kinaadman, maayong panglawas, ug uban pa tingali mohatag ug usa ka sukod sa kasegurohan, ang Bibliya nagpakita nga dili nato mahimong madahom nga dili mausab kining mga butanga o kita magdahom nga kanunayng maayo ang atong kinabuhi. Ang maalamong Haring Solomon miingon: “Ang lumba dili alang sa mga matulin, ni ang gubat alang sa mga gamhanan, ni ang pagkaon alang sa mga maalamon, ni ang mga bahandi alang sa mga masinaboton, ni ang pabor alang kanilang adunay kahibalo.” Nganong dili? “Tungod kay ang panahon ug ang wala damhang panghitabo modangat kanilang tanan.” Busa, si Solomon nagpasidaan: “Ingon sa mga isda nga nasikop sa daotang pukot, ug sama sa mga langgam nga nabitik sa usa ka bitik, mao man usab ang mga anak sa mga tawo nalit-agan sa malisod nga panahon, sa dihang kini kalit nga modangat kanila.”—Ecclesiastes 9:11, 12.
Si Jesu-Kristo usab naghisgot bahin sa usa ka panahon nga mobati ug grabeng kabalaka ug kawalay-katinoan ang tibuok kalibotan sa katawhan. Sa tin-aw kaayong pinulongan, siya miingon: “Aduna unyay mga ilhanan sa adlaw ug sa bulan ug sa mga bituon, ug sa ibabaw sa yuta tumang kasakit sa kanasoran, nga wala mahibalo sa kalingkawasan tungod sa pagdinaguok sa dagat ug pagkabaloron niini, samtang ang mga tawo panguyapan sa kahadlok ug sa pagpaabot sa mga butang nga mahitabo diha sa gipuy-ang yuta; kay ang mga gahom sa mga langit mangatay-og man.” Bisan pa niana, si Jesus naghisgot ug usa ka butang nga makapadasig alang sa matinud-anon-ug-kasingkasing nga mga tawo karon: “Sa dihang makita ninyo nga nagakahitabo kining mga butanga, hibaloi nga ang gingharian sa Diyos haduol na.” (Lucas 21:25, 26, 31) Sa susama, imbes mahadlok tungod sa walay-kasegurohan nga umaabot, kita may pagsalig sa Diyos nga motabang kanato sa pagtan-aw luyo sa pagkawalay-katinoan ngadto sa usa ka maanindot, may kasegurohang umaabot.
‘Nakabaton sa Bug-os nga Pasalig sa Paglaom’
Bisan pag dili kita makatino bahin sa tanang butang nga atong madungog, mabasa, o makita, kita may maayong katarongan sa pagsalig sa Maglalalang. Siya dili lamang ang bugtong Usa nga Supremo kondili usab siya maoy usa ka mahigugmaong Amahan nga nagtagad sa iyang yutan-ong mga anak. Bahin sa iyang kaugalingong pulong, ang Diyos nag-ingon: “Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”—Isaias 55:11.
Si Jesu-Kristo nagtudlo sa kamatuoran bahin sa Diyos, ug daghan niadtong namati kaniya midawat niana nga may pagsalig ug may katinoan. Pananglitan, gisultihan sa usa ka grupo sa matinud-anon-ug-kasingkasing nga mga Samarianhon ang babaye nga unang namati kang Jesus: “Kami nagtuo dili na tungod sa imong gisulti; kay kami mismo nakadungog ug kami nahibalo nga kining tawhana mao gayod ang manluluwas sa kalibotan.” (Juan 4:42) Sa susama usab karon, bisan pa nga nagkinabuhi sa panahon nga walay-kasegurohan, kita dili kinahanglang maglibog sa kon unsay tuohan.
Kon bahin sa relihiyosong mga pagtulon-an, daghan ang nagtuo nga imbes maningkamot nga makasabot, kita kinahanglang motuo na lang. Apan, ang magsusulat sa Bibliya nga si Lucas wala mouyon nianang maong opinyon. Siya nanukiduki ug naghatag ug tukmang impormasyon aron ang uban ‘bug-os mahibalo sa pagkatino sa mga butang’ nga iyang gisulat. (Lucas 1:4) Sanglit ang pamilya ug mga higala nga dili sama nato ug pagtuo mabalaka nga mawad-an unya kita ug paglaom ug mahigawad, hinungdanon nga kita mahibalong modepensa sa atong pagtuo. (1 Pedro 3:15) Pinaagi lamang sa pagbaton ug tukmang kahibalo sa katarongan kon unsa ang atong gituohan nga kita makatabang sa uban sa pagsalig sa Diyos. Gihubit sa Bibliya si Jehova niining mga pulonga: “Ang Bato, hingpit ang iyang kalihokan, kay ang tanan niyang dalan hustisya. Usa ka Diyos sa pagkamatinumanon, nga kaniya walay inhustisya; matarong ug matul-id siya.”—Deuteronomio 32:4.
Tagda kanang kataposang pulong: “Matarong ug matul-id siya.” Unsay atong pamatuod nga kini tinuod? Si apostol Pedro kombinsido gayod niana nga kamatuorana. Iyang giingnan ang usa ka opisyal nga Romano ug ang iyang panimalay: “Tinong naila ko nga ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buhat 10:34, 35) Gisulti ni Pedro kining mga pulonga tungod kay siya nakakita kon sa unsang paagi gigiyahan sa Diyos ang mga kahimtang aron ang usa ka pamilya sa mga Hentil, nga giisip kanhi nga mahugaw ug dili-dalawaton, nahimong dalawaton Kaniya. Sama kang Pedro, kita usab mahimong makombinsir nga ang Diyos walay-pagpihig ug matarong sa dihang atong makita mismo sa atong mga mata ang “dakong panon” sa katawhan—sayis milyones—gikan sa kapin sa 230 ka kayutaan sa tibuok kalibotan nga mibiya sa ilang nangaging dalan sa kinabuhi ug naglakaw na diha sa dalan sa pagkamatarong.—Pinadayag 7:9; Isaias 2:2-4.
Ingong tinuod nga mga Kristohanon, kita buot nga mahimong dili panatiko o dogmatiko, kondili mapaubsanon ug makataronganon. Bisan pa niana, kita tino sa atong gituohan ug kon unsay atong dahomon sa umaabot. Ngadto sa unang-siglong mga Kristohanon, si apostol Pablo nagsulat: “Kami nagtinguha nga ang matag usa kaninyo magpakita sa samang kakugi aron makabaton sa bug-os nga pagsalig sa paglaom hangtod sa kataposan.” (Hebreohanon 6:11) Sa susama, ang maayong balita gikan sa Bibliya naghatag kanato ug “bug-os nga pagsalig sa paglaom.” Kana nga paglaom, nga bug-os nga gipasukad sa Pulong sa Diyos, “dili motultol sa pagkahigawad,” sama sa gipatin-aw usab ni Pablo.—Roma 5:5.
Dugang pa, kita bug-os nga kombinsido nga ang pagtudlo sa uban sa maayong balita sa Bibliya mohatag kanila ug kasegurohan ug katinoan sa espirituwal nga paagi, ug bisan sa emosyonal ug sa pisikal. Kita makaduyog kang Pablo sa pag-ingon: “Ang maayong balita nga among giwali wala makaplagi sa inyong taliwala uban ang mga sulti lamang apan usab uban ang gahom ug uban ang balaang espiritu ug hugot nga pagtuo.”—1 Tesalonica 1:5.
Mga Panalanging Nadawat Karon Agig Resulta sa Espirituwal nga Kasegurohan
Bisan tuod ug dili kita makalaom ug bug-os nga kasegurohan sa kinabuhi karon, dunay mga butang nga atong mahimo nga motabang kanato sa pagsubay ug medyo malig-on ug may kasegurohang kinabuhi. Pananglitan, ang pagpakig-uban kanunay sa Kristohanong kongregasyon diha sa mga tigom makahatag ug kalig-on tungod kay didto kita ginatudloan kon unsa ang husto ug matarong nga mga prinsipyo ug mga kalagdaan sa pamatasan. Si Pablo nagsulat: “Sugoa ang mga dato niini nga sistema sa mga butang nga dili magmapahitas-on sa kaisipan, ug magbutang sa ilang paglaom, dili sa walay-kasegurohang bahandi, kondili sa Diyos, nga dagayang naghatag kanato sa tanang butang aron atong pagakalipayan.” (1 Timoteo 6:17) Pinaagi sa pagtuon sa pagbutang sa ilang pagsalig kang Jehova ug dili sa lumalabay nga materyal nga mga butang o mga kalingawan, daghan ang nakahimo sa pagwagtang gikan sa ilang kaugalingon sa mga kabalaka ug mga kahigawad nga ilang giantos kaniadto.—Mateo 6:19-21.
Diha sa kongregasyon, gitagamtam usab nato ang mainiton nga panag-igsoonay, nga mohatag ug tabang ug pagpaluyo sa daghang paagi. Sa usa ka higayon sa iyang ministeryo, si apostol Pablo ug ang iyang nagapanawng mga kauban mibati ug “hilabihang pagpiot” ug “wala-makatino bisan sa [ilang] kinabuhi.” Diin nakakita si Pablo ug pagpaluyo ug kahupayan? Siyempre, ang iyang pagsalig sa Diyos malig-on gayod. Bisan pa niana, siya nadasig ug nahatagan ug kahupayan sa mga isigka-Kristohanon nga mitabang kaniya. (2 Corinto 1:8, 9; 7:5-7) Karon kon may mahitabong kinaiyanhong mga katalagman o ubang mga kalamidad, sa makadaghan ang atong Kristohanong mga igsoon mao ang unang moabot sa paghatag sa gikinahanglang tabang sa materyal ug sa espirituwal ngadto sa mga isigka-Kristohanon maingon man sa uban nga nanginahanglan.
Laing paagi nga madawat ang tabang sa pag-atubang sa pagkawalay-katinoan sa kinabuhi mao ang pag-ampo. Kita sa tanang panahon makadangop sa atong mahigugmaong langitnong Amahan ilalom sa wala damha nga kalisod. “Si Jehova mahimong usa ka luwas nga hataas nga dapit alang sa dinaogdaog, usa ka luwas nga hataas nga dapit sa mga panahon sa kasakit.” (Salmo 9:9) Ang tawhanong mga ginikanan tingali mapakyas sa pagpanalipod sa ilang mga anak. Apan, ang Diyos andam motabang kanato sa pagsagubang sa atong kahadlok ug pagbati nga pagkawalay-katinoan. Sa pagtugyan sa atong mga kabalaka ngadto kang Jehova pinaagig pag-ampo, kita makatino nga siya “makabuhat ug labaw pa sa hilabihan kamadagayaon nga lapaw sa tanang butang nga atong gipangayo o gihunahuna.”—Efeso 3:20.
Ikaw ba kanunayng modangop sa Diyos pinaagig pag-ampo? Kombinsido ka ba nga ang imong mga pag-ampo dunggon sa Diyos? “Gisultihan ako sa akong inahan nga kinahanglang mag-ampo ako sa Diyos,” miingon ang usa ka dalagita sa São Paulo. “Apan gipangutana nako ang akong kaugalingon: ‘Nganong makigsulti man ako sa usa ka persona nga wala gani ako makaila?’ Apan, ang Proverbio 18:10 nakatabang kanako sa pagsabot nga kita nagkinahanglan sa tabang sa Diyos ug kinahanglang makigsulti kita kaniya pinaagig pag-ampo.” Kanang tekstoha nag-ingon: “Ang ngalan ni Jehova usa ka malig-ong torre. Nganha niana ang matarong modagan ug mahatagan sa panalipod.” Sa pagkatinuod, sa unsang paagi maugmad nato ang pagsalig kang Jehova kon dili nato batasanon ang pagpakigsulti kaniya? Aron matagamtam ang mga panalangin sa espirituwal nga kasegurohan, kinahanglan nga batasanon nato ang inadlaw ug kinasingkasing nga pag-ampo. Si Jesus miingon: “Nan, magpadayon sa pagtukaw, nga sa tanang panahon magapangamuyo aron molampos kamo sa pag-ikyas niining tanang butanga nga gitakdang mahitabo, ug sa pagbarog atubangan sa Anak sa tawo.”—Lucas 21:36.
Usa ka butang nga kita makatino mao ang bahin sa atong paglaom sa Gingharian sa Diyos. Matikdi ang mga pulong sa Daniel 2:44: “Ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.” Kanang maong paglaom malig-on ug kana masaligan gayod nato. Ang mga saad sa tawo kasagarang dili matuman, apan kita makasalig gayod sa pulong ni Jehova. Imbes dili-kasaligan, ang Diyos kaamgid sa usa ka dakong bato nga atong masaligan. Kita makabati sama sa gibati ni David, kinsa miingon: “Ang akong Diyos mao ang akong bato. Modangop ako kaniya, akong taming ug akong sungay sa kaluwasan, akong luwas nga hataas nga dapit, ug akong dapit nga kalagiwan, akong Manluluwas; gikan sa kapintasan ikaw nagluwas kanako.”—2 Samuel 22:3.
Ang librong Managing Your Mind dugang miingon: “Sa magsige ug hunahuna ang tawo bahin sa daotang mga butang nga basig mahitabo, mas motinuod kini diha sa hunahuna, ug mas lisod na nga makita kon unsaon sa pagsagubang niini.” Busa, nganong atong tugotan ang atong kaugalingon nga mabug-atan sa mga kabalaka ug mga pagduhaduha sa kalibotan? Hinunoa, pulihi ang pagkawalay-katinoan niining kalibotana ug mga katinoan nga gitagana sa Diyos. Pinaagi sa pagpabiling malig-on diha sa atong pagtuo sa dili-mapakyas nga mga saad ni Jehova, kita gipasaligan niini: “Walay usa nga magbutang sa iyang pagtuo kaniya ang mahigawad.”—Roma 10:11.
[Blurb sa panid 29]
Ang Pulong sa Diyos nagpasalig ug umaabot nga mga panalangin alang sa katawhan
[Blurb sa panid 30]
“Walay usa nga magbutang sa iyang pagtuo kaniya ang mahigawad”
[Hulagway sa panid 31]
Ang maayong balita sa Gingharian mohatag sa mga tawo ug kasegurohan