ENOC

[Usa nga Gibansay; Giinagurahan [nga mao, gipahinungod, gisugdan]].

1. Anak ni Cain ug amahan ni Irad. Si Enoc natawo sa yuta sa Pagkakagiw human patya ni Cain ang iyang igsoong si Abel.​—Gen 4:​17, 18.

2. Ang anak nga natawo kang Jared sa edad nga 162; ang ikapitong tawo sa linya sa kaliwatan gikan kang Adan. Gawas kang Matusalem, nga natawo kaniya sa dihang siya nagpanuigon ug 65, si Enoc adunay ubang mga anak nga lalaki ug babaye. Si Enoc maoy usa “sa ingon kabagang panganod sa mga saksi” nga talagsaong panig-ingnan sa pagtuo sa karaang panahon. “Si Enoc nagpadayon sa paglakaw uban sa matuod nga Diyos.” (Gen 5:​18, 21-24; Heb 11:5; 12:1) Ingong usa ka manalagna ni Jehova, iyang gitagna ang pag-abot sa Diyos uban sa Iyang balaang mga tinagpulo ka libo aron sa pagpahamtang ug paghukom batok sa mga dili-diyosnon. (Jud 14, 15) Malagmit gilutos siya tungod sa iyang pagpanagna. Apan, wala motugot ang Diyos nga patyon si Enoc sa mga magsusupak. Hinunoa, “gikuha siya” ni Jehova, nga mao, gipamubo ang iyang kinabuhi sa panuigong 365, usa ka panuigon nga mas ubos kaayo kon itandi sa kadaghanan sa iyang mga katalirongan. Si Enoc “gilalin aron dili makaagom ug kamatayon,” nga lagmit nagkahulogan nga gipahinabo sa Diyos nga siya mapunawan samtang nakakitag panan-awon ug dayon nagtapos sa kinabuhi ni Enoc samtang siya gipunawan aron dili niya masinati ang kahapdos sa kamatayon. (Gen 5:24; Heb 11:​5, 13) Hinunoa, siya wala dad-a ngadto sa langit, sumala sa tin-awng gipahayag ni Jesus sa Juan 3:13. Mopatim-aw nga, sama sa nahitabo sa lawas ni Moises, gihipos ni Jehova ang lawas ni Enoc, kay “wala na siya hikaplagi.”​—Deu 34:​5, 6; Jud 9.

Si Enoc dili mao ang magsusulat sa “Basahon ni Enoc.” Kini dili inspirado, apokripal nga basahon nga gisulat daghang siglo sa ulahi, malagmit panahon sa ikaduha ug unang siglo W.K.P.

3. Ang unang siyudad nga gihisgotan sa Bibliya. Si Cain nagtukod niining siyudara didto sa yuta sa Pagkakagiw sa S sa Eden, nga nagtawag niini sumala sa ngalan sa iyang anak nga si Enoc.​—Gen 4:17.