10. (a) Unsay gisugo ni Jehova sa mga Israelinhon sa bulan sa Nisan 1513 B.C.E.? (b) Nganong gituman ni Moises ang mga sugo sa Diyos?

¹⁰ Sa bulan sa Nisan 1513 B.C.E., gisugo ni Jehova si Moises ug Aaron nga sultihan ang mga Israelinhon sa pagkuhag himsog nga laking karnero o kanding, ihawon kini, ug isablig ang dugo niini sa ilang pultahan. (Ex. 12:3-7) Unsay sanong ni Moises? Si Pablo miingon bahin kaniya: “Tungod sa pagtuo iyang gisaulog ang paskuwa ug ang pagsablig sa dugo, aron dili hilabtan sa tiglaglag ang ilang mga panganay.” (Heb. 11:28) Si Moises masaligon nga matuman gayod ang mga saad ni Jehova, ug siya may pagtuo nga mamatay ang tanang panganay sa mga Ehiptohanon.

11. Nganong gipasidan-an ni Moises ang uban?

¹¹ Ang mga anak ni Moises lagmit atua sa Midian, nga layo sa “tiglaglag.”a (Ex. 18:1-6) Apan iyang gisunod ang sugo nga pasidan-an ang ubang Israelinhon kansang mga panganay nameligrong mamatay. Gimahal gayod ni Moises ang iyang isigkatawo. Busa ang Bibliya nag-ingon: “Sa walay langan gipatawag ni Moises ang tanang ansiyano sa Israel ug miingon kanila: . . . ‘Ihawa ang halad sa paskuwa.’”​—Ex. 12:21.

12. Unsang importanteng mensahe ang gisugo ni Jehova kanato nga isangyaw?

¹² Sa tabang sa mga manulonda, ang katawhan ni Jehova nagpahibalo niining importanteng mensahe: “Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na, ug busa simbaha ninyo ang Usa nga maoy naghimo sa langit ug sa yuta ug sa dagat ug sa mga tuboran sa mga tubig.” (Pin. 14:7) Kinahanglan natong isangyaw kini nga mensahe. Angay natong pasidan-an ang atong mga silingan sa paggula gikan sa bakak nga relihiyon, aron dili sila “makadawat ug bahin sa iyang mga hampak.” (Pin. 18:4) Ang “ubang mga karnero” miduyog sa mga dinihogan sa pag-awhag sa mga tawong nahimulag sa Diyos sa ‘pagpasig-uli’ ngadto kaniya.​—Juan 10:16; 2 Cor. 5:20.

13. Sa unsang paagi modako ang atong tinguha sa pagsangyaw sa maayong balita?

¹³ Kita kombinsido nga ‘ang takna sa paghukom’ miabot na. Kombinsido usab kita nga ang atong pagsangyaw ug paghimog mga tinun-an dinalian gayod sumala sa giingon ni Jehova. Sa panan-awon, nakita ni apostol Juan “ang upat ka manulonda nga nagbarog diha sa upat ka suok sa yuta, nga hugot nga nagkupot sa upat ka hangin sa yuta.” (Pin. 7:1) Pinaagi sa pagtuo, nakita ba nimo ang maong mga manulonda nga andam nang mobuhi sa malaglagong hangin sa dakong kasakitan? Kon imong makita ang maong mga manulonda pinaagi sa imong mata sa pagtuo, masaligon kang mosangyaw sa maayong balita.