Mopadayon Ka ba sa Pagsubay sa Kamatuoran?
“WALA akoy labaw nga hinungdan nga magpasalamat kay niini, nga . . . ang akong mga anak mopadayon sa pagsubay sa kamatuoran.” (3 Juan 4) Kana ang giingon ni apostol Juan sa hinapos sa taas niyang kinabuhi. Ang padayong pag-antos sa ‘iyang mga anak,’ kadtong gipasulod niya sa “kamatuoran,” mihatag niyag dakong kalipay. Si Jehova nagakalipay usab sa dihang ang iyang mga magsisimba magpabilin sa kamatuoran. Dako gayod ang iyang kahimuot nga makita karong adlawa ang usa ka dakong organisasyon, nga mokabat sa milyonmilyon, nga nagasubay nianang maalamong dalan!—Proverbio 27:11.
Ugaling, bisan pag ang katawhan sa Diyos sa katibuk-an dimatarog nga nagamahal sa kamatuoran, ang pila ka Kristohanon nagahinayhinay o nagabiya pa sa maputling pagsimba. Kini dili ingong wala dahoma, kay ang samang butang nahitabo sa unang siglo. (2 Timoteo 4:10; Hebreohanon 2:1) Bisan pa niana, ang kamatuorang ang pipila nagahinayhinay nagapasiugda sa tanan sa pagbantay sa ilang kaugalingong espirituwalidad. Gidasig ni Pablo ang tanang Kristohanon: “Magpadayon sa pagsusi kon unsa kamo sa inyong kaugalingon.” (2 Corinto 13:5) Ang matag Kristohanon angay mangutana sa iyang kaugalingon sa pangutana: ‘Unsaon nako pagtino nga ako mopadayon sa pagsubay sa kamatuoran?’
Ang pipila nagahinayhinay o nangundang pa sa pagsubay sa kamatuoran kay sila naluya—tingali sa mga problema sa lawas o mga panagbangi sa personalidad. Ang uban naghinayhinay kay sila nalinga. Buot nilang makapahimulos sa pipila sa mga bunga niining sistema sa mga butang samtang nagalungtad kini. Sa unsang paagi makalikay kita sa paghinayhinay? Sa pagtubag, palandongon nato ang panig-ingnan nga gibilin kanato ni Jesus.
Sunda ang Panig-ingnan ni Jesus
Giatubang ni Jesus ang daghang lisod nga mga kahimtang. Gihusay niya ang mga panagbangi sa personalidad taliwala sa iyang mga sumusunod, ingon man giantos ang pagdumot ug pagbiaybiay sa iyang mga kaaway. Gisuklan usab niya ang mga tentasyon niining kalibotana. Sa pagkamatuod, gitanyagan siyag bahandi ug pagkainila sa gidak-on nga diyutay ray nakaagom. (Mateo 4:8-11; Juan 6:14, 15) Bisan pa niana, si Jesus mipadayon sa pagsubay sa kamatuoran. Unsay nakaabag niya sa pagbuhat niadto?
Si apostol Pablo nagasulti nato sa nagasulat siya: “Atong dalaganon nga malahutayon ang lumba nga gibutang sa atong atubangan, samtang nagatutok kita sa Pangulong Ahente ug Maghihingpit sa atong pagtuo, si Jesus. Tungod sa kalipay nga gibutang sa iyang atubangan iyang giantos ang kahoy sa pagsakit, nga gitamay ang kaulawan, ug milingkod sa tuong kamot sa trono sa Diyos.” (Hebreohanon 12:1, 2) Sa kahimtang ni Jesus, ang pagbutang sa hunahuna “sa kalipay nga gibutang sa iyang atubangan,” ang mga ganti sa kahitas-an nga nagpaabot kaniya, nakatabang niya sa pagpadayon sa pagsubay sa kamatuoran. Ang maong “kalipay nga gibutang sa iyang atubangan” milabaw sa umalaging mga butang makapaluya o nakapalinga nga iyang giatubang.
Ang paghinumdom sa ganti makatabang nato sa pag-antos, sama nga kadto nakatabang kang Jesus. (Pinadayag 22:12) Sa pag-ilustrar, hunahunaa ang usa ka magpapanaw nga nagasubay sa lisod nga dalan sa bukid. Siya kapoyon ug maluya. Ang matag tikang maoy hago, ug ang dalan daw walay kataposan. Dayon siya makaabot sa taluktok sa usa ka bungtod ug makakita sa halayo sa lungsod nga iyang adtoan. Sa kalit ang paglakaw morag mas sayon. Ang tin-aw nga hulagway sa iyang destinasyon motabang niya sa paghikalimot sa iyang kakapoy. Ang Kristohanon susamang mas sayonan sa pagsubay sa kamatuoran kon huptan niyang tin-aw sa hunahuna ang iyang dulnganan.
Sundoga si Apostol Pablo
Ang lain nga daghag giantos nga makapaluya unta kaniya mao si apostol Pablo. Gihusay niya ang mga pagkabahinbahin ug mga panagbangi sa personalidad taliwala sa mga igsoon, ingon man giantos ang grabeng problema sa panglawas, paglutos, pisikal nga mga kalisdanan, ug mga suliran ug bisan pagsupak sulod sa mga kongregasyon. (1 Corinto 1:10; 2 Corinto 10:7-12; 11:21-29; 12:7-10) Nganong si Pablo wala maluya hangtod sa punto nga moundang? Siya misaysay: “Ako may kusog alang sa tanang butang tungod niya nga nagahatag kanako ug kusog.” (Filipos 4:13) Wala niya sulayi nga pas-anon ang iyang mga palas-anon nga kinaugalingon. Hinunoa, si Pablo misalig kang Jehova sa paglig-on kaniya.—Salmo 55:22.
Ang balaang tinubdan sa kusog nga gisangpit ni Pablo sa pagtabang kaniya sa pag-antos mabatonan usab karong adlawa. Ang Bibliya nagaingon: “Si [Jehova] nagahatag ug kusog sa gikapoy; ug sa usang walay dinamikong enerhiya siya nagapadagaya sa gahom. Ang mga batang lalaki mangaluya ug kapoyon, ug ang mga batan-ong lalaki pihong mangatumba, apan kadtong nagalaom kang Jehova mapasig-ulian sa kusog. Sila manglupad pinaagi sa mga pako sama sa mga agila. Sila manalagan ug dili mangaluya; sila manglakaw ug dili kapoyon.” (Isaias 40:29-31) Kon mosalig kita kang Jehova sa paghatag kanatog kusog pinaagi sa personal nga pagtuon, pagtambong sa tigom, madasigong Kristohanong kalihokan, ug—ilabina—pag-ampo, kita makaantos sa mga tentasyon ug mga butang makapaluya nga tingali motungha matag karon ug unya.—Salmo 1:1-3; Roma 10:10; 1 Tesalonica 5:16, 17; Hebreohanon 10:23-25.
Milyonmilyon Nagaandam sa Pagpuyo sa Paraiso
Si Satanas mao ang diyos niining sistema sa mga butang, diin ang mga Kristohanon mao lamay mga langyaw, mga dumuloong. (2 Corinto 4:4) Busa, kita dili gayod matingala kon atong atubangon usab ang mga butang makapaluya o makalinga. Si Pablo misulat diha sa basahong Hebreohanon: “Kita wala magbaton dinhi sa usa ka siyudad nga nagapadayon, apan kita tim-aw nga nagatinguha sa usa nga umaabot.” (Hebreohanon 13:14) Ang paghinumdom nga ang atong paglaom dili niining daang kalibotan kondili nianang sa umaabot nagatabang usab nato nga dili maghinayhinay.
Sa pila ka paagi, ang mga Kristohanon nahisamag mga lalin nga nagabiya sa ilang nitibong nasod sa pagpangitag maarang-arang nga kinabuhi sa laing dapit. Sa kasagaran, kini lisod nga lakang nga himoon. Naglangkit kini sa paghipos o pagbaligya sa tanan niyang kabtangan ug pagpanamilit sa sinating balay, ingon man sa mga higala ug mga paryente. Naglangkit usab kini sa pag-adto sa usa ka bag-ong nasod, nga mopuyo taliwala sa mga tawo nga dili tingali magadawat kaniya, ug pagkat-on sa usa ka bag-ong pinulongan ug wala-naandi nga pagkinabuhi. Bisan pa niana, daghan ang nagahimo sa maong lakang sa paglaom nga mapaarang-arang ang ilang materyal nga kahimtang niining kalibotana.
Kadtong nagalalin, ingnon ta, gikan niining daang sistema sa mga butang ug nahimong bahin sa katawhan sa Diyos nagaatubang ug susamang mga hagit. Sila nagahimog kultural nga mga pagpasibo aron magkinabuhi sumala sa mahinlong mga sukdanan sa Pulong sa Diyos, ug sila nagatuon sa “maputling pinulongan” sa kamatuoran. (Sofonias 3:9; 1 Corinto 6:9-11) Sila nagakugi, usab, sa pag-alagad sa dakong Hari sa Gingharian sa Diyos, si Jesu-Kristo. Dugang pa, sa daghang kaso ang ilang mga paryente ug kanhing mga higala nagapalayo kanila, mao nga, sa pagkamatuod, kinahanglang sila manamilit kanila.
Apan ang mga Kristohanon mas daghag maganansiya kay niadtong nagalalin tungod sa mga hinungdang ekonomikanhon. Sa usa ka butang, sila makasulod sa usa ka komunidad nga nahigugma ug matinagdanon kanila. (Lucas 18:29, 30) Labaw nga hinungdanon, sila mahidangat sa suod nga relasyon uban kang Jehova, ang Diyos sa uniberso. Maangkon nila ang kalinaw sa hunahuna ug pagsalig mahitungod sa umaabot samtang sila magpaabot sa pagkatuman sa kahibulongang mga saad sa Diyos. (Filipos 4:8, 9) Kadtong may tukmang pagpabili niining mga kamatuorana dili magtugot nga ang mga butang makalinga o makapaluya magpahinayhinay kanila nga permanente. Sila dili mapatalikod gikan sa masigpit nga dalan nga mosangko sa kinabuhi.—Mateo 7:13, 14; 1 Juan 2:15-17.
Tagda ang Imong Espirituwal nga Kahimsog
Kon gitagad nato ang atong pisikal nga kahimsog nga regular, kita mas maayog purohan nga makasukol sa sakit. Ug kon kita magsakit, kita daling maulian. Sa susama, kon atimanon nato ang atong espirituwal nga kahimsog, nga maghupot sa tin-awng hulagway sa mga panalangin nga ato karong gipahimuslan ug niadtong nagahulat kanato, ug kon kita makatuon sa pagsalig sa kusog ni Jehova inay sa atong kaugalingon, kita mas makaarang sa pag-atubang sa mga suliran nga motungha. Dili kita bug-os makalikay sa mga butang makalinga o sa makapaluyang mga kahimtang. Apan kon giatiman nato sa tukma ang atong espirituwal nga kahimsog nga abante, kanang mga butanga dili makabuntog kanato.
Hinumdomi, si Jehova nagakalipay sa dihang ang iyang mga magsisimba magaantos. Busa hatagan natog kalipay ang iyang kasingkasing pinaagi sa pagsubay sa kamatuoran.