Ang Disiplina nga Mohatag ug Madaitong Bunga
“Walay disiplina ang daw makalipay sa pagkakaron, kondili makaguol; apan sa ulahi alang niadtong nabansay niini kini mohatag ug madaitong bunga, nga mao, ang pagkamatarong.”—HEBREOHANON 12:11.
1, 2. (a) Sumala sa Hebreohanon 12:9-11, unsa ang mahigugmaong gitagana sa Diyos? (b) Unsa ang usa ka pananglitan sa disiplina, ug unsay moresulta gikan niini?
PALANDONGA ug balik ang imong adlaw sa pagkabatan-on. Makahinumdom ka ba nga gidisiplina ka sa imong mga ginikanan? Makahinumdom ang kadaghanan kanato. Gigamit kana ni apostol Pablo ingong ilustrasyon dihang mikomento bahin sa disiplina nga gikan sa Diyos, nga atong mabasa diha sa Hebreohanon 12:9-11.
2 Ang inamahang pagdisiplina sa Diyos, nga nagaapekto sa atong espirituwal nga mga kinabuhi, adunay daghang porma. Ang usa mao ang iyang kahikayan sa pagpagawas gikan sa Kristohanong kongregasyon sa usa ka tawong dili na gustong magkinabuhi sumala sa mga sukdanan Diyos, o nagadumili sa pagbuhat sa ingon. Ang tawo nga kusganong gibadlong o gidisiplina tingali maghinulsol ug magbag-o. Sa ingon siya, ang kongregasyon sa mga maunongon gidisiplina sa pagkaagi nga nagpakakat-on sila sa bili sa pagsunod sa hataas nga mga sukdanan sa Diyos.—1 Timoteo 1:20.
3. Unsay reaksiyon sa pipila bahin sa ideya sa pagpalagpot?
3 ‘Apan,’ tingali may mangutana, ‘dili ba mabangis ra ang pagpalagpot ug dayon dili na makigsulti sa tawong napalagpot?’ Mitungha kining hunahunaa diha sa dili pa dugayng kaso sa korte nga nalangkit sa usa ka babayeng gimatuto sa mga ginikanang mga Saksi ni Jehova. Gipalagpot ang iyang mga ginikanan. Siya wala, apan kinabubut-ong mibulag o midis-asosyet siya pinaagi sa pagsulat nga dili na siya makig-uban pa sa kongregasyon. Busa, yanong gipahibalo sa kongregasyon nga dili na siya usa sa mga Saksi ni Jehova. Mibalhin siyag puyo, apan sa katuigan sa ulahi mibalik siya ug nakakita nga ang lokal nga mga Saksi dili na makigsulti kaniya. Busa iyang gipasaka kining butanga sa hukmanan. Unsa ang resulta, ug sa unsang paagi nagaapektar kini kanimo? Aron mas masabtan pa kining butanga, atong tan-awon ang nalangkit nga ulohan sa pagpalagpot.
Nganong May Ingon Niining Malig-ong Baroganan?
4. Unsay mahitabo panagsa sa pipila diha sa kongregasyon? (Galacia 6:1; Judas 23)
4 Ang kadaghanan sa tinuod nga mga Kristohanon maunongong nagalaban sa Diyos ug sa iyang matarong nga mga kasugoan. (1 Tesalonica 1:2-7; Hebreohanon 6:10) Apan, may mga panahon, nga ang tawo motipas gikan sa dalan sa kamatuoran. Pananglitan, bisan pa sa tabang sa Kristohanong mga ansiano, tingali sa walay paghinulsol molapas siya sa mga kasugoan sa Diyos. O tingali iyang isalikway ang kamatuoran pinaagi sa pagpanudlo ug bakak nga doktrina o pinaagi sa pagdis-asosyet sa iyang kaugalingon gikan sa kongregasyon. Nan unsa ang angay buhaton? Nahitabo kining mga butanga bisan sa panahong buhi pa ang mga apostoles; busa, atong tan-awon kon unsay ilang gisulat bahin niini.
5, 6. (a) Unsang maalamong tambag ang atong nabatonan bahin sa pagpakig-atubang sa mga tawong nakahimog seryosong mga sala ug dili-mahinulsolon? (Mateo 18:17) (b) Unsang mga pangutana ang atong atubangon?
5 Dihang may usa ka tawo sa Corinto nga imoral ug wala maghinulsol, gisultihan ni Pablo ang kongregasyon: “Ayaw pagpakig-uban kang bisan kinsa nga nagapakaigsoon kon kana siya makihilawason o dalo, o tigsimbag mga diyosdiyos o tigpasipala, o palahubog o tikasan, dili bisan na lang sa pagpakigsalo kaniya sa pagpangaon.” (1 Corinto 5:11-13) Mao usab kanay buhaton diha sa mga apostata, sama kang Himeneo: “Alang sa usa ka tawo nga nagapasiugda ug sekta, tapos nimo siya katambagi sa makausa o makaduha isalikway mo siya; sa nasayran mo na nga ang maong tawo nahisalaag ug nagapakasala.” (Tito 3:10, 11; 1 Timoteo 1:19, 20) Kini nga pagsalikway angay, usab, alang kang bisan kinsa nga mobulag sa kongregasyon: “Sila namahawa gikan kanato, kay sila dili man sama nato; kon sila sama pa nato, magpabilin unta sila uban kanato. Apan sila namahawa aron makita nga sila diay dili sama nato.”—1 Juan 2:18, 19.
6 Sa malaomon, maghinulsol ang maong tawo aron siya madawat ug balik. (Buhat 3:19) Apan kasamtangan, kinahanglan bang limitihan o bug-os nga likayan siya sa mga Kristohanon? Ug, kon mao, ngano?
Bug-os ba nga Pagputol?
7. Sa unsang paagi lahi ang atong paggawi bahin sa duha ka matang sa mga makasasala?
7 Ang mga Kristohanon dili magpalain sa ilang kaugalingon gikan sa mga tawo. Kita normal nga makigkita sa mga silingan, mga kauban sa trabaho, kaubanan sa klase, ug sa uban, ug magpamatuod kanila bisan kon ang uban ‘mga makihilawason, mga hakog, mga tikasan, o mga tigsimbag mga diyosdiyos.’ Si Pablo misulat nga dili gayod kita sa bug-os makalikay kanila, ‘kay kon maohon kinahanglang manggawas kita sa kalibotan.’ Apan, siya miingon nga lahi na ang kahimtang kon bahin sa “usa ka igsoon” nga nagkinabuhi nga sama niana: “Ayaw pagpakig-uban kang bisan kinsa nga nagapakaigsoon nga [mibalik niining mga dalana], dili bisan na lang sa pagpakigsalo kaniya sa pagpangaon.”—1 Corinto 5:9-11; Marcos 2:13-17.
8. Unsang tambag ang gihatag ni apostol Juan bahin sa pagsalikway?
8 Diha sa mga sinulat ni apostol Juan, makakita kitag samang tambag nga nagpasiugda kon unsa ka bug-os nga likayan sila sa mga Kristohanon: “Ang bisan kinsa nga magauna ug dili magpabilin diha sa pagtulon-an ni Kristo siya wala makapanag-iya sa Diyos . . . Kon adunay moanha kaninyo ug kini sila wala magdala niining pagtulon-ana, ayaw ninyo siya pagpasak-a sa inyong balay ug ayaw ninyo pangomostaha siya. Kay siya nga mangomosta [Grego, khaiʹro] kaniya magapakig-ambit sa iyang daotang mga binuhatan.”a—2 Juan 9-11.
9, 10. (a) Unsay nahitabo sa dili-manulsolong mga maglalapas sa kasuguan sa Israel ug ngano? (b) Unsa ang angay natong bation bahin sa kahikayan karong adlawa sa pagpakig-atubang sa mga tawo napalagpot tungod sa wala-hinulsoling sala? (2 Pedro 2:20-22)
9 Nganong ang maong malig-ong baroganan tukma bisan karong adlawa? Buweno, palandonga ang bug-os nga pagpalagpot nga gisugo sa Kasugoan sa Diyos sa Israel. Sa ubang seryosong mga butang, ang mga maglalapas nga mituyo sa pagpakasala gipatay. (Levitico 20:10; Numeros 15:30, 31) Dihang mahitabo kana, ang uban, bisan ang mga paryente, dili na mahimong makigsulti sa patayng maglalapas sa kasugoan. (Levitico 19:1-4; Deuteronomio 13:1-5; 17:1-7) Bisan pa nga ang maunongong mga Israelinhon balik niadto normal nga mga tawo nga may mga pagbati sama kanato, sila nahibalo nga ang Diyos matarong ug mahigugmaon ug nga ang iyang Kasugoan nagpanalipod sa ilang moral ug espirituwal nga kahinlo. Busa ilang gidawat nga ang iyang kahikayan sa pagpalagpot sa mga mamumuhat ug daotan matarong ug maayong butang.—Job 34:10-12.
10 Kita makaseguro nga ang kahikayan sa Diyos sa pagdumili sa mga Kristohanon sa pagpakig-uban sa usa ka tawong gipalagpot tungod sa wala hinulsoling sala maoy usa ka maalamong panalipod kanato: “Kuhaa gikan kaninyo ang daang igpatubo, aron kamo mahimong bag-ong minasa, sama kaninyo nga walay igpatubo.” (1 Corinto 5:7) Pinaagi sa paglikay usab sa mga tawo kinsa kinabubut-ong midis-asosyet sa ilang kaugalingon, ang mga Kristohanon mapanalipdan gikan sa kalagmitang kritikal, dili-mapabilhon, o bisan apostatang mga hunahuna.—Hebreohanon 12:15, 16.
Komosta ang Bahin sa mga Paryente?
11, 12. (a) Unsay epekto diha sa mga paryenteng Israelinhon dihang gipalagpot ang mamumuhat ug daotan? (b) Iilustrar ang mga kaayohan sa pagsunod.
11 Ang Diyos nahibalo nga ang pagtuman sa iyang matarong nga mga kasugoan sa pagpalagpot sa mga mamumuhat ug daotan kasagarang nalangkit ug makaapekto sa mga paryente. Sama sa gihisgotan sa ibabaw, dihang patyon ang usa ka Israelinhon nga mamumuhat ug daotan, bisan ang pag-ubanay sa pamilya dili na mahimo. Sa pagkatinuod, kon ang anak nga lalaki palahubog ug ulitan, dalhon gayod siya sa iyang mga ginikanan atubangan sa mga maghuhukom, ug kon dili siya maghinulsol, ang mga ginikanan nakigbahin sa makataronganong pagpatay kaniya, ‘aron sa pagkuha sa daotan gikan sa taliwala sa Israel.’ (Deuteronomio 21:18-21) Imong masabtan nga dili kini masayon alang kanila. Handurawa, usab, ang bation sa mga igsoong lalaki, sa mga babaye, o sa mga apohan sa mamumuhat ug daotan. Apan, ang ilang pag-una sa pagkamaunongon sa ilang matarong nga Diyos kay sa pagmahal sa pamilya makaluwas sa ilang kinabuhi.
12 Hinumdomi ang kaso ni Kore, ang lider sa rebelyon batok sa pagpangulo sa Diyos pinaagi ni Moises. Diha sa iyang hingpit nga hustisya, nakita ni Jehova nga angay patyon si Kore. Apan ang tanang mga maunongon gitambagan: “Pahawa, nangaliyopo ako kaninyo, gikan sa mga balongbalong niining mga tawong daotan ug dili kamo maghikap sa bisan unsa nga butang nga ila, aron dili kamo maut-ot diha sa tanan nilang kasal-anan.” Ang mga paryente nga wala mamati sa pasidaan sa Diyos namatay uban sa mga maalsahon. Apan ang ubang mga paryente ni Kore maalamong mipili sa pagpabiling maunongon kang Jehova, nga nakaluwas sa ilang mga kinabuhi ug mitultol sa umaabot nga mga panalangin.—Numeros 16:16-33; 26:9-11; 2 Cronicas 20:19.
13. Unsay buhaton sa maunongong mga Kristohanon kon ang suod nga membro sa pamilya napalagpot o midis-asosyet sa iyang kaugalingon?
13 Ang pagbulag gikan sa Kristohanong kongregasyon dili mosangpot dayon ug dihadiha nga kamatayon, busa padayon gihapon ang relasyon sa pamilya. Busa, ang usa ka tawong napalagpot o midis-asosyet sa iyang kaugalingon tingali nagpuyo gihapon sa balay uban sa iyang Kristohanong asawa ug matinumanong mga anak. Ang pagtahod sa mga paghukom sa Diyos ug sa aksiyon sa kongregasyon mopalihok sa asawa ug sa mga anak sa pag-ila nga tungod sa iyang gihimo, iyang giusab ang espirituwal nga relasyon nga naglungtad taliwala kanila. Apan, kay ang iyang pagkanapalagpot wala man magtapos sa ilang relasyon sa dugo ug sa kaminyoon, ang kinaiyanhong mga pagmahal ug mga pagbati makapadayon.
14. Unsang tambag sa Diyos ang angay moimpluwensiya sa atong pakigkontak sa napalagpot o sa nadis-asosyet nga paryente nga gawas na sa atong suod nga sirkulo sa pamilya?
14 Lahi ang situwasyon kon ang tawong napalagpot o nadis-asosyet maoy usa ka paryente nga nagpuyo sa gawas sa suod nga sirkulo sa pamilya ug balay. Tingali posibleng dili na makigkita pa sa paryente. Bisan kon adunay pila ka butang sa pamilya nga nagkinahanglag panagkita, kini angay limitihan, sibo sa prinsipyo sa Diyos: “Ayaw pagpakig-uban kang bisan kinsa nga nagapakaigsoon nga makihilawason o dalo [o sad-an sa grabe nga kalapasan], . . . dili bisan na lang sa pagpakigsalo kaniya sa pagpangaon.”—1 Corinto 5:11.
15. Sa unsang paagi mapugngan sa mga paryente ang impluwensiya sa emosyon sa maong mga higayon? (Salmo 15:1-5; Marcos 10:29, 30)
15 Masabot, tingali malisod kini tungod sa mga emosyon ug sa mga relasyon sa pamilya, sama sa gugma sa apohan alang sa ilang mga apo. Apan, kini maoy usa ka pagsulay sa pagkamaunongon ngadto sa Diyos, sumala sa gipahayag sa igsoong babaye nga gikutlo sa panid 26. Ang bisan kinsa nga mobati sa kasubo ug kasakit nga gipahinabo sa gipalagpot nga paryente mapahalipayan ug mapadasig sa pananglitan nga gipakita sa ubang mga paryente ni Kore.—Salmo 84:10-12.b
Ang Desisyon sa Hukmanan
16-18. Unsang desisyon ang naabot sa kaso sa hukmanan nga gihisgotan sa sinugdan, ug unsang dugang opinyon ang gihatag sa hukmanan?
16 Tingali gusto kamong masayod sa resulta sa kaso sa hukmanan bahin sa babaye nga nasuko tungod kay ang iyang mga kaila kanhi dili na makigsulti kaniya tapos nga mipili siya sa pagsalikway sa pagtuo, midis-asosyet sa iyang kaugalingon gikan sa kongregasyon.
17 Sa wala pa husaya ang kaso, mipakanaog ug hukom ang federal district court batok kaniya. Kadto nga hukom gibase sa paglantaw nga ang mga korte dili magpalangkit sa mga butang maylabot sa pagdisiplina sa iglesya. Siya miapelar. Ang giuyonang hukom sa federal court of appealsc binase sa liberal nga katarongan sa Unang Enmiyenda sa mga katungod (sa U.S. Constitution) mao: “Sanglit ang praktis sa pagsalikway bahin man sa pagtuo sa mga Saksi ni Jehova, among nakita nga ang ‘libreng pagsunod’ sa probisyon sa Konstitusyon sa Tinipong Bansa . . . nagpugong [kaniya] sa pagdaog. Ang mga akusado sumala sa konstitusyon may protektadong pribilehiyo sa pagpadayon sa praktis sa pagsalikway. Busa, among gipaluyohan” ang unang desisyon sa district court.
18 Ang hukmanan mipadayon: “Ang pagsalikway maoy praktis nga gihimo sa mga Saksi ni Jehova sumala sa ilang interpretasyon sa canonikal nga teksto, ug kami dili libre sa pag-interpretar pag-usab niana nga teksto . . . Ang mga akusado may katungod sa libreng pagsunod sa ilang relihiyosong mga pagtulon-an . . . Ang mga hukmanan sa katibuk-an dili mag-usisa sa relasyon taliwala sa mga membro [o kanhing mga membro] sa relihiyon. Ang mga relihiyon gihatagan ug dakong kagawasan dihang magpakanaog silag disiplina sa mga membro o kanhing mga membro. Kami miuyon sa hunahuna ni Maghuhukom Jackson [kanhi Korte Suprema sa T.B.] nga ang ‘[r]elihiyosong mga kalihokan nga nalangkit lamang sa mga membro sa pagtuo angay may kagawasan—halos may kagawasan sa bisan unsa.’ . . . Ang mga membro sa Iglesya nga [iyang] gidesidihang talikdan mihukom nga dili na sila buot makig-uban pa kaniya. Among gilabanan nga sila libre sa paghimo niana nga kapilian.”
19, 20. Nganong ang tawong napalagpot gikan sa kongregasyon dili makapangayog danyos diha sa korte?
19 Ang korte sa apelasyon miila nga bisan pa kon ang babaye naguol tungod kay ang iyang mga kaila kanhi dili na man makigsulti kaniya, “ang pagtugot kaniya nga makabangon gikan sa tulokibon o emosyonal nga kadaot supak sa konstitusyon tungod kay nagapiot kini sa mga Saksi ni Jehova sa libreng pagsunod sa relihiyon . . . Ang konstitusyon nagahatag ug garantiya sa libreng pagsunod sa relihiyon nga angay tugotan sa katilingban ang matang sa mga kadaot nga [iyang] giantos ingong takos nga kabayaran aron mapanalipdan ang katungod sa relihiyosong kalainan nga gitagamtam sa tanang mga lungsoranon.” Sa usa ka diwa, kining hukoma mas nalig-on sukad nga gipakanaog kini. Sa unsang paagi? Ang babaye sa ulahi miapelar sa kinatas-ang korte sa yuta sa pagpamati sa kaso ug tingali sa pagbali sa desisyon batok kaniya. Apan sa Nobyembre 1987, midumili ang Korte Suprema sa Tinipong Bansa sa paghimo niini.
20 Busa, gitino niining bililhong kaso nga ang tawong napalagpot o nadis-asosyet dili makadawat ug danyos gikan sa mga Saksi ni Jehova diha sa hukmanan tungod sa pagkahimong sinalikway.d Sanglit ang kongregasyon nagasunod sa hingpit nga mga sugo nga mabasa natong tanan diha sa Pulong sa Diyos ug nagapadapat niini, gibati sa tawo ang kapildihan nga gipahinabo tungod sa iyang mga buhat.
Disiplina—Daghang Kaayohan
21. Nganong gikinahanglan ang pagkatimbang sa paglantaw sa pagpalagpot?
21 Ang ubang mga tagagawas, sa pagkadungog bahin sa pagpalagpot, kiling sa pagsimpatiya sa mamumuhat ug daotan nga dili na makahimo sa pagpakigsulti sa mga membro sa Kristohanong kongregasyon. Apan dili ba ang maong simpatiya wala sa lugar? Palandonga ang posibleng kaayohan nga madawat sa mamumuhat ug daotan ug sa uban.
22, 23. Iilustrar ang importansiya ug bili sa pagsunod sa Diyos sa atong paglantaw sa mga tawong napalagpot.
22 Pananglitan, sa panid 26 among gipadayag ang komento ni Lynette bahin sa iyang pagpili sa ‘dili na pagpakiglabot pa sa bug-os’ sa iyang napalagpot nga igsoong si Margaret. Siya ug ang iyang Kristohanong mga paryente ‘nagtuo nga labing maayo ang paagi ni Jehova.’ Ug tinuod gayod kini!
23 Ang igsoong babaye ni Lynette miingon kaniya: ‘Kon gaan pa ang imong paglantaw sa pagpalagpot, nahibalo ako nga dili unta ako mohimog mga lakang aron makabalik dayon sama sa gihimo ko. Sanglit bug-os nga napalayo sa mga minahal ug sa suod nga pakig-uban sa kongregasyon nakapatunghag kusganong tinguha sa paghinulsol. Akong naamgohan kon unsa ka sayop sa akong dalan ug unsa ka seryoso ang pagtalikod ko kang Jehova.’
24. Sa unsang paagi ang reaksiyon sa usa ka igsoong babaye sa pagpalagpot nakaapekto kaniya ug sa uban?
24 Diha sa laing kaso, napalagpot ang mga ginikanan ni Laurie. Apan siya miingon: ‘Wala ako mohunong sa pagpakig-uban kanila hinunoa midugang kini. Sa paglabay sa panahon, dugang ug dugang nahimo akong dili-aktibo. Miabot ako sa punto nga wala na magtambongan ug mga tigom.’ Dayon iyang nabasa ang materyal diha sa Ang Bantayanang Torre sa Marso 1 ug 15, 1982, nga nagpasiugda sa tambag diha sa 1 Corinto 5:11-13 ug 2 Juan 9-11. “Ingon nga daw may nagpasigag suga kanako,” siya misulat. ‘Nahibalo ako nga kinahanglang mag-usab ako. Karon mas nasabtan ko na ang kahulogan sa Mateo 10:34-36. Dili masayong tunlon ang akong desisyon alang sa akong pamilya, alang sa akong anak nga lalaki, nga singko ang edad, nga bugtong anak, ug gimahal kaayo nila siya.’ Ginalaoman nga ang pagkawala sa maong pag-ubanay makatandog sa kasingkasing sa mga ginikanan, sama sa ginikanan ni Margaret. Apan, ang disiplinang nalangkit nakatabang kang Laurie: ‘Nakabalik na ako sa pag-alagad sa kanataran. Ang akong kaminyoon ug pamilya mas milig-on tungod sa akong kausaban, ug maingon man ako.’
25. Unsa ang hunahuna sa tawong napasig-uli bahin sa disiplina sa Diyos?
25 O palandonga ang pagbati sa usa nga napalagpot ug sa ulahi nakabalik. Si Sandi misulat: ‘Buot kong magpasalamat kaninyo alang sa makatabang kaayo ug matudloong mga artikulo [gihisgotan sa ibabaw] bahin sa pagbadlong ug pagpalagpot. Nalipay ako nga gimahal ni Jehova ang iyang katawhan nga igong makakita nga ang iyang organisasyon gitipigang mahinlo. Ang daw mabangis alang sa mga tagagawas kinahanglan ug mahigugmaong butang nga himoon. Mapasalamaton ako nga ang atong langitnong Amahan mahigugmaon ug mapasayloon nga Diyos.’
26. Unsang matarong nga bunga ang moresulta gikan sa pagdawat sa disiplina? (Salmo 94:10, 12)
26 Busa ang atong Diyos nga nagpangayo nga ang dili-mahinulsolong mamumuhat ug daotan ipalagpot gikan sa kongregasyon mahigugmaong nagapakita nga mahimong makabalik ang makasasala sa kongregasyon kon siya maghinulsol ug magbag-o. (Ang tawong nadis-asosyet makahangyo nga mahimong sakop na usab sa kongregasyon.) Human niana mapahalipayan sa mga Kristohanon nga mopamatuod sa ilang gugma alang kaniya. (2 Corinto 2:5-11; 7:8-13) Sa pagkatinuod, sama gayod kana sa gisulat ni Pablo: “Walay disiplina ang daw makalipay sa pagkakaron, kondili makaguol; apan sa ulahi alang niadtong nabansay niini kini mohatag ug madaitong bunga, nga mao, ang pagkamatarong.”—Hebreohanon 12:11.
Mga Potnot]
a Gigamit dinhi ni Juan ang khaiʹro, nga usa ka katahuran sama sa “maayong adlaw” o “hello.” (Buhat 15:23; Mateo 28:9) Wala niya gamita ang a·spaʹzo·mai (sama sa bersikulo 13), nga nagkahulogang “paghalog, busa pagtimbaya, pag-abiabi” ug tingali nagpasabot ug mainit nga pangomosta, uban ang paggakos. (Lucas 10:4; 11:43; Buhat 20:1, 37; 1 Tesalonica 5:26) Busa ang iyang pahimangno diha sa 2 Juan 11 nagkahulogan sa dili gani pag-ingon ug “hello” niining mga tawhana.—Tan-awa The Watchtower Hulyo 15, 1985, panid 31.
b Alang sa panaghisgot bahin sa pagkanalagpot sa paryente, tan-awa ang Ang Bantayanang Torre Marso 15, 1982, panid 21-27.
c 819 F.2d 875 (9th Cir. 1987).
d Bisan pa nga daghang mga indibiduwal mipasakag sumbong, walay hukmanan ang mipakanaog ug desisyon batok sa mga Saksi ni Jehova bahin sa ilang binase sa Bibliya nga praktis sa pagsalikway.
Mga Punto nga Hinumdoman
◻ Sa unsang paagi ang pagpalagpot maoy usa ka porma sa pagdisiplina?
◻ Nganong ang paggawi sa Kristohanon sa tawong napalagpot lahi gikan sa iyang paggawi sa mga makasasala sa kalibotan?
◻ Unsang Kasulatanhong mga sugo ang isilsil sa hunahuna bisan pag paryente ang napalagpot?
◻ Unsay desisyon ang gipakanaog sa korte sa apelasyon bahin sa usa ka kaso nga gipasaka sa usa ka tawong napalagpot?
◻ Unsay atong nakat-onan gikan sa personal nga mga pahayag bahin sa pagpalagpot?
[Blurb sa panid 26]
“Ang bug-os nga pagputol sa among kaugalingon gikan sa pag-ubanay sa [akong napalagpot nga igsoon] si Margaret nakahatag pagsulay sa among pagkamaunongon sa kahikayan ni Jehova. Nakahatag kadto sa among pamilya ug higayon sa pagpakita nga kami nagatuo gayod nga ang paagi ni Jehova mao ang labing maayo.”—Lynette.
[Kahon sa panid 30]
Ekskomunikasyon—Unsay Epekto?
Ang Ingles nga manalaysay si Edward Gibbon misulat bahin sa katukma ug epekto sa pagpalagpot duol sa panahon sa mga apostoles.
“Kini sa tino maoy katungod sa matag katilingban sa pagpagawas gikan sa pag-ubanay ug sa mga kaayohan niini sa mga membro nga nagasalikway o nagalapas niadtong mga regulasyona nga gitukod uban sa pag-uyon sa katibuk-an. . . . Ang mga resulta sa ekskomunikasyon temporal [yutan-on] maingon man espirituwal nga kinaiyahan. Ang Kristohanon nga gipahamtangan niini gihikawan sa tanang bahin sa mga pagsimba sa mga matinumanon. Ang relasyon sa relihiyoso o pribadong panaghigalaay nawala.”