Unsay Tan-aw ni Jehova Nako?
1. Nganong ang Bibliya morag samin?
1 Kapila ka manamin? Kadaghanan kanato manamin kada adlaw sa pagsusi sa atong hitsura. Ang Bibliya morag samin. Kon atong basahon ang Pulong sa Diyos, atong makita ang tinuod natong pagkatawo, nga maoy ginatan-aw ni Jehova. (1 Sam. 16:7; Sant. 1:22-24) Ang Pulong sa Diyos “makatugkad sa mga hunahuna ug mga tuyo sa kasingkasing.” (Heb. 4:12) Sa unsang paagi ang pagbasa ug pagpamalandong sa Bibliya kada adlaw makatabang nato sa pagsusi kon unsay angay natong pauswagon aron mahimong mas epektibong mga ministro?—Sal. 1:1-3.
2. Sa unsang paagi ang Bibliya makatabang nato sa pagsusi sa atong kaugalingon?
2 Gamita ang Bibliya Ingong Samin: Ang mga estorya sa Bibliya bahin sa matinumanong mga alagad ni Jehova nagtudlo nato kon unsang mga hiyasa ang gusto niya. Pananglitan, si David nagpakitag kasibot para sa ngalan sa Diyos. (1 Sam. 17:45, 46) Si Isaias maisogong miboluntaryo sa pagsangyaw sa lisod nga teritoryo. (Isa. 6:8, 9) Si Jesus, tungod sa iyang dakong gugma sa iyang Amahan, nag-isip sa ministeryo nga makapalagsik ug makapatagbaw imbes makapabug-at. (Juan 4:34) Ang mga Kristohanon sa unang siglo misangyaw nga madasigon, misalig kang Jehova, ug determinado sa paglahutay. (Buh. 5:41, 42; 2 Cor. 4:1; 2 Tim. 4:17) Ang pagpamalandong sa ilang panig-ingnan makatabang nato sa pagsusi sa atong kaugalingon aron mapauswag ang atong sagradong pag-alagad.
3. Nganong dili kita maglangaylangay sa pagtul-id sa mga depekto nga atong nakita?
3 Tul-ira ang mga Depekto: Siyempre, walay silbi ang pagpanamin kon wala kitay himoon sa nakita natong depekto. Kita makaampo kang Jehova sa pagtabang nato nga masusi ang kaugalingon ug makahimog mga kausaban. (Sal. 139:23, 24; Luc. 11:13) Kay ang panahong nabilin mubo na ug kinabuhi ang nalangkit, dili gayod kita maglangaylangay sa pagtul-id sa mga depekto nga atong nakita.—1 Cor. 7:29; 1 Tim. 4:16.
4. Unsay mahitabo sa tawo nga mosusi sa Pulong sa Diyos ug molihok sumala sa iyang nakita?
4 Ang atong tinuod nga pagkatawo—nga maoy ginatan-aw ni Jehova—mas importante kay sa atong hitsura. (1 Ped. 3:3, 4) Unsay mahitabo sa tawo nga mosusi sa Pulong sa Diyos ug molihok sumala sa iyang nakita? “Siya [mahimong,] dili usa ka malimtanong tigpaminaw, kondili . . . magtutuman sa buluhaton, [ug magmalipayon] siya sa iyang pagbuhat niini.” (Sant. 1:25) Oo, kita magmalipayon ug mahimong epektibong mga ministro tungod kay “atong ginasumbalik-silaw samag mga salamin ang himaya ni Jehova.”—2 Cor. 3:18.