Mga Pangutana Gikan sa mga Magbabasa
Unsay gipasabot sa tinun-ang si Santiago sa dihang siya miingon: “Dili daghan kaninyo ang angay mahimong mga magtutudlo, akong mga igsoon, kay nahibalo nga kita modawat ug mas bug-at nga paghukom”?—Santiago 3:1.
Dayag nga wala gayod magpaluya si Santiago sa mga Kristohanon gikan sa pagtudlo sa kamatuoran ngadto sa uban. Diha sa Mateo 28:19, 20, gisugo ni Jesus ang iyang mga disipulo sa “paghimog mga tinun-an sa katawhan sa tanang kanasoran, . . . nga magatudlo kanila sa pagsunod sa tanang butang nga akong gisugo kaninyo.” Busa, ang tanang Kristohanon angayng mahimong mga magtutudlo. Si apostol Pablo nagtambag sa Hebreohanong mga Kristohanon tungod kay sila wala pa mahimong mga magtutudlo. Siya misulat: “Bisan tuod angay na kamong mahimong mga magtutudlo tungod sa panahon, kamo nanginahanglan na usab nga may motudlo kaninyo gikan sa sinugdan sa paninugdan nga mga butang sa sagradong mga kapahayagan sa Diyos.”—Hebreohanon 5:12.
Nan, unsay gihisgotan ni Santiago? Siya naghisgot niadtong may linaing mga pribilehiyo sa pagpanudlo diha sa kongregasyon. Diha sa Efeso 4:11, atong mabasa: “Iyang [Jesu-Kristo, ang Ulo sa kongregasyon] gihatag ang pipila ingong mga apostol, ang pipila ingong mga propeta, ang pipila ingong mga tig-ebanghelyo, ang pipila ingong mga pastol ug mga magtutudlo.” Dihay linaing mga pribilehiyo sa pagpanudlo taliwala sa mga kongregasyon sa unang siglo sama karong adlawa. Pananglitan, ang Nagamandong Lawas naghawas “sa kasaligan ug mabuot nga ulipon” ug may linaing kaakohan sa pagdumala sa pagpanudlo sa kongregasyon sa tibuok-yuta. (Mateo 24:45) Ang nagapanawng mga magtatan-aw ug ang mga ansiano sa kongregasyon usab adunay linaing mga kaakohan sa pagpanudlo.
Gisultihan ba ni Santiago ang kuwalipikadong mga lalaking Kristohanon nga sila dili angayng modawat sa papel sa pagkamagtutudlo tungod sa kahadlok nga makadawat ug mas mabug-at nga paghukom sa Diyos? Wala gayod. Ang katungdanan sa pagkaansiano maoy usa ka dakong pribilehiyo, ingon sa gipakita sa 1 Timoteo 3:1, nga nag-ingon: “Kon si bisan kinsang tawhana nagapangab-ot sa katungdanan sa pagkamagtatan-aw, siya matinguhaon sa usa ka maayong buhat.” Ang usa sa mga kinahanglanon aron matudlo ingong usa ka ansiano sa kongregasyon mao nga siya usa ka tawo nga “kuwalipikado sa pagpanudlo.” (1 Timoteo 3:2) Wala kontraha ni Santiago ang dinasig nga mga pulong ni Pablo.
Ugaling, daw mopatim-aw nga sa unang siglo K.P., ang pipila nagtudlo sa ilang kaugalingon ingong mga magtutudlo, bisag sila dili kuwalipikado ug wala tudloa. Lagmit, gibati nila nga may pagkaprominente ang maong katungdanan, ug gusto nila ang kaugalingong himaya. (Itandi ang Marcos 12:38-40; 1 Timoteo 5:17.) Si apostol Juan naghisgot kang Deotrepes, kinsa ‘gustong mobaton sa unang dapit, apan wala magadawat sa bisan unsa kang Juan nga may pagtahod.’ (3 Juan 9) Ang 1 Timoteo 1:7 naghisgot sa pipila kinsa ‘buot mahimong mga magtutudlo sa balaod apan wala managpakasabot sa mga butang nga ilang gipanulti o sa mga butang nga bahin niini sila kusganong nagainsister.’ Ang mga pulong sa Santiago 3:1 ilabinang haom alang sa mga lalaki nga nagtinguha nga mahimong mga magtutudlo apan adunay sayop nga motibo. Ang maong mga tawo makadaot gayod sa panon ug sa ingon makadawat ug mas mabug-at nga paghukom.—Roma 2:17-21; 14:12.
Ang Santiago 3:1 maoy maayong pahinumdom usab alang niadtong kinsa kuwalipikado ug kinsa nagaalagad ingong mga magtutudlo. Sanglit dako ang gisalig diha kanila, dako usab ang pangayoon gikan kanila. (Lucas 12:48) Si Jesus miingon: “Ang matag walay-kapuslanang sulti nga gipamulong sa mga tawo, sila mohatag ug pagpanubag mahitungod niini sa Adlaw sa Paghukom.” (Mateo 12:36) Kini tinuod ilabina alang niadtong kansang mga pulong may dakong impluwensiya, ang tinudlong mga ansiano.
Ang mga ansiano manubag sa paagi sa ilang pakiglabot sa mga karnero ni Jehova. (Hebreohanon 13:17) Ang ilang ipanulti nagaapektar sa mga kinabuhi. Busa, ang usa ka ansiano kinahanglang mag-amping nga dili magduso ug iyang kaugalingong mga opinyon o mag-abuso sa mga karnero sama sa gihimo sa mga Pariseo. Siya kinahanglang maningkamot nga makapasundayag ug samang halalom nga gugma nga gipakita ni Jesus. Sa matag kahimtang sa pagpanudlo, ug ilabina kon bahin sa hudisyal nga mga butang, angay nga timbangtimbangon sa usa ka ansiano ang iyang mga pulong, dili magpataka ug sulti o magpahayag ug pulos personal nga mga ideya. Pinaagi sa bug-os nga pagsandig kang Jehova, sa iyang Pulong, ug sa iyang mga pagtultol pinaagi sa iyang organisasyon, ang magbalantay makadawat ug dagayang mga panalangin sa Diyos, dili “mas bug-at nga paghukom.”