“Duol sa Diyos”

“Duol sa Diyos, ug siya moduol kaninyo.”—SANTIAGO 4:8.

1, 2. (a) Unsay kasagarang pangangkon sa mga tawo? (b) Unsang tambag ang gihatag ni Santiago, ug nganong gikinahanglan kini?

“ANG Diyos nagauban kanato.” Kanang mga pulonga nagdayandayan sa nasodnong mga emblema ug bisan sa mga uniporme sa mga sundalo. Ang “In God we trust” (Sa Diyos kita nagasalig) gikulit diha sa daghan kaayong sensilyo ug mga papel de bangko sa modernong kuwarta. Komon alang sa mga tawo ang pag-angkon nga sila adunay suod nga relasyon sa Diyos. Apan, dili ka ba mouyon nga ang aktuwal nga pagkabaton nianang maong relasyon nagkinahanglan ug labaw pa kay sa paghisgot lamang bahin niana o pagpasundayag ug mga eslogan?

² Gipakita sa Bibliya nga posibleng makabaton ug relasyon uban sa Diyos. Apan gikinahanglan ang paningkamot. Bisan ang pipila ka dinihogang mga Kristohanon sa unang siglo kinahanglang magpalig-on sa ilang relasyon kang Jehova nga Diyos. Ang Kristohanong magtatan-aw nga si Santiago kinahanglang magpasidaan sa pipila bahin sa ilang unodnong mga kiling ug sa pagkawala sa espirituwal nga kahinlo. Diha sa maong tambag, siya naghatag ug puwersadong awhag: “Duol sa Diyos, ug siya moduol kaninyo.” (Santiago 4:1-12) Unsay gipasabot ni Santiago sa pulong nga “duol”?

3, 4. (a) Sa unsa nga ang pipila sa unang-siglong mga magbabasa ni Santiago mahimong gipahinumdoman sa pamulong nga “duol sa Diyos”? (b) Nganong makasalig kita nga posible ang pagduol sa Diyos?

³ Si Santiago migamit ug pamulong nga nasinatian na sa kadaghanan sa iyang mga magbabasa. Ang Moisesnong Balaod naghatag sa mga saserdote ug espesipikong mga instruksiyon kon unsaon sa ‘pagduol’ kang Jehova alang sa iyang katawhan. (Exodo 19:22) Busa ang mga magbabasa ni Santiago mahimong gipahinumdoman nga ang pagduol kang Jehova dili usa ka butang nga pakamenoson lamang. Nabatonan ni Jehova ang kinatas-ang posisyon sa dignidad sa uniberso.

⁴ Sa laing bahin, sumala sa giingon sa usa ka eskolar sa Bibliya, “kining tambag [sa Santiago 4:8] nagpadayag ug hilabihang pagkamalaomon.” Si Santiago nahibalo nga si Jehova kanunayng mahigugmaon nga nag-awhag sa dili-hingpit nga mga tawo sa pagduol Kaniya. (2 Cronicas 15:2) Ang halad ni Jesus nagbukas sa dalan aron makaduol kang Jehova sa mas bug-os nga diwa. (Efeso 3:11, 12) Karon, ang paagi sa pagduol sa Diyos gibuksan alang sa milyonmilyon! Apan, sa unsang paagi magamit nato kining kahibulongang kahigayonan? Hisgotan nato sa makadiyot ang tulo ka paagi nga niana kita makaduol kang Jehova nga Diyos.

Padayon sa “Pagkuha ug Kahibalo” Bahin sa Diyos

5, 6. Sa unsang paagi ang panig-ingnan sa batan-ong si Samuel nag-ilustrar kon unsay nalangkit sa “pagkuha ug kahibalo” bahin sa Diyos?

⁵ Sumala sa Juan 17:3, si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” Daghang hubad niining bersikuloha ang lahi ug diyutay sa Bag-ong Kalibotang Hubad. Imbes moingon nga “pagkuha ug kahibalo” bahin sa Diyos, sila yanong maghubad sa berbo ngadto sa “pagkaila” sa Diyos. Apan, daghang eskolar ang nag-ingon nga ang diwa sa pulong nga gigamit sa orihinal nga Grego naglangkit ug labaw pa—usa ka mapinadayonong proseso, usa nga mahimong motultol pa gani sa suod nga pagkaila sa lain.

⁶ Ang suod nga pagkaila sa Diyos dili usa ka bag-ong ideya sa adlaw ni Jesus. Pananglitan, sa Hebreohanong Kasulatan atong mabasa nga sa dihang bata pa si Samuel, “wala pa siya makaila kang Jehova.” (1 Samuel 3:7) Nagpasabot ba kini nga si Samuel diyutay ra kaayog nahibaloan bahin sa iyang Diyos? Wala. Ang iyang mga ginikanan ug ang mga saserdote seguradong daghan ug gitudlo kaniya. Apan, ang Hebreohanong pulong nga gigamit sa maong bersikulo, sumala sa usa ka batid sa pinulongan, mahimong “gamiton alang sa labing suod nga kaila.” Si Samuel wala pa makaila pag-ayo kang Jehova, sama sa iyang pagkaila kaniya sa ulahi sa dihang nag-alagad siya ingong tigpamaba ni Jehova. Samtang nagdako si Samuel, siya nakaila gayod kang Jehova, nga nakabaton ug suod nga personal nga relasyon uban kaniya.—1 Samuel 3:19, 20.

7, 8. (a) Nganong dili angayng maluya ang atong buot tungod sa mas lawom nga mga pagtulon-an sa Bibliya? (b) Unsa ang pipila ka lawom nga mga kamatuoran sa Pulong sa Diyos nga angay natong tun-an?

⁷ Nagakuha ka ba ug kahibalo bahin kang Jehova aron suod nga makaila kaniya? Aron mahimo kana, kinahanglang ‘maugmad nimo ang pagpangandoy’ sa espirituwal nga pagkaon nga ginahatag sa Diyos. (1 Pedro 2:2) Ayaw pagkatagbaw sa paninugdan lamang nga mga pagtulon-an sa Bibliya. Paningkamot nga makakat-on sa mas lawom nga mga pagtulon-an sa Bibliya. (Hebreohanon 5:12-14) Naluya ba ang imong buot tungod sa maong mga pagtulon-an, nga naghunahuna nga kini lisod kaayo? Kon mao, hinumdomi nga si Jehova mao ang “Dakong Instruktor.” (Isaias 30:20) Siya nahibalo kon unsaon pagpasa ug lawom nga mga kamatuoran ngadto sa dili-hingpit nga mga hunahuna sa tawo. Ug makapanalangin siya sa imong sinserong mga paningkamot sa pagsabot kon unsay iyang ginatudlo kanimo.—Salmo 25:4.

⁸ Nganong dili nimo susihon ang imong kaugalingon maylabot sa pipila ka “lawom nga mga butang sa Diyos”? (1 Corinto 2:10) Kini dili mga topiko nga dili makaiikag sama nianang pagadebatehan sa mga teologo ug mga klerigo. Kini maoy mapuslanong mga doktrina nga pinaagi niana makakat-on kita ug makaiikag kaayo nga mga butang bahin sa hunahuna ug kasingkasing sa atong langitnong Amahan. Pananglitan, ang halad-lukat, “sagradong tinago,” ug ang lainlaing mga pakigsaad nga gigamit ni Jehova sa pagpanalangin sa iyang katawhan ug pagtuman sa iyang mga katuyoan—kining maong mga ulohan ug daghan pang susama niini maoy makalipay ug magantihong mga topiko alang sa personal nga panukiduki ug pagtuon.—1 Corinto 2:7.

9, 10. (a) Nganong peligroso ang garbo, ug unsay motabang kanato sa paglikay niana? (b) Maylabot sa kahibalo ni Jehova, nganong maningkamot kita nga mahimong mapaubsanon?

⁹ Samtang motubo ang imong kahibalo sa mas lawom nga espirituwal nga mga kamatuoran, pagbantay sa kapeligrohan nga mahimong moresulta tungod sa kahibalo—ang garbo. (1 Corinto 8:1) Ang garbo peligroso, kay kini magpalayo sa mga tawo gikan sa Diyos. (Proverbio 16:5; Santiago 4:6) Hinumdomi nga walay tawo nga dunay katarongan nga manghambog sa iyang kahibalo. Sa pag-ilustrar, tagda kining mga pulonga gikan sa pasiuna sa usa ka libro nga nagsurbi sa mas bag-ong mga kauswagan sa tawo sa natad sa siyensiya: “Kon mas daghan kitag nahibaloan, mas makaamgo kita nga pagkagamay diay sa atong nahibaloan. . . . Ang tanan nga atong nakat-onan walay bili kon itandi sa ato pang angayng tun-an.” Ang maong pagkamapaubsanon makapalipay. Karon, kon bahin sa kinadak-ang hugpong sa kahibalo—ang kahibalo ni Jehova nga Diyos—aduna kitay labaw pa gani nga hinungdan nga magmapaubsanon. Ngano?

¹⁰ Matikdi ang pipila ka pahayag sa Bibliya bahin kang Jehova. “Pagkahalawom sa imong mga hunahuna.” (Salmo 92:5) “Ang pagsabot [ni Jehova] dili-ikabatbat.” (Salmo 147:5) “Dili arang masusi ang pagsabot [ni Jehova].” (Isaias 40:28) “Oh pagkalawom sa bahandi ug kaalam ug kahibalo sa Diyos!” (Roma 11:33) Klaro nga dili gayod mahibaloan ang tanan bahin kang Jehova. (Ecclesiastes 3:11) Gitudloan niya kita ug daghang kahibulongang mga butang, apan kanunayng anaa sa atubangan nato ang usa ka walay-kinutoban nga hugpong sa kahibalo diin kita dugang makakat-on. Wala ba kita mahinam ug mobating ubos tungod nianang maong palaaboton? Nan, samtang kita nagakat-on hinaot nga gamiton gayod nato ang atong kahibalo ingong pasikaranan sa pagduol kang Jehova ug sa pagtabang sa uban sa pagbuhat niana—nga dili gayod kini gamiton ingong paagi sa pagtuboy sa atong kaugalingon ibabaw sa uban.—Mateo 23:12; Lucas 9:48.

Ipadayag ang Imong Gugma Kang Jehova

11, 12. (a) Sa unsang paagi angayng mag-apektar kanato ang kahibalo nga atong kuhaon bahin kang Jehova? (b) Unsay magtino kon tinuod ba ang gugma sa usa ka tawo alang sa Diyos?

¹¹ Sa kahaom, gilangkit ni apostol Pablo ang kahibalo ug gugma. Siya misulat: “Mao kini ang padayon ko nga ginaampo, nga ang inyong gugma mosamot pa sa pagdagaya uban ang tukmang kahibalo ug bug-os nga katakos sa pag-ila.” (Filipos 1:9) Inay kay mopahinabo kanato nga moburot sa garbo, ang matag bililhong kamatuoran nga atong makat-onan mahitungod kang Jehova ug sa iyang mga katuyoan angayng magpadako sa atong gugma alang sa atong langitnong Amahan.

¹² Siyempre, daghang nag-angkon nga nahigugma sa Diyos ang sa pagkatinuod wala gayod mahigugma kaniya. Sila tingali sinsero bahin sa kusganong mga pagbati nga nagsugwak diha sa ilang kasingkasing. Ang maong mga pagbati maayo man, dalayegon pa gani, kon kini kaharmonya sa tukmang kahibalo. Apan kini dili katumbas sa tinuod nga gugma alang sa Diyos. Nganong dili? Matikdi kon sa unsang paagi gihubit sa Pulong sa Diyos ang maong gugma: “Kini ang kahulogan sa paghigugma sa Diyos, nga atong bantayan ang iyang mga sugo.” (1 Juan 5:3) Nan, ang gugma alang kang Jehova tiunay lamang kon kini gipahayag diha sa masinugtanong mga lihok.

13. Sa unsang paagi ang diyosnong kahadlok motabang kanato sa pagpasundayag sa atong gugma alang kang Jehova?

¹³ Ang diyosnong kahadlok motabang kanato sa pagsugot kang Jehova. Kining dakong kataha ug halawom nga pagtahod alang kang Jehova naggikan sa pagkuha ug kahibalo bahin kaniya, pagtuon bahin sa iyang walay-kinutobang pagkabalaan, himaya, gahom, hustisya, kaalam, ug gugma. Ang maong kahadlok hinungdanon diha sa pagduol kaniya. Ngani, matikdi ang giingon sa Salmo 25:14: “Ang pagkasuod kang Jehova ila sa mga nahadlok kaniya.” Busa kon kita dunay maayong matang sa kahadlok nga dili pasuk-on ang atong mahigugmaon nga langitnong Amahan, kita makaduol kaniya. Ang diyosnong kahadlok motabang kanato sa pagsunod sa maalamong tambag nga nasulat diha sa Proverbio 3:6: “Sa tanan mong mga dalan tagda siya, ug siya magatul-id sa imong mga alagianan.” Unsay buot ipasabot niana?

14, 15. (a) Unsa ang pipila sa mga desisyon nga atong ginaatubang sa adlaw-adlaw nga kinabuhi? (b) Sa unsang paagi kita makahimog mga desisyon sa paagi nga magbanaag sa atong diyosnong kahadlok?

¹⁴ Kinahanglang mohimo ka ug desisyon kada adlaw, dagko ug gagmay. Pananglitan, unsang matanga sa kabildohay ang imong himoon uban sa imong mga kauban sa trabaho, kauban sa tunghaan, mga silingan? (Lucas 6:45) Magkugi ka ba sa paghimo sa mga buluhaton nga gihatag kanimo, o mangita kag mga paagi nga matapos ang trabaho pinaagi sa diyutay lamang nga paghago? (Colosas 3:23) Makigsuod ka ba niadtong nagpakita ug diyutay lang nga gugma o walay gugma alang kang Jehova, o maningkamot ka sa pagpalig-on sa imong relasyon uban sa mga tawo nga mahunahunaon sa espirituwal? (Proverbio 13:20) Unsay imong buhaton, bisan sa gagmayng mga paagi, sa pagpalambo sa mga intereses sa Gingharian sa Diyos? (Mateo 6:33) Kon ang Kasulatanhong mga prinsipyo sama nianang gihisgotan dinhi naggiya sa imong adlaw-adlaw nga mga desisyon, nan ikaw sa pagkatinuod nagtagad kang Jehova “sa tanan mong mga dalan.”

¹⁵ Sa pagkatinuod, sa matag desisyon nga atong himoon, kita angayng magiyahan niining hunahunaa: ‘Unsay gusto ni Jehova nga akong buhaton? Unsang dalan ang labing makapahimuot kaniya?’ (Proverbio 27:11) Ang pagpakita ug diyosnong kahadlok niining paagiha maoy maayong paagi sa pagpahayag ug gugma alang kang Jehova. Ang diyosnong kahadlok magtukmod usab kanato sa pagpabiling hinlo—sa espirituwal, moral, ug sa pisikal. Hinumdomi nga sa mao gihapong bersikulo diin giawhag ni Santiago ang mga Kristohanon sa ‘pagduol sa Diyos,’ siya nagtambag usab: “Hinloi ang inyong mga kamot, kamong mga makasasala, ug lunsaya ang inyong mga kasingkasing, kamong mga maduhaduhaon.”—Santiago 4:8.

16. Pinaagi sa paghatag ngadto kang Jehova, unsay dili gayod nato mahimo, bisan pa niana molampos gayod kita sa pagbuhat sa unsa?

¹⁶ Siyempre, ang pagpahayag sa atong gugma alang kang Jehova naglakip ug labaw pa kay sa paglikay sa kon unsay daotan. Ang gugma magtukmod usab kanato sa pagbuhat kon unsay maayo. Pananglitan, sa unsang paagi kita mosanong sa hilabihang pagkamanggihatagon ni Jehova? Si Santiago misulat: “Ang matag maayong gasa ug matag hingpit nga regalo naggikan sa itaas, kay kini gikan sa Amahan sa langitnong mga kahayag.” (Santiago 1:17) Tinuod, sa dihang kita mohatag kang Jehova sa atong mga kabtangan, dili nato siya mapadato. Siya ang tag-iya sa tanang manggad ug kahinguhaan. (Salmo 50:12) Ug kon kita mohatag kang Jehova sa atong panahon ug kusog, wala nato tagbawa ang usa ka panginahanglan nga dili niya matagbaw mismo. Bisan pag modumili kita sa pagsangyaw sa maayong balita sa Gingharian sa Diyos, mahimo niyang pasinggiton ang mga bato! Nan, nganong mohatag man kita kang Jehova sa atong kahinguhaan, panahon, ug kusog? Sa panguna, tungod kay pinaagi niana atong gipahayag ang atong gugma alang kaniya uban sa atong bug-os nga kasingkasing, kalag, hunahuna, ug kusog.—Marcos 12:29, 30.

17. Unsay makatukmod kanato sa paghatag nga malipayon kang Jehova?

¹⁷ Sa dihang mohatag kita ngadto kang Jehova, angay natong himoon kana nga masadyaon, “kay gihigugma sa Diyos ang malipayong maghahatag.” (2 Corinto 9:7) Ang prinsipyo nga nasulat diha sa Deuteronomio 16:17 makatabang kanato sa paghatag nga malipayon: “Ang gasa sa kamot sa matag usa kinahanglang sumala sa panalangin ni Jehova nga imong Diyos nga iyang gihatag kanimo.” Sa dihang palandongon nato kon unsa ka manggihatagon si Jehova kanato, magtinguha kita sa paghatag kaniya nga malipayon ug dagaya. Ang maong paghatag makapalipay sa kasingkasing, maingon nga ang usa ka gamayng gasa gikan sa usa ka pinalangga nga anak makapahimuot sa ginikanan. Ang pagpahayag sa atong gugma niining paagiha motabang kanato sa pagduol kang Jehova.

Ugmara ang Pagkasuod Pinaagi sa Pag-ampo

18. Nganong takos tagdon kon unsaon pagpauswag ang kalidad sa atong mga pag-ampo?

¹⁸ Ang atong mga yugto sa pribado nga pag-ampo maghatag kanatog bililhong kahigayonan—mga okasyon alang sa suod, pribado nga pagpakig-estorya sa atong langitnong Amahan. (Filipos 4:6) Tungod kay ang pag-ampo maoy usa ka hinungdanong paagi sa pagduol sa Diyos, takos nga mohunong ug palandongon ang kalidad sa atong mga pag-ampo. Wala kini magpasabot nga ang atong pag-ampo kinahanglang talagsaon ug mga pulong ug pagkahan-ay, kondili kini kinahanglang maoy kinasingkasing nga mga pahayag. Sa unsang paagi mapauswag nato ang kalidad sa atong mga pag-ampo?

19, 20. Nganong angayng mamalandong sa dili pa kita moampo, ug unsa ang pipila ka haom nga mga ulohan alang sa maong pagpamalandong?

¹⁹ Mahimong sulayan nato ang pagpamalandong sa dili pa kita mag-ampo. Kon mamalandong kitang daan, atong mahimo ang atong mga pag-ampo nga espesipiko ug makahuloganon, sa ingon malikayan ang batasan sa pagsubli sa pamilyar nga mga pulong nga dali rang mahinumdoman. (Proverbio 15:28, 29) Tingali makatabang ang paghunahuna sa pipila sa mga tema nga gihisgotan ni Jesus diha sa iyang modelong pag-ampo ug dayon tagdon kon sa unsang paagi kini nalangkit sa atong kaugalingong mga sirkumstansiya. (Mateo 6:9-13) Pananglitan, mahimo natong pangutan-on ang atong kaugalingon kon unsang gamayng bahin ang atong gidahom nga himoon sa pagtuman sa kabubut-on ni Jehova dinhi sa yuta. Mahimo ba natong ipahayag kang Jehova ang atong tinguha nga magamit niya kutob sa maarangan ug mohangyo sa iyang tabang sa pagtuman sa bisan unsang mga asaynment nga iyang ihatag kanato? Kita ba nabug-atan sa mga kabalaka bahin sa atong materyal nga mga panginahanglan? Sa unsang mga sala nga kita nagkinahanglan ug kapasayloan, ug ngadto kang kinsa nga kita kinahanglang magmapinasayloon? Unsang mga tentasyon ang nag-apektar kanato, ug naamgohan ba nato kon unsa ka dinalian nga gikinahanglan nato ang panalipod ni Jehova niining bahina?

²⁰ Dugang pa, mahimong maghunahuna kita bahin sa mga tawo nga atong kaila nga ilabinang nagkinahanglan sa tabang ni Jehova. (2 Corinto 1:11) Apan, dili nato kalimtan ang pagpasalamat. Kon hinuktokan nato kini, seguradong makahunahuna kita ug mga katarongan sa pagpasalamat kang Jehova ug pagdayeg kaniya kada adlaw tungod sa iyang dagayang pagkamaayo. (Deuteronomio 8:10; Lucas 10:21) Ang pagbuhat niana dunay dugang benepisyo—makatabang kini kanato sa pagbaton ug mas positibo, mapasalamaton nga tinamdan sa kinabuhi.

21. Ang pagtuon sa unsang Kasulatanhong mga panig-ingnan ang makatabang kanato sa dihang moduol kita kang Jehova diha sa pag-ampo?

²¹ Ang pagtuon makapauswag usab sa atong mga pag-ampo. Dunay talagsaong mga pag-ampo sa matinumanong mga lalaki ug babaye nga nasulat diha sa Pulong sa Diyos. Pananglitan, kon nag-atubang kita ug usa ka bug-at nga problema, nga tungod niini kita nabalaka ug nahadlok pa sa atong kaayohan ug nianang sa atong mga minahal, mahimong basahon nato ang pag-ampo ni Jacob mahitungod sa iyang nagsingabot nga pagpakigkita sa iyang mapanimaslong igsoon nga si Esau. (Genesis 32:9-12) O mahimong tun-an nato ang pag-ampo nga gilitok ni Haring Asa sa dihang duolan sa usa ka milyong Etiopianhon ang naghulga sa katawhan sa Diyos. (2 Cronicas 14:11, 12) Kon gihasol kita sa usa ka problema nga naghulga sa pagpasipala sa maayong ngalan ni Jehova, nan ang pag-ampo ni Elias atubangan sa mga magsisimba ni Baal didto sa Bukid sa Carmelo takos tagdon, maingon man ang pag-ampo ni Nehemias bahin sa makaluluoyng kahimtang sa Jerusalem. (1 Hari 18:36, 37; Nehemias 1:4-11) Ang pagbasa ug pagpalandong sa maong mga pag-ampo makapalig-on sa atong pagtuo ug makahatag kanato ug mga ideya kon sa unsang paagi labing maayong duolon si Jehova uban sa mga kabalaka nga naghatag kanatog kabug-at.

22. Unsa ang tinuig nga teksto sa 2003, ug unsay mahimo natong isukna sa atong kaugalingon matag karon ug unya sulod sa tibuok tuig?

²² Klaro nga wala nay mas dakong dungog, mas maayo pang tumong, kay sa pagsunod sa tambag ni Santiago sa ‘pagduol sa Diyos.’ (Santiago 4:8) Hinaot buhaton nato kana pinaagi sa pag-uswag diha sa atong kahibalo sa Diyos, pinaagi sa pagpaningkamot nga mas pang ipahayag ang atong gugma kaniya, ug pinaagi sa pagpaningkamot nga masuod kaniya diha sa atong mga pag-ampo. Sa tibuok tuig 2003, samtang ibutang nato sa hunahuna ang Santiago 4:8 ingong tinuig nga teksto, hinaot nga magpadayon kita sa pagsusi sa atong kaugalingon kon kita nagaduol ba gayod kang Jehova. Apan, komosta ang ulahing bahin nianang maong teksto? Sa unsang diwa nga si Jehova “moduol kaninyo,” nga magpahinabo ug unsang mga panalangin? Ang sunod nga artikulo maghisgot niini.

“Siya Moduol Kaninyo”

“[Ang Diyos] dili halayo gikan sa matag usa kanato.”—BUHAT 17:27.

1, 2. (a) Sa dihang mosud-ong sa daghag bituon nga kalangitan, unsang pangutana ang mahimo natong isukna maylabot sa Maglalalang? (b) Sa unsang paagi gipasaligan kita sa Bibliya nga ang mga tawo bililhon gayod sa mga mata ni Jehova?

NASULAYAN na ba nimo ang pagsud-ong sa daghag bituon nga kalangitan sa gabii nga walay dag-om ug natugob ka sa kahibulong? Ang daghan kaayong bituon ug ang kadako sa kawanangan makapahingangha. Niining dako kaayo nga uniberso, ang yuta maoy usa lamang ka gamayng tuldok. Nagpasabot ba kini nga ang Maglalalang, “ang Labing Hataas ibabaw sa tibuok nga yuta,” taas ra kaayo nga dili siya mabalaka bahin sa mga tawo o siya halayo ra kaayo ug dili-matugkad nga dili siya mailhan sa mga tawo?—Salmo 83:18.

² Gipasaligan kita sa Bibliya nga ang mga tawo bililhon gayod sa mga mata ni Jehova. Gani, ang Pulong sa Diyos nagdasig kanato sa pagpangita kaniya, nga nag-ingon: “Siya dili halayo gikan sa matag usa kanato.” (Buhat 17:27; 1 Cronicas 28:9) Sa pagkatinuod, kon kita mohimog mga lakang sa pagduol sa Diyos, mosanong siya sa atong mga paningkamot. Sa unsang paagi? Ang mga pulong sa atong tinuig nga teksto sa 2003 naghatag niining makapadasig nga tubag: “Siya moduol kaninyo.” (Santiago 4:8) Hisgotan nato ang pipila sa kahibulongang mga panalangin nga dagayang ihatag ni Jehova niadtong suod kaniya.

Usa ka Personal nga Gasa Gikan Kang Jehova

3. Unsang gasa ang ihatag ni Jehova niadtong moduol kaniya?

³ Una, ang mga alagad ni Jehova dunay bililhong gasa nga giandam niya alang sa iyang katawhan. Ang tanang gahom, bahandi, ug edukasyon nga itanyag niining sistemaha sa mga butang dili makatanyag nianang maong gasa. Kini maoy usa ka personal nga gasa, usa nga ihatag lamang ni Jehova niadtong suod kaniya. Unsa man kana? Ang Pulong sa Diyos nagtubag: “Kon ikaw . . . magapatugbaw sa imong tingog alang sa katakos sa pag-ila, kon ikaw magapadayon sa pagpangita niini ingon sa plata, ug ingon sa tinagong mga bahandi ikaw magapadayon sa pagpangita niini, nan imong masabtan ang pagkahadlok kang Jehova, ug imong makaplagan ang mismong kahibalo sa Diyos. Kay si Jehova magahatag ug kaalam.” (Proverbio 2:3-6) Tiaw mo kana, ang dili-hingpit nga mga tawo makakaplag sa “mismong kahibalo sa Diyos”! Kanang maong gasa—ang kahibalo nga makaplagan diha sa Pulong sa Diyos—gitandi sa “tinagong mga bahandi.” Ngano man?

4, 5. Nganong “ang mismong kahibalo sa Diyos” ikatandi sa “tinagong mga bahandi”? Iilustrar.

⁴ Una, ang kahibalo sa Diyos bililhon kaayo. Usa sa labing bililhong mga panalangin niini mao ang paglaom nga mabuhi sa walay kataposan. (Juan 17:3) Apan ang maong kahibalo makapatugob sa atong kinabuhi bisan karon. Pananglitan, tungod sa atong mainampingong pagtuon sa Pulong sa Diyos, atong nahibaloan ang mga tubag sa hinungdanong mga pangutana sama sa: Unsay ngalan sa Diyos? (Salmo 83:18) Unsa ang tinuod nga kahimtang sa mga patay? (Ecclesiastes 9:5, 10) Unsay katuyoan sa Diyos alang sa yuta ug sa katawhan? (Isaias 45:18) Nahibaloan usab nato nga ang kinamaayohang paagi sa pagkinabuhi mao ang pagpadapat sa maalamong tambag sa Bibliya. (Isaias 30:20, 21; 48:17, 18) Busa, kita adunay maayong giya nga motabang kanato sa pagsagubang sa mga kabalaka sa kinabuhi ug sa pagsubay sa dalan nga magpatungha ug tinuod nga kalipay ug katagbawan. Labaw sa tanan, ang atong pagtuon sa Pulong sa Diyos nakapaarang kanato sa pagkahibalo sa kahibulongang mga hiyas ni Jehova ug sa pagduol kaniya. Unsa pay mas bililhon kay sa suod nga relasyon uban kang Jehova nga pinasukad sa “mismong kahibalo sa Diyos”?

⁵ Dunay laing katarongan kon nganong ang kahibalo sa Diyos ikatandi sa “tinagong mga bahandi.” Sama sa daghang bahandi, kini may pagkatalagsaon niining kalibotana. Sa unom ka bilyong molupyo sa yuta, mga unom ka milyong magsisimba ni Jehova, o mga 1 sa 1,000, ang nakakaplag sa “mismong kahibalo sa Diyos.” Sa pag-ilustrar kon unsa ka talagsaong pribilehiyo ang pagkahibalo sa kamatuoran sa Pulong sa Diyos, tagda ang usa lamang ka pangutana sa Bibliya: Unsay mahitabo sa mga tawo inigkamatay? Nahibalo kita gikan sa Kasulatan nga ang kalag mamatay ug nga ang mga patay walay kaamgohan. (Ezequiel 18:4) Bisan pa niana, ang bakak nga pagtuo nga dunay usa ka butang sa sulod sa tawo nga magpabiling buhi human sa kamatayon gidawat sa kadaghanang mga relihiyon sa kalibotan. Kini maoy hinungdanong bahin sa mga relihiyon sa Kakristiyanohan. Anaa usab kini sa Budhismo, Hinduismo, Islam, Jainismo, Judaismo, Shinto, Sikhismo, ug Taoismo. Hunahunaa ra—bilyonbilyong tawo ang nalimbongan niining usa ka bakak nga doktrina!

6, 7. (a) Kinsa lamang ang makakaplag sa “mismong kahibalo sa Diyos”? (b) Unsang panig-ingnan ang nagpakita nga si Jehova nagpanalangin kanato ug hait nga pagsabot nga wala mabatoni sa daghang ‘maalamon ug mga makinaadmanon’?

⁶ Nganong diyutay ra man ang mga tawo nga nakakaplag sa “mismong kahibalo sa Diyos”? Tungod kay ang usa dili bug-os nga makasabot sa kahulogan sa Pulong sa Diyos nga wala ang Iyang tabang. Hinumdomi, kining maong kahibalo maoy usa ka gasa. Ihatag lamang kini ni Jehova niadtong andam nga manukiduki sa iyang Pulong uban ang pagkamatinud-anon ug pagkamapaubsanon. Ang maong mga tawo dili tingali “maalamon sa unodnong paagi.” (1 Corinto 1:26) Daghan taliwala kanila ang mahimo ganing isipon nga “dili edukado ug ordinaryo” sumala sa mga sukdanan sa kalibotan. (Buhat 4:13) Bisan pa niana, dili kana hinungdanon. Si Jehova magaganti kanato uban sa “mismong kahibalo sa Diyos” tungod sa mga hiyas nga iyang makaplagan diha sa atong kasingkasing.

⁷ Tagda ang usa ka pananglitan. Daghang eskolar sa Kakristiyanohan ang nagpatungha ug daghan kaayong mga komentaryo bahin sa Bibliya. Ang maong mga basahon magsaysay tingali sa makasaysayanhong kagikan, sa kahulogan sa Hebreohanon ug Grego nga mga pulong, ug uban pa. Uban sa tanan nilang kinaadman, nakaplagan ba gayod sa maong mga eskolar “ang mismong kahibalo sa Diyos”? Aw, nasabtan ba gayod nila ang tema sa Bibliya—ang pagbindikar sa pagkasoberano ni Jehova pinaagi sa iyang langitnong Gingharian? Nahibalo ba sila nga si Jehova nga Diyos dili bahin sa usa ka Trinidad? Kita duna gayoy tukma nga pagsabot sa maong mga butang. Ngano? Si Jehova naghatag kanato ug hait nga pagsabot sa espirituwal nga mga kamatuoran nga wala mabatoni sa daghang ‘maalamon ug mga makinaadmanon.’ (Mateo 11:25) Nagaganti gayod si Jehova niadtong suod kaniya!

“Si Jehova Nagabantay sa Tanang Nahigugma Kaniya”

8, 9. (a) Sa unsang paagi gihubit ni David ang laing panalangin alang niadtong suod kang Jehova? (b) Nganong ang matuod nga mga Kristohanon nagkinahanglan ug proteksiyon sa Diyos?

⁸ Kadtong suod kang Jehova nagatagamtam ug laing panalangin—ang Iyang proteksiyon. Ang salmistang si David, kinsa nakaagi ug daghang kalisdanan, misulat: “Si Jehova haduol kanilang tanan nga nagatawag kaniya, kanilang tanan nga nagatawag kaniya sa kamatinud-anon. Pagatumanon niya ang tinguha niadtong nahadlok kaniya, ug ang ilang pagtuaw alang sa tabang iyang pagadunggon, ug siya magaluwas kanila. Si Jehova nagabantay sa tanang nahigugma kaniya.” (Salmo 145:18-20) Oo, si Jehova duol niadtong nahigugma kaniya ug busa makasanong dayon sa ilang pagpangayog tabang.

⁹ Nganong nagkinahanglan kita sa proteksiyon sa Diyos? Gawas pa sa pagbati sa mga epekto sa pagkinabuhi niining “makuyaw nga mga panahong lisod sagubangon,” ang matuod nga mga Kristohanon mao ang linaing gipuntirya sa pangunang Kaaway ni Jehova, nga mao si Satanas nga Yawa. (2 Timoteo 3:1) Ang malansisong kaaway determinadong ‘motukob’ kanato. (1 Pedro 5:8) Kita lutoson, pit-oson, ug tentalon ni Satanas. Mangita usab siyag mga tinamdan sa hunahuna ug kasingkasing nga iyang mapahimuslan. Siya adunay tumong: ang pagpaluya sa atong pagtuo ug pagdaot sa atong espirituwalidad. (Pinadayag 12:12, 17) Tungod kay duna kitay gamhanan kaayong kaaway nga atubangon, dili ba makapalig-on ang pagkahibalo nga “si Jehova nagabantay sa tanang nahigugma kaniya”?

10. (a) Sa unsang paagi si Jehova nagabantay sa iyang katawhan? (b) Unsa ang labing hinungdanong matang sa proteksiyon, ug ngano?

¹⁰ Apan, sa unsang paagi si Jehova nagabantay sa iyang katawhan? Ang iyang saad nga proteksiyon dili maggarantiya kanato ug kinabuhi nga walay mga problema niining sistemaha; ni nagpasabot kini nga siya obligado nga maghimog mga milagro alang kanato. Bisan pa niana, si Jehova nagahatag gayod ug pisikal nga panalipod alang sa iyang katawhan ingong usa ka grupo. Kon buot hunahunaon, dili gayod niya tugotan ang Yawa nga paphaon ang matuod nga mga magsisimba gikan sa yuta! (2 Pedro 2:9) Labaw sa tanan, si Jehova manalipod kanato sa espirituwal nga paagi. Gisangkapan niya kita sa atong gikinahanglan aron sa paglahutay sa mga pagsulay ug sa pagpanalipod sa atong relasyon kaniya. Sa ngadtongadto, ang espirituwal nga proteksiyon mao ang labing hinungdanong matang sa proteksiyon. Ngano? Basta mamentinar nato ang atong relasyon uban kang Jehova, walay bisan unsa—bisan gani kamatayon—ang makadaot kanato sa dayon.—Mateo 10:28.

11. Unsang mga tagana ang gihimo ni Jehova alang sa espirituwal nga proteksiyon sa iyang katawhan?

¹¹ Si Jehova naghimog daghang kahikayan alang sa espirituwal nga proteksiyon niadtong suod kaniya. Pinaagi sa iyang Pulong, ang Bibliya, siya nagahatag kanato ug kaalam aron sa pagsagubang sa lainlaing mga pagsulay. (Santiago 1:2-5) Ang pagpadapat sa praktikal nga tambag nga makita diha sa Kasulatan maoy proteksiyon mismo. Dugang pa, si Jehova nagahatag ug “balaang espiritu niadtong nagapangayo kaniya.” (Lucas 11:13) Ang maong espiritu mao ang labing gamhanang puwersa sa uniberso, busa kini tinong magsangkap kanato aron maatubang nga malamposon ang bisan unsang pagsulay o tentasyon nga modangat kanato. Pinaagi kang Kristo, si Jehova nagahatag ug “mga gasa nga mga lalaki.” (Efeso 4:8) Kining kuwalipikado sa espirituwal nga mga lalaki naningkamot sa pagsumbalik-silaw sa kaugalingong halalom nga pagbati ni Jehova sa dihang sila nagatabang sa mga isigkamagsisimba.—Santiago 5:14, 15.

12, 13. (a) Pinaagi sa unsa nga si Jehova nagtagana kanato ug espirituwal nga pagkaon sa tukmang panahon? (b) Unsay pagbati nimo bahin sa mga tagana ni Jehova alang sa atong espirituwal nga kaayohan?

¹² Si Jehova nagtagana ug laing butang nga manalipod kanato: espirituwal nga pagkaon sa hustong panahon. (Mateo 24:45) Pinaagi sa pinatik nga mga publikasyon, lakip na sa mga magasing Ang Bantayanang Torre ug Pagmata!, maingon man sa mga tigom, asembliya, ug mga kombensiyon, si Jehova nagtagana kanato sa atong gikinahanglan sa dihang gikinahanglan nato kini. Mahinumdoman ba nimo ang usa ka higayon sa dihang duna kay nadungog sa usa ka Kristohanong tigom, asembliya, o kombensiyon nga nakatandog sa imong kasingkasing ug nagpalig-on o naghupay kanimo? Nakabasa ka na ba sukad ug artikulo diha sa usa sa nahisgotan nang mga magasin ug mibati nga kini gisulat alang gayod kanimo?

¹³ Usa sa labing epektibong mga hinagiban ni Satanas mao ang pagkaluya sa buot, ug apektado kita niini. Siya nasayod gayod nga ang dulot nga pagbatig kawalay-paglaom makapaluya kanato, makapahimo pa gani kanato nga daling madala ni Satanas. (Proverbio 24:10) Tungod kay si Satanas naningkamot sa pagpahimulos sa negatibong mga pagbati, kita nagkinahanglan ug tabang. Ang mga magasing Bantayanang Torre ug Pagmata! matag karon ug unya nagpatik ug mga artikulo nga motabang kanato sa pagbuntog sa pagkaluya sa buot. Bahin sa usa nianang maong mga artikulo, usa ka Kristohanong sister misulat: “Ginabasa ko ang artikulo halos kada adlaw, ug manglugmaw gihapon ang akong mga luha. Gibutang ko kini tupad sa akong kama aron mabasa dayon nako kini kon maluya ang akong buot. Pinaagi sa mga artikulo nga sama niini, gibati nako nga ang mapanalipdanong mga kamot ni Jehova naghalog kanako.”a Dili ba kita mapasalamaton kang Jehova tungod sa pagtagana kanato ug tukma-sa-panahong espirituwal nga pagkaon? Hinumdomi, ang iyang mga kahikayan alang sa atong espirituwal nga kaayohan maoy pamatuod nga siya duol kanato ug nagpailalom kanato sa iyang mapanalipdanong pag-atiman.

Pagduol sa “Tigpatalinghog sa Pag-ampo”

14, 15. (a) Unsang personal nga panalangin ang gihatag ni Jehova niadtong suod kaniya? (b) Nganong usa ka talagsaong pribilehiyo nga gitugotan kitang moduol kang Jehova diha sa pag-ampo?

¹⁴ Namatikdan ba nimo nga sa dihang ang mga tawo makaangkon ug gahom ug awtoridad, kasagarang nagkalisod silang duolon niadtong nailalom sa ilang awtoridad? Apan, komosta si Jehova nga Diyos? Siya ba halayo ra kaayo nga dili siya interesado sa gipahayag sa mga tawo kaniya? Kasukwahi niana! Ang gasa sa pag-ampo maoy lain pang panalangin nga ihatag ni Jehova niadtong suod kaniya. Usa ka kahibulongang pribilehiyo nga gitugotan kitang moduol sa “Tigpatalinghog sa pag-ampo.” (Salmo 65:2) Ngano?

¹⁵ Sa pag-ilustrar: Ang pangulong ehekutibo sa usa ka dakong korporasyon adunay daghang responsibilidad. Siya mohukom kon unsang mga butanga ang iyang dumalahon sa personal ug unsay iyang idelegar sa uban. Sa susama, ang Soberanong Magmamando sa uniberso makapili kon unsang mga butanga ang iyang apilan ug kon unsay iyang idelegar. Hunahunaa ra ang tanang katungdanan nga gidelegar ni Jehova sa iyang pinalanggang Anak nga si Jesus. Ang Anak gihatagag “awtoridad sa pagpanghukom.” (Juan 5:27) Ang mga manulonda “gipailalom kaniya.” (1 Pedro 3:22) Ang gamhanang balaang espiritu ni Jehova gipagamit kang Jesus sa pagtabang kaniya sa pagpanguna sa iyang mga tinun-an dinhi sa yuta. (Juan 15:26; 16:7) Busa makaingon si Jesus: “Ang tanang awtoridad gihatag na kanako sa langit ug sa yuta.” (Mateo 28:18) Bisan pa niana, maylabot sa atong mga pag-ampo, si Jehova mipili nga malangkit niana mismo. Mao nga gisugo kita sa Bibliya sa pagtumong sa atong mga pag-ampo ngadto lamang kang Jehova, nga himoon kana sa ngalan ni Jesus.—Salmo 69:13; Juan 14:6, 13.

16. Nganong makasalig kita nga si Jehova mamati gayod sa atong mga pag-ampo?

¹⁶ Mamati ba gayod si Jehova sa atong mga pag-ampo? Kon siya dili matinagdanon, dili gayod niya kita awhagon nga ‘molahutay sa pag-ampo’ o motugyan sa atong mga palas-anon ug mga kabalaka ngadto kaniya. (Roma 12:12; Salmo 55:22; 1 Pedro 5:7) Ang matinumanong mga alagad sa kapanahonan sa Bibliya may bug-os nga pagsalig nga si Jehova mamati sa pag-ampo. (1 Juan 5:14) Busa, ang salmistang si David miingon: “Madungog [ni Jehova] ang akong tingog.” (Salmo 55:17) Kita usab dunay katarongan nga magmasaligon nga si Jehova anaa sa duol, andam magpatalinghog sa atong tanang hunahuna ug kabalaka.

Si Jehova Magaganti sa Iyang mga Alagad

17, 18. (a) Unsay bation ni Jehova bahin sa matinumanong pag-alagad sa iyang intelihenteng mga linalang? (b) Ipatin-aw kon sa unsang paagi gipakita sa Proverbio 19:17 nga ang atong maluluy-ong mga buhat namatikdan ni Jehova.

¹⁷ Ang posisyon ni Jehova ingong Unibersohanong Soberano dili maapektahan sa ginabuhat o dili gustong buhaton sa mga tawo lamang. Bisan pa niana, si Jehova maoy mapabilhon nga Diyos. Giapresyar pa gani niya ang matinumanong pag-alagad sa iyang intelihenteng mga linalang. (Salmo 147:11) Nan, kini maoy laing benepisyo nga matagamtam niadtong suod kang Jehova: Siya magaganti sa iyang mga alagad.—Hebreohanon 11:6.

¹⁸ Klarong gipakita sa Bibliya nga si Jehova nagpabili sa ginabuhat sa iyang mga magsisimba. Pananglitan, atong mabasa: “Siya nga nagapakitag kaluoy sa timawa nagapahulam kang Jehova, ug Siya magabayad kaniya sa iyang gibuhat.” (Proverbio 19:17) Ang maluluy-ong konsiderasyon ni Jehova alang sa mga timawa gibanaag diha sa Moisesnong Balaod. (Levitico 14:21; 19:15) Unsay bation ni Jehova kon sundogon nato ang iyang kaluoy diha sa atong mga pakiglabot sa mga timawa? Sa dihang mohatag kita ngadto sa timawa, nga dili magdahom ug balos, lantawon kini ni Jehova ingong pahulam ngadto Kaniya. Si Jehova nagsaad sa pagbayad sa maong utang pinaagig pabor ug mga panalangin. (Proverbio 10:22; Mateo 6:3, 4; Lucas 14:12-14) Oo, sa dihang magpakita kita ug kaluoy sa usa ka isigkamagsisimba nga nanginahanglan, kini makatandog sa kasingkasing ni Jehova. Pagkamapasalamaton nato nga atong nahibaloan nga ang atong maluluy-ong mga buhat namatikdan sa atong langitnong Amahan!—Mateo 5:7.

19. (a) Nganong makaseguro kita nga si Jehova nagpabili sa atong ginahimo diha sa buluhatong pagsangyaw ug paghimog tinun-an? (b) Sa unsang paagi si Jehova magaganti sa mga buhat sa pag-alagad nga gihimo sa pagpaluyo sa iyang Gingharian?

¹⁹ Si Jehova ilabinang nagpabili sa atong ginabuhat alang sa iyang Gingharian. Sa dihang moduol kita kang Jehova, natural lamang nga buot natong gamiton ang atong panahon, kusog, ug mga kahinguhaan aron sa pagpakig-ambit sa bug-os kutob sa mahimo diha sa pagsangyaw sa Gingharian ug sa buluhatong paghimog-tinun-an. (Mateo 28:19, 20) Usahay, bation tingali nato nga diyutay ra ang atong nahimo. Ang atong dili-hingpit nga kasingkasing magpahinabo pa gani kanato sa pagduhaduha kon nahimuot ba si Jehova sa atong mga paningkamot. (1 Juan 3:19, 20) Apan gipabilhan ni Jehova ang bisan unsang gasa—bisan unsa ka gamay—nga nagagikan sa usa ka kasingkasing nga gitukmod sa gugma. (Marcos 12:41-44) Gipasaligan kita sa Bibliya: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” (Hebreohanon 6:10) Sa pagkatinuod, si Jehova mahinumdom ug magaganti bisan sa kinagamyang buhat sa pag-alagad nga gihimo sa pagpaluyo sa iyang Gingharian. Gawas pa sa dagayang mga panalangin karon, makalaom kita sa mga kalipay sa kinabuhi sa nagsingabot nga bag-ong kalibotan, diin si Jehova madagayaong magbukhad sa iyang kamot ug magtagbaw sa matarong nga mga tinguha sa tanan nga suod kaniya!—Salmo 145:16; 2 Pedro 3:13.

20. Sa tibuok tuig 2003, sa unsang paagi kaha masilsil nato sa hunahuna ang mga pulong sa atong tinuig nga teksto, ug uban sa unsang resulta?

²⁰ Sa tibuok tuig 2003, suknaon nato ang atong kaugalingon kon kita ba nagahimog mapinadayonong paningkamot sa pagduol sa atong langitnong Amahan. Kon mao, makaseguro kita nga siya mosanong sumala sa iyang gisaad. Kon buot hunahunaon, ‘ang Diyos . . . dili makabakak.’ (Tito 1:2) Kon moduol ka kaniya, siya moduol kanimo. (Santiago 4:8) Ug uban sa unsang resulta? Dagayang mga panalangin karon ug ang palaaboton nga mas masuod pa kang Jehova hangtod sa kahangtoran!

[Footnote]