Barog nga Malig-on Batok sa mga Panglansis ni Satanas
“Isul-ob ang hingpit nga sapot sa hinagiban gikan sa Diyos aron kamo makabarog nga malig-on batok sa mga panglansis [Grego, “malinglahong mga buhat”] sa Yawa.”—EFESO 6:11.
1. Unsang ebidensiya nga si Satanas nagalungtad ang gitagana sa mga pagtental kang Jesus?
SI Satanas tinuod bang nagalungtad? Mangatarongan ang pila ka tawo nga sa Bibliya, ang “Satanas” nagatumong lamang sa pagkadaotan sa kahiladman sa tawo. Dili sila motuo sa iyang kalungtaran ingong usa ka linalang. Apan unsay ginatug-an kanato sa Kasulatan? Ang mga asoy sa Ebanghelyo ni Mateo ug ni Lucas nagapakita nga si Kristo Jesus laktud gitental sa katulo ni Satanas, ug sa matag panahon gisalikway siya ni Jesus, pinaagi sa paggamit sa Kasulatan. Nganong gitubag siya ni Jesus gikan sa Hebreohanong Kasulatan? Kay si Satanas miduol kaniya nga sayop nagpadapat niadtong mga Kasulatana mismo aron ipabuhat niya ang sala ug mapakyas ingong Anak sa Diyos, ang gisaad nga Binhi.—Mateo 4: 1-11; Lucas 4:1-13.
2. Giunsa nato pagkahibalo nga si Jesus wala maghanduraw sa iyang mga panagtagbo kang Satanas?
2 Dayag, si Jesus, nga usa ka hingpit nga tawo, wala maghanduraw sa maong mga panagtagbo. (Hebreohanon 4:15; 7:26) Giatubang siya mismo sa gahom nga mao ang nagpaluyo sa bitin sa Eden, ang iyang kaniadto manulondang igsoon nga sa nangaging kapanahonan mialsa ug nagtinguha niadto nga pakyason ang pagkatuman sa Genesis 3:15. Buot ni Satanas nga bungkagon ang pagkamatinumanon sa gisaad nga Binhi. Kay nahibalo sa iyang malinglahong mga buhat, malig-ong gisalikway ni Jesus ang Manenental. Unsay sanong ni Satanas? “Busa ang Yawa, kay nahuman sa tanang pagpanulay, mipahilayo gikan kaniya hangtod sa laing nahiangay nga panahon.” Tin-aw, si Jesus wala mopahilayo gikan sa iyang kaugalingon! Si Satanas, kay gibatig kapakyasan, mibiya kaniya, “ug, tan-awa! ang mga manulonda nangabot ug misugod sa pag-alagad kang [Jesus].”—Lucas 4:13; Mateo 4:11.
3. Unsay ginaingon sa usa ka historyano mahitungod sa kahulogan sa paglungtad sa Yawa alang sa Kristiyanidad?
3 Makataronganon, ang usa ka historyano mikomento: “Ang dili pagtuo sa kalungtaran ug pangunang kahinungdanon sa Yawa diha sa Kristiyanidad maoy pagsupak sa pagtulon-an sa mga apostol ug makasaysayanhong kaugmaran sa Kristohanong doktrina. Sanglit ang pagbatbat sa Kristiyanidad sa mga pinulongan nga lahi niini literal nga walay kahulogan, dili sumala sa katarongan ang pag-ergo dapig sa Kristiyanidad nga wala ang Yawa. Kon wala maglungtad ang Yawa, nan ang Kristiyanidad sayop kaayo bahin sa usa ka pangunang punto sukad gayod sa sinugdanan.”a Kanang konklusyona maoy usa ka hagit sa matag tawo sa yuta karong adlawa. Giila mo ba ang kalungtaran sa dili-makitang kaaway nga may tuyo sa pagpukan sa pagkasoberano sa Diyos ug pag-unong sa tawo?
Ang Tinuod nga Ilhanan ni Satanas
4. Giunsa pagkahimo sa usa ka hingpit espiritung linalang nga Satanas?
4 Si Satanas usa ka gamhanang espiritung linalang, nga sa sinugdan gilalang sa Diyos ingong usa ka manulonda, usa ka espiritung anak nga makaadto sa langitnong hukmanan ni Jehova. (Job 1:6) Ugaling lang, gigamit ni Satanas ang iyang kagawasan sa pagpili sa pagsupak sa Diyos; uban ang pagkamalinglahon giagak niya si Eva, ug pinaagi kaniya, si Adan ngadto sa pagkamasupilon ug sa kamatayon. (2 Corinto 11:3) Busa, siya nahimong Satanas, nga nagkahulogang “Kaaway”—usa ka rebelde, usa ka demonyo, usa ka mamumuno, ug usa ka bakakon. (Juan 8:44) Haom kaayo ang pahayag ni Pablo nga “si Satanas mismo nagabalhin sa iyang kaugalingon nga usa ka manulonda sa kahayag,” nga sa pagkamatuod siya maoy ‘magmamando sa kalibotan niining kangitngitan’! (2 Corinto 6:14; 11:14; Efeso 6:12) Pinaagi sa paghaylo sa ubang mga manulonda sa pagrebelde, iyang giagak sila gikan sa kahayag sa Diyos ngadto sa iyang kaugalingong kangitngitan. Siya nahimong “ang magmamando sa mga demonyo.“ Gipaila usab siya ni Jesus ingong ”ang magmamando niining kalibotana.” Dayag, aron mahimong magmamando, kinahanglang siya magalungtad ingong gilalang espiritung persona.—Mateo 9:34; 12:24-28; Juan 16:11.
5. Unsa ka tin-aw si Satanas gipaila diha sa Kristohanon Gregong Kasulatan?
5 Bisan tuod talagsa ra ang paghisgot kang Satanas diha sa Hebreohanong Kasulatan, siya bug-os gipadayag diha sa Kristohanong Gregong Kasulatan—mao nga atong mahibalag ang ngalang Satanas dinha sa 36 ka beses ug ang pulong Yawa, sa 33 ka beses. (Tan-awa ang Comprehensive Concordance of the New World Translation of the Holy Scriptures.) Gipaila usab siya sa ubang mga ngalan ug mga titulo. Duha kanila gigamit ni Juan sa Pinadayag 12:9: “Busa gitambog ang dakong dragon, ang unang bitin, ang usang gitawag Yawa ug Satanas, nga nagalimbong sa tibuok gipuy-ang yuta.”—Tan-awa usab ang Mateo 12:24-27; 2 Corinth 6: 14, 15.
6. Unsa ang kahulogan sa pulong “Yawa”?
6 Sa Pinadayag makita ang Gregong pulong nga di·aʹbo·los, nga gihubad “Yawa.” Sumala sa Gregong eskolar si J. H. Thayer, kini literal nagkahulogang “mapasanginlon, mabutangbutangon, mapasipalahon.” (Itandi ang 1 Timoteo 3:11; 2 Timoteo 3:3, Kingdom Interlinear.) Si W. E. Vine nagbatbat sa Yawa ingon nga “mao ang makamatay nga kaaway sa Diyos ug sa tawo.”b
7. Nganong si Satanas makabug-os sa iyang paningkamot nganha sa katawhan ni Jehova?
7 Ang dakong Kaaway dili ingong walay buhat. (1 Pedro 5:8) Tingali kana ang katarongang ang usa ka sanglitanan nagaingon, “Ang Yawa mangitag buluhaton nga ipabuhat sa mga kamot nga walay buhat.” Maoy iyang tuyo ang pagpukan sa tanang matuod nga Kristohanon. (2 Timoteo 3:12) Ug ikahatag niya ang bug-os nga pagtagad sa katawhan ni Jehova tungod sa yano sa usa ka katarongan—ang nahibilin sa kalibotan nailalom na sa iyang gahom! (1 Juan 5:19) Ang kalibotan karong adlawa mao ang kalibotan ni Satanas. Siya mao ang magmamando ug diyos niini, bisan kon ilhon kana o dili sa katawhan. (Juan 12:31; 2 Corinth 4:4) Ingong sangpotanan, gamiton niya ang tanang malinglahon o malansisong buhat o sugyot aron sa pagpukan sa katawhan ni Jehova, sa tinagsatagsa o tiningob. Atong susihon ang pipila sa mga paagi sa iyang paglihok.—Marcos 4:14, 15; Lucas 8:12.
Ang Malansison ug Malinglahong mga Buhat ni Satanas
8. Uban ang unsang bentaha nga si Satanas tingali nagabuhat batok kanato?
8 Si Satanas nakatuon sa taas nga panahon sa tawhanong sikolohiya, nga nagsusi sa tawhanong kinaiya uban ang tanang dala-sa-pagkatawo ug nabatonang mga depekto. Nasayod siya kon unsaon pagpahimulos sa atong mga kahuyangan ug atong garbo. Karon, unsa ang kahimtang kon nahibalo ang imong kaaway sa imong mga kahuyangan ug ikaw mismo wala makaila niana? Nan ikaw wala hisangkapig maayo sa pagpanalipod sa imong kaugalingon, sanglit wala ka makaamgo sa mga liki sa imong espirituwal nga hinagiban. (1 Corinth 10:12; Hebreohanon 12:12, 13) Tukma gayod ang mga pulong sa usa ka magbabalak nga taga-Scotland: ‘Oh hinaot untag may gahom nga mogasa kanato sa pagkakita sa atong kaugalingon sama sa pagkakita sa uban kanila! Kana magpagawas kanato sa daghang kasaypanan.’
9. Unsa tingali ang makapasubong sangpotanan kon kita mapakyas sa pagsusi sa atong kangalingon ug sa pagbag—o?
9 Gusto ba natong makakita sa atong kaugalingon sama sa pagkakita sa uban kanato—ilabina sama sa tingali pagkakita kanato sa Diyos o ni Satanas? Kana nagkinahanglag matinud-anong pagsusi-sa-kaugalingon ug pagtulotimbang ug sa tinguha nga magbag-o. Sayon kaayo ang paglimbong sa kaugalingon. (Santiago 1: 23, 24) Buot gayod natong pakamatarongon usahay ang atong binuhatan! (Itandi ang 1 Samuel 15:13-15, 20, 21, 24.) Ug pagkasayon ang pag-ingon, “Aw, wala bitaw ing hingpit!” Kana mao gayod ang nahibaloan ni Satanas, ug siya nagapahimulos sa atong pagkadili-hingpit. (2 Samuel 11:2-27) Makapasubo gayod ang pagdangat sa gulang nga edad ug pagkaamgo nga tungod sa diniktador, dili-mabination, o dili-malulutong paagi sa pagpakiglabot sa uban latas sa katuigan, ang usa walay higala; o pagkaamgo nga siya diyutay rag nahimo o wala kaha sa paghimo sa ubang tawo nga malipayon. Uban ang pagkamalinglahon si Satanas tingali nag-agak kanato sa kinabuhi nga nagagamit sa atong dala-sa-pagkatawong kahakog sa pagbuta kanato. Kita napakyas sa pagsabot sa diwa sa tinuod nga hunahuna ni Kristo—ang gugma, kahangawa, ug kalulot.-1 Juan 4:8, 11, 20.
10. Unsang mga pangutana ang atong ikasukna sa atong kaugalingon, ug ngano?
10 Busa, aron sa pagsukol kang Satanas, kinahanglang atong susihon ang atong kaugalingon. Ikaw ba may kahuyangan nga mapahimudsan ni Satanas o gipahimudsan karon mismo? Ikaw ba may suliran sa pagkahambogiro? Kinahanglan bang ikaw kanunay nga numero uno? Ang garbo ba mao ang imong natagong panukmod? Ang pangabugho, kasina, o gugma sa salapi nagadaot ba sa imong pagkatawo? Ikaw ba manghagit ug away? Ikaw ba dili magbalibali sa uban ug matahapon? O ikaw ba sobra ka sensitibo kon hatagag mga sugyot o sawayon? Mayugot ka ba o dili modawat ug tambag? Kon nakaila kita sa atong kaugalingon, makatul-id kita nianang mga sulirana, basta kita mapaubsanon. Kay kon dili, kita nagaladlad sa atong kaugalingon kang Satanas.-1 Timoteo 3:6, 7; Hebreohanon 12:7, 11; 1 Pedro 5:6-8.
11. Sa unsang malalangong paagi nga si Satanas tingali magdaot sa atong espirituwalidad?
11 Si Satanas makadaot usab sa atong espirituwalidad sa malinglahon, malalangon nga paagi. Tingali kita mapikal sa paagi sa pagbuhat sa mga butang diha sa kongregasyon o sa organisasyon. Kadaghanan wala kita makabaton sa tanang kasayoran, apan dali kitang mohinapos. Kon huyang ang atong relasyon uban kang Jehova, nan kana mubong tikang padulong sa negatibong panghunahuna ug sa mga pagduhaduha sa kamatuoran. Ang pipila tingali mangitag magpakamatarong-sa-kaugalingon nga paagi sa paggawas sa mga responsabilidad nga nalangkit sa kamatuoran. Dayon ibutang ni Satanas ang pagkadilimaunongon ug pagluib sa ilang mga kasingkasing. Sa dili madugay sila mahimong mga biktima sa apostasiya, ug malipay si Satanas. —Lucas 22:3-6; Juan 13:2, 27; 2 Juan 9-11.
12. (a) Sa unsang paagi ang pipila gipaisog ni Satanas?(b) Sa unsang paagl si Satanas nagalit-ag sa daghan ngadto sa imoralidad?
12 Ang uban paisogon ni Satanas dili lamang sa paghimog dagkong mga sala nga takos pagpalagpot kondili bisan sa pagdangop sa mga bakak ug panglimbong aron sulayan ang paglimbong sa mga ansiano sa kongregasyon. Sama kang Ananias ug Sapira, sila nagahunahuaa nga sila makalimbong sa mga manulonda ug sa balaang espiritu sa Diyos. (Buhat 5:1-10) Libolibo sa katuigang bag-o pa ang nahulog sa lit-ag ni Satanas nga imoralidad. Nahibalo ang Yawa nga kusganon ang mga agda sa sekso sa mga tawo, ug pinaagi sa iyang sistema sa kalibotan, gipasiugda, gituis, ug gidaot niya ang papel sa katakos sa sekso. (Numeros 25:1-3) Ang dili-minyo nga mga Kristohanon basin matental sa pakighilawas o sa ubang mga pag-abusar sa sekso. (Proverbio 7:6-23) Kon itugot sa minyong mga Kristohanon nga magsalaag ang ilang mga hunahuna ug mga kasingkasing, sila mahatumpawak sa maluibong gawi, nga luiban ang kapikas nga gisaaran nila nga unongan.—1 Corinto 6:18; 7:1-5; Hebreohanon 13:4.
13. (a) Sa unsang paagi ang telebisyon makaumol sa atong panghunahuna? (b) Sa unsang paagi kita makasukol sa maong impluwensiya?
13 Kita nagapuyo sa usa ka kalibotan nga ang kabakakan, panglimbong, ug mapintasong kasuko maoy kasagaran. Bug-os gigamit ni Satanas ang palaumagian sa balita sa pagpaila niining daotang panghunahuna. Ang mga seryal sa telebisyon o mga dramang mingaw nagahulagway sa mga tawo nga matahom ug dagway nga nagapuyo sa balayan sa limbong. Kon itugot natong maapektahan nianang panghunahunaa, sa dili madugay mosugod kita sa pagpahiuyon sa “ginagmayng” mga sala, nga mahimong sulab sa tigib sa “dagkong” mga sala. Ang malalangong mga sugyot ni Satanas daling mouliot sa atong hunahuna. Sa unsang paagi makasukol kita sa maong mga impluwensiya? Ayaw gayod “tugotig luna ang Yawa,” sumala sa gitambag ni Pablo. Kana nagkahulogan usab sa pagkontrolar kon kinsay pasudlon ninyo sa inyong balay pinaagi sa telebisyon. Dili ba angay dumtan nato ang pagsulod sa mapintason, imoral hugaw-ug-baba nga tawo nga nagadalag hugaw sa atong sala?—Efeso 4:23-32.
Sa Unsang Paagi Kita Makasukol Kang Satanas ug Makapabiling Matinumanon sa Diyos?
14. Unsang duhag-pilong hukom ang gikinahanglan aron makasukol kang Satanas, ug nagkinahanglan kinig unsa?
14 Kay ang maong gamhanan, labaw-tawhanong kaaway gihan-ay batok kanatong dili-hingpit tawhanong mga linalang, sa unsang paagi kita makahupot sa atong integridad? Ang yawi hikaplagan sa mga pulong ni Santiago: “Busa, magpasakop kamo sa Diyos; apan sukli ang Yawa, ug siya mokalagiw gikan kaninyo.” (Santiago 4:7) Matikdi nga duhag pilo ang tambag ni Santiago. Samtang suklan nato ang Yawa ug ang iyang kabubut-on, kinahanglang ipasakop nato ang atong kaugalingon sa kabubut-on sa Diyos. Nalangkit niana ang paghigugma sa kabubut-on sa Diyos ug pagdumot sa kabubut-on ni Satanas. (Roma 12:9) Busa, si Santiago nagaingon: “Makigsuod kamo sa Diyos, ug siya mosuod kaninyo. Hinloi ninyo ang inyong mga kamot, kamong mga makasasala, ug putlia ang inyong mga kasingkasing, kamong mga maduhaduhaon.” (Santiago 4:8) Oo, sa pagsukol nato kang Satanas, walay luna ang pagkataphaw ug pagkamaduhaduhaon. Dili kita makapameligro sa atong integridad pinaagi sa pagtan-aw unsa ka duol kita makaduol sa utlanan gikan sa pagkadaotan. Kinahanglang sa bug-os atong “dumtan ang daotan.”—Salmo 97:10.
15. Nganong kinahanglanon ”ang hingpit nga sapot sa hinagiban gikan sa Diyos”? Iilustrar.
15 Ang talagsaong tambag sa pagsukol kang Satanas hikaplagan sa Mga Taga-Efeso kapitulo 6. Giunsa ni Pablo sa pagsulti nga kita makasukol sa “pagkamalinglahon,” “mga bitik,” o “mga taktika” ni Satanas? (Efeso 6:11, Phillips, New International Version, The Jerusalem Bible) “Isul-ob ninyo ang hingpit nga sapot sa hinagiban gikan sa Diyos,” siya mitambag. Kining pahayag nga “hingpit nga sapot” wala maghatag luna alang sa dinanghag nga tinamdan bahin sa Kristiyanidad, sama rang ang usa ka Romanong sundalo dili mahimong danghag kon mangandam alang sa gubat. Unsay kahimtang sa sundalo kon mangandam siya sa tibuok sapot sa hinagiban gawas sa kalasag ug salukot? Siya mahimong naghunahuna, ‘Kana dako kaayong kalasag, ug bug-at kaayo ang salukot. Kana sila bug-at kaayo, ug dili ko kana kinahanglan.’ Handurawa ang kahimtang—usa ka Romanong sundalo nga armado sa pagpakiggubat apan wala magbaton sa panguna niyang mga gamit pangdepensa.—Efeso 6:16. 17.
16. (a) Sa unsang paagi atong pagasundon ang panig-ingnan ni Jesus sa paggamit sa atong ”espada”? (b) Sa unsang paagi kita makabantay kanunay batok sa ”nagdilaab nga mga udyong” ni Satanas, ug unsa ang sangpotanan?
16 Handurawa, usab,ang usa ka sundalo nga wala magbaton sa iyang espada. “Ang espada sa espiritu” usa ka maayong depensa, kay kini gamiton sa pagtigbas sa hinagiban nga gamiton ni Satanas batok sa Kristohanon. Ang atong “espada” angay nga andam sa kanunay. Kana ang kahimtang kon dili kita magpabaya sa atong personal ug pamilyahanong pagtuon sa Bibliya. Apan sa panguna, kining “espada . . . nga Pulong sa Diyos” mao ang atong galamiton sa pag-atake. Gigamit kana ni Jesus sa Duha ka paagi. (Mateo 4:6, 7, 10; 22:41-46) Mao usab kita. Kinahanglang kanunay natong bairon ang atong pagpabili sa kamatuoran. Dili kita makahupot padayon sa atong espirituwalidad pinasukad sa atong nakat-onan sa una natong pila ka bulan o katuigan sa kamatuoran. Kon mapakyas kita sa pagbag-o sa espirituwal nga mga sirkito sa atong hunahuna, mahanap ang atong espirituwal nga panan-aw. Magkamenos ang atong kadasig sa matuod nga pagsimba ni Jehova. Kita mahimong luya sa espirituwal. Dili na kita makaarang sa pagsagang sa mga atake sa mga paryente, mga higala, mga kauban, ug mga apostata nga tingali magtumpok ug pagtamay diha sa atong mga pagtuo. Apan luwason kita sa Diyos gikan sa Yawa ug sa iyang “nagdilaab nga mga udyong” kon magpadayon kita sa pagsangkap sa atong kaugalingon sa “hingpit nga sapot sa hinagiban gikan sa Diyos.”—Isaias 35:3, 4.
17, 18. Batok kang kinsa ang atong pakigbugno, ug sa unsang paagi kita makadaog?
17 Oo, gipasiugda ni Pablo ang kapeligrohan nga nalangkit sa Kristohanong away sa misulat siya: “Kay ang atong pakigbugno dili batok sa tawhanong mga kaaway, kondili batok sa kosmikong mga gahom, batok sa mga pagbulot-an ug mga pamunoan niining mangitngit nga kalibotan, batok sa labaw-sa-tawong mga gahom sa kadaotan sa mga langit.” (Efeso 6:12, The New English Bible) Sa unsang paagi kitang huyang nga mga tawo makasukol ug makadaog nianang dili-patas nga bugno? Gisubli ni Pablo ang iyang punto: “Tungod niini isul-ob ang hingpit nga sapot sa hinagiban gikan sa Diyos, aron kamo makasukol sa adlaw nga daotan ug, pagkatapos ninyo mabuhat ang tanang butang sa bug-os, bumarog kamo nga malig-on.” (Efeso 6:13) Ang yawing pamulong mao: “Pagkatapos ninyo mabuhat ang tanang butang sa bug-os.” Kini dili na usab mohatag ug lugar sa pagkataphaw o may-kabaldahan nga Kristiyanidad.—1 Juan 2:15-17.
18 Busa, bumarog kitang malig-on sa kamatuoran, nga higugmaon ang pagkamatarong ni Jehova, nga iwali ang maayong balita sa kalinaw, nga mangupot sa hugot uban ang lig-ong pagtuo sa kaluwasan nga ihatag ni Jehova pinaagi ni Kristo Jesus, samtang mosalig kita sa Pulong sa Diyos ingong atong suportar. (Efeso 6:14-17) Himumdomi, ang Diyos nagatagad nato, ug motabang kanato aron modaog sa pagsulay ug mga kabalaka nga mobabag diha sa sistema sa mga butang ni Satanas. Hinaot atong pamation ngatanan ang pasidaan: “Magmaligdong sa hunahuna, magmabinantayon. Ang inyong kaaway, ang Yawa, nagalibotlibot sama sa usa ka leyon nga nagangulob, nangitag matukob.” Oo, “bumarog kamo batok kaniya, nga lig-on sa pagtuo.”—1 Pedro 5:6.9.
19. (a) Unsang dugang kinahanglanong tagana ang kinahanglang atong gamiton sa pagsukol kang Satanas? (b) Unsay mahitabo kang Satanas sa kataposan?
19 Dili nato hikalimtan ang hinungdanong dugang sa “sapot sa hinagiban.” Siya miingon: “Samtang uban sa tanang matang sa pag-ampo ug pangaliya magpadayon kamo sa pagampo sa tanang higayon diha sa espiritu. Ug nianang katuyoana magpadayong magtukaw uban ang bug-os nga pagkamakanunayon ug uban ang pangaliya alang sa tanang balaan.“ (Efeso 6:18) Ang atong dili-makitang kaaway gamhanan kaayo nga gikinahanglan nato “ang tanang matang sa pag-ampo ug pangaliya.“ Nan, kinahanglang tiunay ug may pagkadaiya ang atong mga pag-ampo! Ang bug-os natong pagsalig kang Jehova bililhon aron kita makadaog sa bugno ug makahupot nga padayon sa integridad. Siya lamang ang makatagana sa “gahom labaw sa kasagaran“ nga makapaarang nato sa pagsukol sa atong walay-hunong nga Kaaway. Makalipay kaayo nga mahibalo nga ang atong dakong Kaaway sa dili madugay itambog sa bung-aw ug dayon pagalaglagon sa walay kataposan!—2 Corinto 4:7; Pinadayag 20:1-3, 10.
[Mga footnote]
a Satan—The Early Christian Tradition, ni Jeffrey Burton Russell, panid 25.
b An Expository Dictionary of New Testament Words.
Makatubag Ka Ba?
◻ Sa unsang paagi nahibalo kita nga si Satanas tinuod nga persona?
◻ Nganong ang ubang ngalan ug titulo ni Satanas haom?
◻ Unsang pagsusi-sa-kaugalingon ang makatabang nato sa pagsukol sa malalangong mga pag-atake ni Satanas?
◻ Unsang duhag-pilo nga tambag ang motabang sa pagpildi kang Satanas, ug ngano?
[Hulagway sa panid 15]
Ang usa ka paagi sa pagsukol sa impluwensiya ni Satanas mao ang pagkahimong mahigalaon, matinabangon, mahigugmaon
[Hulagway sa panid 16]
Magbantay kita nga mahisama kang Ananias ug Sapira, kinsa nagpadaog kang Satanas
[Hulagway sa panid 17]
Sa pagsagang sa mga udyong ni Satanas, dili mahimong dili nato gamiton ang bisan unsang bahin sa atong espirituwal nga hinagiban