Magpadayon Kamo sa Paglig-onay sa Usag Usa

“Ayaw itugot nga manggula gikan sa inyong baba ang mangil-ad nga mga sulti, kondili kanang mga maayo lamang nga makapalig-on.”​—EFESO 4:29.

1, 2. (a) Nganong tukmang ikaingon nga ang katakos sa pagsulti katingalahan? (b) Unsang pag-amping ang angay kon bahin sa atong paggamit sa atong dila?

“ANG katakos sa pagsulti mao ang madyik nga hilo nga nagbugkos sa mga higala, mga pamilya ug mga katilingban . . . Gikan sa tawhanong hunahuna ug sa mahapsay nga pagkulo-kulo sa kaunoran sa dila, kita makahimog mga tingog nga modasig ug gugma, pangabubho, pagtahod​—sa pagkatinuod sa bisan unsang tawhanong emosyon.”​—Hearing, Taste and Smell.

² Ang atong dila maoy labaw pa kay sa usa ka organo sa pagtulon o sa pagtilaw; kini maoy usa ka bahin sa atong katakos sa pagpaambit sa atong hunahuna ug pagbati. “Ang dila maoy usa ra ka gamay nga bahin sa lawas,” misulat si Santiago. “Pinaagi niini atong ginadayeg si Jehova, ang Amahan, apan pinaagi niini ginapanghimaraot nato ang mga tawo nga gihimo ‘sama sa dagway sa Diyos.’” (Santiago 3:5, 9) Oo, kita makagamit sa atong mga dila sa daghang maayong mga paagi, sama sa pagdayeg kang Jehova. Sanglit dili man hingpit, dali natong magamit ang atong mga dila sa pagsultig masakit o negatibong mga butang. Si Santiago misulat: “Mga igsoon ko, dili angay nga kini maoy mahitabo.”​—Santiago 3:10.

3. Unsang duha ka bahin sa atong sinultihan ang kinahanglan natong hatagan ug pagtagad?

³ Sanglit walay tawo ang hingpit nga makakontrolar sa dila, siyempre kita maningkamot gayod nga mouswag. Gitambagan kita ni apostol Pablo: “Ayaw itugot nga manggula gikan sa inyong baba ang mangil-ad nga mga sulti, kondili kanang mga maayo lamang nga makapalig-on ug angay sa higayon, aron makahatag kinig kaayohan sa mga mamati.” (Efeso 4:29) Panid-i nga kining tambaga adunay duha ka bahin: kon unsa ang atong paningkamotang likayan ug kon unsa ang angay natong panlimbasogang buhaton. Atong tagdon kining duha ka bahin.

Paglikay sa Mangil-ad nga Sulti

4, 5. (a) Unsang pakigbugno ang ginaatubang sa mga Kristohanon bahin sa mangil-ad nga sinultihan? (b) Unsang larawan ang mohaom sa pulong “mangil-ad nga mga sulti”?

⁴ Ang Efeso 4:29 unang nag-awhag kanato: “Ayaw itugot nga manggula gikan sa inyong baba ang mangil-ad nga mga sulti.” Kana tingali dili masayon. Ang usa ka katarongan mao nga ang pagpamalikas komun kaayo sa kalibotan sa atong palibot. Daghang Kristohanong mga batan-on makadungog ug pagpamalikas kada adlaw, tungod kay tingali ang mga kauban sa klase naghunahuna nga kini dugang makapasiugda o mopahimo kanila nga isog tan-awon. Tingali kita dili gayod bug-os makalikay nga makadungog ug malaw-ay nga mga pulong, apan kita makahimo ug kinahanglang maningkamot nga dili mosagop niini. Kini walay dapit diha sa atong mga hunahuna o mga baba.

⁵ Nagpasiugda sa pasidaan ni Pablo mao ang Gregong pulong nga nalangkit sa dubok nga isda o lata nga prutas. Handurawa kini: Nakita mo ang usa ka tawo nga nawad-ag-pailob ug unya nasuko sa hilabihan. Sa kataposan iyang gipahungaw ang iyang kasuko, ug imong nakita ang dubok nga isda nga migula sa iyang baba. Unya imong nakita ang baho, lata nga prutas nga gikalit ug luwa, napiskan ang tanan nga anaa sa duol. Kinsa siya? Pagkamakalilisang kon siya usa kanato! Hinoon, ang maong larawan mohaom kon atong ‘tugotang manggula gikan sa atong baba ang mangil-ad nga mga sulti.’

6. Sa unsang paagi ang Efeso 4:29 aplikado sa masawayon, negatibong sinultihan?

⁶ Laing aplikasyon sa Efeso 4:29 mao ang atong paglikay sa pagpunay ug panaway. Ingnon ta, kitang tanan dunay mga opinyon ug mga paghukom labot sa mga butang nga kita dili makaangay o makadawat, apan nakakuyog ka na ba ug usa ka tawo nga daw may negatibong komento (o mga komento) halos sa tanang tawo, dapit, o butang nga hisgotan? (Itandi sa Roma 12:9; Hebreohanon 1:9.) Ang iyang sinultihan makalumpag, makahatag kaguol, o makadaot. (Salmo 10:7; 64:2-4; Proverbio 16:27; Santiago 4:11, 12) Tingali siya wala makaamgo nga siya kaamgid gayod sa mga hinawayon nga gibatbat ni Malakias. (Malakias 3:13-15) Pagkadako sa iyang kakurat kon sultihan siya sa usa ka tumatan-aw nga ang usa ka dubok nga isda o lata nga prutas migawas sa iyang baba!

7. Unsang pagsusi-sa-kaugalingon ang angay natong buhaton sa tagsatagsa?

⁷ Samtang daling maila ang tawo nga kanunay mosultig negatibo o masawayon nga mga komento, pangutan-a ang imong kaugalingon, ‘May kiling ba nga ako sama niana? Sa pagkatinuod, ingon ba ako niana?’ Maalamong palandongon panalagsa ang espiritu sa atong mga pulong. Kini ba sa dakong bahin negatibo, pagpanaway? Kita ba daw nahisamang pamation sa tulo ka mini nga tiglipay ni Job? (Job 2:11; 13:4, 5; 16:2; 19:2) Nganong dili mangitag positibong bahin nga pagahisgotan? Kon ang panagsultihay pulos pagpanaway, nganong dili agakon kini ngadto sa makapalig-ong mga butang?

8. Ang Malakias 3:16 naghatag ug unsang leksiyon bahin sa sinultihan, ug sa unsang paagi atong ikapakita nga atong ginapadapat ang leksiyon?

⁸ Gipresentar ni Malakias kini nga kalainan: “Ang may kahadlok kang Jehova managsulti ang usag usa; ang matag usa sa iyang kauban, ug si Jehova padayong mamati ug magpatalinghog. Ug ang usa ka basahon sa handomanan gisulat sa iyang atubangan alang kaniya nga may kahadlok kang Jehova ug nagpalandong sa iyang ngalan.” (Malakias 3:16) Nakamatikod ka ba sa pagsanong sa Diyos sa sulting makapalig-on? Unsa kaha ang epekto sa maong panagkokabildo diha sa atong mga kauban? Kita sa personal makakat-on ug leksiyon bahin sa atong adlaw-adlaw nga sinultihan. Pagkamaayo unta alang kanato ug sa uban kon ang atong normal nga panagsultihay mopabanaag sa atong ‘halad sa pagdayeg sa Diyos.’​—Hebreohanon 13:15.

Paningkamot nga Mapalig-on ang Uban

9. Nganong ang Kristohanong mga tigom maoy maayong mga higayon sa paglig-on sa usag usa?

⁹ Ang mga tigom sa kongregasyon maoy labing maayong mga higayon sa pagsulti ug ‘mga maayo lamang nga makapalig-on ug angay sa higayon, aron makahatag kinig kaayohan sa mga mamati.’ (Efeso 4:29) Atong mahimo kana dihang maghatag ug pakigpulong mahitungod sa impormasyon sa Bibliya, makigbahin sa demonstrasyon, o sa pagkomento sa panahon sa mga bahin sa pangutanag-tubag. Sa ingon atong mapamatud-ang tinuod ang Proverbio 20:15: “Ang mga ngabil sa kahibalo maoy usa ka bililhong mga galamiton.” Ug kinsay nasayod kon pila ka kasingkasing ang atong matandog o mapalig-on?

10. Human makapalandong kon kinsa kanunay ang atong pakigsultihan, unsang kausaban ang angay himoon? (2 Corinto 6:12, 13)

¹⁰ Ang mga oras sa dili pa magsugod ang tigom ug human sa mga tigom mao ang angay nga panahon sa paglig-on sa uban pinaagi sa panagsultihay nga makaayo sa mga mamati. Sayon nga ipalabay kining mga panahona sa maayong panagsultihay uban sa mga paryente ug mga higala nga kanila kita mobating komportable. (Juan 13:23; 19:26) Apan, nahiuyon sa Efeso 4:29, nganong dili kita mangitag uban nga pakigsultihan? (Itandi ang Lucas 14:12-14.) Magbanabana na kitang daan nga dili lamang kita mosulti ug pormal o lumalabay nga maayong-adlaw ngadto sa pipila ka bag-ohan, sa mga edaran, o sa mga batan-on, kondili makigtapad pa ug lingkod uban sa mga batan-on aron makig-angay-angay kanila. Ang atong tim-os nga interes ug mga panahon sa makapalig-ong sinultihan dugang motukmod sa uban sa pagpalanog sa mga pagbati ni David diha sa Salmo 122:1.

11. (a) Unsang batasan ang naugmad sa kadaghanan bahin sa paglingkod? (b) Nganong tuyoon sa uban ang paglainlain sa dapit nga ilang pagalingkoran?

¹¹ Ang laing tabang sa makapalig-ong panagsultihay mao ang paglainlain sa atong dapit nga pagalingkoran diha sa mga tigom. Ang nagpasusong inahan tingali kinahanglang molingkod duol sa kasilyas, o ang usa ka baldado tingali nagkinahanglag lingkoranan diha sa kilid, apan komusta ang uban kanato? Ang yanong batasan tingali motultol kanato ngadto sa usa ka lingkoranan o dapit; sama sa mga langgam nga kinaiyanhong mobalik sa batoganan niini. (Isaias 1:3; Mateo 8:20) Apan, sa prangkang pagkasulti, sanglit mahimo man kitang molingkod bisan asa, nganong dili mobalhinbalhin ug puwesto nga pagalingkoran​—sa tuo nga kilid, wala nga kilid, duol sa atubangan, ug uban pa​—ug busa dugang nga masinati pa nato ang nagkalainlaing mga igsoon? Samtang walay lagda nga atong buhaton kini, ang mga ansiano ug ubang mga hamtong nga nagalainlain sa dapit nga ilang pagalingkoran nakakaplag nga mas masayon ang pagpaambit sa mga butang nga makaayo sa daghan inay sa pipila lamang ka suod nga mga higala.

Magpalig-on sa Diyosnong Paagi

12. Unsang dili-maayong hilig ang nakita sa tibuok kasaysayan?

¹² Ang Kristohanong tinguha sa paglig-on sa uban angay mopukaw kaniya sa pagsundog sa Diyos niining bahina imbes sundon ang tawhanong hilig sa paghimog daghang mga lagda.a Dugay nang hilig sa mga tawong dili-hingpit ang pagmando sa mga tawo sa ilang palibot, ug bisan ang pipila sa mga alagad sa Diyos nadaog niining kilinga. (Genesis 3:16; Ecclesiastes 8:9) Sa panahon ni Jesus ang Hudiyohanong mga lider ‘nagabugkos ug mabug-at nga mga luwan sa uban apan sila dili gani mokihol.’ (Mateo 23:4) Ilang gihimo ang dili-makadaot nga mga kustombre ingong mga tradisyon nga kinahanglang sundon. Tungod sa ilang sobrang kabalaka sa mga lagda sa tawo, ilang nakalimtan ang mga butang nga giila sa Diyos nga mas hinungdanon. Walay napalig-on sa ilang paghimog daghang dili-kasulatanhong mga lagda; ang ilang paagi dili mao ang paagi sa Diyos.​—Mateo 23:23, 24; Mateo 7:1-13.

13. Nganong dili-maayong maghimog daghang mga lagda alang sa isigka-Kristohanon?

¹³ Ang mga Kristohanon tim-os nga nagatinguha sa pagpabiling matinumanon sa mga kasugoan sa Diyos. Bisan kita, hinunoa, mabiktima sa kiling sa paghimog daghang mabug-at nga mga lagda. Ngano? Una sa tanan, ang mga kagustohan o hilig dili-managsama, busa ang uban makaangay nianang dili-magustohan sa uban ug mobati nga kini kinahanglang isalikway. Ang mga Kristohanon dili-managsama, usab, sa ilang pag-uswag ngadto sa espirituwal nga pagkahamtong. Apan ang paghimo ba ug daghang mga lagda maoy diyosnong paagi sa pagtabang sa uban aron mouswag ngadto sa pagkahamtong? (Filipos 3:15; 1 Timoteo 1:19; Hebreohanon 5:14) Bisan pa kon aktuwal nga nagsubay ang usa ka tawo ug usa ka dalan nga mopatim-aw nga delikado o peligroso, ang madid-anon ba nga lagda mao ang labing maayong solusyon? Ang paagi sa Diyos mao nga ang may mga katakos maningkamot sa pagpasig-uli sa usa ka tawong nakasala pinaagi sa malumo nga pagpangatarongan uban kaniya.​—Galacia 6:1.

14. Nag-alagad sa unsang katuyoan ang mga kasugoan nga gihatag sa Diyos sa Israel?

¹⁴ Tinuod, samtang gigamit ang Israel ingong iyang katawhan, ang Diyos tinuod naghatag ug gatosan ka mga kasugoan bahin sa pagsimba sa templo, sa mga halad, ug sa sanitasyon. Angay kadto alang sa usa ka lahi nga nasod, ug ang kadaghanan sa mga kasugoan adunay matagnaong kahulogan ug nakatabang sa pag-agak sa mga Hudiyo ngadto sa Mesiyas. Si Pablo misulat: “Ang Kasugoan nahimong atong mag-aagak ngadto kang Kristo, aron kita ikapahayag nga matarong pinaagi sa pagtuo. Apan karon nga miabot na ang pagtuo, kita wala na mailalom sa usa ka mag-aagak.” (Galacia 3:19, 23-25) Human nga giwala ang Kasugoan diha sa kahoy sa pagsakit, ang Diyos wala maghatag sa mga Kristohanon ug taas nga listahan sa mga lagda may kalabotan sa kadaghanang bahin sa kinabuhi, ingon nga daw ang kasugoan mao ang paagi aron sila magpabiling malig-on sa pagtuo.

15. Unsang giya ang gihatag sa Diyos alang sa Kristohanong mga magsisimba?

¹⁵ Siyempre, kita adunay kasugoan. Ang Diyos nagsugo kanato sa pagpahilayo gikan sa pagsimba ug mga diyosdiyos, pagpakighilawas ug pagpanapaw, ug sa pag-abuso sa dugo. Ilabinang iyang gidili ang pagpatay, pagpamakak, espiritismo, ug uban pang nagkalainlaing mga sala. (Buhat 15:28, 29; 1 Corinto 6:9, 10; Pinadayag 21:8) Ug siya naghatag diha sa iyang Pulong ug tin-aw nga tambag bahin sa daghang mga butang. Apan, sa mas dakong sukod kay sa mga Israelinhon, kita may tulobagon sa pagtuon ug sa pagpadapat sa mga prinsipyo sa Bibliya. Ang mga ansiano makapalig-on sa uban pinaagi sa pagtabang kanila sa pagkaplag ug sa pagpalandong niining mga prinsipyoha inay mangita lamang o maghimog mga lagda.

Mga Ansiano nga Nagapalig-on

16, 17. Unsang maayong panig-ingnan ang gihatag sa mga apostol bahin sa paghimog mga lagda alang sa isigkamagsisimba?

¹⁶ Si Pablo misulat: “Sumala sa atong nahimong pag-uswag, magpadayon kita sa paglakaw nga mahusay niining sama nga paagi.” (Filipos 3:16) Nahiuyon sa maong hunahuna sa Diyos, nakiglabot ang apostol sa uban sa paagi nga makapalig-on. Pananglitan, dihay pangutanang mibangon kon mahimo bang kaonon ang karne nga basig gikan sa templo sa diyosdiyos. Kini bang ansianoha, tingali alang sa panag-angay o pagpayano, naghatag ug pipila ka lagda alang sa tanan diha sa unang mga kongregasyon? Wala. Siya midawat nga ang panagkadaiya sa kahibalo ug kauswagan sa pagkahamtong hayan mitultol sa maong mga Kristohanon sa magkalahi nga mga kagustohan. Alang kaniya, siya determinado sa paghatag ug maayong panig-ingnan.​—Roma 14:1-4; 1 Corinto 8:4-13.

¹⁷ Ang Kristohanon Gregong Kasulatan nagpakita nga ang mga apostol tinuod nga mihatag ug makatabang nga tambag bahin sa pipila ka personal nga mga butang, sama sa pamesti ug pamostura, apan sila wala modangop sa paggamit ug mga lagda nga mapadapat sa tanang higayon. Karon kini maoy usa ka maayong panig-ingnan alang sa Kristohanong mga magtatan-aw, kinsa interesado sa paglig-on sa panon. Ug gani kini naghatag pa ug paninugdang paagi sa pagpakiglabot nga gisunod sa Diyos bisan alang sa karaan nga Israel.

18. Unsang mga lagda ang gihatag ni Jehova sa Israel bahin sa pamesti?

¹⁸ Ang Diyos wala maghatag sa mga Israelinhon ug komplikadong mga kasugoan bahin sa pamesti. Dayag nga ang mga lalaki ug mga babaye nagsul-ob ug managsamang mga sapot, o panggawas nga mga besti, apan ang besti sa mga babaye tingali binordahan o mas mabulokon. Ang mga lalaki ug babaye nagsul-ob usab ug sa·dhinʹ, o pang-ilalom nga sapot. (Maghuhukom 14:12; Proverbio 31:24; Isaias 3:23) Unsa nga mga kasugoan bahin sa besti ang gihatag sa Diyos? Ang mga lalaki ug mga babaye gidid-an sa pagsul-ob ug mga besti nga mahisama sa kaatbang nga sekso, nga sa dayag may homoseksuwal nga katuyoan. (Deuteronomio 22:5) Aron ikapakita ang ilang pagkahimong lahi gikan sa mga nasod sa palibot, ang mga Israelinhon gisugo sa pagbutang ug mga borlas diha sa sidsid sa ilang besti, nga patongag asul baga nga hilo ang matag borlas, ug tingali mga ribete sa mga kilid sa mga besti. (Numeros 15:38-41) Kana sa paninugdan ang tanang pagtultol nga gihatag sa Kasugoan bahin sa mga estilo sa besti.

19, 20. (a) Unsang pagtultol ang gihatag sa Bibliya sa mga Kristohanon bahin sa pamesti ug pamostura? (b) Angay magbaton ang mga ansiano ug unsang hunahuna bahin sa paghimog mga lagda labot sa personal nga panagway?

¹⁹ Bisan pag ang mga Kristohanon dili na ilalom sa Kasugoan, duna ba kitay detalyadong mga lagda bahin sa pamesti o dayandayan nga gihatag alang kanato diha sa Bibliya? Wala man hinoon. Ang Diyos naghatag ug timbang nga mga prinsipyo nga atong ikapadapat. Si Pablo misulat: “Gitinguha nako nga ang mga babaye magdayandayan sa ilang kaugalingon sa besti nga mahiangay, uban ang kaligdong ug pagkamabuot, dili pinaagi sa buhok nga sinalapid ug sa bulawan o sa mga mutya o sa mahal nga sapot.” (1 Timoteo 2:9) Si Pedro miawhag nga inay hatagan ug pagtagad ang pagdayandayan sa lawas, angay hatagan ug pagtagad sa Kristohanong kababayen-an ang “pagkatawo nga natago sulod sa kasingkasing pinaagi sa dili-madunot nga sapot sa malinawon ug maaghop nga espiritu.” (1 Pedro 3:3, 4) Nga girekord kadtong tambaga nagkahulogan nga ang pipila ka mga Kristohanon sa unang-siglo tingali kinahanglang mas magmakasaranganon ug dili-maghinobra sa ilang pamesti ug pamostura. Apan, inay ipugos​—o idili​—ang pipila ka estilo, ang mga apostol yanong naghatag ug makapalig-ong tambag.

²⁰ Angay nga ingon niana ang mga Saksi ni Jehova ug sa katibuk-an gitahod sila sa ilang makasaranganong panagway. Bisan pa, ang mga estilo lahi gikan sa usa ka nasod ngadto sa lain ug bisan sulod sa usa ka dapit o kongregasyon. Siyempre, ang usa ka ansiano nga may kusganong mga opinyon o may pipila ka kagustohan sa pamesti ug pamostura mahimong mohukom nga nahiangay alang sa iyang kaugalingon ug sa iyang pamilya. Apan kon bahin sa panon, kinahanglang iyang isilsil sa hunahuna ang punto ni Pablo: “Dili nga kami maoy mga agalon sa inyong pagtuo, kondili kami maoy inyong kaubang mga magbubuhat alang sa inyong kalipay, tungod kay nagbarog man kamo diha sa kalig-on sa inyong pagtuo.” (2 Corinto 1:24) Oo, ang pagsukol sa tanang mga panukmod sa paghatag ug mga lagda alang sa kongregasyon, ang mga ansiano maningkamot sa paglig-on sa pagtuo sa uban.

21. Sa unsang paagi makahatag ang mga ansiano ug makapalig-ong tabang kon adunay maghingapin sa pamesti?

²¹ Sama sa unang siglo, may mga panahong ang usa ka bag-ohan o maluyahon sa espirituwal tingalig mosundog sa kuwestiyonable o dili-maalamong estilo sa pamesti o sa paggamit ug mek-ap o pagsul-ob ug alahas. Nan unsa man? Sa makausa pa, ang Galacia 6:1 naghatag ug giya alang sa Kristohanong mga ansiano nga sinserong motabang. Sa dili pa modesisyon ang usa ka ansiano sa paghatag ug tambag, maalamong mokonsulta una siya sa usa ka kaubang ansiano, mas maayong dili moduol sa usa ka ansiano nga iyang nahibaloan nga sama kaniyag kagustohan o kaisipan. Kon daw naapektohan sa kalibotanong uso sa pamesti o pamostura ang kadaghanan diha sa kongregasyon, mahimong hisgotan sa lawas sa mga ansiano kon unsa ang labing maayong paagi mahatag ang tabang, sama sa usa ka maluluton, makapalig-ong bahin diha sa usa ka tigom o sa paghatag ug indibiduwal nga tabang. (Proverbio 24:6; 27:17) Ang ilang tumong maoy sa pagdasig sa kaisipan nga gipabanaag diha sa 2 Corinto 6:3: “Kami wala magbutang ug bisan unsang kapangdolan, aron ang among pag-alagad dili masaway.”

22. (a) Nganong dili angay matugaw kon adunay ginagmay nga mga panaglahi sa hunahuna? (b) Unsang maayong panig-ingnan ang gihatag ni Pablo?

²² Ang Kristohanong mga ansiano nga ‘nagabantay sa panon sa Diyos nga gipiyal diha kanila’ buot mobuhat sumala sa gilaraw ni Pedro, nga mao, dili ‘magharihari sa panon sa Diyos.’ (1 Pedro 5:2, 3) Sa lakat sa ilang mahigugmaong buluhaton, tingalig may mga pangutanang mobangon kon may magkalahi nga mga kagustohan. Tingali kustombre na sa maong dapit ang pagtindog dihang magbasa sa mga parapo sa panahon sa Pagtuon sa Bantayanang Torre. Ang grupo nga mga kahikayan alang sa pag-alagad sa kanataran ug ubang daghang mga detalye bahin sa ministeryo tingali ginadumala sumala sa naandan. Ugaling, daotan ba kon adunay usa nga may lahi nga paagi? Ang mahigugmaong mga magtatan-aw magtinguha nga ang “mga butang pagahimoon diha sa maligdong ug mahusay nga paagi,” nga maoy ekspresyon nga gigamit ni Pablo mahitungod sa milagrosong mga gasa. Apan ang konteksto nagpakita nga ang interes ni Pablo mao “ang paglig-on sa kongregasyon.” (1 Corinto 14:12, 40) Siya wala magpakitag kiling sa paghimog daghang mga lagda, diin ang iyang tumong mao ang bug-os nga panagsama ug hingpit nga pagkaepisyente. Siya misulat: “Ang Ginoo maoy naghatag kanamo [sa kagahom] sa paglig-on kaninyo ug dili sa paglumpag kaninyo.”​—2 Corinto 10:8.

23. Unsa ang pipila ka paagi nga atong masundog ang panig-ingnan ni Pablo sa paglig-on sa uban?

²³ Si Pablo tino nga nagkugi sa paglig-on sa uban pinaagi sa positibo ug makapadasig nga sinultihan. Inay nakig-uban lamang sa pipila ka higala, siya dugang naningkamot sa pagduaw sa mas daghang igsoong mga lalaki ug mga babaye, sa mga hamtong sa espirituwal ug niadtong ilabinang nagkinahanglag paglig-on. Ug iyang gipasiugda ang gugma​—inay ang mga lagda—kay ang “gugma nagapalig-on.”​—1 Corinto 8:1.

[Footnote]

Mga Punto Agig Repaso

◻ Nganong angay mag-usab kon kita hilig sa negatibo o masawayon nga sinultihan?

◻ Unsay atong mahimo aron dugang makapalig-on sa kongregasyon?

◻ Unsa ang diyosnong sumbanan bahin sa paghimog daghang mga lagda alang sa uban?

◻ Unsay makatabang sa mga ansiano aron malikayan ang paghimog tawhanong mga lagda alang sa panon?