Si Jesus, Usa ka Sulundan nga Suod Pagasundon
“Sa pagkamatuod, sa maong paggawi kamo gipanagtawag, tungod kay si Kristo nag-antos alang kaninyo, nga nagbilin ug usa ka sulundan aron inyong sundon sa suod ang iyang mga lakang.”—1 PEDRO 2:21.
1, 2. Unsang matang sa tinun-an si Pedro panahon sa iyang ministeryo uban kang Jesus?
SULOD sa yugtong tulo ka tuig ug tunga, si Simon, kinsa nailhang si Cefas, o Pedro, nakapribilehiyo sa suod nga pagpakig-uban kang Kristo Jesus. (Juan 1:35-42) Tapos sa usa ka tuig nga pagkatinun-an, siya ginganlang usa sa 12 ka apostol. (Marcos 3:13-19) Ang mga asoy sa Ebanghelyo nagapakitang si Pedro maisogon, madalidalion, ug mapadayganon. Siya mao ang miingon dili gayod niya ilimod si Kristo, bisan pag unsay mahitabo. Apan, sa giapeke, siya milimod kaniya sa tulo ka panahon, sumala sa gitagna ni Jesus.—Mateo 26:31-35; Marcos 14:66-72.
2 Si Pedro mao ang apostol nga miingon kang Jesus, “Dili ka gayod maghugas sa akong mga tiil.” Unya dihang gitambagan siya ni Jesus, siya nagpasobra ug miingon, “Ginoo, dili lamang ang akong mga tiil, kondili hasta ang akong mga kamot ug ang akong ulo.” (Juan 13:1-17) Kini mao gihapong Simon Pedro si kinsa, dihang gidakop si Jesus, milihok nga maisogon pinaagi sa pag-ibot sa iyang espada ug mitigbas sa tuong dalunggan ni Malchus, ang ulipon sa hataas nga saserdote. Kadto usab gibadlong ni Jesus: “Ibalik ang espada sa iyang sakoban. Ang kopa nga gihatag kanako sa Amahan, dili ba diay akong pagaimnon?”—Juan 18:10, 11.
3. Unsay atong makat-onan gikan sa panig-ingnan ni Pedro?
3 Unsay gipaila niini ug sa ubang hitabo mahitungod kang Pedro? Nga subsob kaayo siya wala maghunahuna ug mangatarongang sama kang Jesus. Dugang pa, nga wala niya kanunay mabatoni ang hunahuna ni Kristo. Kana subsob matuod sa atong kahimtang mismo. Kita mapakyas sa pagbutang sa mga butang nga nahiuyon sa panghunahuna ni Jesus. Ang atong mga sanong madaot sa atong dili-hingpit tawhanong kinaiyahan.—Lucas 9:46-50; Roma 7:21-23.
4. Unsang mga hitabo ang nag-apektar sa ulahi sa panghunahuna ni Pedro? (Tan-awa ang Galacia 2:11-14.)
4 Bisan pa niana, ang kahimtang misugod sa pagkausab alang kang Pedro sukad sa Pentekostes paunahan. Kay gidasig sa balaang espiritu, siya nanguna sa buluhaton sa pagsangyaw taliwala sa mga Hudiyo sa Jerusalem. (Buhat, kapitulo 2-5) Sa paglamdag sa balaang espiritu, iya usab gipasibo ang iyang hunahuna aron mahiuyon sa hunahuna ni Kristo mahitungod sa mga Hentil. (Buhat, kapitulo 10) Gipakita ni Pedro ang pagpaubos, usa ka hiyas nga kinahanglan nato kon buot natong mahiuyon kang Kristo.—Mateo 18:3; 23:12.
Dili Makita Apan Nahibaloan
5, 6. Ang kamatuoran ba nga wala gayod nato makita si Kristo usa ka babag sa pagsunod nato sa iyang panig-ingnan?
5 Sa panahong gisulat ni Pedro ang iyang unang dinasig nga sulat, sa mga 62-64 K.P., may panahong iyang napalandong ang iyang ministeryo uban kang Jesus ug mas nasabtan ang hunahuna ni Jesus bahin sa mga butang. Sa sinugdanan sa iyang sulat giila sa apostol ang yanong kamatuoran—nga ang kadaghanan sa mga igsoon sa Asia Minor wala gayod makaila sa personal kang Jesus sama kaniya. Apan kadto ba usa ka babag sa pagbaton sa hunahuna ni Kristo ug sa pagsundog sa iyang panig-ingnan? Si Pedro miingon: “Bisan pag kamo wala makakita kaniya, kamo nahigugma kaniya. Bisan pag kamo wala magatan-aw kaniya sa pagkakaron, apan kamo nagtuo kaniya ug nagakalipay ug dako uban ang dili-ikabatbat ug labaw nga kalipay, samtang inyong ginadawat ang sangpotanan sa inyong pagtuo, ang kaluwasan sa inyong mga kalag.”—1 Pedro 1:8, 9.
6 Ang mga pulong ni Pedro angay may samang pagpadapat sa tanang katawhan ni Jehova karong adlawa. Kita wala makaila kang Kristo sa personal, apan kon kita mohimo sa “makugihong pag-usisa ug mabinantayong pagsusi” ug ‘magpadayon sa pagsusi’ sama sa mga manalagna, nan kita, sa dakodakong paagi, makaangkon sa hunahuna ni Kristo.—1 Pedro 1:10, 11.
Si Jesus, ang Hingpit nga Sulundan
7, 8. (a) Unsang malangkobong tambag ang ginahatag ni Pedro sa iyang unang sulat? (b) Unsa ang paninugdang kahulogan sa hy·po·gram·mosʹ? Sa unsang paagi gipadapat kini ni Pedro?
7 Tungod sa iyang mas tin-awng pagsabot sa panghunahuna ni Jesus ug ilalom sa paggiya sa balaang espiritu, si Pedro nakahatag ug tambag ngadto sa iyang isigkamagtutuo bahin sa kon unsaon pagbanaag sa hunahuna ni Kristo diha sa ilang nagkalainlaing mga kahimtang. (2 Timoteo 3:16) Busa, siya nagatambag sa tanang Kristohanon “ingong mga langyaw ug mga dumuloong” sa paglikay sa unodnong mga tinguha. Siya nagadasig kanila, bisan pag sila nagaantos tungod sa pagkamatarong, sa paghupot ug maayong kagawian diha sa ilang adlaw-adlawng mga kinabuhi.—1 Pedro 2:11, 12.
8 Sa pila ka linya sa ulahi gipasulod ni Pedro ang tanghagaon nga ilustrasyon, nga miingon: “Kon, dihang kamo magabuhat ug maayo ug kamo magaantos, kamo magaantos niini, kini butang giuyonan sa Diyos. Ngani, sa maong dalan kamo gipanagtawag, tungod kay bisan si Kristo nag-antos alang kaninyo, nga nagbilin kaninyo sa usa ka sulundan aron inyong pagasundon sa suod ang iyang mga lakang.” (1 Pedro 2:20, 21) Ang Gregong pulong gihubad “sulundan,” o “panig-ingnan” diha sa daghang ubang hubad, mao ang hy·po·gram·mosʹ. Kini sa literal nagkahulogang “pagsulat sa ilalom,” o “pagsulat-kopya, apil ang tanang letra sa alpabeto, nga ihatag sa mga nagsugod ingong tabang sa pagtuon sa pagdibuho kanila.” (A Greek-English Lexicon of the New Testament, ni J. H. Thayer) Busa, ang mga batang nagtungha usahay hatagag talohong mga papan nga ibabaw niana gisulat sa magtutudlo ang mga letra diha sa sulundang sinulat pinaagig stylus. Ang estudyante kinahanglang magsunod sa panig-ingnan ug mosulay sa paggamag eksaktong kopya sa ilalom niana. Gihimo ni Pedro ang dakong pasiugda dinhi, kay siya mao ang bugtong magsusulat sa Gregong Kasulatan nga nagagamit sa pulong hy·po·gram·mosʹ. Sa ingon iyang gipasiugda ang kamatuorang gibilin ni Jesus ang hingpit nga panig-ingnan aron sundogon sa iyang mga sumusunod.
9. Unsay gipasabot sa Gregong pulong gihubad nga “mental nga disposisyon” o kaisipan? (Itandi ang Mateo 20:28.)
9 Sa ulahi, gihatag ni Pedro ang usa ka pagtulon-an alang kanato gikan sa pag-antos ni Kristo sa mga kalisdanan. “Busa sanglit si Kristo nag-antos sa unod, sangkapi usab ninyo ang inyong kaugalingon sa samang kaisipan [Grego, enʹnoi·an].” (1 Pedro 4:1) Dinhi na usab iyang gigamit ang talagsaong pulong, ang enʹnoi·a, nga kaduha lamang makaplagi diha sa Gregong Kasulatan. (Tan-awa ang Hebreohanon 4:12, The Kingdom Interlinear Translation.) Sumala kang J. H. Thayer, ang enʹnoi·a nagkahulogan sa “hunahuna, pagsabot, kabubut-on; paagi sa paghunahuna ug pagbati.” Busa, kinahanglang kita mopasibo ngadto sa paagi sa paghunahuna ug pagbati ni Kristo. Apan sa unsang paagi mahimo nato ang maong pagpasibo? Sa unsang gidak-on kini pagahimoon?
10. Unsay gipasabot ni Pedro sa ekspresyong “sangkapi ang inyong kaugalingon”?
10 Si Pedro migamit nga singular sa Gregong berbong ho·pliʹsa·sthe, nga nagkahulogan ‘pagsangkap sa kaugalingon ingong usa ka sundalo.’ Si bisan kinsang sundalo nga nagasangkap sa iyang kaugalingon nga dili bug-os kasingkasing lagmit dili makalahutay ug dugay sa pakiggubat. Busa, ang mga pulong ni Pedro wala maghatag ug luna alang sa dagaang nga pagsundog sa paagi sa paghunahuna ni Jesus. Kinahanglan kita bug-os sa kalag sa atong tinguha sa pagbaton sa “kaisipan” o “paagi sa paghunahuna” ni Kristo. (1 Pedro 4:1, Today’s English Version) Kini nagapahinumdom kanato kon giunsa pagpasiugda ni Pablo nga ang Kristohanon kinahanglang magsangkap sa iyang kaugalingon sa “tibuok nga hinagiban sa Diyos” aron makabarog nga malig-on batok kang Satanas ug sa iyang kalibotan.—Efeso 6:11-18.
Kaisipan ni Kristo Alang sa mga Asawa
11. Unsang tambag ang ginahatag ni Pedro alang sa Kristohanong mga asawa?
11 Sa nanungatunga sa iyang sulat, si Pedro miliso sa iyang pagtagad ngadto sa mga asawa ug sa mga bana. Niadtong karaang paganong kalibotan, diin ang mga babaye nagbatog pila ra ka katungod, lisod kaayo sa Kristohanong babaye ang paghupot sa iyang integridad kon ang iyang bana dili magtutuo. Siya nailalom sa pagpasipala, pag-antos, ug posibleng diborsiyo tungod sa pagbiya sa mga diyos sa katigulangan. Ang kahimtang dili kaayo lahi sa modernong panahon. Apan gipasiugda pag-usab ni Pedro ang kabililhon sa pagbaton sa kaisipan ni Kristo, nga maandam moantos tungod sa pagkamatarong. Siya miingon: “Sa samang paagi [sa iya ni Kristo, sumala sa gihisgotan sa nangaging mga bersikulo], kamong mga asawa, magpasakop kamo sa inyong mga bana, aron nga, kon may dili masinugtanon sa pulong, sila madani nga walay pulong pinaagi sa kagawian sa ilang mga asawa, tungod kay nakasaksi sa inyong maputli nga kagawian uban ang halalom nga pagtahod.”—1 Pedro 3:1, 2.
12. (a) Sa unsang paagi ang mapasakopon, malumong espiritu sa usa ka asawa nagabanaag sa panig-ingnan ni Jesus? (1 Corinto 11:3) (b) Sa unsang paagi isipon ang iyang malumong espiritu sa Diyos? ug lagmit sa iyang bana?
12 Oo, ang dili-magtutuong kapikas usahay madani, dili kanunay pinaagi sa malahutayong mga taktika sa pagsangyaw, kondili pinaagi sa “halalom nga pagtahod” ug “matinumanon ug binuotang” mga panig-ingnan sa mapasakopong asawa. (1 Pedro 3:2, The Jerusalem Bible) Ang iyang “mahilomon ug malumong espiritu, nga dakog bili sa panan-aw sa Diyos,” makatabang usab sa iyang bana sa pagsabot sa mga sangpotanan sa pagbaton sa hunahuna ni Kristo diha sa matag-adlawng kinabuhi. (1 Pedro 3:4) Nganong ang maong malumong espiritu nagabanaag sa kaisipan ni Jesus? Kay si Jesus mismo miingon: “Isangon ninyo ang akong yugo diha kaninyo ug magtuon gikan kanako, kay ako malumo ug mapaubsanon sa kasingkasing, ug kamo makakaplag ug pahulay sa inyong mga kalag.”—Mateo 11:29.
Kaisipan ni Kristo Alang sa mga Bana
13. Sa unsang paagi pagatagdon sa mga bana ang ilang mga asawa? (Efeso 5:28, 29, 33)
13 Ang mga bana kinahanglan usab magbanaag sa kaisipan ni Kristo samtang ilang ipadayag ang matuod nga gugma nganha sa ilang mga asawa. Si Pedro mitambag na usab: “Kamong mga bana, magpadayon sa pagpuyo sa samang paagi uban kanila sumala sa kahibalo, nga magahatag kanilag kadungganan ingon nga ngadto sa usa ka mahuyang panudlanan, ang babaye.” (1 Pedro 3:7) Alang niadtong karaang paganong kalibotan, ang maong tambag katingad-anan—magahatag ug kadungganan sa usa ka babaye! Apan ang Kristohanong kongregasyon kinahanglang malahi sa kalibotan. Sa Kristohanong kaminyoon, kinahanglan adunay kahalangdon ug mutuwal nga pagtahod.—1 Pedro 4:3, 4.
14. Sa unsang paagi ang bana makapakitag kadungganan ug konsiderasyon sa iyang asawa?
14 Si Kristo sa kanunay mahunahunaon sa iyang mga tinun-an ug sa mga panon nga misunod kaniya. (Marcos 6:30-44) Kini nalambiggit pag-ayo sa tambag ni Pedro ngadto sa mga bana sa pagtagad sa kahimtang sa pagkababaye sa ilang mga asawa. Ang usa ka Kinatsilang hubad nagapahayag niini niining paagiha: “Mahitungod sa mga bana: magmataktikanhon sa inyong giambitang kinabuhi, nga magpakitag konsiderasyon sa babaye, tungod kay siya may labi pang tandogonon nga kahulmahan.” (Nueva Biblia Española) Kon sundon sa bana ang sulundan ni Kristo, iyang tagdon ang tandogonong bahin sa kinabuhi sa iyang asawa. Kana nagaapil nianang lisod nga mga adlaw sa dihang iyang kinahanglan ang labaw nga kalulot, pailob, ug konsiderasyon. Tinong ang mahigugmaong bana mopakitag pagpugong-sa-kaugalingon ug dili magmapugsanon sa maong mga okasyon. Ang matuod nga gugma nagasakripisyo sa kaugalingon.—Itandi ang Levitico 15:24; 20:18; 1 Corinto 7:3-6.
15. Unsang panig-ingnan ang gihatag ni Jesus mahitungod sa pagkaulo?
15 Matuod, ang “bana mao ang ulo sa iyang asawa.” Apan kinsa ba ang iyang sulundan sa pagpadayag sa maong pagkaulo? Si Pablo nagpatin-aw niini pinaagi sa pagdugang, “maingon nga si Kristo mao usab ang ulo sa kongregasyon.” (Efeso 5:23) Ang maong mabatbatong mga pulong wala maghatag luna alang sa paghinarihari ug sa ginagmayng pagdiniktador diha sa Kristohanong relasyon sa kaminyoon. Sa iyang mga pakiglabot sa mga tinun-an, si Kristo wala gayod moabusar sa iyang gahom (iyang pagkaulo) kondili migamit hinuon sa iyang gahom nga nahiuyon sa mga prinsipyo sa Bibliya.—Itandi ang Mateo 16:13-17, 20; Lucas 9:18-21.
Ang Sulundan ni Kristo Alang sa mga Lalaki
16. (a) Nganong si Pedro mahunahunaon kaayo sa panginahanglan sa pagpaubos? (b) Kinsa ilabina ang kinahanglang magpadayag sa maong hiyas?
16 Sa iyang ministeryo kanunay gipasiugda ni Jesus ang hiyas sa pagpaubos. Sa iyang ilustrasyon bahin sa mga gidapit sa usa ka kombira sa kasal, siya miingon: “Kay ang matag usa nga magapahitaas sa iyang kaugalingon pagapaubson ug siya nga magapaubos sa iyang kaugalingon igapahitaas.” (Lucas 14:11) Si Pedro mahunahunaon kaayo sa kaisipan ni Jesus niining bahina. Wala ba siya makahinumdom sa panig-ingnan ni Jesus sa paghugas sa mga tiil sa mga tinun-an? (Juan 13:4-17) Busa, sa iyang unang sulat iyang gitambagan ang mga tigulang ug mga batan-on sa pagpadayag sa tinamdan sa pagpaubos. Ang mga ansiano ‘angay dili magharihari sa kongregasyon kondili mahimong mga panig-ingnan sa panon.’ Ang mga batan-ong lalaki angay magpasakop sa mga ansiano. Apan unya silang tanan, batag tigulang, angay ‘magsangkap sa ilang kaugalingon sa pagpaubos sa hunahuna, tungod kay ang Diyos supak sa mga mapahitas-on apan nagahatag sa dili-takos nga kalulot sa mga mapaubsanon.’—1 Pedro 5:1-5.
17. Sa unsang paagi ang Gregong pulong alang sa “sangkapi ang inyong kaugalingon” nagapasiugda sa mapaubsanong pag-alagad?
17 Dinhi na usab gigamit ni Pedro sa linain ang usa ka pulong sa pagpasabot sa iyang punto mahitungod sa pagpaubos. Siya miingon: “Sangkapi ang inyong kaugalingon [Grego, eg·kom·boʹsa·sthe] sa pagpaubos sa hunahuna.” Kini nga berbo gikuha sa usa ka gamot nga pulong nga nagkahulogan sa pagbaligtos o pagbugkot, ug ang kahulogan niini nalangkit sa “puting bandana o tapis sa mga ulipon, nga gitaod sa bakos sa pangsapaw nga biste . . . ug nagpaila sa mga ulipon gikan sa mga tawong gawas; busa, . . . sangkapi ang inyong kaugalingon sa pagpaubos sama sa inyong biste sa pagkaulipon . . . sama pananglit sa pagsul-ob sa pagpaubos ipakita ang inyong pagpasakop sa usag usa.”—A Greek-English Lexicon of the New Testament, J. H. Thayer.
18. (a) Unsay angay ibutang sa hunahuna sa dedikadtong mga lalaki bahin sa ilang motibo? (b) Sa unsang linaing paagi daghang igsoong babaye usa ka panig-ingnan sa pagpaubos?
18 Sa unsang paagi ikapadapat sa dedikadong mga lalaki kanang tambaga karong adlawa? Pinaagi sa pag-ila nga ang bisan unsang responsableng katungdanan sulod sa Kristohanong kongregasyon maoy tinudlong-buluhaton sa mapaubsanon nga pag-alagad. Ang pipila tingali sa kasayop maghunahuna nga ang pagkahimong ministeryal nga alagad o ansiano sa kongregasyon, magtatan-aw sa sirkito, distrito, sa Bethel maoy pagkab-ot sa katungdanang may dungog ug gahom. Sa maong kahimtang wala sila makabaton sa hunahuna ni Kristo sa maong butang. Walay dapit ang mahakogong ambisyon kon kita may kaisipan ni Kristo. Ang atong motibo sa pag-alagad sa Diyos ug sa atong mga igsoon kinahanglang putli. Pananglitan, daghan sa atong Kristohanong mga igsoong babaye nagapanguna sa pagpayunir ug sa misyonaryong pag-alagad. Ang uban maoy madasigong mga magmamantala sa maayong balita bisan pa sa paglutos o sa pamilyahanong pagsupak. Ug ngani kining tanan ginahimo nga walay motibo nga mahimong ministeryal nga mga alagad o mga magtatan-aw!
Gugma—Ang Batong Pamag-ang sa Panig-ingnan ni Kristo
19. Unsa ang batong pamag-ang sa panig-ingnan ni Kristo? Sa unsang paagi kita nahibalo niana?
19 Unsay ginapasiugda ni Pedro labaw sa tanan mahitungod sa hunahuna ni Kristo? Siya misulat: “Labaw sa tanang butang, magbaton ug mainit nga gugma alang sa usag usa, tungod kay ang gugma nagatabon sa kapid-an nga sala.” (1 Pedro 4:8) Giunsa ni Jesus pagbanaag ang maong gugma? Siya mitudlo: “Kini mao ang akong sugo, nga kamo maghigugmaay sa usag usa maingon nga ako nahigugma kaninyo. Walay may labaw nga gugma kay niini, nga may magatugyan sa iyang kalag alang sa iyang mga higala.” (Juan 15:12, 13) Wala madugay niadto, gihalad ni Jesus ang iyang kinabuhi alang sa katawhan. Ug tinong ang iyang gugma nagtabon sa kapid-ang sala! Busa, kon kita tinuod nagbaton sa samang kaisipan ni Jesus, kita, usab, mopadayag sa “mainitong gugma alang sa usag usa” ug magmapasayloon.—Colosas 3:12-14; Proverbio 10:12.
20. Kon buot natong sundon sa suod ang sulundan ni Kristo, unsay kinahanglang buhaton natong tanan?
20 Ang panig-ingnan ni Kristo gisuma sa usa ka pulong—ang gugma. Kon tinuod natong sundon ang sulundan ni Jesus sa tanan natong hunahunaon, isulti, ug buhaton, ato usab ipakita ang gugma. Sumala sa giingon ni Pedro: “Sa kataposan, kamong tanan magbaton sa samang hunahuna, nga magpakitag pagkamabination, magbaton sa inigsoong gugma, magmaluluy-on, mapaubsanon sa hunahuna, nga dili magabalos ug daotan sa daotan o magbalos ug pasipala sa pasipala, kondili, sa kaatbang, magahatag sa panalangin, tungod kay kamo gipanagtawag alang niining dalana, aron kamo makapanunod sa panalangin.”—1 Pedro 3:8, 9.
Nahinumdom Ka Ba?
◻ Sa unsang paagi atong sundon ang sulundang gibilin kanato ni Kristo?
◻ Sa unsang paagi pagasundon sa Kristohanong asawa ang panig-ingnan ni Kristo?
◻ Sa unsang paagi ang Kristohanong mga bana magapasidungog sa ilang mga asawa?
◻ Giunsa pagpasiugda ni Pedro ang pagpaubos?
◻ Unsa ang batong pamag-ang sa panig-ingnan ni Jesus?
[Hulagway sa panid 18]
Ang magtutudlo misulat sa pangunang teksto sa ibabaw nga mga linya; ang estudyante naningkamot sa paghimog hingpit nga kopya (hy·po·gram·mosʹ)