Paglipay Alang sa Mga Maghuhupot sa Integridad

“Tungod sa akong integridad ikaw nagtuboy kanako.”—SALMO 41:12.

1. Nganong gikinahanglan sa katawhan ni Jehova ang paglipay?

ANG mga saksi ni Jehova nga nagahupot sa integridad nagkinahanglag paglipay kay sila mao ang tumong sa paglutos. Hinuon, angay nilang dahomon ang maong mga pagsulay, kay giingnan ni Jesu-Kristo ang iyang mga sumusunod: “Ang usa ka ulipon dili labaw sa iyang agalon. Kon ako ilang gilutos, kamo ila usab nga pagalutoson.” (Juan 15:20) Karon ilabina nga gikinahanglan sa katawhan ni Jehova ang paglipay. Ngano? Kay ang unang maglalapas sa integridad, si Satanas nga Yawa, gitambog na nganhi sa silinganan sa yuta, ug hamubo na ang iyang panahon. Busa, iyang ginahimo ang kataposan niyang pagbarog ingong mag-aaway batok sa Diyos ug sa Iyang mga alagad.​—Pinadayag 12:7-9, 17.

2. Unsay pagbati sa mga Kristohanon bahin sa mga pag-antos sa isigkamagtutuo?

² Ingong mga alagad ni Jehova, kita mainitong nagaampo alang sa atong mga igsoong lalaki ug babaye nga kinahanglang mag-alagad bisan may pagdili o gihulga ug gidagmalan sa mga maglulutos. (Buhat 12:1; 2 Tesalonica 1:4) Kita magadayeg sa mga Kristohanon nga matinumanong nagaantos sa mga pakaulaw gikan sa mga apostata ug sa uban. (Mateo 5:11) Kita dunay mahigugmaong kabalaka sa masigkamagtutuo nga gisupak sa mga paryente o nagapuyo sa mga panimalay nga nabahin sa relihiyon. (Mateo 10:34-36) Ug ang atong kinasingkasing nga pagbati maoy uban sa mga nagahupot sa integridad nga nagaantos sa mga kaluyahon ug tagdugay nga sakit. Apan nganong may pag-antos man? Ug unsa ba ang paglipay alang sa mga lalaki ug babayeng nagahupot sa integridad?

Hinumdomi ang Hinungdan ug ang Dangpanan

3. Gigamit ni Satanas ang paglutos sa paningkamot sa pagbuhat sa unsa?

³ Kon kaha sa paaging tawhanon o demonyohanon, ang Yawa nagatinguha sa “pagtukob” sa mga Kristohanon. (1 Pedro 5:8) Oo, si Satanas nagagamit sa paglutos ug ubang suliran sa pagsingkamot sa pagdaot sa atong relasyon uban kang Jehova nga Diyos, sa paghimo kanatong dili-maunongong mga maglalapas sa integridad. Apan niining tanan, kita ba walay panalipod? Dili gayod!

4. Kon moatubang sa paglutos ug ubang kalisdanan, ang mga maghuhupot sa integridad makasalig sa unsa?

⁴ Si Jehova mao ang atong Dangpanan kon kita mainampoon nga mangayo sa iyang panabang. Kon atakehon sa paglutos ug ubang kasakitan, kita makapangaliya kaniya sama sa gibuhat sa salmistang si David: “Pakitai akog kaluoy, Oh Diyos ko, pakitai akog kaluoy, kay diha kanimo ang akong kalag midangop; ug sa landong sa imong mga pako ako mopasilong hangtod moagi na ang mga kagul-anan.” (Salmo 57:1) Ingong nagahupot sa integridad, kita makapanegurong sa igo nga panahon moabot ang kahupayan gikan kang Jehova, ang atong Dangpanan. Ug kita makasalig sama kang David sa miingon siya sa pag-ampo sa Diyos: “Tungod sa akong integridad ako imong gituboy, ug ibutang mo ako atubangan sa imong nawong sa panahong walay katinoan.”​—Salmo 41:12.

5. Unsang hiyas ang gikinahanglan sa gilutos nga mga Kristohanon, ug unsa ang ilang paglaom?

⁵ Apan, sanglit ang mga pagsulay tingali molungtad sa taastaas nga panahon, kinahanglang atong ugmaron ang pagkamainantoson. Giawhag ni apostol Pablo ang Hebreohanong mga Kristohanon nga “magpadayon sa paghinumdom sa unang mga adlaw nga niana . . . [ilang] giantos ang dakong pakigbisog sa mga kasakitan.” Siya dugang misulat: “Inyong gikinahanglan ang pagkamainantoson, aron nga, tapos inyong mabuhat ang kabubut-on sa Diyos, inyong madawat ang katumanan sa saad.” (Hebreohanon 10:32-36) Alang sa dinihogang mga Kristohanon, ang pagkatuman sa saad sa Diyos mopatungha sa ganting dili-mamatay nga kinabuhi sa langit. Apan alang sa “dakong panon,” anaa ang kalaoman sa kinabuhing dayon sa usa ka yutan-ong paraiso. (Pinadayag 7:9; Lucas 23:43) Sa pagkamatuod, posible ang kaluwasan ngadto sa kinabuhing dayon alang sa tanang moantos hangtod sa kataposan ingong mga maghuhupot sa integridad.​—Marcos 13:13.

6. Nganong ang pipila sa mga Saksi ni Jehova nagkinahanglan ilabina sa pagkamainantoson, ug unsang tabang ang ilang nabatonan?

⁶ Sulod sa tinagpulo ka katuigan, ang mga Saksi ni Jehova sa pipila ka nasod sa linain may ‘panginahanglan sa pagkamainantoson.’ Ngano? Tungod kay gikinahanglang ilang buhaton ang ilang balaang pag-alagad diha sa lisod nga teritoryo o atubangan sa nagkadaiyang kalisdanan, apil ang mga pagdili sa gobyerno. Tingali mag-antos ka sa maluyahong panglawas o pagsupak sa pamilya sa imong Kristohanong mga kalihokan. Kanang mga pagsulaya mopugong niadtong nagasalig lamang sa tawhanong kusog, apan kana dili mopahunong sa mga Saksi ni Jehova tungod kay “ang ilang panabang maoy gikan kang Jehova, ang Magbubuhat sa langit ug sa yuta.”​—Salmo 121:1-3.

7. (a) Ang mga pagsulay nga nagapadayon mohatag kanato sa unsang higayon? (b) Nganong makatuo kita sa giingon ni Pablo sa Filipos 4:13?

⁷ Tingali kinahanglang antoson ang pila ka kahimtang hangtod sa pagkatapos niining sistema sa mga butang. Apan ang nagapadayong mga pagsulay mohatag kanatog higayon sa pagpamatuod sa atong integridad sa Diyos ug paglipay sa iyang kasingkasing. (Proverbio 27:11) Sa samang panahon, gitagana ni Jehova ang kusog nga gikinahanglan sa paglahutay nga mainantoson. Misulat si apostol Pablo: “Ako adunay kusog tungod kaniya nga nagahatag kanako ug gahom alang sa tanang butang.” (Filipos 4:13) Makatuo ka nianang mapasaligon nga mga pulong, kay kana kanunayng natuman sa kahimtang sa “tibuok kapunongan sa inyong mga igsoon sa kalibotan.”​—1 Pedro 5:9, 10.

Ang mga Maghuhupot sa Integridad Nagadasig Kanato

8. Iilustrar sa unsang paagi mapanalanginan ang mga maghuhupot sa integridad diha sa mga panimalay nga nabahin.

⁸ Ang pagkakita nga ang ‘tibuok kapunongan sa atong mga igsoon sa kalibotan’ nagahupot sa integridad maoy tinubdan sa dakong pagdasig. Ang pila kanila tugob gigantihan tungod sa paghupot sa ilang integridad kang Jehova diha sa nabahin nga mga panimalay. Pananglitan, sa gisugdan ang usa ka pagtuon sa Bibliya uban sa usa ka babayeng Katoliko sa Irlandiya, ang iyang bana mipadayag ug mapait nga pagsupak ug mibahad sa pagdiborsiyo kaniya. Bisan pa niana, iyang gipadayon ang iyang pagtuon, ug usa ka adlaw iyang gihatag sa iyang bana ang kopya sa librong Ikaw Mabuhing Walay Kataposan sa Paraiso sa Yuta. Siya nahingangha sa katin-aw, kalaktud, ug sa nindot nga mga hulagway niini. Sa wala madugay ang iyang bana mituon sa Bibliya sa tabang niining libroha. Mihunong siya sa tabako, ug sa wala madugay tapos niana ang magtiayon miluwat sa Iglesya Katolika ug milaglag sa ilang balaan konong mga hulagway. Dayon ang asawa nabawtismohan ug miapil sa buluhatong auxiliary payunir, samtang ang iyang bana maayog pag-uswag sa ministeryo. Ang maong mga kasinatian makapadasig ug dako niadtong anaa sa nabahin nga mga panimalay nga nagamalahutayon sa paghupot sa integridad.​—1 Corinto 7:12-16.

9. Sa unsang paagi ang maluyahong mga maghuhupot sa integridad makatabang sa uban?

⁹ Ang ubang maghuhupot sa integridad nagpamatuod nga matinumanon bisan pa sa kaluyahon. Sa Britanya, ang usa ka baldadong Kristohanon nga kinahanglang mogamit ug wheelchair nagmatagbawon sa iyang ministeryo. Misulat siya: “Bisan tuod ako walay trabahong sekular sukad 1949, nahimuot si Jehova sa paggamit kanako niining tanang panahon. Busa daling milabay ang mga tuig. Akong nahibaloan nga bisan ang baldado kaayong tawo makaalagad ug dako sa uban. Ang akong asawa ug ako nahimong usa ka matang sa angkla alang sa nagkalainlaing tawo sa kongregasyon. Tungod sa among kahimtang ako kanunayng ania dinhi, nga kanunay andam kon kinahanglan.” Oo, ang may-kaluyahon nga Kristohanon dili angay mawad-ag kadasig, kay siya mahimong tinubdan sa kadasig sa uban.

10. Pinaagi sa dili pagpadaog sa paglutos, sa unsang paagi ang mga maghuhupot sa integridad makatabang sa isigkamagtutuo?

¹⁰ Ang mga maghuhupot sa integridad dili mopadaog sa paglutos. Ang usa ka igsoong lalaki, nga gibilanggo tungod sa paghupot sa Kristohanong neyutralidad, miingon: “Ang mga pagkulata . . . nahimong regular nga bahin sa akong kinabuhi, nga nagkasubsob ug nagkagrabe. Sa sunodsunod nga adlaw ako nagkaluya, kay kadaghanan dili nila ako hatagag pagkaon. Ako kanunayng nag-ampo kang Jehova, ug ako makaingong wala niya ako biyai.” Bisan pag gisentensiyahan ug kapin sa duha ka tuig sa bilanggoan, gihuptan sa maong saksi ni Jehova ang iyang neyutralidad. (Isaias 2:2-4; Juan 15:19) Daghang ubang maghuhupot sa integridad ang nagbaton sa susamang baroganan. Sa pagkamatuod, ang maong paghupot sa integridad nagahatag ug makapadasig nga panig-ingnan nga makatukmod sa isigkamagtutuo nga magmatinumanon.

Paglipay nga Dili Mapakyas

11. Unsang Kasulatanhong pasalig sa paglipay ang nabatonan sa mga Kristohanon?

¹¹ Ang nahisgotan maoy pila lamang sa dimaihap nga mga kasinatian nga nagapamatuod nga si Jehova nagauban sa matinumanon niyang katawhan. Siya mao “ang Amahan sa malumong mga kaluoy ug ang Diyos sa tanang paglipay, kinsa nagalipay kanato sa tanan natong kasakitan.” (2 Corinto 1:3, 4) Oo, “ang Diyos maoy usa ka dangpanan ug kusog alang kanato, usa ka panabang nga daling hikaplagan panahon sa mga kasakitan.” (Salmo 46:1-3) Makalilipay kaayo ang pagkahibalong siya molig-on kanato ug sa atong isigkamagtutuo sa tanan natong kasakitan!

12. Sa unsang paagi ang paghupot ni Pablo sa integridad nakaapektar sa isigka-Kristohanon?

¹² Kita makakuhag kalig-on sa pagkakitang ang isigkamagtutuo kang Jehova nagaantos ingong maunongong mga Kristohanon bisan pa sa nagkalainlaing kalisdanan. Kini ang nahitabo sa napanid-an sa uban ang pagkamatinumanon ni apostol Pablo: “Ang mga nahitabo kanako misangpot nga kauswagan sa maayong balita inay sa laing paagi, mao nga ang akong mga gapos nasayran sa katilingban . . . ; ug ang kadaghanan sa mga kaigsoonan sa Ginoo, kay masaligon tungod sa akong mga gapos sa pagkabinilanggo, nagapadayag sa labaw nga kaisog sa pagpahayag sa pulong sa Diyos nga walay kahadlok.”​—Filipos 1:12-14.

13. Unsa ang epekto sa atong paghupot mismo sa integridad?

¹³ Oo, kon atong masayrang ang ubang saksi ni Jehova nagahupot sa integridad ngadto kaniya atubangan sa paglutos, kita malig-on sa pagpabiling maunongon. Sa laing bahin, kon kita maghupot sa integridad kon pagasulayan, atong madasig ang uban sa pagpahayag sa pulong sa Diyos nga walay kahadlok. Ug tinong kita matagbaw sa pagkasayod nga ang atong pagkamatinumanon maoy tinubdan sa kadasig ug panalangin sa uban.

14. Unsa ang duha ka paagi nga niana si Jehova nagalipay kanato?

¹⁴ Si Jehova nagalig-on kanato pinaagi sa iyang balaang espiritu. Ngani, sumala sa gisulat ni Pedro, ‘kon kita gipakaulawan tungod sa ngalan ni Kristo, kita malipayon, tungod kay ang espiritu sa himaya, bisan ang espiritu sa Diyos, anaa kanato.’ (1 Pedro 4:12-16) Ang Diyos nagalipay usab kanato ug sa nagaantos natong isigkamagtutuo pinaagi sa iyang pagtubag sa atong mga pag-ampo. “Ayaw kamo pagkabalaka sa bisan unsa,” misulat si Pablo, “apan sa tanang butang pinaagi sa pag-ampo ug pangaliyupo uban ang pagpasalamat ipahibalo ninyo ang inyong mga hangyo sa Diyos; ug ang Diyos sa kalinaw nga nagalabaw sa tanang hunahuna magabantay sa inyong mga kasingkasing ug mga gahom sa panghunahuna pinaagi kang Kristo Jesus.” (Filipos 4:6, 7) Ikaw ba may samang pagsalig sa “Tigdungog sa pag-ampo”?​—Salmo 65:2.

Pagbatog Kalipay Gikan sa Pulong sa Diyos

15. Sa unsang paagi imong iilustrar ang kamatuoran sa Roma 15:4?

¹⁵ Ang balaang Pulong sa Diyos tinubdan usab sa dakong paglipay. Sumala sa giingon ni apostol Pablo: “Ang tanang butang nga gisulat sa unang panahon gisulat sa pagtudlo kanato, nga pinaagi sa atong pagkamainantoson ug pinaagi sa paglipay gikan sa Kasulatan kita makabaton untag paglaom.” (Roma 15:4) Pananglitan, inigbasa nato bahin sa milagrosong pagkaluwas sa Israel gikan sa Ehipto o pagkaluwas sa mga Hudiyo sa adlaw ni Rayna Ester, dili ba kana molig-on sa atong pagsalig kang Jehova ingong walay-katupong nga Manluluwas? Unsa na man ang rekord sa paghupot ug integridad ni Job atubangan sa dakong kalisod? Sa pagkamatuod, kini nagailustrar sa unsang paagi ang modernong-adlawng mga alagad ni Jehova makaantos sa mga kasakitan tungod sa kusog nga ginahatag sa Diyos. Ang “paglipay gikan sa Kasulatan” tinuod makapuno sa mga maghuhupot sa integridad sa paglaom ug kaisog.

16. Unsang makalipay nga mga pasalig ang hikaplagan sa 1 Pedro 5:6, 7 ug 1 Corinto 10:13?

¹⁶ Apan unsa man kon tungod sa atong mga suliran kita batiog kaluya o depresyon? Sa pagkamatuod, ang makalipay nga mga pasalig sa Kasulatan mopabati kanato sa kasegurohan tungod sa pagkamatinagdanon ni Jehova ug makabulig sa paghupay sa atong depresyon. Misulat si apostol Pedro: “Magpaubos kamo . . . sa gamhanang kamot sa Diyos, aron kamo iyang bayawon sa igo nga panahon; samtang inyong itugyan kaniya ang tanan ninyong kabalaka, tungod kay siya matinagdanon kaninyo.” (1 Pedro 5:6, 7) Oo, si Jehova “matinagdanon kaninyo.” Pagkamakalipay nga hunahunaon! Walay butang mahitabo nga dili niya makita o mapugngan. Dugang pa, gihatag ni Pablo kining pasaliga: “Ang Diyos matinumanon, ug dili niya itugot nga kamo pagatentalon nga labaw sa inyong maantos, apan duyog sa panental siya mohatag usab ug lutsanan aron kamo makaantos.” (1 Corinto 10:13) Ingong tawong determinadong mahimong maghuhupot sa integridad, makasalig ka niana!

17. Unsa ang ubang tagana nga mohatag kanatog paglipay?

¹⁷ Ang mainampoon nga pagtuon sa Pulong sa Diyos ug Kristohanong mga basahong gitagana sa “matinumanon ug maalamong ulipon” makahatag ug paglipay sa mga panahon sa kapit-osan. (Mateo 24:45-47; Salmo 119:105) Mao usab ang Kasulatanhong tambag gikan sa malulutong mga ansiano sa kongregasyon. Apil sa ubang butang, sila kinahanglang “mosulti nga may paglipay ngadto sa mga kalag nga naluya, molig-on sa mga mahuyang, magmapailobon sa tanan.”​—1 Tesalonica 5:14.

18. Kon diyutay ra ang atong materyal, anaa ang unsang paglipay alang kanato?

¹⁸ Apan anaa ba ang paglipay kon kita kabos sa materyal? Tinong makapalipay ang pagkahibalong may nindot unyang balay, dagayang pagkaon, ug ubang materyal nga mga panalangin sa Bag-ong Kahikayan sa Diyos. (Salmo 72:16; 2 Pedro 3:13; itandi ang Isaias 65:17-25.) Apan bisan karon ang Kristohanong pagkinabuhi maghanaw sa pag-usik-usik sa kuwarta diha sa makadaot nga pagtabako, pagpatuyang sa alkoholikong ilimnon, pagsugal, ug uban pa. Sa ingon ang kuwartang matigom magamit sa paghatag ug kaayohan sa pamilya. Ang pagsunod sa Pulong sa Diyos makatabang usab kanato nga magmatagbawon sa diyutay nga materyal. Si Pablo matagbawon, kay siya miingon: “Sa pagkamatuod, kining diyosnong debosyon uban ang pagkatagbaw sa kaugalingon maoy usa ka dakong ganansiya. Kay kita walay gidala sa kalibotan, ug kita usab walay madala sa gawas. Busa, kay nakabaton sa pagkaon ug panapot, kita magmatagbawon niining mga butanga.” (1 Timoteo 6:6-8; Filipos 4:11, 12) Ang paghatag sa bug-os nga pagtagad sa atong mga pribilehiyo sa pag-alagad ni Jehova mosangpot sa daghang panalangin nga mohimo gayod kanatong bahandianon.​—Proverbio 10:22.

19. Sa unsang paagi maantos ang dugay nga sakit?

¹⁹ Apan, unsa man kon kinahanglang antoson nato ang dugay nga sakit? Kini maantos sa tabang ug paglipay ni Jehova nga gitagana pinaagi sa iyang Pulong. Pananglitan, miingon ang salmistang si David: “Malipayon siya nga nagalihok nga mahunahunaon sa timawa . . . Si Jehova mismo molig-on kaniya sa higdaanan sa balatian.” (Salmo 41:1-3) Karon dili panahon sa milagrosong mga pagkaayo. Apan ihatag ni Jehova sa masakitong mga Kristohanon ang kaalam ug kalig-on nga gikinahanglan sa pagsagubang sa ilang mga sakit samtang ilang ginabutang ang intereses sa Gingharian nga una sa kinabuhi.​—Mateo 6:33; 2 Corinto 12:7-10.

20. Sa unsang paagi kita makasagubang sa kaguol kon mamatay ang usa ka minahal?

²⁰ Sa unsang paagi kita makasagubang sa kaguol nga maagoman dihang mamatay ang usa ka minahal? Ang paglipay makuha gikan sa paglaom sa pagkabanhaw sa Bibliya. (Juan 5:28, 29; Buhat 24:15) Busa, bisan tuod masubo kita tungod sa pagkamatay sa usa ka minahal, kita “dili masubo sama sa uban nga walay paglaom.” (1 Tesalonica 4:13) Dako gayod nga paglipay ang ihatag sa paglaom sa pagkabanhaw sa mga maghuhupot sa integridad!

Pabiling Masaligon sa Diyos sa Paglipay

21. Ang giantos nga paglutos kadaghanan mosangpot sa unsa?

²¹ Salig nga si Jehova, “ang Diyos sa tanang paglipay,” dili gayod mobiya sa iyang napahinungod ug maunongong katawhan. (2 Corinto 1:3; Salmo 94:14) Makatabang usab ang paghinumdom nga ang paglutos nga giantos ingong mga Kristohanon makapasidungog, o makahimaya, sa Diyos. Kana nga pagtratar makahatag pagtagad sa iyang katawhan ug sa ilang buluhaton sa pagsangyaw sa Gingharian, ug kini kadaghanan mosangpot sa dako pang pag-uswag sa gidaghanon sa mga magdadayeg ni Jehova.​—Itandi ang Buhat 8:4-8; 11:19-21.

22. Mahitungod sa integridad, unsay angay atong hugot nga hukom?

²² Busa, sa tabang sa Diyos, atong ihukom nga hugot nga dili magpadaog sa mga laraw ni Satanas sa pagbungkag sa atong integridad. Pinaagi sa paglihok nga may pagtuo, hinaot kita mopadayon sa pagsalig kang Jehova. Dili gayod nato hikalimtan ang daghang paagi nga niana iyang gipanalanginan, gituboy, ug gilipay kita ingong iyang mga alagad. Hinaot atong pamatud-an ang atong debosyon kaniya, ug sa iyang matarong nga mga prinsipyo, nga labanan ang iyang pagkasoberano. Hinumdomi, usab, nga kini personal kaayong butang. Magpadayon sa pagbuhat sa balaang kabubut-on samtang ikaw magbuhat duyog sa organisasyon ni Jehova niining halandumong mga adlaw. Magkalipay sa imong pribilehiyo sa paglipay sa kasingkasing ni Jehova pinaagi sa pagpabiling matinumanon kaniya, ug ayaw gayod hikalimting siya sa walay pakyas nagataganag paglipay sa tanang maghuhupot sa integridad.

Unsa ang Imong Tubag?

◻ Nganong ang mga alagad ni Jehova nagkinahanglan ilabina sa paglipay?

◻ Nganong gigamit ni Satanas ang paglutos batok sa mga Kristohanon?

◻ Sa unsang paagi ang mga maghuhupot sa integridad makadasig kanato?

◻ Sa unsang paagi kita makakuhag paglipay gikan sa Pulong sa Diyos?

◻ Kita gipasaligan sa unsa sa 1 Pedro 5:6, 7 ug 1 Corinto 10:13?

[Hulagway sa panid 16]

Si Satanas nagatinguha sa pagtukob sa mga alagad ni Jehova, apan kita may panalipod

[Hulagway sa panid 18]

Si Jehova nagadungog sa mga pag-ampo sa mga maghuhupot sa integridad. Ikaw ba nagaampong regular?