Mga Batan-on Nangutana . . .

Magpabawtismo ba Ako?

ANG trese-anyos nga si Susana anaa sa kataposang ang-ang sa kanser sa dihang siya mitambong sa iyang kataposang kombensiyon sa mga Saksi ni Jehova. Siya wala masayod nga siya mamatay sulod sa sa napulo ka adlaw na lamang. Hinunoa, dili bisan ang kanser ang makapugong kaniya gikan sa pagtuman sa iyang labing gipakamahal nga tinguha: sa pagpabawtismo ingong usa ka dedikadong Saksi ni Jehova ug usa ka disipulo ni Jesu-Kristo.

Si Susana maoy usa lamang sa libo-libong batan-on taliwala sa mga Saksi ni Jehova nga sa katuigang dili pa dugay nagmahal sa pribilehiyo nga mabawtismohan. Apan tingalig imong nakitang makahahadlok ang pagbarog nga lig-on nianang bahina. Dili nga ikaw wala magtuo sa pinasukad sa Bibliya nga mga kamatuoran nga gikatudlo kanimo. Tingali regular ka nga tigtambongan sa Kristohanong mga panagkatigom ug ikaw tingali sa regular nakigbahin sa pagpaambit sa mga kamatuoran sa Bibliya ngadto sa uban. Apan, kon bahin sa pagdedikar sa imong kinabuhi ngadto sa Diyos, ikaw tingali nagpanuko. Nan, unsa ka hinungdanon ang bawtismo? Ug nganong daghan kaayong mga batan-on naglikay niana?

Relihiyon nga Walay Dedikasyon

Diha sa Kakristiyanohan, ang pangutana bahin sa bawtismo kasagaran tubagon sa mga ginikanan alang sa ilang mga anak. Ang pipila ka sekta nagdasig sa mga ginikanan sa pagpabawtismo sa ilang mga anak nga masuso pa. Ug bisan pa nga ang rituwal sa bawtismo gitagana alang sa mga hamtong, ang mga batan-on gilaoman nga mosunod sa relihiyon sa ilang mga ginikanan nga maoy naandan, dili pagpili.

Sa pagkamakaiikag, hinunoa, ang surbi sa Gallup sa Tinipong Bansa nagpakita nga samtang “halos tanang mga tin-edyer (96 porsiento) nagtuo nga adunay Diyos,” 39 porsiento lamang ang nagaampo kanunay. Ug 52 porsiento lamang ang may pagsalig sa organisadong relihiyon. Ang batan-ong si Diane maoy usa niini sa dihang miingon: “Ako nagtuo ug Diyos ug ang tanan niana, apan labaw pa ang akong gituohan kay sa pagpaningkamot lamang nga mahimong maayong tawo kay sa pagbasa sa tanang linya sa Bibliya.”

Oo, ang relihiyon mahimong usa ka huyang nga puwersa, sa pagkamatuod, kon kini ipugos diha sa batan-on sa iyang mga ginikanan. Ang usa ka pagtuon nga gihimo sa usa ka grupo sa delingkuwenteng mga batan-ong Katoliko dugang nagailustrar niini. Ang katunga kanila tigsimba. Ang kadaghanan nasayod sa pasukaranang mga doktrina sa ilang pagtuo. Ug duolan sa 90 porsiento kanila wala mouyon sa pagpangawat. Apan, kapin sa dos tersiya maoy mga kawatan! Miingon ang libro nga The Adolescent: “Ang usa ka katarongan tingali mao nga wala kaayoy relihiyosong panaad ang batan-ong mga lalaki. Ang tanan gipanganak nga Katoliko; ang ilang sinugdanang panaad gihimo alang kanila sa ilang mga ginikanan. Ang ilang relihiyon dili ilang pinili.”

Bawtismo​—Kon Nganong Usa ka Kristohanong Kinahanglanon

Busa, alang sa maayong katarongan nga ang Bibliya nagkinahanglan nga ikaw​—dili ang imong mga ginikanan​—ang mohimog personal nga dedikasyon sa Diyos.a ‘Maayo,’ tingali moingon ka, ‘apan kon ang dedikasyon maoy personal, usa ka butang tali sa Diyos ug kanako, nganong ako kinahanglang magpabawtismo pa?’

Tungod kay ang bawtismo naglakip ‘sa kaluwasan sa imong kalag.’ (1 Pedro 1:9) Anaa sa hunahuna sa Diyos ang pagpahamtang ug “panimalos diha kanila nga wala makaila sa Diyos ug wala magmasinugtanon sa maayong balita mahitungod sa atong Ginoong Jesus. Mahiagoman ra nila ang silot nga walay kataposang kalaglagan.” (2 Tesalonica 1:8, 9) Ang tanang timailhan mao nga kining kalaglagan moabot sa atong adlaw.b

Bisan pa, ang kabubut-on sa Diyos mao nga “ang tanang matang sa mga tawo mangaluwas.” (1 Timoteo 2:4) Buot niya nga ikaw makaikyas sa kataposan niining sistema sa mga butang ug makapuyo sa walay kataposan diha sa Paraiso sa yuta! (Pinadayag 21:3, 4) Apan sa unsang paagi maila ka ingong tawo nga nagasunod sa maayong balita? Dili igo ang yanong pagtuo sa mga kamatuoran sa Bibliya nga gikatudlo kanimo, ni igo na ang pagsunod-sunod lang sa imong mga ginikanan diha sa Kristohanong mga panagkatigom. (Itandi ang Santiago 2:19.) Kadtong gusto ug kaluwasan angay magpahinungod sa ilang kaugalingon sa Diyos ug motuman sa iyang kabubut-on. Miingon si apostol Pablo diha sa Roma 12:1: “Busa hangyoon ko kamo, mga igsoon, tungod sa mga kaluoy sa Diyos, sa pagtugyan sa inyong mga lawas ingong halad nga buhi, balaan, [“dedikado,” The New English Bible] ug mahinangponon sa Diyos, usa ka balaang pag-alagad uban sa inyong gahom sa pangatarongan.”

Apan ang dedikasyon dili magpabiling usa ka higpit pribadong butang. Gawas pa, unsa ka tim-os, unsa ka dedikado, ang usa ka tagong disipulo? (Itandi ang Juan 19:38.) Ikaw ba mosalig sa usa ka higala nga gusto nga ang inyong panaghigala magpabiling tinagoan? Nan, sa maalamon ang Diyos nagsugo nga ang tanan ‘mohimog katilingbanong pagpahayag alang sa kaluwasan.’ (Roma 10:10) Kini magsugod diha sa bawtismo. Nianang panahona, ang usa magahimog binabang deklarasyon sa iyang pagtuo. Unya, mosunod ang bawtismo sa tubig. (Mateo 28:19, 20) Hinunoa, unsa may bili sa paglusbog diha sa tubig?

Ang bawtismo dili maoy yanong pagkaligo; kini maoy simbolikong paglubong. Sa dihang ikaw ituslob sa tubig sa bawtismo, kini nagpahinumdom kanimo nga ikaw namatay sa imong nangaging kurso sa kinabuhi. Sa una, ang imong personal nga mga ambisyon, mga tumong, ug mga tinguha maoy panguna sa imong kinabuhi. Apan si Jesus miingon nga ang iyang mga disipulo ‘magadumili sa ilang kaugalingon.’ (Marcos 8:34) Busa sa dihang ikaw gibangon, ikaw gipahinumdoman nga ikaw karon gibuhi sa pagtuman sa kabubut-on sa Diyos. Kining maisogon, katilingbanong buhat maoy usa ka hinungdanong bahin sa pagbutang sa timaan nga magpaila kanimo alang sa kaluwasan!​—Ezekiel 9:4-6; itandi ang 1 Pedro 3:21.

‘Mahadlok Ako nga Mapalagpot’

Kon ang bawtismo hinungdanon kaayo, nan, nganong ang pipila naglikay niana? Gibangon sa Pagmata! kanang pangutanaha diha sa ubay-ubayng Kristohanong mga batan-on. Ang usa ka batan-ong babaye miingon: “Daghan ang mibati nga sila adunay dugang kagawasan kon sila dili bawtismado. Sila mibati nga kon sila makasala, sila wala kaayoy tulobagon.” Ang batan-on nga ginganlag Robert mipatugbaw niining komentoha pinaagi sa pag-ingon: “Sa akong hunahuna daghang mga batan-on ang naglikay nga dili magpabawtismo tungod kay sila nahadlok nga kini maoy usa ka kataposang tikang nga dili nila kaatrasan. Sila mibati nga kon sila makabuhat ug daotan, ipalagpot sila gikan sa kongregasyon.”

Tinuod nga dili makaatras ang usa sa pagpahinungod sa Diyos. (Itandi ang Ecclesiastes 5:4.) Ang usa ka tawo nga nagpahinungod sa iyang kaugalingon sa Diyos adunay ug usa ka seryosong responsabilidad. Siya obligadong “magalakaw nga takos kang Jehova nga sa hingpit kahimut-an niya.” (Colosas 1:10) Ang usa nga nakahimog seryosong kalapasan nameligro nga mapalagpot gikan sa Kristohanong kongregasyon.​—1 Corinto 5:11-13.

Apan, ang usa dili makapangatarongan nga kay siya dili bawtismado, makahimo siyag bisan unsa. Kay “kon siya nasayod kon unsay matarong ug wala magabuhat niini, siya nakasala”​—bawtismado ug dili-bawtismado! (Santiago 4:17) Ang usa tingalig makalikay sa pormal nga pagpalagpot gikan sa kongregasyon, apan siya dili makalingkawas sa paghukom ni Jehova. “Ayaw kamo pagkasayop,” nagpasidaan si Pablo, “ang Diyos dili katiawtiawan; kay anihon sa tawo ang iyang gipugas.”​—Galacia 6:7, Byington.

Sa kasagaran ang kahadlok nga mapalagpot sa pagkatinuod nagatabon sa tagong tinguha sa pagbuhat ug kasal-anan. Ang usa ka dalagitang ginganlag Natalie prangkang miingon: “Ako gipadako sa kalibotan ni Satanas ug nasayod kon unsang matanga kini. Apan daghang mga batan-on ang gustong mogawas ug mosinati kon unsa ang anaa didto.” Inay tugotan ang sayop nga mga tinguha nga mopugong kanimo sa pagpabawtismo​—o tugotan kini nga maugmad ngadto sa pagbuhat ug daotan​—nganong dili mangayog tabang, tingalig hisgotan kining mga butanga uban sa ginikanan o sa hamtong nga Kristohanon?​—Santiago 1:14, 15.

Sa pagkatinuod, ang kagawasan nga gitanyag sa kalibotan ni Satanas maoy ilusyon lamang. Ingon sa gipahayag ni apostol Pedro maylabot sa pipila nga nalimbongan sa iyang adlaw: “Samtang sila nagasaad kanila ug kagawasan, sila mismo nagakinabuhi ingong mga ulipon sa kadunotan. Kay ang tawo ulipon man sa bisan unsa nga makabuntog kaniya.” (2 Pedro 2:19) Tinuod ba gayod nga kagawasan kon ang imong panghunahuna, paggawi, ug moral gikontrolar sa uban? Tinuod ba gayod nga kagawasan ang pakigbahin sa mga buhat nga mosangpot ug sakit, kaulaw, ug, sa kataposan, kamatayon?​—Proverbio 5:8-14.

Ang usa ka batan-ong Hapones nga ginganlag Hitoshi nakaatubang nianang mga pangutanaha. Siya gimatuto sa Kristohanong mga ginikanan ug nahinumdom: “Samtang ang uban nagdula, ako napugos sa pagtambong sa mga panagkatigom. Gusto ako ug dugang kagawasan. Abi nako ug may nawala kanakong maayong butang.” Oo, sama kang salmistang Asap, siya “nasina” sa mga makasasala. (Salmo 73:2, 3) Apan human sa mabuot nga pagpalandong sa maong butang, ang pagbati ni Hitoshi nausab. Siya miingon: “Akong naamgohan kon unsa unya ang akong kinabuhi kon wala ang kamatuoran​—akong makita ang akong kaugalingon nga nabuhi sa 70 o 80 ka tuig ug unya namatay. Apan si Jehova nagasaad ug kinabuhing dayon!” Busa si Hitoshi nagpahinungod sa Diyos ug gibawtismohan.​—Itandi ang Salmo 73:19-28.

Ikaw ba napalihok sa pagbuhat sa ingon? Ang usa ka batan-ong ginganlag David mihimo sa ingon. Siya nahinumdom: “Ang pagpabawtismo bisan batan-on pa nahimong proteksiyon kanako. . . . Ang ubang walay bawtismong mga tin-edyer sa kongregasyon mibating libre sa awtoridad sa mga ansiano ug ingong resulta naligas sa daotang paggawi. Apan kanunay nakong hinumdoman nga akong gipahinungod ang akong kinabuhi ngadto sa Diyos.” Apan, tingali ikaw wala pa gayod makatino kon ikaw andam na sa pagkuha niini nga tikang. Ang impormasyon nga motabang kanimo ipadayag unya sa umaabot nga artikulo.

[Mga footnote]

[Mga hulagway sa panid 26]

Ang desisyon sa pag-alagad sa Diyos maoy imong kaugalingong desisyon. Ang bawtismo nagpaila sa usa ingong dedikadong disipulo ni Kristo Jesus