Pagbantay sa mga Mabiaybiayon!

Karong adlawa, daghan kaayo ang mga panagna, ug ang negosyo labot sa umaabot nag-usbaw. “Samtang ang tuig 2000 nagkaduol na,” nag-ingon ang The Daily Telegraph sa London, “usa ka katingalahang butang apan dili gayod kay wala dahoma nagakahitabo. Libolibong tawo sa tibuok kalibotan nagpakaagom ug katingalahan ug kasagaran makuyawng mga panan-awon sa umaabot.” Alang sa daghang tigpaniid kining dako kaayong kaikag sa umaabot maoy pagsubli lamang sa gilaoman niadto nga mga kausaban nga wala matuman.

SA MIDAGHAN ang ginuyod-sa-kabayo nga trapiko sa ika-19ng siglo, usa ka tawo nanagna nga ang mga siyudad sa Uropa sa ngadtongadto matuok sa tai sa kabayo. Sa pagkamatuod, ang iyang panagna napamatud-ang bakak. Busa, sa naghisgot sa paagi nga ang mga panagna subsob nga dili-matuman, ang The Times sa London nag-ingon: “Ang umaabot maoy usa lamang ka karga sa tai sa kabayo.”

Yubiton sa uban kadtong makakita sa kapeligrohan sa unahan. Pananglitan, usa ka propesor sa negosyo sa usa ka unibersidad sa T.B. nanghagit ug pusta niadtong nagpasidaan bahin sa pagkadaot sa kalikopan kon kaha mosamot ba ang kahimtang. Ingon sa gitaho sa magasing New Scientist, siya nangangkon nga ang “atong kalidad sa kinabuhi miarang-arang ug magpadayon nga maingon niini hangtod sa hangtod.”

Taliwala sa kalibog labot sa mga pangangkon ug kontra-pangangkon, daghan ang nagtuo nga ang tanang butang magpabilin nga mao ra gihapon. Biaybiayon ang bisan unsang hunahuna bahin sa pagpangilabot sa Diyos sa tawhanong mga kalihokan, sila magpakita ug tinamdan nga sama sa mga mabiaybiayon sa unang siglo K.P.

Ang Tanang Butang Mao ra ba Gihapon?

Ang ikaduhang dinasig nga sulat sa Kristohanong apostol Pedro, nga gisulat sa mga 64 K.P., nagpasidaan: “Sa ulahing mga adlaw adunay mangabot nga mga mabiaybiayon uban sa ilang mga pagbiaybiay, nga magapadayon sumala sa kaugalingon nilang mga tinguha.”​—2 Pedro 3:3.

Ang mga mabiaybiayon maningkamot sa paghimo sa tumong sa ilang pagbiaybiay nga tan-awong kataw-anan. Ang tawong madaog sa pagbiaybiay hayan mahulog sa hakog nga lit-ag tungod kay kasagaran ang mabiaybiayon gusto nga kadtong mamati modawat sa iyang hunahuna. Tingali ang ubang mga mabiaybiayon nga bahin kanila nagpasidaan si Pedro maoy sama niini, nga “magapadayon sumala sa kaugalingon nilang mga tinguha.” Sa nagpasidaan sa iyang mga magbabasa, gigamit sa apostol ang usa ka maugdang nga matang sa ekspresyon. Siya nagpasidaan bahin sa pag-abot sa “mga mabiaybiayon uban sa ilang mga pagbiaybiay.”

Gikuwestiyon niadtong unang-siglong mga mabiaybiayon ang pagkatinuod sa “gisaad nga pagkaanaa” ni Kristo, nga nag-ingon: “Asa na man kining gisaad nga pagkaanaa niya? Tan-awa, sukad sa adlaw nga ang atong mga katigulangan nahikatulog sa kamatayon, ang tanang butang nagapadayon nga mao ra gayod sukad sa sinugdan sa kalalangan.” (2 Pedro 3:4) Mopatim-aw nga ingon niana ang kahimtang alang kanila. Apan, balik sa tuig 33 K.P., si Jesus nagtagna ug katalagman alang sa siyudad sa Jerusalem. “Ang mga adlaw moabot nganha kanimo,” siya miingon, “dihang ang imong mga kaaway magatukod libot kanimo ug salipdanan pinaagig tinalinis nga mga estaka ug magalikos kanimo ug magasakit kanimo gikan sa tanang direksiyon, ug sila magalampurnas kanimo sa yuta ug sa imong mga anak nga anaa sulod kanimo, ug ikaw dili nila binlan ug bato nga napatong sa bato.” Pagkadakong sayop niadtong nagbiaybiay sa maong pasidaan! Sa 70 K.P., gilikosan sa Romanong kasundalohan ang Jerusalem ug gilaglag ang siyudad, ug daghan ang nangamatay sa mga molupyo niini. Nganong ang kadaghanan sa mga molupyo sa siyudad wala maandam alang niini nga katalagman? Tungod kay sila wala makasabot nga gisusi sila sa Diyos pinaagi sa iyang Anak, si Jesus.​—Lucas 19:​43, 44.

Gihisgotan ni apostol Pedro ang umaabot nga pagpangilabot pinaagi sa Diyos nga Labing Gamhanan. “Ang adlaw ni Jehova moabot ingon sa usa ka kawatan,” si Pedro nagpasidaan. (2 Pedro 3:10) Nianang panahona paphaon sa Diyos ang di-diyosnon gikan sa tibuok kalibotan ug luwason kadtong pagahukman nga matarong. Ingon sa masubsob nga gipatin-aw niining basahona, ang “pagkaanaa” ni Kristo Jesus nagsugod sa 1914. Apan ang iyang paglihok ingong Tigpakanaog sa Silot sa Diyos sa pagpapha sa daotan mahitabo sa umaabot pa. Busa, ang pasidaan sa apostol nga magbantay sa mga mabiaybiayon aplikado karon nga mas dinalian.

Tingali ikaw dugay na kaayong naghulat sa pagpangilabot sa Diyos diha sa mga kalihokan sa tawo. Unsay makatabang kanimo sa pagpadayon sa mapailobong paghulat nga dili mahimong biktima sa mga mabiaybiayon? Palihog padayon sa pagbasa.

[Blurb sa panid 4]

“Ang mga adlaw moabot nganha kanimo, dihang ang imong mga kaaway . . . magalikos kanimo ug magasakit kanimo gikan sa tanang direksiyon, . . . ug ikaw dili nila binlan ug bato nga napatong sa bato.” Kana dili usa ka pasidaan nga angay biaybiayon. Gilaglag sa Romanong kasundalohan ang Jerusalem, ug daghan kaayo ang nangamatay.