Tinguhaa ang Diyosnong Debosyon Ingong Bawtismadong mga Kristohanon
“Apan ikaw, O tawo sa Diyos, . . . tinguhaa ang pagkamatarong, diyosnong debosyon.”—1 TIMOTEO 6:11.
1. Unsaon nimo pagtubag sa pangutana, Unsa ang labing importanteng adlaw sa imong kinabuhi? Nganong kana ang imong tubag?
UNSA ba ang labing importanteng adlaw sa imong kinabuhi? Kon ikaw bawtismadong Saksi ni Jehova, walay duhaduha nga ikaw motubag, ‘Aw, ang adlaw nga ako nabawtismohan!’ Tino, ang bawtismo mao ang labing importanteng lakang sa imong kinabuhi. Kini panggawas nga simbolo nga nahimo mo ang bug-os ug walay-pagpanuko nga pahinungod kang Jehova sa pagbuhat sa iyang kabubut-on. Ang imong bawtismo nagatimaan sa petsa sa imong ordinasyon ingong ministro sa Labing Hataas nga Diyos, si Jehova.
2. (a) Sa unsang paagi ikailustrar nga ang bawtismo dili kataposang lakang nga imong himoon diha sa imong Kristohanong dalan? (b) Unsang importanteng pasiunang mga lakang ang imong gihimo una magpabawtismo?
2 Ugaling, ang bawtismo mao ba ang kataposang lakang nga imong himoon diha sa imong Kristohanong dalan? Halayo niana! Sa pag-ilustrar: Sa daghang kayutaan ang seremonyas sa kasal nagatimaan sa kataposan sa yugto sa pagplano ug preparasyon (ug kasagaran sa panagtrato). Sa samang panahon, kini nagatimaan sa sinugdanan sa kinabuhing managkauban ingon nga kasadong magtiayon. Sa susama, ang imong bawtismo mao ang tayuktok sa usa ka yugto sa preparasyon diin gihimo nimo ang daghang hinungdanong pasiunang mga lakang. Ikaw nagbaton sa kahibalo bahin sa Diyos ug kang Kristo. (Juan 17:3) Misugod ka sa pagtuo kang Jehova ingong matuod nga Diyos, kang Kristo ingong imong Manluluwas, ug sa Bibliya ingong Pulong sa Diyos. (Buhat 4:12; 1 Tesalonica 2:13; Hebreohanon 11:6) Gipasundayag mo kanang pagtuoha pinaagi sa paghinulsol sa kanhi nimong binuhatan ug pagliso ngadto sa matarong nga dalan. (Buhat 3:19) Unya midesisyon ka sa pagpahinungod sa imong kaugalingon kang Jehova aron sa pagbuhat sa iyang kabubut-on. (Mateo 16:24) Sa kataposan, ikaw nabawtismohan.—Mateo 28:19, 20.
3. (a) Sa unsang paagi atong ikapasundayag nga ang atong bawtismo nagatimaan sa sinugdanan sa usa ka kinabuhi sa nagpahinungod nga pag-alagad sa Diyos? (b) Unsang mga pangutana ang motungha, ug nganong ang mga tubag angay nga dulot makapaikag kanato?
3 Apan, ang imong bawtismo dili mao ang kataposan kondili ang sinugdanan sa usa ka kinabuhi sa napahinungod sagradong pag-alagad sa Diyos. Sumala sa giingon sa usa ka eskolar sa Bibliya, ang Kristohanong kinabuhi kinahanglang dili mao ang ‘sinugdang pagkirig nga sundan sa dugayng pagkaway-lihok.’ Nan, sa unsang paagi ikapasundayag nimo nga sa imong kaso, ang bawtismo dili lamang nagahawas sa ‘sinugdang pagkirig’? Kini maoy pinaagi sa pagtinguha sa tibuok-kinabuhing dalan sa diyosnong debosyon. Unsa ba kining diyosnong debosyon? Nganong kinahanglang tinguhaon kini? Sa unsang paagi maugmad nimo kining bug-os pa sa imong kinabuhi? Ang mga tubag angay nga dulot makapaikag kanato, kay kinahanglang kita maoy mga tawo nga mailhan tungod sa “mga binuhatan sa diyosnong debosyon” aron kita maluwas sa nagsingabot nga adlaw sa paghukom ni Jehova.—2 Pedro 3:11, 12.
Ang Kahulogan sa Diyosnong Debosyon
4. Unsay gitambag ni Pablo nga buhaton ni Timoteo, ug unsay kahimtang ni Timoteo sa maong panahon?
4 Sa usa ka panahon tali sa 61 ug 64 K.P., gisulat ni apostol Pablo ang una niyang inspiradong sulat ngadto sa Kristohanong disipulo nga si Timoteo. Tapos sa pagbatbat sa mga kapeligrohan nga mahimong sangpotan sa gugma sa salapi, si Pablo misulat: “Apan ikaw, O tawo sa Diyos, kalagiw gikan niining mga butanga. Apan tinguhaa . . . ang diyosnong debosyon.” (1 Timoteo 6:9-11) Makaiikag, niadtong panahona si Timoteo tingali bag-o pang nagtrayenta anyos. Siya nakabiyahe nag layo kauban ni apostol Pablo ug nahatagag awtoridad sa pagtudlog mga magtatan-aw ug ministeryal nga mga alagad diha sa mga kongregasyon. (Buhat 16:3; 1 Timoteo 5:22) Bisan pa niana, gitambagan ni Pablo ang maong nagpahinungod ug bawtismado, hamtong nga Kristohanong lalaki sa pagtinguha sa diyosnong debosyon.
5. Unsay kahulogan sa pamulong “diyosnong debosyon”?
5 Unsay gipasabot ni Pablo sa pamulong nga “diyosnong debosyon”? Ang orihinal Gregong pulong (eu·seʹbei·a) mahimong hubaron sa literal nga “well-reverencing” o matinahoron kaayo. Bahin sa kahulogan niini, atong mabasa: “Ang eusebeia usahay makita diha sa diwa nga nagapasabot sa personal relihiyosong debosyon diha sa mga sinulat sa maong panahon . . . apan ang mas malangkobong kahulogan niini diha sa popular nga Grego sa Romanhong yugto maoy ‘pagkamaunongon.’ . . . Alang sa mga Kristohanon ang eusebeia mao ang kinatas-ang matang sa debosyon ngadto sa Diyos.” (Christian Words, ni Nigel Turner) Busa sumala sa pagkagamit diha sa Kasulatan, ang pamulong “diyosnong debosyon” nagatumong sa pagtahod o debosyon uban ang pagkamaunongon kang Jehova nga Diyos sa personal.
6. Sa unsang paagi ang usa ka Kristohanon nagahatag ebidensiya sa iyang diyosnong debosyon?
6 Hinuon, kining diyosnong debosyon dili lamang usa ka masimbahong pagbati. Maingon nga “ang pagtuo nga walay mga buhat maoy patay,” mao, usab, ang diyosnong debosyon kinahanglang ipadayag diha sa kinabuhi sa usa. (Santiago 2:26) Sa New Testament Words, si William Barclay misulat: “Dili lamang nga ang [eu·seʹbei·a ug ubang nalangkit nga mga pulong] nagapahayag ug pagbati sa kahingangha ug pagtahod, kondili nagpasabot usab kini sa pagsimba nga angay sa maong kahingangha, ug sa kinabuhi sa aktibong pagkamasinugtanon nga angay sa maong pagtahod.” Ang eu·seʹbei·a dugang gibatbat ingong “praktikal kaayong kaamgohan sa Diyos diha sa tanang bahin sa kinabuhi.” (The Second Epistle General of Peter and the General Epistle of Jude, ni Michael Green) Nan, ang Kristohanon kinahanglang mohatag ebidensiya sa personal niyang kalabotan kang Jehova pinaagi sa iyang pagkinabuhi.—1 Timoteo 2:2; 2 Pedro 3:11.
Gikinahanglan ang Dakong Paningkamot
7. Unsay gipasabot ni Pablo sa giagda niya si Timoteo, bisan pag siya bawtismado na, nga “tinguhaa” ang diyosnong debosyon?
7 Apan, unsay nalangkit sa pag-ugmad ug pagpadayag sa diyosnong debosyon? Kini ba mao lamay pagpabawtismo? Hinumdomi nga si Timoteo, bisan pag bawtismado na, giagda nga “tinguhaa [sa literal, ‘magtinguha ka’]” niini.a (1 Timoteo 6:11, Kingdom Interlinear) Dayag, si Pablo wala magpasabot nga ang disipulong si Timoteo walay diyosnong debosyon. Hinunoa, gisilsil niya diha kaniya ang panginahanglan nga ipadayon pagtinguha kini uban ang kamainiton ug kadasig. (Itandi ang Filipos 3:14.) Tin-aw, kadto maoy tibuok-kinabuhing pagtinguha. Si Timoteo, sama sa tanang bawtismadong Kristohanon, makapadayon sa pag-uswag sa pagpadayag ug diyosnong debosyon.
8. Giunsa pagpakita ni Pedro nga gikinahanglan ang dakong paningkamot aron ang nagpahinungod, bawtismadong Kristohanon magtinguha sa diyosnong debosyon?
8 Gikinahanglan ang dakong paningkamot aron ang nagpahinungod, bawtismadong Kristohanon magtinguha sa diyosnong debosyon. Sa pagsulat ngadto sa bawtismadong mga Kristohanon nga nagbaton sa paglaom nga ‘mahimong mga umalambit sa balaang kinaiya,’ si apostol Pedro miingon: “Oo, tungod niining maong hinungdan, pinaagi sa inyong pag-amot sa pagsanong sa bug-os nga mainitong paningkamot, ipuno sa inyong pagtuo ang maayong kinaiya, sa inyong maayong kinaiya ang kahibalo, sa inyong kahibalo ang pagpugong-sa-kaugalingon, sa inyong pagpugong-sa-kaugalingon ang pagkamainantoson, sa inyong pagkamainantoson ang diyosnong debosyon.” (2 Pedro 1:4-6) Dayag, gikinahanglan ang usa ka sukod sa pagtuo aron sa pagtanyag sa atong kaugalingon alang sa bawtismo. Ugaling, human sa bawtismo kita dili makapaus-os, nga matagbaw na sa basta lamang nga Kristiyanidad. Hinunoa, samtang mouswag kita sa Kristohanong pagkinabuhi, kinahanglang mopadayon kita sa pag-ugmad sa ubang maayong mga hiyas, apil ang diyosnong debosyon, nga ikapuno sa atong pagtuo. Kini, matud ni Pedro, nagkinahanglag mainitong paningkamot sa atong bahin.
9. (a) Sa unsang paagi ang Gregong pulong alang sa “supply” o ipuno nagailustrar sa gidak-on sa paningkamot nga gikinahanglan sa pag-ugmad ug diyosnong debosyon? (b) Unsay giagda ni Pedro nga atong buhaton?
9 Ang Gregong pulong nga gigamit ni Pedro alang sa “ipuno” (e·pi·kho·re·geʹo) may makaiikag nga kagikan ug nagailustrar sa gidak-on sa paningkamot nga gikinahanglan. Gikan kini sa usa ka nombre (kho·re·gosʹ) nga sa literal nagkahulogang “ang pangulo sa usa ka koro.” Kini nagtumong sa usa nga nagbayad sa tanang galastohan sa pagbansay ug pagmentenar sa usa ka koro sa pagpasundayag sa usa ka dula. Kinabubut-ong gidawat nianang mga tawhana ang maong responsabilidad tungod sa gugma alang sa ilang siyudad ug gibayran ang mga galastohan gikan sa ilang kaugalingong mga bulsa. Garbo sa maong mga tawo ang paggastog dako aron itagana ang tanang gikinahanglan alang sa usa ka madungganong pasundayag. Ang pulong miusbaw nga kana nagkahulogang “pagpuno, pagtaganang madagayaon.” (Itandi ang 2 Pedro 1:11.) Busa giagda kita ni Pedro nga pun-an nato ang atong kaugalingon, dili ra sa usa ka sukod sa diyosnong debosyon, kondili sa labing bug-os posibleng pagpadayag niining bililhong hiyas.
10, 11. (a) Nganong gikinahanglan ang paningkamot aron sa pag-ugmad ug pagpadayag sa diyosnong debosyon? (b) Sa unsang paagi kita makadaog sa pakigbisog?
10 Nan, nganong gikinahanglan ang dakong paningkamot aron sa pag-ugmad ug pagpadayag sa diyosnong debosyon? Sa usa ka butang, anaa ang pakigbisog batok sa nahulog nga unod. Sanglit “ang kiling sa kasingkasing sa tawo daotan man sukad sa iyang pagkabata,” dili sayon ang pagtinguha sa kinabuhi sa aktibong pagkamasinugtanon ngadto sa Diyos. (Genesis 8:21; Roma 7:21-23) “Ang tanan nga matinguhaon sa pagkinabuhi uban ang diyosnong debosyon langkit kang Kristo Jesus pagalutoson usab,” matud ni apostol Pablo. (2 Timoteo 3:12) Oo, ang Kristohanon nga maningkamot sa pagkinabuhi sa paagi nga makapahimuot sa Diyos kinahanglang malahi sa kalibotan. Siya may laing hugpong sa mga sukdanan ug laing mga tumong. Sumala sa gipasidaan ni Jesus, kini mopukaw sa pagdumot sa daotang kalibotan.—Juan 15:19; 1 Pedro 4:4.
11 Bisan pa niana, mahimo kitang makadaog sa pakigbisog, kay “si Jehova nahibalo kon unsaon pagluwas ang mga tawong may diyosnong debosyon gikan sa pagsulay.” (2 Pedro 2:9) Hinuon, kinahanglang buhaton nato ang atong bahin pinaagi sa pagpadayon sa pagtinguha sa diyosnong debosyon.
Pag-ugmad ug Diyosnong Debosyon
12. Giunsa pagpaila ni Pedro kon unsay gikinahanglan aron pag-ugmad sa diyosnong debosyon sa mas bug-os pa?
12 Nan, sa unsang paagi maugmad nimo kining diyosnong debosyon sa mas bug-os pa? Gihatag ni apostol Pedro ang usa ka ilhanan. Sa 2 Pedro 1:5, 6, sa gilista ang mga hiyas nga kinahanglang ipuno sa atong pagtuo, gilista niya ang kahibalo nga una sa diyosnong debosyon. Sa sinugdan sa samang kapitulo, siya misulat: “Ang iyang balaang gahom naghatag kanatong madagayaon sa tanang butang nga maylabot sa kinabuhi ug diyosnong debosyon, pinaagi sa tukmang kahibalo sa usa nga nagtawag kanato.” (2 Pedro 1:3) Sa ingon gilangkit ni Pedro ang diyosnong debosyon sa tukmang kahibalo kang Jehova.
13. Nganong ang tukmang kahibalo kinahanglanon sa pag-ugmad sa diyosnong debosyon?
13 Sa pagkamatuod, kon walay tukmang kahibalo imposible ang pag-ugmad ug diyosnong debosyon. Ngano? Aw, hinumdoming ang diyosnong debosyon maoy ngadto kang Jehova sa personal ug gipamatud-an sa pagkinabuhi nato. Busa ang tukmang kahibalo bahin kang Jehova kinahanglanon, sanglit nagalangkit kini sa pagkaila kaniya sa personal, sa suod nga paagi, sa pagkasinati sa bug-os sa iyang mga hiyas ug iyang mga dalan. Labaw pa niana, nagalangkit kini sa pagsundog kaniya. (Efeso 5:1) Kon sa dugang mouswag kita sa pagkat-on bahin kang Jehova ug sa pagbanaag sa iyang mga dalan ug mga hiyas diha sa atong mga kinabuhi, kita makaila kaniya nga mas maayo. (2 Corinto 3:18; itandi ang 1 Juan 2:3-6.) Kini, sa baylo, mosangpot sa mas lalom nga pagpabili sa bililhong mga hiyas ni Jehova, sa mas bug-os nga gidak-on sa diyosnong debosyon.
14. Sa pagbatog tukmang kahibalo, unsay igaapil sa atong programa sa personal nga pagtuon, ug ngano?
14 Unsaon nato pagbaton ang maong tukmang kahibalo? Walay mga laktoran. Aron makabatog tukmang kahibalo, kinahanglang magmakugihon kita sa pagtuon sa Pulong sa Diyos ug sa mga basahong gibase sa Bibliya. Ang maong personal nga pagtuon angay maglakip sa regular nga programa sa pagbasa sa Bibliya, sama nianang gieskedyul maylabot sa Tunghaan sa Teokratikanhong Ministeryo. (Salmo 1:2) Sanglit ang Bibliya usa man ka gasa gikan ni Jehova, ang atong ginahimong personal nga pagtuon sa Bibliya maoy banaag kon unsa ka dako ang atong pagpabili sa maong gasa. Unsay ginapadayag sa imong personal nga mga batasan sa pagtuon bahin sa giladmon sa imong pagpabili sa espirituwal nga mga tagana ni Jehova?—Salmo 119:97.
15, 16. (a) Unsay makatabang nato sa pag-ugmad ug espirituwal nga gana alang sa personal nga pagtuon sa Bibliya? (b) Aron ang personal nga pagtuon sa Bibliya mosangpot sa atong pag-ugmad sa diyosnong debosyon, unsay pagahimoon sa dihang magbasa sa usa ka bahin sa Pulong sa Diyos?
15 Tinuod, ang pagbasa ug pagtuon dili sayon alang sa pipila. Apan uban sa panahon ug paningkamot, makaugmad kag espirituwal nga gana alang sa personal nga pagtuon sa Bibliya. (1 Pedro 2:2) Dihang palandongon nimong mapabilhon ang tanan nga nahimo, ginahimo, ug pagahimoon pa ni Jehova nga Diyos alang kanimo, itukmod ka sa imong kasingkasing sa pagkat-on sa tanang imong maarangan bahin kaniya.—Salmo 25:4.
16 Apan aron ang maong personal nga pagtuon sa Bibliya mosangpot sa pag-ugmad nimo sa diyosnong debosyon, ang imong tumong dili mahimong mao lamang ang pagkobre sa mga panid sa materyal o pagpuno sa imong kaisipan sa impormasyon. Hinunoa, dihang ikaw mobasag usa ka bahin sa Pulong sa Diyos, kinahanglang mogahin kag panahon sa pagpalandong sa kasayoran, nga suknaon ang imong kaugalingon sa mga pangutana sama sa: ‘Unsay ginatudlo niini kanako bahin sa malumong mga hiyas ug mga dalan ni Jehova? Sa unsang paagi ako labaw nga mahisama kang Jehova niining mga bahina?’
17. (a) Unsay atong makat-onan bahin sa kaluoy ni Jehova gikan sa basahong Oseas? (b) Sa unsang paagi ang pagpalandong sa kaluoy ni Jehova magaapektar kanato?
17 Tagda ang usa ka pananglitan. Sa dili pa dugay ang gihatag kanatong asaynment sa pagbasa sa Tunghaan sa Teokratikanhong Ministeryo mao ang tibuok nga basahong Oseas. Human sa pagbasa sa bug-os sa maong basahon sa Bibliya, ikaw makasukna sa imong kaugalingon: ‘Unsay akong nakat-onan bahin kang Jehova ingong Persona—iyang mga hiyas ug iyang mga dalan—gikan sa maong basahon?’ Ang paagi sa pagkagamit niini sa ulahing mga magsusulat sa Bibliya nagapaila nga daghan ang atong makat-onan bahin sa mabinationg kaluoy ni Jehova gikan sa basahong Oseas. (Itandi ang Mateo 9:13 sa Oseas 6:6; Roma 9:22-26 sa Oseas 1:10 ug 2:21-23.) Ang kaandam ni Jehova sa pagpakitag kaluoy sa Israel giilustrar sa mga pakiglabot ni Oseas sa iyang asawa, si Gomer. (Oseas 1:2; 3:1-5) Bisan pag ang pag-ulag dugo, pangawat, pakighilawas, ug pagsimbag diyosdiyos kaylap sa Israel, si Jehova ‘nakigsulti ngadto sa kasingkasing sa Israel.’ (Oseas 2:13, 14; 4:2) Si Jehova dili obligado sa pagpakita sa maong kaluoy apan nagbuhat niana sa iyang “kaugalingong kabubut-on,” basta ang mga Israelinhon magpadayag sa kinasingkasing nga paghinulsol ug motalikod sa ilang makasasalang dalan. (Oseas 14:4; itandi ang Oseas 3:3.) Inigpalandong nimo niining paagiha sa talagsaong kaluoy ni Jehova, kini mopukaw sa imong kasingkasing, nga mopalig-on sa imong personal nga kalabotan kaniya.
18. Tapos sa pagpalandong sa kaluoy ni Jehova sumala sa gipasiugda diha sa Oseas, unsay imong ikasukna sa imong kaugalingon?
18 Hinuon, labaw pa ang gikinahanglan. “Malipayon ang maluluy-on, sanglit sila pakitaag kaluoy,” matud ni Jesus. (Mateo 5:7) Busa, tapos sa pagpalandong sa kaluoy ni Jehova sumala sa gipasiugda diha sa basahong Oseas, suknaa ang imong kaugalingon: ‘Sa unsang paagi labaw ko pang masundog ang kaluoy ni Jehova sa pagpakiglabot sa uban? Kon ang usa ka igsoong lalaki o babaye nga nakasala o nakapasilo kanako mangayog pasaylo, ako ba nagapasaylo “uban ang pagkamasadyaon”?’ (Roma 12:8; Efeso 4:32) Kon ikaw nagaalagad diha sa kongregasyon ingong tinudlo nga ansiano, ikaw makasukna sa imong kaugalingon: ‘Sa dihang magahusay sa hudisyal nga mga butang, sa unsang paagi ako labawng makasundog kang Jehova, si kinsa kanunay “andam sa pagpasaylo,” ilabina kon ang mamumuhat ug daotan nagahatag ug tiunay nga ebidensiya sa kinasingkasing nga paghinulsol?’ (Salmo 86:5; Proverbio 28:13) ‘Unsay angay kong pangitaon ingong pasikaranan sa pagkaluoy?’—Itandi ang Oseas 5:4 ug 7:14.
19, 20. (a) Unsay mosangpot kon ang pagtuon sa Bibliya himoon sa bug-os nga paagi? (b) Unsay dugang tabang sa pag-ugmad sa diyosnong debosyon?
19 Pagkamagantihon unya sa imong personal nga pagtuon sa Bibliya kon himoon sa maong bug-os nga paagi! Mosugwak sa imong kasingkasing ang pagpabili sa bililhong mga hiyas ni Jehova. Ug pinaagi sa padayong pagpaningkamot sa pagsundog niining mga hiyas diha sa imong kinabuhi, mapalig-on nimo ang imong personal nga kalabotan kaniya. Sa ingon imong tinguhaon ang diyosnong debosyon ingong nagpahinungod, bawtismadong alagad ni Jehova.—1 Timoteo 6:11.
20 Ang dugang tabang sa pag-ugmad niining bililhong hiyas hikaplagan diha kang Jesu-Kristo—ang hingpit nga panig-ingnan sa diyosnong debosyon. Sa unsang paagi ang pagsunod sa panig-ingnan ni Jesus mobulig nimo sa pag-ugmad ug pagpadayag sa diyosnong debosyon? Ang artikulo sa panid 18 mohisgot niini ug sa langkit nga mga pangutana.
[Footnote]
a Mahitungod sa Gregong pulong di·oʹko (“pursue” o pagtinguha), ang The New International Dictionary of New Testament Theology nagasaysay nga diha sa klasikal nga mga sinulat ang pulong “nagkahulogan sa literal nga paggukod, pagsunod, paglakag, . . . ug sa masambingayon pagtinguha sa usa ka butang nga madasigon, pagsulay sa pagkab-ot sa usa ka butang, pagsulay sa pagbaton.”
Unsay Imong Tubag?
◻ Nganong ang bawtismo dili mao ang kataposang lakang imong himoon diha sa imong Kristohanong dalan?
◻ Unsay kahulogan sa “diyosnong debosyon,” ug sa unsang paagi nagahatag kag ebidensiya niini?
◻ Nganong gikinahanglan ang dakong paningkamot aron sa pag-ugmad ug diyosnong debosyon?
◻ Sa unsang paagi makaugmad ka sa diyosnong debosyon sa mas bug-os pa?