Padayon sa Pagkinabuhi Ingong mga Anak sa Diyos

“Ang bisan kinsa nga wala maghimog pagkamatarong dili iya sa Diyos, mao man ang wala magahigugma sa iyang igsoon.”—1 JUAN 3:10.

1, 2. Samtang magpadayon kita sa pagtuon sa Unang Juan, unsang tambag sa apostol ang atong tagdon?

SI Jehova adunay unibersohanong pamilya, ug ang pipila kanila karon sakop na niana. Sila maoy mga anak sa Diyos. Apan sa unsang paagi lahi sila sa uban?

² Diha sa iyang unang balaan nga pagkadasig nga sulat, gipaila ni apostol Juan kining nahamut-an kaayong mga tawo. Siya mihatag usab ug tambag nga nakatabang kanila sa pagpadayon sa pagkinabuhi ingong mga anak sa Diyos. Ug ang iyang gipamulong makaayo sa tanang dedikadong mga saksi ni Jehova.

Pagkadako sa Gugma sa Diyos!

3. Sa unsang paagi ang ubang mga tawo gihimong “mga anak sa Diyos,” sa unsay paglantaw kanila sa kalibotan?

³ Gikutlo ni Juan ang paglaom sa dinihogang mga Kristohanon. (Basaha ang 1 Juan 3:1-3.) Pagkadako sa gugma nga gipakita ni Jehova pinaagi sa pagsagop kanila ingong espirituwal nga mga anak, nga nagpahimo kanilang “mga anak sa Diyos”! (Roma 5:8-10) Wala makaambit sa ilang diyosnong espiritu, mga tumong, ug mga paglaom ang “kalibotan”​—nga mao ang dili-matarong tawhanong katilingban. Ang maong kalibotanong katilingban nagadumot ni Kristo ug sa iyang mga sumusunod ug sa Amahan usab. (Juan 15:17-25) Busa ang kalibotan makaila sa mga dinihogan ingong mga indibiduwal apan dili ingong mga anak sa Diyos tungod kay “kini wala makaila” kang Jehova.​—1 Corinto 2:14.

4. Unsay kinahanglang buhaton sa tanan nga may paglaom sa langitnong kinabuhi?

⁴ Sa karon, ang mga dinihogan maoy mga anak sa Diyos. “Apan,” miingon si Juan, “kini wala pa ipakita kon unsa unya kita” tapos mamatay diha sa pagkamatinumanon ug sa pagbanhaw ngadto sa langitnong kinabuhi uban sa espirituhanong mga lawas. (Filipos 3:20, 21) Apan, sa “mapadayag” ang Diyos, sila “mahisama kaniya” ug “magasud-ong kaniya sa iyang pagkamao,” ingong si “Jehova nga Espiritu.” (2 Corinto 3:17, 18) Ang tanang nakabaton “niini nga paglaom” sa langitnong kinabuhi mapalihok sa pagpaputli sa iyang kaugalingon “sama nga kanang usa [Jehova] maputli.” Bisan pag ang mga dinihogan karon dili-hingpit, sila kinahanglang magpuyo sa mahinlong mga kinabuhi nga sibo uban sa ilang paglaom sa pagsud-ong sa maputli, balaang Diyos sa langitnong gingharian.​—Salmo 99:5, 9; 2 Corinto 7:1.

Bansaya ang Pagkamatarong

5, 6. Ang tanan nga nagpakasala nagabuhat ug unsa sumala sa panglantaw sa Diyos, apan ning bahina, unsay tinuod niadtong nagapabiling “nahiusa uban” kang Kristo?

⁵ Ang pagkinabuhi ingong mga anak sa Diyos nagkahulogan usab sa pagbuhat sa matarong. (Basaha ang 1 Juan 3:4, 5.) “Ang tanan nga nagpakasala” “naglapas usab sa sugo” sumala sa panan-aw ni Jehova, kansang mga kasugoan gilapas sa makasasala. (Isaias 33:22; Santiago 4:12) Ang tanang “sala kalapasan sa sugo,” nakasala sa kasugoan sa Diyos. Ang pagpakasala sukwahi sa Kristohanong espiritu, ug kita mapasalamaton nga si Jesu-Kristo “gipadayag” ingong tawo “sa pagkuha sa atong mga kasal-anan.” Sanglit “diha kaniya wala ang kasal-anan,” siya nakahimo sa pagtanyag sa Diyos ug usa ka bug-os makatagbawng halad nga makatabon sa sala.​—Isaias 53:11, 12; Hebreohanon 7:26-28; 1 Pedro 2:22-25.

⁶ “Ang tanang nagapabilin diha kaniya [ang Anak] dili magapakasala.” (Basaha ang 1 Juan 3:6.) Sanglit dili-hingpit, makasala usahay kita. Apan ang pagpakasala dili batasan niadtong nagapabiling nahiusa diha sa Anak, ug busa, nahiusa sa Amahan. Ang mga tigpakasala wala “makakita” kang Jesus pinaagi sa mata sa pagtuo, ni ang naanad nang mga makasasalang apostata wala “makaila” ug magpabili kang Kristo ingong nagatabon sa sala nga “Kordero sa Diyos.”​—Juan 1:36.

7, 8. Sumala sa 1 Juan 3:7, 8, ang motuyo sa pagpakasala iya kang kinsa, apan ang Anak sa Diyos “gipadayag” nga nagahimog unsa niining bahina?

⁷ Si Juan mipasidaan batok sa pagpahisalaag. (Basaha ang 1 Juan 3:7, 8.) “Ayaw tugoting may mopahisalaag kaninyo,” miingon ang apostol, ug midugang: “Siya nga nagahimog pagkamatarong [pinaagi sa pagbantay sa sugo sa Diyos] maoy matarong, maingon nga siya [Jesu-Kristo] matarong.” Ang atong pagkamakasasala nakapugong kanato sa pagkahimong matarong sa samang sukod sa Dakong Sulondan. Apan pinaagi sa dili-takos nga kalulot ni Jehova, ang dinihogang mga sumusunod ni Jesus makapadayon na karon sa pagkinabuhi ingong mga anak sa Diyos.

⁸ Ang motuyo sa pagpakasala “iya sa Yawa,” nga nagpakasala “sukad pa sa sinugdan” sa iyang dalan sa pag-alsa batok kang Jehova. Apan ang Anak sa Diyos “gipadayag” aron sa “pagbungkag” sa “mga buhat” ni Satanas sa pagpalambo sa sala ug kadaotan. Naglakip kini sa pagwala sa mga epekto sa Adamikong kamatayon pinaagi sa pagtabon sa sala pinaagi ni Kristo ug sa pagbanhaw niadtong anaa sa Sheol (Hades), maingon man sa pagdugmok sa ulo ni Satanas. (Genesis 3:15; 1 Corinto 15:26) Kasamtangan, pasagdi nga kita, ang dinihogang nanghibilin ug ang “dakong panon,” magbantay batok sa pagpakasala ug sa pagkadili-matarong.

Bantayi ang Sugo sa Diyos

9. Sa unsang diwa nga ang tinuod nga Kristohanon “dili magahimog pagpakasala,” ug ngano man?

⁹ Sunod gipaila ni Juan ang kalainan tali sa mga anak sa Diyos ug sa Yawa. (Basaha ang 1 Juan 3:9-12.) Ang tanang “gipanganak gikan sa Diyos dili magahimog pagpakasala,” o himoon kini nga batasan. Ang “binhi,” ni Jehova kun balaang espiritu nga maoy mohatag sa usa ug “bag-ong pagkatawo” sa usa ka langitnong paglaom, magpabilin diha sa indibiduwal gawas kon siya mosupak ug sa ingon ‘magpasubo’ sa espiritu, busa kuhaon kini sa Diyos. (1 Pedro 1:3, 4, 18, 19, 23; Efeso 4:30) Aron makapabiling usa sa mga anak sa Diyos, ang inanak sa espiritu nga Kristohanon “dili magahimog pagpakasala.” Ingong usa ka “bag-ong linalang” uban sa “bag-ong personalidad,” siya makigbisog batok sa sala. Siya “nakalingawas na gikan sa pagkadunot nga anaa sa kalibotan pinaagi sa kailibgon,” ug wala diha sa iyang kasingkasing ang batasan sa pagbuhat ug daotan.​—2 Corinto 5:16, 17; Colosas 3:5-11; 2 Pedro 1:4.

10. Unsa ang usa ka paagi sa pag-ila sa mga anak sa Diyos ug sa mga anak sa Yawa?

¹⁰ Ang usa ka paagi sa pag-ila sa mga anak sa Diyos ug sa Yawa mao kini: “Ang bisan kinsa nga wala maghimog pagkamatarong dili iya sa Diyos.” Ang pagkadili-matarong maoy kinaiya sa mga anak sa Yawa nga sila “dili matulog gawas kon sila makabuhat ug daotan, ug ang ilang pagkatulog mawala gawas kon sila makapahulog sa uban,” nga maoy gitinguhang buhaton sa mga apostata ngadto sa maunongong mga Kristohanon.​—Proverbio 4:14-16.

11. (a) Unsa ang laing paagi sa pag-ila niadtong dili mga anak sa Diyos? (b) Mopalihok kanato sa pagbuhat ug unsa ang pagpalandong sa dalan ni Cain?

¹¹ Dugang pa, “dili siya [iya sa Diyos] nga wala maghigugma sa iyang igsoon.” Sa pagkatinuod, ang “mensahe” nga atong nadunggan “sukad pa sa sinugdan” sa atong mga kinabuhi ingong mga Saksi ni Jehova mao nga “kita kinahanglang maghigugmaay sa usag usa.” (Juan 13:34) Busa kita “dili sama kang Cain,” kinsa nagpakita nga siya “iya sa usa nga daotan” pinaagi sa ‘pagpatay sa iyang igsoon’ sa mabangis nga paagi nga maoy kinaiyahan sa mamumunong si Satanas. (Genesis 4:2-10; Juan 8:44) Gipatay ni Cain si Abel “tungod kay ang iyang kaugalingong mga binuhatan daotan, apan kadtong sa iyang igsoon matarong.” Siyempre, ang pagpalandong sa dalan ni Cain mopalihok kanato sa pagbantay batok sa samang pagdumot sa atong espirituwal nga mga igsoon.

Gugma “sa Buhat ug sa Kamatuoran”

12. Sa unsang paagi “kita nahibalo nga kita nakalabang sa kamatayon ngadto sa kinabuhi,” ug unsay kahulogan niini?

¹² Kon atong sundogon si Cain, patay kita sa espirituwal nga paagi. (Basaha ang 1 Juan 3:13-15.) Dako kaayo ang iyang pagdumot sa iyang igsoon nga tungod niadto iyang gipatay siya, ug dili kita mahibulong kon ang kalibotan nagadumot usab kanato, tungod kay gitagna na kini ni Jesus. (Marcos 13:13) Apan “kita nahibalo [o, masaligon nga] kita nakalabang na gikan sa [espirituwal] nga kamatayon ngadto sa kinabuhi [walay kataposan], tungod kay kita nagahigugma man sa mga igsoon,” ang atong isigka-saksi ni Jehova. Tungod ning inigsoong gugma, inubanan sa pagtuo kang Kristo, dili na kita ‘patay’ sa mga kalapasan ug mga kasal-anan, apan gituboy na kita sa Diyos gikan sa Iyang paghukom, ug kita gibanhaw gikan sa espirituwal nga kamatayon, nga gihatagag paglaom sa kinabuhing walay kataposan. (Juan 5:24; Efeso 2:1-7) Ang walay gugmang mga apostata wala niining paglaoma, kay “siya nga wala magahigugma nagpabilin pa gihapon sa [espirituwal] kamatayon.”

13. Kon magdumot kita sa atong igsoon, nganong angay nato kining iampo?

¹³ Sa pagkatinuod, “ang matag usa nga nagadumot sa iyang igsoon mamumuno.” Tingali walay pisikal nga pagpatay ang nahimo (sama sa pagpatay ni Cain kang Abel gumikan sa kasina ug pagdumot), apan nagatinguha ang tigdumot nga mamatay ang iyang espirituwal nga igsoon. Sanglit mabasa man ni Jehova ang kasingkasing, ang tigdumot pagahukman. (Proverbio 21:2; itandi ang Mateo 5:21, 22.) Walay dili-mahinulsolong “mamumuno,” o tigdumot sa isigkamagtutuo, ang “may kinabuhing walay kataposan nga magapabilin diha kaniya.” Busa kon may gidumtan kitang isigka-Saksi sa tago, dili ba angay nga mangayo kitag tabang ni Jehova sa pagbag-o sa atong espiritu nianang sa inigsoong gugma?

14. Sa unsa nga sukod nga kita gisugo sa pagpakitag inigsoong gugma?

¹⁴ Kon magapadayon kita sa pagkinabuhi ingong mga anak sa Diyos, kinahanglang magpakita kita ug inigsoong gugma sa pulong ug sa buhat. (Basaha ang 1 Juan 3:16-18.) Posible kini, kay “kita nakadangat sa pagkahibalo sa gugma, tungod kay kanang usa [Jesu-Kristo] mihalad sa iyang kalag [kun, “kinabuhi”] alang kanato.” Sanglit nakapakita si Jesus ug gugma nianang sukora, kita angay magpakitag samang may prinsipyong gugma (Grego, a·gaʹpe) sa isigkamagtutuo. Sa panahon sa paglutos, pananglitan, “kita may kaakohan sa paghalad sa atong mga kalag alang sa atong mga igsoon,” sama kang Prisca ug Aquila nga “nagpameligro sa ilang mga kinabuhi alang sa kalag” ni apostol Pablo.​—Roma 16:3, 4; Juan 15:12, 13.

15. Kon nanginahanglan ang usa ka igsoon ug atong nabatonan ang “kahinguhaan niining kalibotana aron mabuhi,” unsay gikinahanglan sa gugma kanato?

¹⁵ Kon atong ihatag ang atong mga kinabuhi alang sa atong mga igsoon, kinahanglan andam kita sa paghimog dili kaayo mabug-at nga mga butang alang kanila. Ingnon tang atong nabatonan “ang kahinguhaan niining kalibotana aron mabuhi”​—salapi, pagkaon, sapot, ug uban pa, nga gipaposible sa kalibotan. Tingali ‘nakita’ nato ang igsoon nga nanginahanglan, dili lamang pahapyaw nga nakakita niini kondili nakapaniid sa situwasyon. Ang iyang kahimtang tingali maoy mopabukas sa “pultahan” sa atong “malumong pagbati,” ug dulot nga kaluoy. Apan komusta kon atong sirhan kanang “pultahana” pinaagi sa pagtugot sa pagkadalo sa pagsanta sa atong tinguha sa pagtabang kaniya? Nan “sa unsang paagi ang gugma sa Diyos” magapabilin kanato? Dili igo ang paghisgot lamang sa inigsoong gugma. Ingong mga anak sa Diyos, kinahanglang atong ipakita kana “sa buhat ug sa kamatuoran.” Pananglitan, kon gigutom ang igsoon, siya nagkinahanglan ug pagkaon, dili mga pulong lamang.​—Santiago 2:14-17.

Mga Kasingkasing nga Dili Maghukom Kanato

16. (a) Sa unsang paagi ang Diyos “mas dako kay sa atong mga kasingkasing”? (b) Sumala kang Juan, nganong tubagon ni Jehova ang atong mga pag-ampo?

¹⁶ Sunod gipunting ni Juan ang mga pasalig nga kita mga anak ni Jehova. (Basaha ang 1 Juan 3:19-24.) “Kita nahibalo nga kita iya sa kamatuoran” ug dili mga biktima sa paglimbong sa mga apostata “pinaagi niini”​—ang kamatuoran nga kita nagapakitag inigsoong gugma. Busa kita “nagapasalig sa atong mga kasingkasing” atubangan sa Diyos. (Salmo 119:11) Kon hukman kita sa atong mga kasingkasing, tungod kini kay atong gibati nga wala kita makapakita sa atong isigkamagsisimba ug igong gugma, hinumdomi nga ang “Diyos mas dako kay sa atong mga kasingkasing ug nahibalo sa tanang butang.” Maluloy-on siya tungod kay nahibalo siya sa atong “dili salingkapaw inigsoong pagbati,” sa atong pakig-away batok sa sala, ug sa atong mga paningkamot sa pagkinabuhi sa paagi nga kahimut-an niya. (1 Pedro 1:22; Salmo 103:10-14) “Kon ang atong mga kasingkasing dili magahukom kanato” tungod kay adunay mga binuhatan nga nagapamatuod sa atong inigsoong gugma, ug dili kita sad-an sa tagong mga kasal-anan, “kita may kagawasan sa pagsulti atubangan sa Diyos” diha sa pag-ampo. (Salmo 19:12) Ug siya motubag sa atong mga pag-ampo “tungod kay atong ginasunod ang iyang mga sugo ug nagabuhat sa mga butang nga kahimut-anan sa iyang mga mata.”

17. Ang “sugo” sa Diyos nagkinahanglan sa unsang duha ka kinahanglanon?

¹⁷ Kon nagalaom kita nga matubag ang atong mga pag-ampo, kinahanglang bantayan nato ang “sugo” sa Diyos may labot ning duha ka kinahanglanon: (1) Kinahanglang may pagtuo kita sa “ngalan” ni Jesus, sa pagdawat sa lukat ug sa pag-ila sa hinatag sa Diyos nga awtoridad. (Filipos 2:9-11) (2) Kinahanglang kita “maghigugmaay sa usag usa” sama sa gisugo ni Jesus. (Juan 15:12, 17) Siyempre, ang tanang may pagtuo sa ngalan ni Kristo kinahanglang magahigugma sa tanan nga nagapakita sa maong pagtuo.

18. Sa unsang paagi kita nahibalo nga si Jehova “nagapabiling nahiusa uban kanato”?

¹⁸ Ang tawong nagasunod sa mga sugo sa Diyos “nagapabilin nga nahiusa uban kaniya,” nahiusa uban kang Jehova. (Itandi sa Juan 17:20, 21.) Apan sa unsang paagi “kita makabaton sa kahibalo” nga ang Diyos “nagapabiling nahiusa uban kanato”? Mahibaloan nato kini “pinaagi sa [balaang] espiritu nga iyang gihatag kanato.” Ang pagkabaton sa balaang espiritu sa Diyos ug sa katakos sa pagpakita sa bunga niini lakip sa inigsoong gugma, nagapamatuod nga kita nahiusa uban kang Jehova.​—Galacia 5:22, 23.

Pagbantay!

19, 20. Nganong “sutaon ang dinasig nga mga pahayag,” ug unsang tabang ang gitagana ni Juan ning bahina?

¹⁹ Sunod gipakita ni Juan kon unsaon nato sa pagbantay. (Basaha ang 1 Juan 4:1.) Dili nato tuohan ang tanang espiritu, kun “dinasig nga pahayag,” apan kinahanglang “sutaon ang dinasig nga mga pahayag kon sila ba iya sa Diyos.” Ngano? “Tungod kay daghang mini nga mga propeta ang nanagpanungha sa kalibotan.” Labing menos ang pipila niining malimbongong mga magtutudlo nagapanuroy, nakig-uban sa nagkalainlaing mga kongregasyon, ug naningkamot sa “pagpamirag mga tinun-an ngadto kanila.” (Buhat 20:29, 30; 2 Juan 7) Busa ang matinumanon kinahanglang magbantay.

²⁰ Ang ubang unang siglong mga Kristohanon may “katakos sa pag-ila sa dinasig nga mga pahayag,” nga usa ka milagrosong gasa sa aktibong gahom sa Diyos nga nakahimo kanila sa pagsuta kon ang dinasig nga mga pahayag iya ba ni Jehova. (1 Corinto 12:4, 10) Apan ang pasidaan ni Juan daw aplikado sa mga Kristohanon sa kinatibuk-an ug makatabang karon kon ang mga apostata mosulay sa pagpukan sa pagtuo sa mga Saksi ni Jehova. Bisag ang espiritu sa gasa sa ‘pag-ila sa dinasig nga mga pahayag’ wala na, ang mga pulong ni Juan nagtaganag paagi sa pagtino kon ang mga magtutudlo napalihok ba sa espiritu sa Diyos o sa impulwensiya ni Satanas.

21. Unsa ang usa ka paagi sa pagsuta sa “dinasig nga mga pahayag”?

²¹ Matikdi ang usa ka paagi sa pagsuta. (Basaha ang 1 Juan 4:2, 3.) “Ang tanang dinasig nga pahayag nga nagaila kang Jesu-Kristo nga mianhi sa unod iya sa Diyos.” Kita midawat nga nabuhi niadto si Jesus ingong tawo ug Anak sa Diyos, ug ang atong pagtuo nagpalihok kanato sa pagtudlo sa uban niining kamatuorana. (Mateo 3:16, 17; 17:5; 20:28; 28:19, 20) “Apan ang tanang dinasig nga pahayag nga wala magaila kang Jesus dili iya sa Diyos.” Hinunoa, “kini sila mao ang dinasig nga pahayag sa anti-kristo” nga nagabatok kang Kristo ug nagabatok sa Kasulatanhong mga pagtulon-an bahin kaniya. Sa dayag, si Juan ug ang ubang mga apostoles mipasidaan nga “ang dinasig nga pahayag sa anti-kristo” mianhi. (2 Corinto 11:3, 4; 2 Pedro 2:1) Sanglit nahimong hulga niadto ang bakak mga magtutudlo sa tinuod nga mga Kristohanon, si apostol Juan nakaingon, “Kini siya ania na sa kalibotan.”

22. Unsa ang laing paagi sa pagsuta sa “dinasig nga mga pahayag”?

²² Laing paagi sa pagsuta sa “dinasig nga mga pahayag” mao ang pagtan-aw kon kinsa ang nagapamati kanila. (Basaha ang 1 Juan 4:4-6.) Ingong mga alagad ni Jehova, atong “nadaog,” kun nabuntog, ang bakak nga mga magtutudlo, nagamadaogon batok sa ilang mga pagsulay sa pagpahilayo kanato gikan sa kamatuoran sa Diyos. Kining espirituwal nga kadaogan napaposible tungod kay ang Diyos, nga “nahiusa uban” sa maunongong mga Kristohanon, “mas dako kay kaniya [ang Yawa] nga nahiusa uban sa kalibotan,” o sa dili matarong tawhanong katilingban. (2 Corinto 4:4) Sanglit ang mga apostata “iya sa kalibotan” ug nakabaton sa daotang espiritu niini, “ang ilang ginasulti iya sa kalibotan ug ang kalibotan nagapatalinghog kanila.” Sanglit atong nabatonan ang espiritu ni Jehova, kita makamatikod sa dili-espirituwal nga kinaiyahan sa ilang “dinasig nga mga pahayag” ug busa mosalikway kanila.

23. Kinsa ang mopatalinghog kanato ug moila nga kita gitultolan sa espiritu sa Diyos?

²³ Apan kita nahibalo nga “kita iya sa Diyos” tungod kay “siya nga nakabaton sa kahibalo sa Diyos nagapatalinghog kanato.” (Itandi sa Juan 10:4, 5, 16, 26, 27.) Siyempre, “siya nga dili iya sa Diyos dili magpatalinghog kanato.” Ang mini nga mga propeta, kun mga magtutudlo, wala magpatalinghog kang Juan o sa uban nga ‘iya sa Diyos’ ug mihatag ug maayong espirituwal nga instruksiyon. Busa “pinaagi niini maila nato ang dinasig nga pahayag sa kamatuoran ug ang dinasig nga pahayag sa kasaypanan.” Kita nga sakop sa pamilya sa mga magsisimba ni Jehova nagasulti sa “putli nga pinulongan” sa Kasulatanhong kamatuoran nga gitagana pinaagi sa organisasyon sa Diyos. (Sofonias 3:9) Ug ang atong ipamulong, tataw diha sa mga karnerohon nga kita gitultolan sa balaang espiritu sa Diyos.

24. Unsay sunod nga ipadayag ni Juan?

²⁴ Niining puntoha, nakahatag si Juan sa pangunang mga kinahanglanon nga atong kab-oton kon buot kitang magpadayon sa pagkinabuhi ingong mga anak sa Diyos. Iyang ipadayag sa sunod kon nganong ipakita nato sa tanang panahon ang gugma ug pagtuo.

Unsay Imong Tubag?

◻ Sa unsang paagi ang ubang mga tawo gihimong “mga anak sa Diyos”?

◻ Sa unsang paagi atong maila ang mga anak sa Diyos ug ang mga anak sa Yawa?

◻ Mopalihok kanato sa pagbuhat ug unsa ang pagpalandong sa dalan ni Cain?

◻ Sa unsang sukod nga atong ipakita ang inigsoong gugma?

◻ Sa unsang paagi masuta ang “dinasig nga mga pahayag”?

[Hulagway sa panid 18]

Ang pagpalandong sa dalan ni Cain mopalihok kanato sa pagbantay batok sa pagdumot sa atong mga igsoon

[Hulagway sa panid 20]

Ang mga magsisimba ni Jehova nagasulti sa “putli nga pinulongan” sa Kasulatanhong kamatuoran nga gitagana sa organisasyon sa Diyos