Sila Misanong nga Di-Mahakogon sa Gugma sa Diyos
“Oh nga magpasalamat unta ang mga tawo kang Jehova tungod sa iyang mahigugmaong-kalulot ug tungod sa iyang katingalahang mga buhat alang sa mga anak sa mga tawo.”—SALMO 107:8.
1. Giunsa sa pagpasiugda ni apostol Juan ang hiyas sa gugma diha sa una niyang sulat?
“ANG Diyos gugma.” Pagkapunog kahulogan kanang mga pulonga! Dili katingalahan nga mibati si apostol Juan nga kinahanglang sublion kana diha sa iyang unang sulat. (1 Juan 4:8, 16) Dili lamang nga si Jehova nga Diyos gugma apan siya usab mao ang kahugpongan, o personipikasyon, sa gugma.
2. Sa unsang mga paagi gipasundayag sa Diyos ang gugma sa paglalang sa lalaki ug babaye ug sa pagtagana alang kanila?
2 Palandonga ang gugma nga gipasundayag sa Diyos sa paagi sa iyang paglalang kanato. Tukma kaayo ang mapabilhon nga mga pulong ni David. Ingong usa ka dinasig nga salmista, siya miingon: “Pagadayegon ko ikaw tungod kay sa makalilisang nga paagi ako kahibulongang pagkabuhat.” (Salmo 139:14) Aron kita mabuhing mahimsog ug malipayon, gipaposible sa Diyos ang di-matapos nga mga butang makapahimuot kanato pinaagi sa atong lima ka sentido—panan-aw, pandungog, panilaw, panimhot, ug pagbati. Pagkatalagsaon ang katahom nga makita nato diha sa kalalangan sa atong palibot! Kahibulongan kaayo ang daghan ug sarisaring mga tanom ug mga hayop, nga dili na hisgotan ang katahoman sa tawhanong mga lawas ug mga hitsura! Gipahinabo usab sa Diyos nga kita makabaton sa labing kahimut-anan lainlaing prutas, utanon, ug ubang pagkaon. (Salmo 104:13-16) Nga may maayong katarongan, si apostol Pablo nagpahinumdom sa mga molupyo sa karaang Listra nga ang Diyos “nagbuhat ug maayo, nga naghatag kaninyo sa mga ulan gikan sa langit ug sa mabungahong mga panahon, nga nagtagbaw sa inyong mga kasingkasing pinaagi sa pagkaon ug kasadya.”—Buhat 14:17.
3. Unsang kahibulongang mga katakos ang gihatag sa Diyos kanato?
3 Hunahunaa usab ang tanang panalangin nga langkit sa malipayong pamilyahanong kinabuhi. Labaw pa niana, palandonga ang tanang mga kalipayan nga mahimo natong kapahimuslan tungod sa atong mental ug emosyonal nga mga katakos: handurawan, gahom sa pangatarongan, memorya, konsensiya, ug ilabina ang katakos sa pagsimba—nga kanang tanan nagabutang kanato nga labaw kaayo kay sa mga hayop; ni hikalimtan nato ang mga kalipay nga ikahatag kanato sa musika. Kini sila ug ang daghang ubang gasa maoy mga pasundayag sa gugma sa Diyos kanato.
4. Unsang mga pasundayag sa gugma sa Diyos ang nasinati sa mga tawo sukad sa paglapas sa ilang unang mga ginikanan?
4 Walay pagduhaduha nga natagamtam ni Adan ug Eva ang daghan kaayong kalipayan diha sa ilang hingpit nga kahimtang didto sa tanaman sa Eden. (Genesis 2:7-9, 22, 23) Apan sa dihang napakyas sila sa pagsanong nga di-mahakogon sa tanang ebidensiya sa balaang gugma nga ilang gipahimuslan, ang Diyos misalikway ba sa tawhanong banay? Wala gayod! Gihimo dayon niya ang tagana aron sa pagtul-id sa tanang kadaotan nga misangpot sa paglapas sa atong unang mga ginikanan. (Genesis 3:15) Gipasundayag usab ni Jehova ang gugma pinaagi sa mapailobong pag-antos sa dili-hingpit nga mga kaliwat ni Adan. (Roma 5:12) Sa unsang gidugayon? Aw, sulod na sa mga 6,000 ka tuig hangtod karon! Ang Diyos nagpasundayag ilabina sa gugma diha sa pagpakiglabot sa iyang mga alagad. Matuod ang mga pulong: “Jehova, Jehova, usa ka Diyos nga maluluy-on ug mapuangoron, hinay sa kasuko ug dagaya sa mahigugmaong-kalulot ug kamatuoran, nga nagatipig sa mahigugmaong-kalulot alang sa linibo, nga nagapasaylo sa sayop ug kalapasan ug sala.”—Exodo 34:6, 7.
5. Giunsa pagpakita ni Jehova ang mahigugmaong pailob sa pagpakiglabot sa nasod sa Israel?
5 Oo, dako gayod ang pailob nga gipakita ni Jehova nga Diyos sa iyang mga pakiglabot sa mga Israelinhon sukad pa sa panahong iyang gipatungha sila ingong usa ka nasod sa tiilan sa Bukid Sinai hangtod nga tungod sa ilang pagkasukihan napugos siya sa pagsalikway kanila sa bug-os. Sumala sa atong mabasa sa 2 Cronicas 36:15, 16: “Si Jehova ang Diyos sa ilang mga katigulangan nagpadayon sa pagpadala batok kanila pinaagi sa iyang mga sinugo, nga balikbalik nga nagpadala, tungod kay siya gibatig kaluoy sa iyang katawhan ug sa iyang puluy-anan. Apan sila nagpadayon sa pagbiaybiay sa mga sinugo sa matuod nga Diyos ug nagtamay sa iyang mga pulong ug nagyagayaga sa iyang mga manalagna, hangtod nga ang kapungot ni Jehova misilaob batok sa iyang katawhan, hangtod nga wala nay pagkaayo.” Apan dihay misanong nga di-mahakogon sa gugma ni Jehova nga Diyos. Sa pagtan-aw kon giunsa nila paghimo niana, susihon nato karon ang mga kinabuhi sa pipila sa maong mga indibiduwal. Kini magpahimutang sa patukoranan sa pagpakita kon sa unsang paagi kita mismo makasanong sa gugma ni Jehova sa praktikal kaayong mga paagi.
Kon sa Unsang Paagi Misanong nga Di-mahakogon si Moises
6. Sa unsang mga paagi talagsaon ang panig-ingnan ni Moises, ug sa unsang mga kapasidad iyang nasinati ang gugma sa Diyos?
6 Si Moises usa ka talagsaong panig-ingnan sa usa ka tawo nga misanong nga di-mahakogon sa gugma sa Diyos. Pagkatagsaon sa kahigayonan nga gibutang sa atubangan ni Moises ingong sinagop nga anak sa anak babaye ni Paraon! Apan gipalabi niyang “pagadagmalan uban sa katawhan sa Diyos inay magakalipay nga umalagi sa sala, tungod kay iyang gitamod ang kaulawan ni Kristo ingong bahanding labaw pa kay sa mga bahandi sa Ehipto.” (Hebreohanon 11:25, 26) Sa usa ka panahon buot ni Moises nga luwason ang iyang kaigsoonan, ang mga Israelinhon, gikan sa kaulipnan sa Ehipto. Apan wala sila magpabili sa iyang mga paningkamot, ni kadto mao ang gitakdang panahon sa Diyos aron sa pagluwas kanila. (Buhat 7:23-29) Tinagpulo ka katuigan sa ulahi, hinunoa, tungod sa pagtuo ug di-mahakogong tinguha ni Moises sa pagtabang sa iyang mga igsoon, gihatagan siyag gahom ni Jehova sa paghimog daghang milagro ug sa pag-alagad sa mga Israelinhon sulod sa 40 ka tuig ingong Iyang manalagna, maghuhukom, maghahatag-balaod, ug tigpataliwala. Sa maong mga katungdanan, nasinati ni Moises ang daghang higayon sa gugma ni Jehova alang kaniya ug sa iyang isigka-Israelinhon.
7. Sa unsang paagi misanong si Moises sa mga ekspresyon sa gugma sa Diyos?
7 Sa unsang paagi misanong si Moises sa gugma ug dili-takos nga kalulot? Iya bang ‘gidawat ang dili-takos nga kalulot ni Jehova ug gisayloan ang katuyoan niini’? (2 Corinto 6:1) Wala gayod! Si Moises misanong nga di-mahakogon sa mga ekspresyon sa gugma ni Jehova kaniya pinaagi sa pagkabug-os mahiligon sa Diyos. Sa tanang panahon misalig siya kang Jehova ug nakabatog suod nga relasyon uban sa iyang Magbubuhat. Pagkadako sa pagdayeg sa Diyos kang Moises sa gibadlong si Aaron ug Miriam tungod sa pagsaway sa ilang igsoon! Oo, si Jehova nakigsulti “baba sa baba” kang Moises ug nagtugot nga siya makakita sa “dagway ni Jehova.” (Numeros 12:6-8) Bisan pa sa daghang pribilehiyo ni Moises, siya nagpadayon nga labing maaghop sa mga tawo ug nagtuman sa mga sugo ni Jehova “sumala gayod niana.”—Exodo 40:16; Numeros 12:3.
8. Giunsa pagpakita ni Moises nga siya tinuod nga mahiligon sa Diyos?
8 Si Moises nagpakita usab nga siya sa di-mahakogon mahiligon sa Diyos pinaagi sa kabalaka nga iyang gipakita alang sa ngalan, dungog, ug maputling pagsimba ni Jehova. Busa, sa duha ka okasyon si Moises mihangyo nga malamposon kang Jehova nga ihatag ang kaluoy ngadto sa Israel kay nalangkit ang ngalan sa Diyos. (Exodo 32:11-14; Numeros 14:13-19) Sa dihang ang mga Israelinhon nalangkit sa idolatrosong pagsimba sa baka, gipasundayag ni Moises ang kasibot alang sa maputling pagsimba pinaagi sa pagpatugbaw: “Kinsay dapig kang Jehova? Ngari kanako!” Human niadto, si Moises ug kadtong uban kaniya nagpatay sa 3,000 nga mga tigsimbag diyosdiyos. Dayon, sulod sa 40 ka tuig giantos niya ang tigreklamo ug rebelyosong katawhan. Sa walay duhaduha si Moises misanong nga di-mahakogon sa mga ekspresyon sa gugma sa Diyos, nga naghatag ug maayong panig-ingnan alang kanato karong adlawa.—Exodo 32:26-28; Deuteronomio 34:7, 10-12.
Maayong Sanong ni David
9. (a) Sa unsang paagi misanong si David sa gugma ni Jehova nga Diyos? (b) Sama kang David, sa unsang paagi makapasidungog kita kang Jehova pinaagi sa bililhong mga butang?
9 Ang laing iladong tawo sa Bibliya nga mihatag ug maayong panig-ingnan sa di-mahakogong pagsanong sa gugma sa Diyos mao ang salmistang si David, ang ikaduhang hari sa Israel. Ang iyang kadasig alang sa ngalan ni Jehova nagtukmod niya sa pagpakiggubat sa matamayong Pilistehanong higante si Goliat, nga batok kaniya gihatag sa Diyos kang David ang kadaogan. (1 Samuel 17:45-51) Kanang samang kadasig nagtukmod kang David sa pagdala sa arka sa tugon ngadto sa Jerusalem. (2 Samuel 6:12-19) Ug dili ba ang tinguha ni David sa pagtukod ug templo kang Jehova laing ekspresyon sa iyang kadasig ug pagpabili sa gugma ug pagkamaayo sa Diyos? Siyempre mao gayod. Ang pagkagihikawan sa maong pribilehiyo wala magpugong kang David sa pagpangandam alang sa proyekto ug pagpasidungog kang Jehova pinaagi sa pag-amot sa personal sa bulawan, salapi, ug mahal nga mga bato nga dako kaayog bili. (2 Samuel 7:1-13; 1 Cronicas 29:2-5) Ang susamang di-mahakogong sanong sa gugma sa Diyos angay magdasig kanato nga ‘pasidunggan si Jehova pinaagi sa atong mahal nga mga butang’ pinaagi sa paggamit sa atong materyal nga katigayonan sa pagpauswag sa intereses sa Gingharian.—Proverbio 3:9, 10; Mateo 6:33.
10. Sa unsang bahin ang dalan ni David takos sundogon?
10 Bisan pag si David nakahimog seryosong mga sala, sa tibuok niyang kinabuhi siya mipamatuod nga ‘usa ka tawo nga giuyonan sa kasingkasing ni Jehova.’ (1 Samuel 13:14; Buhat 13:22) Ang iyang mga salmo napuno sa mga ekspresyon sa pagpabili sa gugma sa Diyos. Ang The International Standard Bible Encyclopædia nagaingon nga si David “midagaya sa labaw ug labaw nga pagkamapasalamaton kay ni bisan kinsa nga gihisgotan diha sa Balaang Kasulatan.” Ang salmistang si Asap miingon nga ang Diyos “nagpili kang David nga iyang alagad ug nagkuha kaniya gikan sa mga toril sa mga karnero. . . . Iya siyang gikuha aron mahimong magbalantay ibabaw kang Jacob nga iyang katawhan ug sa Israel nga iyang panulondon. Ug siya nagbantay kanila sumala sa katul-id sa iyang kasingkasing.” (Salmo 78:70-72) Sa pagkamatuod, ang dalan ni David angay nga atong sundogon.
Si Jesu-Kristo, Atong Hingpit nga Sulundan
11, 12. Giunsa pagpakita ni Jesus nga siya tinuod nga mahiligon sa Diyos?
11 Hinuon, si Jesu-Kristo mao ang labing maayong Kasulatanhong panig-ingnan sa usa ka tawo nga misanong nga di-mahakogon sa gugma sa Diyos. Si Jesus gidasig niini sa pagbuhat sa unsa? Nahauna, siya nadasig sa paghatag kang Jehova ug linaing debosyon. Walay duhaduha nga si Jesus mahiligon sa Diyos sa kabug-osan. Ang pagpabili sa gugma ug pagkamaayo sa iyang langitnong Amahan nagdasig niya nga mahimong espirituwal gayod nga tawo. Siya may suod, sandurot nga relasyon uban sa Diyos. Si Jesus usa ka tawo sa pag-ampo, ug gusto niyang makigsulti sa iyang langitnong Amahan. Matag karon ug unya, atong mabasa nga si Kristo nag-ampo. Sa usa ka okasyon gigugol niya ang tibuok gabii sa pag-ampo. (Lucas 3:21, 22; 6:12; 11:1; Juan 17:1-26) Ingong sanong sa gugma sa Diyos, gisunod ni Jesus diha sa kinabuhi ang kamatuoran nga ‘ang tawo dili lamang mabuhi sa tinapay kondili sa matag pulong nga nagagula sa baba ni Jehova.’ Sa pagkamatuod, ang pagbuhat sa kabubut-on sa iyang Amahan maoy pagkaon alang kaniya. (Mateo 4:4; Juan 4:34) Dili ba angay nga mosanong kita sa susama sa gugma sa Diyos, nga ihatag kaniya ang linain nga debosyon?
12 Sa pagsanong nga di-mahakogon sa gugma sa Diyos, si Jesu-Kristo kanunayng nagtumong sa pagtagad sa iyang Diyos ug Amahan. Sa dihang may mitawag kang Jesus nga “Maayong Magtutudlo,” siya mitutol ug miingon: “Walay maayo gawas sa usa, ang Diyos.” (Lucas 18:18, 19) Balikbalik nga gipasiugda ni Jesus nga siya walay mabuhat sa iyang kaugalingong pagbuot. Walay higayon nga iyang gisayloan sa pagbayaw sa ngalan sa iyang Amahan, ug labing haom niyang gisugdan ang iyang sulundang pag-ampo sa hangyo: “Balaana ang imong ngalan.” Siya miampo: “Amahan, himayaa ang imong ngalan. Ug sa dayon na siyang mamatay, si Kristo miingon ngadto sa iyang Amahan: “Gihimaya ko ikaw sa yuta, sanglit natapos na ang buluhaton nga imong gihatag kanako nga buhaton.” (Mateo 6:9; Juan 12:28; 17:4) Sa pagkamatuod, ingon nga sanong sa gugma sa Diyos, angay nga atong tinguhaon ang paghimaya kang Jehova, nga magaampo nga mabalaan ang iyang balaang ngalan.
13. Sa unsang paagi ang gugma sa Diyos nagdasig kang Jesus sa paglihok?
13 Karon, matikdi palihog ang ikaduhang paagi diin ang di-mahakogong sanong sa gugma sa Diyos midasig kang Jesus. Kini nagpahinabo nga iyang gihigugma ang pagkamatarong ug gidumtan ang pagkadaotan, sumala sa gitagna sa Salmo 45:7. (Hebreohanon 1:9) Siya maoy “maunongon, walay limbong, walay lama, linain gikan sa mga makasasala.” (Hebreohanon 7:26) Gihagit ni Jesus ang iyang daotag-tuyo nga mga magsusupak sa pagpakasala kaniya, apan sila wala makahimo niana. (Juan 8:46) Sa duha ka okasyon, ang iyang pagdumot sa pagkadaotan nagpahinabo nga iyang gihinloan ang templo sa mahakogong mga relihiyonista. (Mateo 21:12, 13; Juan 2:13-17) Ug pagkasakit nga gisaway ni Jesus ang salingkapawng relihiyosong mga pangulo, nga giingnan pa sila nga sila iya sa Yawa!—Mateo 6:2, 5, 16; 15:7-9; 23:13-32; Juan 8:44.
14. Sa pagsanong sa gugma ni Jehova, giunsa ni Jesus pagpakiglabot sa iyang mga tinun-an?
14 Ang lain pang paagi diin ang gugma ni Jehova nagdasig kang Jesus makita sa iyang mga pakiglabot uban sa iyang mga apostol ug ubang disipulo. Pagkamahigugmaon, pagkamapailobon, ug pagkahataas sa iyang pailob uban kanila! Grabe gayod ang ilang pagsulay kaniya tungod sa ilang panag-indig, nga naglalisay pa hangtod sa gabii mismo sa pagbudhi kaniya mahitungod sa kon kinsay labing dako. (Lucas 22:24-27) Bisan pa niana, kanunay gipakita ni Jesus nga siya malumo ug mapaubsanon sa kasingkasing. (Mateo 11:28-30) Tinuod, si Judas nagbudhi kang Jesus, si Pedro naglimod niya sa tulo ka beses, ug ang ubang apostoles nangalagiw sa dihang miabot ang magubtanong panon aron sa pagdakop kaniya. Apan siya wala gayod magmayugtanon. Giunsa nato pagkahibalo? Aw, sa pagpakig-uban na usab sa mga apostol tapos sa iyang pagkabanhaw, si Jesus wala mangasaba kanila tungod kay nagpadaog sa kahadlok. Hinunoa, iya silang gilipay ug gipalig-on alang sa dugang pag-alagad sa Gingharian.—Juan 20:19-23.
15. Giunsa ni Jesus pag-alagad nga di-mahakogon sa pisikal nga mga panginahanglan sa katawhan?
15 Atong tagdon ang lain pang paagi diin si Jesu-Kristo misanong nga di-mahakogon sa gugma sa Diyos. Gihimo niya kana pinaagi sa pagsakripisyo sa iyang kaugalingon alang sa uban, hangtod sa makauulaw ug masakit nga kamatayon diha sa usa ka kahoy sa pagsakit. (Filipos 2:5-8) Si Jesus mialagad sa pisikal nga mga panginahanglan sa katawhan pinaagi sa pagpakaon sa panonpanon ug paghimog daghang pagpanambal. (Mateo 14:14-22; 15:32-39) Gibutang niya sa kanunay ang intereses sa uban nga una kay sa iyaha. Kana ang hinungdang siya nakaingon: “Ang mga lobo dunay mga lungib ug ang mga langgam sa langit dunay mga batoganan, apan ang Anak sa tawo walay kapaurarayan sa iyang ulo.” (Mateo 8:20) Si Jesus sensitibo sa paglihok sa espiritu sa Diyos samtang kini migula gikan kaniya diha sa paghimog mga milagro. Apan wala gayod siya mosulay sa pagpanapi gikan sa paggamit nianang labaw-tawhanong gahom, sama sa dihang ang usa ka babaye nga naghinugo sa 12 ka tuig mihikap sa iyang biste diha sa pagtuo ug naayo. (Marcos 5:25-34) Dugang pa, wala gayod gamita ni Jesus ang labaw-tawhanong mga gahom alang sa iyang kaugalingon.—Itandi ang Mateo 4:2-4.
16. Sa unsang mga paagi si Kristo mialagad sa espirituwal nga panginahanglan sa katawhan?
16 Bisan pag si Jesus nag-atiman nga di-mahakogon sa pisikal nga mga panginahanglan sa katawhan pinaagi sa pag-ayo sa ilang mga sakit ug pagpakaon kanila sa milagrosong paagi, ang pangunang motibo sa iyang ministeryo sa yuta mao ang pagwali sa maayong balita sa Gingharian, sa pagtudlo, ug paghimog mga tinun-an. Bisan pa sa tanang kahibulongang pagtambal nga iyang gihimo, siya wala hiilhi nga Dakong Mananambal o Tigmilagro kondili ingong Maayong Magtutudlo. (Mateo 4:23, 24; Marcos 10:17) Si Jesus nagtumong sa iyang kaugalingon nga Magtutudlo, maingon man ang iyang mga tinun-an ug bisan ang iyang mga kaaway. (Mateo 22:16; 26:18; Marcos 9:38) Ug pagkatalagsaon ang mga kamatuoran nga iyang gitudlo, sama sa anaa sa iyang Wali sa Bukid! (Mateo 5:1–7:29) Pagkahaom ang iyang mga ilustrasyon, ug makapahingangha gayod ang iyang matagnaong mga sambingay ug ubang mga tagna! Dili katingad-ang ang mga sundalo nga gisugo sa pagdakop kang Jesus sa usa ka okasyon wala makahimo sa pagdakop kaniya!—Juan 7:45, 46.
17. (a) Giunsa ni Jesus pagtagana kanato ug hingpit nga sumbanan sa gugma? (b) Unsay pagahisgotan sa sunod nga artikulo?
17 Walay pagduhaduha, gihatag kanato ni Jesu-Kristo ang hingpit nga panig-ingnan sa pagsanong nga di-mahakogon sa mga pagpadayag sa Diyos sa gugma nganhi kanato. Gihatag ni Jesus sa iyang langitnong Amahan ang unang dapit sa iyang kinabuhi ug mga pagbati. Iya gayong gihigugma ang pagkamatarong, nga mahigugmaon diha sa pagpakiglabot uban sa iyang mga apostoles ug sa ubang mga tinun-an, ug ang iyang kinabuhi gigugol nga nag-alagad sa espirituwal ug materyal nga mga panginahanglan sa katawhan. Sa kataposan, gitapos nga madungganon ni Jesus ang iyang ministeryo pinaagi sa paghatag sa iyang kinabuhi ingong usa ka lukat. (Mateo 20:28) Apan komosta man kita? Tinuod, kita dili hingpit, sama ra kang Moises ug David. Bisan pa niana, sumala sa ipadayag sa sunod nga artikulo, adunay praktikal nga mga paagi diin kita makasundog sa atong Sulundan sa pagsanong nga di-mahakogon sa mga pagpadayag sa gugma sa Diyos.
Unsay Imong Tubag?
◻ Nganong ikaingon nga “ang Diyos gugma”?
◻ Sa unsang paagi misanong si Moises sa mga pasundayag sa gugma sa Diyos?
◻ Sa unsang mga paagi si David misanong sa gugma ni Jehova nga Diyos?
◻ Unsang panig-ingnan ang gihatag ni Jesu-Kristo sa pagsanong ngadto sa gugma sa Diyos?
[Hulagway sa panid 10]
Nasayod ka ba sa unsang paagi misanong si Moises sa gugma sa Diyos?
[Mga hulagway sa panid 12, 13]
Si Jesus misanong sa gugma sa Diyos pinaagi sa pagtabang sa uban sa espirituwal ug pisikal nga paagi ug paghatag sa iyang kinabuhi ingong lukat