KORE

[lagmit, Upaw; Pagkaupaw].

1. Usa sa tulo ka anak nga lalaki ni Esau pinaagi sa iyang Hivihanong asawa nga si Oholibama; natawo sa Canaan sa wala pa moadto si Esau sa bukirong rehiyon sa Seir. (Gen 36:​2, 5-8, 14; 1Cr 1:35) Si Kore maoy usa ka sultan sa yuta sa Edom.​—Gen 36:18.

Ang usa ka “sultan Kore” gitala sa Genesis 36:16 ingong anak nga lalaki ni Elipaz ug apo ni Esau. Apan, ang maong ngalan dili makita taliwala sa mga kaliwat ni Elipaz sa Genesis 36:​11, 12 o sa 1 Cronicas 1:36. Ang Samarianhong Pentateuch wala mogamit sa maong ngalan diha sa Genesis 36:​16, ug ang ubang mga eskolar nag-ingon nga ang paglutaw niini diha sa Masoretikong teksto tingali maoy sayop sa usa ka magkokopya.

2. Usa sa mga anak nga lalaki ni Hebron sa tribo ni Juda.​—1Cr 2:43.

3. Usa ka Kohatnong Levihanon sa banay ni Izar. (Ex 6:​16, 18, 21; 1Cr 6:​1, 2, 22 [ang Aminadab tingali maoy laing ngalan ni Izar.]) Sa panaw sa Israel sa kamingawan, si Kore mirebelde batok sa awtoridad ni Moises ug Aaron, nagbuhat niana nga kakunsabo ang mga Rubenhon nga si Datan, Abiram, ug On, maingon man ang 250 ka “mga pangulo sa katigoman” o “mga tawong bantogan.” (Num 16:​1, 2) Sila nakiglalis nga “ang tibuok katigoman balaan ang tanan ug si Jehova anaa sa ilang taliwala,” nga nangutana, “Nan, nganong gibayaw ninyo ang inyong kaugalingon nga labaw sa kongregasyon ni Jehova?” (Num 16:3-11) Si Moises sa ulahi nagpatawag kang Datan ug Abiram, apan sila wala moadto, nga naghunahuna nga si Moises walay katungod sa pagpatawag kanila. (Num 16:12-15) Si Kore, ang iyang katigoman, ug ang Hataas nga Saserdoteng si Aaron gisultihan nga mopresentar sa ilang kaugalingon sa atubangan ni Jehova, nga ang tanan magdalag mga insensaryo ug nag-asong insenso.​—Num 16:​16, 17.

Sa pagkaugma si Kore ug ang 250 ka lalaki nga uban niya, nga ang tanan nagdalag insensaryo nga may nag-asong insenso, namarog sa ganghaan sa tolda nga tagboanan uban kang Moises ug Aaron. Ang himaya ni Jehova mipakita sa tibuok katigoman ug ang Diyos misulti kang Moises ug Aaron, nga ibulag nila ang ilang kaugalingon gikan sa taliwala sa katigoman, “aron mapuo ko sila sa daklit lamang.” Apan, si Moises ug Aaron nangaliya alang sa katawhan, ug unya ang Diyos nagsugo kang Moises nga ipahilayo ang katigoman gikan sa mga tabernakulo ni Kore, Datan, ug Abiram. Gisunod nila kini. (Num 16:18-27) Wala madugay human niadto, “ang yuta mibuka sa iyang baba ug milamoy kanila ug sa ilang mga panimalay ug sa tanang tawo nga iya ni Kore ug sa tanang manggad.” Sila ug ang tanan nga ila nangahulog nga buhi ngadto sa Sheol, ug ang yuta mitabon kanila.​—Num 16:28-34.

Kadtong diha sa atubangan sa tolda nga tagboanan nga nagdalag mga insensaryo nga punog insenso wala makalingkawas, kay “ang kalayo migula gikan kang Jehova ug milamoy sa duha ka gatos ug kalim-an ka tawo nga naghalad ug insenso.” (Num 16:35) Si Kore mismo kauban nila niadtong higayona ug busa namatay tungod sa maong kalayo gikan sa Diyos.​—Num 26:10.

Ang mga insensaryo niadtong nakigkunsabo kang Kore gihimong metal nga mga palid aron ihaklap sa halaran. Gihimo kini “tungod kay gitanyag nila kini kang Jehova, mao nga kini nahimong balaan; ug kini magsilbing ilhanan sa mga anak sa Israel.” (Num 16:36-40) Bisan pa niining gamhanang pamatuod sa paghukom sa Diyos, sa pagkasunod adlaw ang tibuok katigoman sa Israel nagbagulbol batok kang Moises ug Aaron, nga nag-ingon, “Kamo, kamo nagpatay sa katawhan ni Jehova.” Kini nakapasuko sa Diyos, ug bisan pa sa pangamuyo ni Moises ug Aaron, 14,700 ang nangamatay tungod sa hampak gikan kang Jehova, ug mihunong lamang kini human nga si Aaron naghimog pagtabon-sa-sala alang sa katawhan. (Num 16:41-50) Human niadto, gikompirmar ang pagkasaserdote ni Aaron pinaagi sa pagpanalingsing sa iyang sungkod.​—Num 17.

Sumala sa rekord sa Bibliya, dayag nga ang mga anak ni Kore wala mosunod sa pagrebelde sa ilang amahan, kay kini nag-ingon: “Apan, ang mga anak ni Kore wala mangamatay.” (Num 26:9-11) Ang mga kaliwat ni Kore sa ulahi nahimong prominente diha sa Levihanong pag-alagad.​—Tan-awa ang KOREHANON.

Ang magsusulat sa basahon ni Judas naghisgot pagtingob kang Cain, Balaam, ug Kore sa dihang nagpasidaan sa mga Kristohanon sa pagbantay batok sa mga tawong mananapon nga “nangalaglag diha sa masuklanong pulong ni Kore!” Dayag nga gitinguha ni Kore ang himaya alang sa iyang kaugalingon. Gihagit niya ang mga tinudlo ni Jehova, nahimong rebelde, ug busa takos mamatay ingong sangpotanan sa iyang dili matarong nga buhat.​—Jud 10, 11.

4. Usa ka Kohatnong Levihanon “sa mga anak nga lalaki ni Asap” ug usa ka kaliwat sa Num. 3. (Ex 6:​16, 18, 21; 1Cr 9:19; 26:1) Si Salum, usa sa “mga magbalantay sa pultahan sa tolda,” gihubit ingong “anak nga lalaki ni Kore nga anak nga lalaki ni Ebiasap nga anak nga lalaki ni Kore,” sa 1 Cronicas 9:19. Kining tekstoha wala maghisgot sa tanang kaliwatan tali kang Salum ug Ebiasap, apan ang mga ngalan nga gihisgotan maoy lakip niining usa ka talaan sa kagikan. Ang 1 Cronicas 26:1 nagtawag sa magbalantay-sa-ganghaan nga si Meselemias nga “anak nga lalaki ni Kore.”

5. Usa ka Levihanon, nga “anak nga lalaki ni Imnah” ug “ang magbalantay-sa-ganghaan dapit sa sidlakan” sa templo sa adlaw ni Haring Ezequias. Siya mao ang “tinugyanan sa kinabubut-ong mga halad sa matuod nga Diyos, sa paghatag sa amot nga iya ni Jehova ug sa labing balaang mga butang,” ug nagbaton ug ubang mga tawo nga ilalom sa iyang pagbuot.​—2Cr 31:14-16.