“Kahadloki ang Diyos ug Kaniya Ihatag ang Himaya”

“Kahadloki ang Diyos ug kaniya ihatag ang himaya.”​—PINADAYAG 14:7.

1. Kinsay atong kahadlokan, ug kinsay dili nato kahadlokan?

KINSAY ATONG KAHADLOKAN? Siyempre dili ang mapulang dragon, si Satanas, ug ang iyang panon sa mga demonyo! Gitambog na sila ni Kristo Jesus gawas sa langit human nga natawo ang Gingharian sa 1914. Apan ang mga panan-awon sa Apokalipsis, sunod nagbutyag sa organisasyon nga gigamit ni Satanas dinhi sa yuta diha sa iyang kataposang pangusog sa pagsumpo sa mga katuyoan sa Diyos. Nangibabaw niining paglarawan mao ang duha ka mabangis nga mapintas nga mga mananap ug ang usa ka nahubog nga babayeng bigaon​—ang Babilonyang Bantogan. Kahadlokan ba nato sila? Dili gayod! Hinunoa, ang angay natong kahadlokan mao si Jehova ug ang iyang Kristo, kansang Gingharian nagaagak sa dunot nga kalibotan ni Satanas ngadto sa kataposang paghukom.​—Proverbio 1:7; Mateo 10:28; Pinadayag 12:9-12.

Mapasipad-anong mga Mananap

2. Unsang mapintas nga mananap ang mitungha sa talan-awon diha sa ikawalong panan-awon, ug unsay gilarawanan niini?

² Sa gibukhad ang ikawalong panan-awon sa Pinadayag, usa ka mapintas nga mananap migimaw gikan sa magubot nga dagat sa katawhan. Kadto dunay pito ka ulo ug napulo ka sungay nga may napulo ka diadema, nga nagpaila sa harianong gahom nga gihatag niini ni Satanas. Kini nagpasipala kang Jehova, nagakuniskunis sa Iyang mga alagad sama sa ginahimo sa usa ka leopardo, sa uso, o leon; apan ang gahom niini temporaryo , nga gikan sa dragon, si Satanas, nga maoy suod nga kaamgid niini. Gibatbat una ni propetang Daniel ang politikanhong mga kagamhanan sa yuta ingong mga mananap, ug ang mga kagamhanan mismo namilig mga ihalas nga mga mananap ingong mga simbolo sa ilang nasod, sama sa leon sa Britanya ug sa agila sa Amerika. (Daniel 8:5-8, 20-22)Karon, nakakita kitag daghang bahin nga mananap, nga nagalukop sa tanang politikanhong mga gahom sa kasaysayan sa Bibliya nga nagalupig sa tinuod nga mga alagad sa yuta. Ang talagsaong “mga ulo” taliwala kanila mao ang Ehipto, Asirya, Babilonya, Medo-Persia, Gresya, Roma, ug sa kataposan ang Anglo-Amerikano Dual nga Gahom sa Kalibotan.​—Pinadayag 13:1, 2; 12:3, 7-9.

3. (a) Sa unsang paagi ang usa sa mga ulo sa mapintas nga mananap nakadawat ug “samad sa espada”? (b) Sa unsang paagi ang duha ka sungay nga mapintas nga mananap nanguna sa paghimog usa ka larawan sa unang mapintas nga mananap? (c) Unsa ang ngalan sa unang mapintas nga mananap ug ang kahulogan sa ngalan?

³ Sa panahon sa gubat sa kalibotan sa 1914-18, ang Gran Britanya, ingong ikapitong gahom sa kalibotan, nakadawat ug “samad sa espada” nga makamatay unta. Apan ang Tinipong Bansa sa Amerika miabot sa pagluwas kaniya. Sukad niadto, ang Amerika ug Britanya nagtinabangay ingong dual nga gahom sa kalibotan, nga bahin niini mipadayon si Juan sa pagbatbat ingong usa ka mapintasa nga mananap nga dunay duha ka sungay, nga migula gikan sa usa ka natukod nga tawhanong katilingban, “ang yuta.” Kining duha ka sungay nga mananap nanguna sa paghimog usa ka larawan sa unang mapintasa nga mananap ug sa paghatag gininhawa sa kinabuhi ngadto niini, nga nagalarawan sa paagi nga ang Anglo-Amerikanong Gahom sa Kalibotan nahimong pangunang tigpaugda ug maghahatag-kinabuhi sa Liga sa Kanasoran ug sa sumusunod niini, ang Hiniusang Kanasoran. Ang unang mapintas nga mananap dunay numerong-ngalan 666. Ang sayis maoy usa ka dili-hingpit nga numero​—kulang sa hingpit nga pito sa Bibliya—​busa ang tulo ka unom nagsugyot sa alaut nga pagkadili-hingpit sa tawhanong mga magmamando karong adlawa. Bisan pa nga nagatahod ang mga Saksi ni Jehova sa kagamhanan ug sulondan sa pagsunod sa mga balaod sa yuta nga ilang gipuy-an, sila maisogong nagadumili sa pagsimba “sa mapintas nga mananap” o sa larawan niin.​—Pinadayag 13:3-18; Roma 13:1-7.

Kahaloki ang Diyos​—Ngano?

4. (a) Kinsa ang nakitang nagbarog diha sa langitnong Bukid sa Sion, ug kinsa ang gihulagwayan sa 24 ka ansiano sa atubangan sa trono sa Diyos? (b) Unsay kalainan sa “bag-ong awit” nga giawit sa dinihogan ug sa “bag-ong awit” nga giawit sa dakong panon?

⁴ Alang karong panahona, igo na alang niadtong mga mananapa! Diha sa makaparepreskong kalainan, ang ikasiyam nga panan-awon nagapunting sa Kordero. Siya nagtindog diha sa Bukid sa Sion, uban sa 144,000 nga iyang gipalit ingong unang mga bunga gikan sa katawhan. Bisan tuod nga ang pipila kanila nagaalagad pa dinhi sa yuta, sa espirituwal nga diwa ang tanang 144,000 “nakaduol diha sa Bukid sa Sion ug . . . sa langitnong Jerusalem.” (Hebreohanon 12:22) Sa tukma, ang 24 ka ansiano nakita usab dinhia sa atubangan sa trono sa Diyos, kay sila naglarawan sa samang dinihogang grupo gikan sa lahi nga baroganan​—ingong binanhaw ug napalingkod nga mga hari ug mga saserdote. Ang 144,000 nanag-awit sa “usa ka bag-ong awit.” Nagtubod kini gikan sa ilang tagsaong kasinatian sa pagkahimong pinalit gikan sa yuta aron mahimong mga manununod sa Gingharian. Ang dakong panon “nanag-awit usab kang Jehova sa usa ka bag-ong awit,” apan lahi kini sa pagkaagi nga sila nanag-awit sa palaabuton sa pagkab-ot ug kinabuhing dayon diha sa yutan-ong dapit sa Gingharian.​—Pinadayag 7:9; 14:1-5; Salmo 96:1-10; Mateo 25:31-34.

5. (a) Unsang balita ang gimantala sa manulonda nga naglupad sa kinataliwad-an sa langit, ug nganong walay kataposan kini? (b) Unsang sugo ang gipagula sa manulonda diha sa makusog nga tingog, ug nganong tukma kaayo kini?

⁵ Ang panan-awon karon midako. Si Juan nakakitag laing manulonda nga naglupad sa kinataliwad-an sa langit. Ug pagkamalipayong balita ang iyang gimantala! Kini maoy walay kataposang maayong balita, kay kini nagkahulogang kinabuhing dayon alang sa mga tawo gikan sa tanang nasod ug kabanayan ug pinulongan ug katawhan nga nagasunod sa Diyos niining takna sa iyang paghukom. Sa kasukwahi uban sa makalilisang nga mga mananap nga bag-o lang gihubit ni Juan, nganong dili simbahon, oo, himayaon kining katingalahang Diyos? Siya mao ang Usa nga naglalang sa langit ug sa yuta. Siya ang Tuboran sa tanang butang nga naglungtad, buhi ug dili-buhi. Nan, pagkadako sa katarongan, nga nagsugo ang mga manulonda sa makusog nga tingog: “KAHADLOKI ANG DIYOS UG KANIYA IHATAG ANG HIMAYA”! Ang tingog sa manulonda madungog sa tibuok yuta, ug gipalanog sa mga Saksi ni Jehova ang iyang makapukawng pagdapit sa tanang katawhan diha sa mga 200 ka pinulongan.​—Pinadayag 14:6, 7; Isaias 45:11, 12, 18.

Pagkagun-ob sa Bantogang Babilonya

6. Unsang makapukawng balita ang gimantala sa lain pang manulonda?

⁶ Laing manulonda mitungha. Pagkamakakurat nga mensahe ang iyang gimantala: “Siya nagun-ob na! Nagun-ob na ang Bantogang Babilonya, ang babaye nga mao ang nagapainom sa tanang kanasoran sa bino sa kasuko sa iyang pagpakighilawas!” (Pinadayag 14:8) Kinsa ang Bantogang Babilonya, nga iyang nadaldal gani ang mga kanasoran ug nakapahubog kanila?

7. Unsa ang Babilonyang Bantogan, ug sa unsang paagi miugmad kini?

⁷ Ang karaang Babilonya mao ang tinubdan sa bakak nga relihiyon, nga milapad sa tibuok yuta nga nahimong demonyohanong kalibotang imperyo, nga sa haom ginganlag “Bantogang Babilonya.” Sa midagan ang panahon, nahimong prominente ang Roma nianang maong relihiyosong imperyo, kay ilalom sa Roma nga ang apostatang Kristiyanidad miugmad. Ang Roma nagpadayon nga usa ka sentro sa kalibotan sa Babilonyanhong relihiyon. Dayag kaayo kini sa 1986 sa dihang ang relihiyosong mga lider sa kalibotan misanong sa panawag sa papa sa Roma pinaagi sa pagtigom uban kaniya sa Assisi, duol sa Roma, aron sa pag-ampo alang sa Internasyonal nga Tuig sa Kalinaw nga gimantala sa Hiniusang Kanasoran.

8. (a) Sa unsang paagi nag-antos ang Babilonyang Bantogan sa dakong pagkagun-ob, ug sukad kanus-a nga nahitabo kini? (b) Unsay nagpakita nga ang mga pag-ampo sa relihiyosong mga lider alang sa pakigdait wala tubaga?

⁸ Apan, nag-antos ang Babilonyang Bantogan ug dakong pagkagun-ob! Sukad sa 1919 nakita kini diha sa nagkaus-os nga pagpaluyo sa bakak nga relihiyon sa tibuok-kalibotan. Ang ateyistikong komunismo karong adlawa ang nagahawid sa dakong bahin sa yuta. Ang mga batan-on karong adlawa gitudloan ug ebolusyon, nga nagkasumpaki sa Pulong sa Diyos. Sa Protestanteng Uropa diyutayng mga tawo na lamang ang nanimba, ug ang nagapanawng papa naningkamot sa paghawid sa iyang Katolikong imperyo. Ang mga pag-ampo ngadto sa daghang mga diyos sa mga relihiyon sa kalibotan sa dayag wala tubaga. Si Ruth L. Sivard mitaho: “Kawhaag-duha ka gubat ang gisangka sa 1987, mas daghan pang gubat kay sa bisan unsang tuig sa miagi nga natala sa kasaysayan. Ang total nga numero sa nangamatay niining mga gubata sa pagkakaron miabot sa labing menos 2,200,000​—ug kusog nga nagadaghan.”a Pagkawalay epekto sa tigom sa pag-ampo diha sa Assisi! Ug bisan pa gitiman-an sa papa ang 1987 nga anibersaryo niana nga asembliya pinaagi sa paghimog medalya nga dunay iyang hulagway sa usa ka kilid ug usa ka simbolo sa tigom sa pag-ampo diha sa pikas. Sila padayong “nagaingon, ‘Pakigdait! Pakigdait!’ sa diha nga walay pakigdait.”​—Jeremias 6:14.

Ang Pagpamiga sa Babilonya Giyagyag

9. Unsang imoral nga mga buhat nga ilado ang klero sa Babilonyang Bantogan?

⁹ Ang Pinadayag 14:8 nagpakita nga ang Bantogang Babilonya makihilawasaon. Ang iyang mga kaklerohan ilado sa ilang imoral nga mga paagi. Gipanitan sa mga ebanghelista sa TV ang ilang mga panon sa ginatos ka milyong dolyar, samtang sa samang panahon sila nagahimog dayag nga imoralidad. Ang kaparian sa Katoliko gikuwestiyon usab, sumala sa gipaila sa sunod nga taho diha sa The Beacon Journal sa Philadelphia, Pennsylvania, Enero 3, 1988: “Ang ginatos ka kabataan nga giabusohan sa Katolikong mga pari sa Tinipong Bansa sulod sa miaging lima ka tuig nag-antos sa grabeng emosyonal nga kadaot, nag-ingon ang mga ginikanan, mga sikolohista, mga opisyal sa kapolisan ug mga abogado nga nalangkit sa mga kaso.” Ang seksuwal nga imoralidad nakadot sa dungog sa daghang mga klero sa Bantogang Babilonya.

10. (a) Diha sa Pinadayag 18:3, unsay gipasabot sa “pakighilawas” sa Babilonyang Bantogan? (b) Sumala sa gipamulong diha sa Pinadayag 18:24, nganong ang mga klero sa Babilonyang Bantogan may dakong bahin sa pagkasad-an sa dugo?

¹⁰ “Ang bino sa kasuko sa iyang pakighilawas,” hinunoa, dunay pagtikular nga kalabotan sa nagapangulitawong mga lider sa bakak nga relihiyon, nagasuportar sa ilang mga kampaniya sa politika ug sa mga gubat, ug nagapugos sa mga tawo sa pagsimba sa usa ka nasyonalistikanhong pundok sa mapintas nga mananap. Nakita sa mga politiko ang relihiyon nga usa ka mapuslanong katabang aron makuha ang ilang mga tumong, sama sa makita sa kasabotan ni Hitler uban sa Batikano niadtong 1933 ug sa Sibil nga Gubat sa Espanya sa 1936-39. Sa panahon sa Gubat sa Kalibotan II, ang mga klero sa Katoliko, sa Protestante, Buddhista, ug ubang mga relihiyon sa duha ka kiliran milihok nga daw nahubog sa nasyonalistikong kainit sa gubat. Sila nakabahin sa mabug-at nga pagkasad-an sa dugo alang sa tinagpulo ka milyong mga sundalo ug sa mga sibilyan nga nangamatay sa gubat sukad sa 1914. Ang klero nga misuportar sa mga Pasista ug sa mga Nazi sad-an sa dugo sa mga Saksi ni Jehova, ug sa uban, nga gipamatay ug nangamatay diha sa mga kampong konsentrasyon.​—Jeremias 2:34; Pinadayag 18:3, 24.

11. (a) Unsay gidumilian sa dinihogang mga Kristohanon ug dakong panon nga simbahon? (b) Unsang dakong mga palaabuton ang naghatag gamahanang katarongan sa pagkahadlok sa Diyos sa paghatag kaniya sa himaya?

¹¹ Panahon sa nangaging 74 ka tuig, ang maunongong dinihogang mga Kristohanon, uban sa nagadaghang dakong panon, nagpadayon sa PAGKAHADLOK SA DIYOS UG SA PAGHATAG KANIYAG HIMAYA. Kita sa malig-on nagadumili sa pagsimba sa bisan unsang nasyonalistikong bahin sa mapintas nga mananap. Kita nagadumili sa paghimaya sa larawan sa mananap​—ang Liga sa Kanasoran ug sa HK—​kay kita nahibalo nga “ang gingharian sa atong Ginoo [Jehova] ug sa iyagn Kristo” mao lamang ang makahatag tinuod nga pakidait ug kasegurohan. Kita determinado sa pagtuman “sa mga sugo sa Diyos ug sa pagtuo kang Jesus.” Kanang maong pag-antos dunay ganti! Ang dinihogang mga Kristohanon kinsa “nangamatay diha sa Ginoo” giisip nga malipayon, kay “ang binuhatag nga ilang gihimo mokuyog man kanila.” Alang sa tanan nga sakop sa dakong panon nga mamatay sa mga paglutos, sa mga sakit, o sa mga aksidente, ang panaghigala nga ilang naugmad uban sa Diyos nagapasalig kanila sa usa ka sayo nga pagkabanhaw ngadto sa katilingban sa “bag-ong yuta.” Kining dakong mga palaabuton naghatag tinuod ug gamhanang katarongan sa PAGKAHADLOK SA DIYOS UG SA PAGHATAG KANIYAG HIMAYA.​—Pinadayag 11:15, 17; 12:10; 14:9-13; 21:1.

12. Unsang duha ka pangani ang nahitabo, ug kanus-a?

¹² Samtang nagapadayon ang paghukom, ang mga manulonda nanawag alang sa duha ka pag-ani. Ang unang Mangangani sa dayag mao si Jesus, nga naentrono sa himaya sa Gingharian sukad sa 1914, kay siya naglingkod diha sa puti nga panganod, gipurongpurongan, “morag anak sa tawo.” Karon, sa adlaw sa Ginoo, iyang giani ang yuta, ang una mao ang nahibilin sa dinihogang mga Kristohanon ug dayon ang minilyong dakong panon. (Itandi ang Mateo 25:31-34; Juan 15:1, 5, 16.)Sa kasukwahi, ang ikaduhang pangani mao kanang “parras sa yuta,” nga gilabay ngadto sa “dakong pigsanan sa kapungot sa Diyos.” Kini mao ang paghukom nga ipahamtang sa Har–Magedon, sa dihang ang daotan, magubot nga tawhanong katilingban lukaon ug ang makahilong bunga niini pugaon. Hinaot nga mahimaya si Jehova sa paghinlo sa yuta niining makahilong bino!​—Pinadayag 14:14-20; 16:14, 16.

“Si Jehova . . . Matarong ug Matuod”

13. (a) Diha sa ikanapulong panan-awon, unsang awit ang giawit sa nabanhawng dinihogan, ug unsa ang mga pulong niini? (b) Sa unsang paagi ang matarong nga mga paghukom sa Diyos matin-awng gipahayag niini nga panan-awon?

¹³ Diha sa ikanapulong panan-awon sa Pinadayag, atong makita na usab ang mga hitabo sa lnagit sa atubangan sa trono sa Diyos. Pagkadalo sa kalipay ang anaa sa iyang presensiya! Ang nabanhawng mga dinihogan​—nga migulang madaogon tungod sa PAGKAHADLOK SA DIYOS UG SA PAGHATAG KANIYAG HIMAYA.​—nanag-awit ‘sa awit ni Moises ug sa Kordero’: “Dako ug kahibulongan ang imong buhat, Ginoong Jehova, nga Makagagahom. Matarong ug matuod ang imong mga paagi, Hari sa walay kataposan. Kinsa bay dili mahadlok kanimo Jehova ug magahimaya sa imong ngalan, kay ikaw mao lamang ang maunongon? Ang tanang kanasoran mangabit ug managsimba kanimo, kay gikapadayag na man ang imong matarong nga mga hukom.” Ang mga paghukom sa Diyos sa tino matarong ug matuod, sumala sa matin-aw kaayong pagkapahayag sa bug-os nga panan-awon! Gibubo sa mga manulonda ang pito ka panaksan sa kasuko sa Diyos, nga mitultol sa pagtigom sa tanang mga nasod ngadto sa Har–Magedon ug usa ka pahinumdom nga ang “Babilonyang Bantogan nahinumdoman diha sa panan-awon sa Diyos”! Pagkatukma sa panahon ang panawag sa PAGKAHADLOK SA DIYOS UG SA PAGHATAG KANIYAG HIMAYA.​—Pinadayag 15:1–16:21.

14. Diha sa mga panan-awon sa 11 ug 12, unsang prominenteng papel ang gidula sa Babilonyang Bantogan, ug nganong panahon nang biyaan siya?

¹⁴ Ang Babilonyang Bantogan subsob nga gihisgotan sa Pinadayag. Atong nakita na usab siya nga mao ang pangunang larawan diha sa mga panan-awon 11 ug 12. Siya “naglingkod diha sa daghang katubigan,” nagahawid sa mga katawhan ug gihubog sila sa iyang makahilo, bakak nga mga doktrina. Siya mismo hubog sa “dugo sa mga balaan,” nga iyang gipatay sa mga paglutos, ug siya sad-an sa dugo maylabot sa “tanang nga gipamatay diha sa yuta,” tungod sa iyang mabudhiong pag-apil-apil sa gubat. Ang iyang dagkong mga kasosyo sa negosyo ug ang iyang pagpuga sa mga tawo sa panalapi nakapasulod ug bahandi nga nakuha sa daotang paagi. Ang labing salawayon mao ang iyang pakighilawas sa politika, bisan hangtod sa punto sa pagkabayo aron mainila diha sa pagsakay sa mananap sa pakigdait ug kasegurohan​—ang HK. Apan ang militarisadong mga sungay sa tanang mga mananap hapit nang mokuniskunis kaniya ug laglagon siya. Panahon na karon alang sa tanang NAHADLOK SA DIYOS UG NAGHATAG KANIYAG HIMAYA sa pagbulag gikan kaniya, “kay ang iyang kasal-anan nagatipun-og sungko sa langit, ug nahinumdoman sa Diyos ang iyang daotang binuhatan.”​—Pinadayag 17:1–18:24.

15. Mitultol sa unsang mga awit sa pagdayeg ang kalaglagan sa dakong bigaon ug gisundan sa unsang malipayong okasyon?

¹⁵ Busa, ang silot sa Babilonyang Bantogan moabot ingong matarong nga paghukom gikan kang Jehova. Ingong pagpabili alang niini, milanog ang ‘mga Hallelujah’ sa langit ug dayon sa yuta, nga nagahatag sa kaluwasan, sa himaya, ug gahom kang Jehova. Kining dungang pag-awit nga “Dayega ninyo si Jehova, kamo nga katawhan!” nagapahayag sa dakong kalipay sa walay kataposang kalaglagan sa dakong bigaon. Pagkalahi sa iyang kalaglagan nianang sa labing malipayong hitabo sa langit​—ang kasal sa Kordero, si Jesu-Kristo, ug sa iyang pangasaw-onon, ang 144,000 ka matinumanong mga bag-ong abot! Usa ka masipang awit sa pagdayeg gipatugbaw ngadto kang “Jehova nga atong Diyos, nga Makagagahom,” oo, “managhugyaw ug managsadya kita, ug ihatag ta kaniya ang himaya, kay ang kasal Kordero nahiabot na ug ang iyang pangasaw-onon nakaandam na sa iyang kaugalingon”!​—Pinadayag 19:1-10.

16. Sumala sa panan-awon 13, unsang isyu sa kataposan ang husayon?

¹⁶ Apan, sa dili pa himoon ang kasal sa langit, ang panan-awon 13 nagpakita kon giunsa sa paghusay ang isyu maylabot sa pagkasoberano ni Jehova. Ang Iyang Hari sa mga hari ug Ginoo sa mga ginoo, si Jesus, inubanan sa panon sa mga manulonda, “magapanghukom ug makiggubat diha sa pagkamatarong,” nga magatamak sa pigsanan sa bino sa kasuko sa kapungot sa Diyos nga Makagagahom. Ang tanang nahibiling bahin sa yutan-ong sistema ni Satanas dugmokon, pulposon! (Pinadayag 19:11-21) Samtang lantawon nato kadtong tulin nga nagasingabot nga kadaogan pinaagi sa mga panan-awon sa Pinadayag, sa tino kita dunay tanang katarongan sa PAGKAHADLOK SA DIYOS UG SA PAGHATAG KANIYAG HIMAYA!

Magahimaya sa Diyos Hangtod sa Walay Kataposan

17. Unsay gipadayag sa mga panan-awon sa 14 ug 15 bahin sa malipayong sangpotan sa tanang may kahadlok sa Diyos ug nagahatag kaniya himaya?

¹⁷ Ang mga panan-awon 14 ug 15 sa Pinadayag nagpakita sa sangpotanan sa tanang NAHADLOK SA DIYOS UG NAGHATAG KANIYAG HIMAYA. Uban kang Satanas ug ang iyang mga demonyo nga gitambog sa bung-aw sulod sa usa ka libo ka tuig, ang langitnong kasal sa Kordero ug sa iyang pangasaw-onon himoon, ug kining 144,001 ka hari ug mga saserdote magmando sulod sa usa ka libo ka tuig sa dihang ilang bangonon ang katawhan ngadto sa kahingpitan. Human sa kataposang pagsulay, kadtong magpadayon sa PAGKAHADLOK SA DIYOS UG SA PAGHATAG KANIYAG HIMAYA modaog ug inuyonan alang sa kinabuhing dayon. Lakip niini ang bilyonbilyong mga binanhaw, “ang dako ug ang gamay,” nga nakapamatuod nga takos ang ilang mga ngalan mahisulat diha sa basahon sa kinabuhi. “Ang usa ka bag-ong langit ug usa ka bag-ong yuta,” mohatag dili-maasoy nga panalangin sa katawhan, mga panalangin nga segurado, tungod kay ang Magbubuhat sa “tanang bag-ong butang,” si Jehova nag-ingon: “Isulat kini, kay kining mga pulonga kasaligan ug matuod.”​—Pinadayag 20:1–21:8.

18. Sumala sa panan-awon 16, unsa ang pangataposan sa basahon sa Pinadayag?

¹⁸ Ang panan-awon 16 mitungha sa talan-awon sa pangataposan sa Pinadayag, unsa man kana? Ang panan-awon sa usa ka siyudad. Kining siyudara, ang Bag-ong Jerusalem, lahi kaayo gikan sa bisan unsang siyudad nga natukod sukad dinhi sa yuta​—lahi, lahi kaayo gikan sa Babilonyang Bantogan, ang siyudad kansang apostasya, mahugawng mga moral, ug politikanhong pagpamiga nga nakapasipalag dako sa Diyos. Ang balaang siyudad putli, mahinlo, bililhon. Kini mao ang pangasaw-onon sa Kordero, ang iyang katabang sa pag-apod-apod sa kinabuhing walay kataposan sa kalibotan sa katawhan. (Juan 3:16) Dili ikahibulong nga makusog nga gipalanog ang panawag karong adlawa, sa matin-aw, sa paggula sa mini nga siyudad, ang Bantogang Babilonya!​—Pinadayag 18:4; 21:9–22:5.

19. (a) Unsang pagdapit ang gitanyag sa pangasaw-onon nga matang, ug sa unsang paagi misanong ang mga maaghop? (b) Ang atong paghatag positibong pagsabong sa sugo “Kahadloki ang Diyos ug kaniya ihatag ang himaya” mosangpot sa unsa?

¹⁹ Ang dinamikong espiritu ni Jehova nga ipaagi diha sa pangasaw-onon nga matang nagagikan ang pagpanapit: “Umari kamo!” Oo, kamong tanang mga maaghop sa yuta nga nagatinguhag kinabuhing walay kataposan diha sa usa ka globonhong paraiso, dumuol sa “suba sa tubig sa kinabuhi,” sa pagdawat sa tanang mga tagana ni Jehova pinaagi ni Kristo ug sa iyang pangasaw-onon sa pagkabaton ug kinabuhing dayon! Pagkatahom nga paalabuton​—tawhanong kinabuhi diha sa kahingpitan sa usa ka paraiso nga yuta! Kini mao unyay ganti alang sa daghan nga mohatag positibong tubag sa sugo: “KAHADLOKI ANG DIYOS UG KANIYA IHATAG ANG HIMAYA”!​—Pinadayag 22:6-21.

[Footnote]

UNSAY IMONG TUBAG?

□ Unsang tukma sa panahong pahamatngon ang anaa alang kanato diha sa panan-awon sa duha ka mapintas nga mananap?

□ Unsa ang angay natong pagsanong sa pagmantala sa manulonda nga naglupad sa kinataliwad-an sa langit?

□ Sa unsang paagi ang Babilonyang Bantogan nalangkit sa pakighilawas, ug sa unsang paagi gilantaw kini niadtong may kahadlok sa Diyos?

□ Sa unsang paagi giani ang yuta sa panahon sa adlaw sa Ginoo?

□ Unsang malipayong mga hitabo nga gitapos ang Pinadayag, ug sa unsang paagi ang katawhan sa Diyos makaambit niini?

[Hulagway sa panid 23]

Kining bronseng medalya giluwat sa Oktubre 1987 sa anibersaryo sa Pag-ampo Alang sa Kalinaw diha sa Assisi. Diha sa usa ka kilid mao ang usa ka larawan sa “Santo Papa” nga libot niini mao ang gisulat “Juan Paulo II Pontifex Maximus” ug ang petsa. Sa pikas kilid “Saint Francis” nga nagapanawag alang sa “Pakigdait nga Gasa sa Diyos” sa Tigom alang sa Pag-ampo sa Pakigdait sa Assisi