Ang Organisasyon ni Jehova Nagpaluyo sa Imong Ministeryo
“Nakita ko ang laing anghel nga naglupad sa katung-ang langit, ug siya adunay walay-kataposang maayong balita nga ipahayag ingon nga makangayang mensahe.”—PINADAYAG 14:6.
1. Sa unsang paagi ang mga Saksi ni Jehova nasulayan, ug nganong sila nakalahutay?
NGANONG hinungdanon kaayo ang pag-ila sa papel sa langitnong organisasyon ni Jehova sa pagpaluyo sa Kristohanong ministeryo? Aw, mahimo kaha sa mga Saksi ni Jehova ang pagsangyaw sa maayong balita sa Gingharian sa Diyos sa tibuok makiawayong kalibotan nga walay pagpaluyo sa langitnong mga panon ni Jehova? Nahimo sa mga Saksi ang maong pagsangyaw sa panahon sa usa ka siglo nga hingapin ang nasyonalismo, diktatoryal nga politikanhong mga sistema, mga gubat sa kalibotan, ug nagkalainlaing mga kalisod. Kon wala pa ang tabang ni Jehova makalahutay kaha ang mga Saksi sa tibuok-kalibotang pag-atake sa pagpihig, pag-ayad, ug kasagaran mapintas nga paglutos nga gipahamtang kanila?—Salmo 34:7.
Milahutay Bisan pa sa Tibuok-Kalibotan nga Pagsupak
2. Unsay kaamgiran sa matuod nga mga Kristohanon sa unang siglo ug karong panahona?
2 Niining ika-20ng siglo, ang mga kaaway, relihiyoso ug politikanhon, nagbutang ug tanang posibleng kababagan, legal ug sa laing paagi, sa pagsulay sa pagsanta o pagpahunong sa buluhaton ni Jehova. Ang Kristohanong mga igsoong lalaki ug babaye gilutos, gidaot, gipasipad-an, ug gibutangbutangan—daghan ang gipamatay pa—kasagaran sa paghulhog sa klero sa Dakong Babilonya. Mahimong ikaingon, sama sa nahitabo sa unang mga Kristohanon, nga “sa pagkamatuod mahitungod niini nga sekta nahibaloan namo nga sa bisan diin kini ginasultihan ug pagbatok.” Sama nga ang Hudiyong klero sa panahon ni Kristo naningkamot pag-ayo sa pagpahunong sa iyang ministeryo, maingon usab ang klero ug ang mga apostata, duyog sa ilang mga hinigugma sa politika, misulay sa pagpahunong sa dakong edukasyonal nga buluhatong pagsangyaw sa katawhan ni Jehova.—Buhat 28:22; Mateo 26:59, 65-67.
3. Unsay atong makat-onan sa integridad ni Henryka Żur?
3 Tagda pananglitan ang nahitabo sa Polandia sa Marso 1, 1946. Si Henryka Żur, usa ka 15-anyos nga Saksing batang babaye duol sa Chełm, mikuyog sa laing Saksi, usa ka igsoong lalaki, sa pagduaw sa mga tawong interesado sa duol nga baryo. Gidakop sila sa mga sakop sa Katolikong pundok sa militar nga gitawag ug Narodowe Siły Zbrojne (Nasodnong Armadong Puwersa). Ang igsoong lalaki gibun-og pag-ayo apan siya nabuhi ra. Apan si Henryka wala. Siya grabeng gisakit sa daghang oras samtang sila naningkamot sa pagpugos kaniya sa Katolikong pagpanguros. Ang usa sa nagsakit kaniya miingon: “Bahala ka na kon unsay imong tuohan, basta himoa lang ang Katolikong pagpanguros. Kay kondili usa ka bala naghulat kanimo!” Nabungkag ba ang iyang integridad? Wala. Giguyod siya sa relihiyosong mga talawan ngadto sa duol nga lasang ug gipusil siya. Bisan pa niana, siya nagmadaogon! Sila napakyas sa pagbungkag sa iyang integridad.a—Roma 8:35-39.
4. Sa unsang paagi ang politikanhon ug relihiyosong mga elemento naningkamot sa pagsanta sa buluhatong pagsangyaw sa Gingharian?
4 Kapin sa usa ka gatos ka tuig, ang modernong-adlaw nga mga alagad sa Diyos gitratar sa mabangison ug matinamayong paagi. Sanglit ang mga Saksi ni Jehova dili, ug dili gustong mahimong, bahin sa dagkong mga relihiyon ni Satanas, sila gilantaw ingong maayong biktima alang sa bisan unsang mapihigong pagpanaway o panatikong kaaway. Sila mapintasong giatake sa politikal nga mga elemento. Daghang Saksi gipatay tungod sa ilang pagtuo. Bisan ang gitawag-kono nga mga demokrasya misulay sa pagbabag sa pagsangyaw sa maayong balita. Balik niadtong 1917 sa Canada ug Tinipong Bansa, ang klero maoy nagsiba sa mga akusasyong subersyon batok sa mga Estudyante sa Bibliya, nga maoy pagtawag sa mga Saksi niadtong panahona. Ang mga opisyal sa Watch Tower Society sayop nga gibilanggo, sa ulahi na lamang gideklarar nga walay sala.—Pinadayag 11:7-9; 12:17.
5. Unsang mga pulong ang nakapadasig sa mga alagad ni Jehova?
5 Nagamit ni Satanas ang tanang paagi nga iyang magamit sa pagsulay sa pagpahunong sa buluhatong pagsangyaw sa mga igsoon ni Kristo ug sa ilang maunongong mga kauban. Bisan pa niana, sama sa gipakita sa daghang eksperyensiya, walay mga hulga, pagpanghadlok, pisikal nga kapintasan, mga pagkabilanggo, mga kampong konsentrasyon, ni kamatayon ang nakapahilom sa mga Saksi ni Jehova. Ug mao kini ang nahitabo latas sa daghang siglo. Sa masubsob, ang mga pulong ni Eliseo nagsilbing usa ka pagpadasig: “Ayaw kahadlok, kay sila nga ania uban kanato mas daghan pa kay sa nagauban kanila.” Usa ka katarongan mao nga ang matinumanong mga manulonda mas daghan kay sa mga panon sa Yawa!—2 Hari 6:16; Buhat 5:27-32, 41, 42.
Gipanalanginan ni Jehova ang Madasigong Pagsangyaw
6, 7. (a) Unsang unang mga paningkamot ang gihimo sa pagsangyaw sa maayong balita? (b) Unsang makaayong kausaban ang nahitabo sugod sa 1943?
6 Sa panahon sa ika-20ng siglo, ang mga Saksi ni Jehova migamit ug daghang modernong mga teknolohiya aron sa pagpakaylap ug pagpakusog sa dakong buluhatong pagsangyaw sa dili pa moabot ang kataposan. Balik sa 1914, gisugdan ni Pastor Russell, nga unang presidente sa Watch Tower Bible and Tract Society, ang unang paggamit sa mga slide ug mga pelikula, nga gidungan sa pinasukad-sa-Bibliya nga komentaryo diha sa mga plaka sa ponograpo, sa walo-ka-oras nga salida sa Bibliya nga gitawag ug “The Photo-Drama of Creation.” Nahingangha niini ang mga tumatan-aw sa daghang nasod niadtong panahona. Sa ulahi, sa katuigang 1930 ug 1940, ang mga Saksi naila sa ilang balay-ug-balay nga pagsangyaw nga nagdaladalag mga ponograpo, ginamit ang mga rekording sa mga pakigpulong sa Bibliya nga gipahayag ni J. F. Rutherford, ang ikaduhang presidente sa Sosyedad.
7 Niadtong 1943 gihimo ang maisogong lakang ilalom sa pagdumala ni Nathan H. Knorr, ang ikatulong presidente sa Sosyedad, sa dihang gidesisyonan nga magtukod ug usa ka tunghaan alang sa mga ministro diha sa matag kongregasyon. Ang mga Saksi pagabansayon sa pagsangyaw ug pagpanudlo sa balay ug balay nga walay paggamit ug mga rekording sa ponograpo. Sukad niadto, ang ubang mga tunghaan giorganisar aron sa pagbansay sa mga misyonaryo, bug-os panahong payunir nga mga ministro, mga ansiyano sa kongregasyon, ug responsableng mga magtatan-aw sa mga sanga sa Watch Tower Society. Unsay miresulta?
8. Sa unsang paagi ang mga Saksi nagpakitag dakong pagtuo sa 1943?
8 Balik sa 1943, samtang gisangka pa ang Gubat sa Kalibotan II, diha lamay 129,000 ka mga Saksi nga aktibo sa 54 ka nasod. Bisan pa niana, sila adunay pagtuo ug determinasyon nga ang Mateo 24:14 matuman sa dili pa moabot ang kataposan. Sila kombinsido nga buot ni Jehova nga ang hinungdanong pasidaang mensahe igawali una sa dili pa ang sunodsunod nga mga hitabo nga motapos niining dunot nga sistema sa mga butang. (Mateo 24:21; Pinadayag 16:16; 19:11-16, 19-21; 20:1-3) Gigantihan ba ang ilang mga paningkamot?
9. Unsang mga kamatuoran ang nagpakita nga miuswag ang buluhatong pagsangyaw?
9 Karon aduna nay labing menos 13 ka nasod nga adunay kapin sa 100,000 ka aktibong mga Saksi ang matag usa. Daghan niining mga nasora nga ang Iglesya Katolika maoy naglabi. Bisan pa, tan-awa ang kahimtang. Ang Brazil adunay duolan sa 450,000 ka magmamantala sa maayong balita, ug kapin sa 1,200,000 ang mitambong sa Memoryal sa kamatayon ni Kristo sa 1997. Ang Mexico maoy laing pananglitan, nga may duolan sa 500,000 ka mga Saksi ug kapin sa 1,600,000 diha sa pagsaulog sa Memoryal. Ang ubang Katolikong mga nasod mao ang Italya (mga 225,000 ka mga Saksi), Pransiya (duolan sa 125,000), Espanya (kapin sa 105,000), ug Argentina (kapin sa 115,000). Sa Tinipong Bansa, diin ang Protestante, Katoliko, ug Hudiyonhong relihiyon mas daghan, adunay duolan sa 975,000 ka mga Saksi ug kapin sa 2,000,000 ang mitambong sa Memoryal. Sa pagkamatuod, dakong mga panon ang nanagganayan paggawas sa Dakong Babilonya, ang kalibotanong imperyo sa bakak nga relihiyon, uban sa mistikong mga doktrina niini ug nanagdangop sa yano ug tinong mga saad sa Diyos nga “bag-ong mga langit ug usa ka bag-ong yuta.”—2 Pedro 3:13; Isaias 2:3, 4; 65:17; Pinadayag 18:4, 5; 21:1-4.
Nagpasibo sa mga Panginahanglan sa mga Tawo
10. Sa unsang paagi nabag-o ang mga kahimtang sa pipila ka dapit?
10 Daghan niadtong midangop kang Jehova pinaagi ni Kristo Jesus nakaplagan diha sa balay ug balay. (Juan 3:16; Buhat 20:20) Apan ubang mga paagi ang gigamit. Ang mga situwasyon nagausab, ug ang mga kahimtang sa ekonomiya ingon usab niana nga daghang kababayen-an karon nagtrabaho sa gawas sa balay. Kasagaran, sulod sa semana, pipila ka tawo lang ang makaplagan diha sa balay. Busa, ang mga Saksi ni Jehova nagpasibo sa kahimtang. Sama kang Jesus ug sa unang mga tinun-an, sila nangadto bisag asa ug bisag unsang panahona nga makaplagan ang mga tawo.—Mateo 5:1, 2; 9:35; Marcos 6:34; 10:1; Buhat 2:14; 17:16, 17.
11. Asa nagasangyaw ang mga Saksi ni Jehova karong adlawa, ug unsay miresulta?
11 Ang mga Saksi naghimog paagi ug maalamong nagsangyaw sa mga tawo diha sa dagkong mga parkinganan, mga shopping mall, mga pabrika, mga opisina ug mga negosyo, mga eskuylahan, mga estasyon sa mga polis, mga estasyon sa gasolina, mga hotel ug mga restawran, ug sa mga dalan. Sa pagkamatuod, sila nagsangyaw bisag asa makaplagan ang mga tawo. Ug kon ang mga tawo anaa sa balay, nan ang mga Saksi nagpadayon sa pagduaw kanila didto. Kining mapailin-ilinon ug praktikal nga paagi miresultag pag-uswag sa pag-apod-apod sa mga basahon sa Bibliya. Ang mga tawong karnerohon nakaplagan. Bag-ong mga pagtuon sa Bibliya nasugdan. Ang labing dakong edukasyonal nga buluhaton sa tawhanong kasaysayan ginahimo nga madasigon sa kapin sa lima ug tunga ka milyong boluntaryong mga ministro! Nakapribilehiyo ka ba nga nahimong usa kanila?—2 Corinto 2:14-17; 3:5, 6.
Unsay Nagpalihok sa mga Saksi ni Jehova?
12. (a) Sa unsang paagi ginatudloan ni Jehova ang iyang katawhan? (b) Unsay epekto niini nga pagpanudlo?
12 Unsay papel sa langitnong organisasyon sa Diyos niining tanan? Si Isaias nagtagna: “Ang tanan nimong mga anak mahimong mga tawo nga tinudloan ni Jehova, ug dagaya ang pakigdait sa imong mga anak.” (Isaias 54:13) Si Jehova maoy nagtudlo niining tibuok-kalibotang nahiusang panag-igsoonay pinaagi sa iyang makitang organisasyon sa yuta—sa mga Kingdom Hall, sa mga kombensiyon, ug sa mga asembliya. Panaghiusa ug pakigdait ang miresulta. Ang pagpanudlo ni Jehova nakapatunghag talagsaong mga tawo, gitudloan sa paghigugma sa usag usa ug sa ilang mga silingan sama sa ilang kaugalingon, dili sa pagdumot sa ilang mga silingan, bisan asa pa sila nagpuyo niining walay-panaghiusa ug nabahinbahin nga kalibotan.—Mateo 22:36-40.
13. Sa unsang paagi makatino kita nga nalangkit ang pagtultol sa manulonda sa buluhatong pagsangyaw?
13 Ang gugma maoy nagpalihok sa mga Saksi ni Jehova sa pagpadayon sa pagsangyaw bisan pa sa pagkawalay-interes o paglutos. (1 Corinto 13:1-8) Sila nahibalo nga ang ilang makaluwas-ug-kinabuhing buluhaton gidumala gikan sa langit, ingon sa gipamulong sa Pinadayag 14:6. Unsa ang mensahe nga giwali ubos sa pagtultol sa manulonda? “Kahadloki ninyo ang Diyos ug ihatag kaniya ang himaya, tungod kay ang takna sa iyang paghukom miabot na, ug busa simbaha ang Usa nga naghimo sa langit ug sa yuta ug dagat ug mga tuboran sa mga tubig.” Ang pagsangyaw sa maayong balita sa Gingharian nagbayaw sa ngalan ni Jehova. Ang mga tawo ginadapit sa paghimaya sa Maglalalang, Diyos, dili sa mga linalang ug sa buta nga ebolusyon. Ug nganong dinalian kaayo ang buluhatong pagsangyaw? Tungod kay ang takna sa paghukom miabot na—paghukom batok sa Dakong Babilonya ug sa tanang ubang mga bahin sa makitang sistema sa mga butang ni Satanas.—Pinadayag 14:7; 18:8-10.
14. Kinsay nalangkit niining dakong kampanya sa pagpanudlo?
14 Walay dedikadong Kristohanon ang nahigawas niining buluhatong pagsangyaw. Ang espirituwal nga mga ansiyano nanguna sa pagsangyaw uban sa kongregasyon. Ang nabansayng mga payunir bug-os nga okupado sa buluhaton. Ang masibotong mga magmamantala sa mensahe sa Gingharian, bisag makasangyaw lang ug pipila ka oras sa usa ka bulan o daghan, nagapakaylap sa mensahe ngadto sa tanang suok sa yuta.—Mateo 28:19, 20; Hebreohanon 13:7, 17.
15. Unsa ang usa ka timaan sa epekto sa pagsangyaw sa mga Saksi ni Jehova?
15 Aduna bay epekto kining tanang paningkamot diha sa kalibotan? Ang usa ka yanong pamatuod nga kini adunay epekto mao ang pagkapasundayag kanunay sa mga Saksi ni Jehova diha sa mga programa sa TV ug sa mga tudling sa mga balita. Kasagaran napasiugda niini ang atong pagkamalahutayon ug determinasyon sa pag-abot sa tanan. Oo, ang atong madasigon ug makanunayong presensiya makahatag ug dulot nga impresyon, bisan pag ang kadaghanan sa mga tawo dili modawat sa mensahe ug sa mga mensahero!
Ang Atong Kadasig sa Pagtapos sa Pagsangyaw
16. Unsang tinamdan ang kinahanglang ipakita sa limitadong panahong nahibilin?
16 Kita wala mahibalo kon pila na lay nahibiling panahon alang niini nga sistema sa mga butang, dili usab kinahanglang mahibalo kita basta ang atong motibo sa pag-alagad kang Jehova maputli. (Mateo 24:36; 1 Corinto 13:1-3) Apan kita nahibalo nga aron ang gugma, gahom, ug hustisya ni Jehova mapasundayag, ang maayong balita kinahanglang igawali “una.” (Marcos 13:10) Busa, bisan pag daghan na kaayong tuig nga kita maikagong naghulat sa kataposan niining daotan, walay-hustisya, ug mapintas nga kalibotan, kinahanglang madasigon natong tumanon ang atong dedikasyon sumala sa atong mga kahimtang. Kita tingali tigulang na o masakiton, apan kita makaalagad gihapon kang Jehova uban sa kadasig nga atong nabatonan sa atong batabata o mahimsog pang mga adlaw. Tingali dili na kita makagugol ug daghang panahon diha sa ministeryo sama sa atong nahimo kaniadto, apan makatino kita nga mahuptan gihapon nato ang hiyas sa atong paghalad sa pagdayeg ngadto kang Jehova.—Hebreohanon 13:15.
17. Pag-asoy ug usa ka makapadasig nga eksperyensiya nga makatabang kanatong tanan.
17 Busa, bata man o tigulang, magpakita kita ug kadasig ug ipakigbahin ang atong positibo bag-ong kalibotang mensahe sa tanan natong mahibalag. Sundon nato ang maulawong siyete-anyos nga batang babaye sa Australia kinsa miuban sa iyang inahan ngadto sa tindahan. Iyang nadunggan diha sa Kingdom Hall kon unsa ka hinungdanon nga mosangyaw ang tanan, busa iyang gibutangan ug duha ka brosyur sa Bibliya ang iyang bag. Samtang puliki ang iyang inahan sa counter, nawagtang ang batang babaye. Sa dihang gipangita siya sa iyang inahan, atua siya nagtanyag sa brosyur sa usa ka babaye! Miduol ang inahan ug nangayog pasaylo sa kahasol nga nahatag sa iyang anak. Apan ang babaye mahigalaong midawat sa brosyur. Sa dihang nagkauban pag-usab ang inahan sa iyang anak, iyang gipangutana siya kon sa unsang paagi nakabaton siyag kaisog sa pagduol sa usa ka estranghero. “Miingon lang ko, Pangandam na, Hala, Atraka! Ug ako miatraka!”
18. Sa unsang paagi ikapakita nato ang usa ka dalayegong espiritu?
18 Kitang tanan nagkinahanglan ug espiritu nga sama nianang batang taga-Australia, ilabina sa pagduol ug mga estranghero o bisan mga opisyal uban sa maayong balita. Kita tingali mahadlok nga dili tagdon. Dili nato kalimtan ang giingon ni Jesus: “Ayaw kabalaka bahin sa kon unsaon o unsay inyong ipamulong sa pagdepensa o unsay inyong isulti; kay ang balaang espiritu magatudlo kaninyo nianang taknaa mismo sa mga butang nga angay ninyong isulti.”—Lucas 12:11, 12.
19. Unsay imong hunahuna bahin sa imong ministeryo?
19 Busa sumalig sa tabang sa espiritu sa Diyos samtang moduol kamo sa mga tawo sa malulotong paagi uban sa maayong balita. Milyonmilyon nagbutang sa ilang pagsalig diha sa mga lalaki ug mga babaye nga kasagarang dili-takos kinsa ania karong adlawa ug mangawagtang ugma. Kita nagasalig kang Jehova ug sa iyang langitnong organisasyon—kang Kristo Jesus, sa balaang mga manulonda, ug nangabanhawng dinihogang mga Kristohanon—kinsa buhi sa walay kataposan! Busa, hinumdomi: “Sila nga ania uban kanato mas daghan pa kay sa nagauban kanila”!—2 Hari 6:16.
[Mga footnote]
a Alang sa dugang mga pananglitan, tan-awa ang 1994 Yearbook of Jehovah’s Witnesses, mga panid 217-20.
Unsay Imong Tubag?
◻ Unsang papel ang gidula sa langitnong organisasyon sa Diyos sa paglahutay sa katawhan ni Jehova?
◻ Unsang politikanhon ug relihiyosong mga elemento ang miatake sa mga Saksi ni Jehova sa ika-20ng siglo?
◻ Sa unsang paagi ang mga Saksi ni Jehova nagpasibo sa ilang ministeryo sa mga panginahanglan sa panahon?
◻ Unsay nagpalihok kanimo sa pagsangyaw?
[Hulagway sa panid 17]
Henryka Żur
[Kapsiyon sa panid 18]
Hapon
Martinique
Tinipong Bansa
Kenya
Tinipong Bansa
Ang mga Saksi ni Jehova nagasangyaw bisag asa ug bisag unsang panahona makaplagan ang mga tawo
[Hulagway sa panid 20]
Sayo niining sigloha, ang mga ponograpo gigamit sa pagpakaylap sa mensahe sa Gingharian