Ang Dakong Babilonya—Napukan ug Gihukman

“SIYA napukan! Napukan ang Dakong Babilonya, siya kinsa mipainom sa tanang mga nasod sa bino sa kasuko sa iyang pakighilawas!” “Ang Dakong Babilonya napukan, ug siya nahimong puloy-anan sa mga yawa ug tagoanan sa tanang mahugawng espiritu ug tagoanan sa tanang langgam nga mahugaw ug dulomtanan!”​—Pinadayag 14:8; 18:2.

Unsa ka makapakurat nga panagna! “Ang Dakong Babilonya napukan!” Sa daghan nang kasiglohan kining simbolikong pahayag nakapadani sa mga estudyante sa Bibliya. Nganong kini makapainteres kanimo? Tungod kay, sumala sa tagna sa Bibliya, ang sangpotanan sa Dakong Babilonya sa dili madugay makaapektar sa tanang katawhan. Ingon sa atong nakita diha sa Abril 1 ug Abril 15 nga mga isyu niining magasina, kining impluwensiyadong bigaon gipaila ingong bakak nga relihiyon sa kalibotanong imperyo ni Satanas.a

Apan sa unsang paagi siya napukan? Ug kanus-a?

Ang Babilonya Napukan Apan Wala Malaglag

Aron makuha ang bug-os nga kahulogan sa pagkapukan sa Dakong Babilonya, angay natong hisabtan kon unsay nahitabo sa dihang ang karaang Babilonya napukan niadtong 539 W.K.P. Sa maong panahon ang katawhan sa Diyos, ang Israel, naulipon sa duolan sa 70 ka katuigan. Karon ilang gilaoman ang kagawasan sumala sa mga pulong sa ilang mga propeta. (Jeremias 25:11, 12; 29:10) Unsa ka kulbahinam kadto para kanila sa dihang si Ciro nga Persiyanhon mipukan sa Babilonya ug mipagawas sa mga Hudiyo balik ngadto sa ilang balaang siyudad, ang Jerusalem!​—Isaias 45:1-4.

Apan, bisan tuod nga naputol na ang gahom sa Babilonya ibabaw sa mga Hudiyo, kini wala magpasabot nga natapos na ang karaang Babilonya. Ang historyano nga si Joan Oates misulat sa iyang librong Babylon: “Si Ciro misulod sa Babilonya nga madaogon, midumili sa pagpanglungkab ug mitudlo sa usa ka Persiyanhong gobernador, nga wala magtugaw sa relihiyosong institusyon ug sibil nga kagamhanan. . . . Tinuod, diha sa pribadong mga kinabuhi sa mga Babilonyanhon mipatim-awng diyutay lamag kausaban ilalom sa Persiyanhong pagmando. Ang relihiyosong mga pagsimba gipreserbar ug ang kalihokan sa pamatigayon miuswag.” Busa, bisan tuod nga siya napukan, nagpadayon ang kalihokan sa Babilonya, apan uban sa usa ka dakong kalainan​—ang katawhan sa Diyos, ang Israel, dili na ulipon. Sila mibalik sa Jerusalem aron ipasig-uli ang matuod nga pagsimba didto.

Sa dihang ang Gregong heneral nga si Alejandrong Bantogan misulod sa Babilonya mga 331 W.K.P., siya gihatagan ug mainitong pag-abiabi sa katawhan. Iyang gihukom nga iyang himoon kini ingong sidlakang kabisera, apan siya namatay nga wala matuman ang iyang tinguha. Kini nagpakita nga ang Babilonya nagpadayon gihapon nianang ulahing katuigan.

Busa, ang pagkapukan sa Babilonya niadtong 539 W.K.P. wala magkahulogan nga siya mihunong na sa paglungtad. Nagpadayon gihapon ang iyang mga kalihokan sa mga kasiglohan. Sa unsang paagi kini naghulagway sa modernong katumanan sa mga panagna nga nag-apil sa Dakong Babilonya?

Ang Dakong Babilonya Napukan

Adunay iyang katumbas sa pagkapukan sa simbolikong Dakong Babilonya, ang imperyo sa kalibotan sa bakak nga relihiyon. Sa unang bahin sa atong ika-20ng siglo sa wala pa ang 1919, ang mga Estudyante sa Bibliya, ingong mga Saksi ni Jehova karon, gipagawas gikan sa pagkaulipon sa espirituwal nga mga ideya ug mga paagi sa pagsimba sa bakak nga relihiyon. Bisan tuod nga gisalikway ang mga bakak nga pagtulon-an sama sa Trinidad ug ang pagkadili-mamatay sa kalag, sa gihapon sila namantsahan sa Babilonyanhong mga batasan. Daghan ang nag-ugmad sa kinaiyang nagpakamatarong sa kaugalingon. Ang pipila nagabayaw sa mga linalang, nagtugot sa pagsimba sa personalidad nga nagpunting kang Charles T. Russell, ang unang presidente sa Watch Tower Bible and Tract Society. Sila misaulog sa mga adlawng natawhan ug Pasko, nga walay bisan unsang pamatuod sa Bibliya. Ang krus sa gihapon anaa sa ilang mga hunahuna. Ang pipila gani nagsul-ob sa krus-ug-koronang mga timaan, samtang ang uban nangandoy nga mainila taliwala sa Kakristiyanohan. Unya, niadtong 1917, human gilayon sa kamatayon ni Russell, ang makahuluganong kausaban misugod.

Nianang tuiga ang Watch Tower Society mipatik ug usa ka komentaryo sa Pinadayag ubos sa ulohang The Finished Mystery. Giyagyag niining libroha ang klero sa Kakristiyanohan, apil ang ilang pagpakiglabot sa Dakong Gubat nga niadto miulbo sa Uropa. Ang pipila ka klero sa Protestante, usa ka partido sa mga hawas sa Dakong Babilonya sa Canada, mikuha niini ug midala ngadto sa ilang politikanhong mga higala sa gobyerno sa Canada ug gidemanda ang mga Estudyante sa Bibliya ingong mga manggugubot. Niadtong Pebrero 12, 1918, ang Watch Tower Society gidili sa Canada.

Ang klero sa Estados Unidos wala maglangan sa pagsunod sa panig-ingnan sa ilang mga igsoon sa Canada. Pipila ka adlaw lamang, ang mga publikasyon sa Bibliya sa Watch Tower giimbargo sa Los Angeles, California, E.U.A. Dayon, niadtong Mayo 1918, ang mga sugo sa pagdakop gipadala para kang J. F. Rutherford, ang bag-ong presidente sa Watch Tower Society, ug sa uban pang pito ka kaubanan. Niadtong Hunyo, uban sa makapahibulong nga katulin, kining Kristohanong mga lalaki gidala dayon ngadto sa korte ug gihukman. Ang pito gisilotan sa 20 ka tuig sa bilanggoan, ug ang usa sa 10 ka tuig. Unsa man ang reaksiyon sa mga klero? Si Martin Marty miingon sa iyang librong Modern American Religion: The Irony of It All: “Ang mga klero miliso batok sa mga Russellites [nga sa ulahi nailhang mga Saksi ni Jehova] ug nalipay sa pagkadungog sa mga biyente ka tuig nga silot nga gipahamtang sa gihukmang sad-an nga mga pangulo sa mga Saksi ni Jehova.” Ang mga hawas sa Dakong Babilonya mikatawa. Sila nahikalimot nga ang ulahing mokatawa mao ang kinamaayohang mokatawa.

Busa, niadtong 1918, ang simbolikong pagkaulipon ngadto sa Babilonya usab nahimong literal nga pagkabilanggo sa pipila ka katawhan ni Jehova. Ang balod sa paglutos sa mga Estudyante sa Bibliya midagsa sa Estados Unidos, Canada, ug uban pang mga nasod. Ang nasyonalistikong mga klero miorganisa ug mga panon sa manggugubot sa paglutos kanila sa kalungsoran. Ang mga Estudyante sa Bibliya gibugalbugalan ug gidagpasan ug gibunalan. Usa ka makauulawng rekord sa inhustisya ang gitukod batok niining gamayng grupo sa sinserong mga Kristohanon.b

Dayon, niadtong 1919, ang wala dahomang pagbalit-ad sa mga panghitabo nahitabo. Ang Dakong Gubat natapos niadtong Nobyembre 1918. Ang mga sentensiya batok sa mga opisyal sa Watch Tower Society giapela ingon nga usa ka kapakyasan sa hustisya. Sa kaulawan sa ilang relihiyosong mga kaaway, si Rutherford ug ang iyang kaubanan gipagawas gikan sa bilanggoan. Ingon sa gipahayag ni Marty: “Walay kalipay alang sa mga membro sa ortodoksong simbahan.” Sa kataposan, ang tanang gisumbong sa bug-os gipagawas. Ang mapihigong huwes nga Katoliko, si Martin T. Manton, kinsa sa ulahi gihimong “kabalyero sa orden ni St. Gregory nga Bantogan” pinaagi ni Papa Pio XI, midumili sa piyansa sa walo ka mga Saksi ug busa hinungdan nga sila inhustisyang gibilanggo sa siyam ka bulan. Ang iyang tinuod nga bulok napadayag sa ulahi, niadtong 1939, sa dihang gibilanggo tungod sa pagpangolekta ug hiphip!

Sa ilang paghigawas gikan sa bilanggoan niadtong 1919, si Rutherford ug ang iyang kaubanan mibalik ngadto sa hedkuwarter sa Watch Tower Society sa Brooklyn. Dayon giorganisar nila ang kinadakoang kampanya sa pagsangyaw sa Gingharian sa tibuok kalibotan sukad masukad. Ang mga Estudyante sa Bibliya miputol sa pusas sa kahadlok sa tawo ug nakapanlantaw nga tin-aw diin sila nagabarog may kalabotan sa tanang bakak nga relihiyon. Ang Dakong Babilonya mao ang ilang mapinadayonong kaaway ug kinahanglan nga ipasundayag ingong napukan. Ang matuod nga pagsimba kinahanglan nga ipasig-uli taliwala sa mga nasod.

Kadtong walay kahadlok nga mga Kristohanon mipadako sa ilang balay-ug-balay nga ministeryo. Sila usab miparada sa publiko, nga mibutyag sa bakak nga relihiyon uban ang mga karatola nga miingon: “Ang Relihiyon Usa ka Lit-ag ug Panikas” ug, “Alagara ang Diyos ug si Kristo nga Hari.” Ang bakak nga relihiyon padayon gihapon nga miuswag ug nagalihok, ingon sa gibuhat sa karaang Babilonya, apan kon bahin sa mga Saksi ni Jehova, ang Dakong Babilonya napukan na niadtong 1919. Sila nahigawas na gikan sa Babilonyanhong pagpit-os!

Ang Nagakaawop nga Impluwensiya sa Babilonya

Karon, mga 70 na ka tuig sa ulahi, atong makita nga sa daghang bahin sa yuta, ang impluwensiya sa Dakong Babilonya nagakaawop. Tinuod, nga ang relihiyon sa gihapon mipatim-awng nagauswag sa Estados Unidos, diin ang daghang emosyonal nga sektor sa katawhan gipahimuslan sa mga magwawali sa TV ug relihiyosong mga sikolohista. Apan, bisan pa ang pipila niining materyalistikong mga tabian sa dili pa dugay gibutyag ang ilang pagtakoban ug gipakaulawan. Ang relihiyon mipatim-awng nagauswag sa Republika sa Korea, diin ang mga simbahan sa Kakristiyanohan bug-os nga nalangkit sa politika. Dayag, bisan tuod nga ang Dakong Babilonya “napukan,” sa gihapon kini nagalihok.

Pagkahuman sa mga gubat sa kalibotan, hinunoa, ang relihiyong ortodokso nawad-an sa iyang mga sumusunod sa mga nasod sama sa Alemanya, Denmark, Sweden ug Britanya. Bisan ang mga nasod nga Katoliko sama sa Italya, Espanya, ug Pransiya namatikdan nga nagaus-os ang tradisyonal Katolikong mga batasan sama sa pagpangumpisal ug pagtambongan sa mga Misa. Ang gidaghanon niadtong kinsa nagtuon sa pagkapari mius-os. Ug ang kamatuoran nga karon ang papa mibati sa panginahanglan sa paglibot sa kalibotan nga labaw kaysa gihimo sa ubang mga papa sa kasaysayan maoy usa ka timailhan sa krisis sa simbahan.

Dugang pa, sukad niadtong 1917 kadaghanan sa mga sosyalistang mga nasod ang mipadaplin sa relihiyon ingong diyutayg bili ug miputol sa iyang kanhing politikal nga impluwensiya. Sa tibuok yutang gilapdon, ang tradisyonal nga relihiyon mao gihapon ang hinungdan sa dakong kayugot ug pagbubo sa dugo nga daghan sa mahunahunaong katawhan ang misalikway sa tanang relihiyon, kon kaha kini Kasadpanhon o Silanganon. Oo, ang simbolikong mga tubig diin ang Dakong Babilonya naglingkod, ang katawhan ubos sa iyang pagkontrolar, nagakahubas. Ang Dakong Babilonya gihukman, ug ang paglaglag kaniya haduol na.​—Pinadayag 16:12; 17:1, 15.

Babilonya—Nganong Gihukman

Unsay pasukaranan nga aduna si Jehova sa paghukom sa imperyo sa kalibotan sa bakak nga relihiyon? Seguro, ang pipila maghunahuna, lantawon niya nga adunay pabor ang tanang mga tunghaan, mga hospital, ug ubang mga buhat sa kaluoy nga gipasiugda sa nagkalainlaing relihiyon. Apan sa unsang paagi kining tanan makatumbas sa gidak-on sa sumbong ni Jehova batok sa mga relihiyon sa kalibotan? Atong susihon makadiyot ang sumbong ug ang rekord sa relihiyon.c

“Ang usa sa pito ka manulonda nga may pito ka panaksan miabot ug miingon kanako: ‘Umari ka, ipakita ko kanimo ang hukom batok sa bantogang daotan nga babaye nga naglingkod sa ibabaw sa daghang katubigan, kang kinsa nakighilawas ang mga hari sa yuta, ug sa kang kinsang bino sa pagkamahilawason nangahubog ang mga nagpuyo sa yuta.’” (Pinadayag 17:1, 2) Ingon sa among tin-awng gipakita sa mga isyu sa Abril 1 ug Abril 15, 1989, ang relihiyosong panagkunsabo sa mga magmamando, “ang mga hari sa yuta,” alang sa kadaotan sa katawhan latas sa kasaysayan, mahimong ikatandi sa kagawian sa mahigugmaon sa kaugalingon, makihilawasong bigaon. Apan ang sumbong nagpadayon.

“Ug akong nakita ang babaye nga hubog sa dugo sa mga balaan ug sa dugo sa mga saksi ni Jesus.” “Oo, diha kaniya hikaplagan ang dugo sa mga propeta ug sa mga balaan ug sa tanan niadtong kinsa gipamatay sa yuta.” (Pinadayag 17:6; 18:24) Ang pagkasad-an sa dugo mao ang sumbong batok sa Dakong Babilonya tungod sa iyang pagmartir sa tinuod nga mga Kristohanon sa daghang kasiglohan, apil ang pipila niadtong kinsa nangahas sa paghubad sa Bibliya ngadto sa kumong pinulongan sa katawhan, ug usab daghan niadtong kinsa nangahas sa pagbaton ug pagbasa sa Bibliya. Ang Dakong Babilonya sad-an usab sa dugo kon bahin sa tinuod nga mga Kristohanon kinsa nahimong mga martir sa dili pa dugay diha sa mga bilanggoan ug mga kampo konsentrasyon, kon kaha ubos sa Nazismo, Pasismo, o ubang mga diktador. Matikdi nga ang sumbong nagpunting sa “tanan niadtong kinsa gipamatay sa yuta,” diin kini nag-apil sa gatosan ka milyong katawhan sa tibuok nga yuta kinsa namatay sa gubat ug sa mga pagpanimalos nga gisangka latas sa kasaysayan sa mga tawong kinsa miangkon nga relihiyoso.​—Itandi ang Mateo 23:34-36; 2 Timoteo 3:5.

Ang paghukom sa Diyos batok sa Dakong Babilonya gipahayag sa laing matang sa kasal-anan nga iyang nahimo. Ang hukom miingon: “Pinaagi sa imong espiritismo ang tanang mga nasod nahisalaag.” (Pinadayag 18:23) Makaiikag, ang “espiritismo” naghubad sa Gregong pulong phar·ma·kiʹa, nga sa “panguna nagpaila sa paggamit ug medisina, mga droga, pagpanglamat; unya pagpanghilo; unya pagpamarang.”d Sa espirituwal nga diwa, ang bakak nga relihiyon nagahilo sa mga nasod, nga mipahisalaag kanila ngadto sa pagtuo sa bakak nga mga diyos ug mga pagtulon-an nga mipasimang kanila sa ilang pagtagad gikan kang Jehova ug sa isyu sa unibersohanong pagkasoberano. Pinaagi sa iyang bakak nga pagtulon-an sa pagkadili-mamatay sa kalag, ang bakak nga relihiyon nagpahimutang usab ug patukuranan sa tanang matang sa espiritismo ug pagpamarang, nga nagdasig sa pagkahadlok sa patay ug pagsimba sa katigulangan. Busa ang paghukom sa Diyos batok sa Dakong Babilonya bug-os gayod nga makataronganon. Ingon sa gisulat ni Juan: “Ang iyang kasal-anan nagatipun-og sungko sa langit, ug nahinumdoman sa Diyos ang iyang mga daotang binuhatan.”​—Pinadayag 18:5.

Unsay Angay Natong Buhaton?

Tungod sa pagkapukan sa Dakong Babilonya ug sa iyang hinukman nga kahimtang, unsay angay nga buhaton karon sa mga mahigugmaon sa kamatuoran? Ang tagna ni Isaias nga naghisgot sa karaang Babilonya mapadapat sa dakong gilapdon sa bakak nga relihiyon karong adlawa: “Pahilayo kamo, pahilayo kamo, gumula kamo gikan dinha, ayaw pagkamkam ug butang nga mahugaw; gumula kamo sa iyang taliwala, panaghinlo kamo sa inyong kaugalingon, kamo nga nanagdala sa mga sudlanan ni Jehova.” (Isaias 52:11) Kining dinaliang pagtawag katumbas sa giingon sa Pinadayag 18:4: “Unya akong nadungog ang laing tingog gikan sa langit: ‘Gumula kamo kaniya [Dakong Babilonya], akong katawhan, kon dili ninyo buot nga mahiapil sa iyang mga kasal-anan, ug kon dili ninyo buot nga makaambit sa iyang mga hampak.’”

Oo, kini mao ang panahon nga putlon ang tanan nga pagpakiglabot sa bakak nga relihiyon. Apan kon kita mogawas sa Dakong Babilonya, asa kita mopaingon? Ngadto sa matuod nga pagsimba ni Jehova sa pagpakig-uban sa iyang mga saksi. Adunay minilyon nga gikan sa tanang mga nasod sa yuta ang mibul-og ngadto niining simbolikong “bukid ni Jehova.” Ikaw usab gidapit sa pagtuon sa Bibliya uban sa mga Saksi ni Jehova ug makig-uban niining tinuod nga pagsimba.​—Isaias 2:2-4; 43:10-12.

Apan ang pangutana nagpabilin, Kon ang Dakong Babilonya napukan ug gihukman, unsa ang sunod balaanong butang nga pagahisgotan? Unsa unyay mahitabo sa imperyo sa bakak nga relihiyon sa kalibotan ni Satanas? Ang among sunod nga gula, ang Mayo 15, motuki niining pangutanaha subay sa mga tagna sa Bibliya.

[Mga Footnote]

[Hulagway sa panid 7]

Bisag napukan ang Babilonya sa 539 W.K.P., kini nagpadayong naglihok ingong siyudad sa gatosan ka tuig