Ang Ipasabot sa mga Balita

Giadmiter ang Ilang Pagkasad-an sa Dugo

“Atong gitawag ang gubat [Gubat sa Kalibotan II] nga usa ka balaan nga gubat ug nagpadalag mga tawo ngadto sa mga panggubatan,” miadmiter si Shingen Hosokawa, ang sekretaryo-heneral sa Opisina sa Templo sa Buddhist True Pure Land Otani Sect sa Hapon. “Kita natuhop sa kaulaw atubangan sa balaan nga Buddha.” Diha sa dili pa dugay nga “Serbisyo sa Paglubong Alang sa Tanang Nangamatay sa Gubat,” 45 ka tuig tapos sa Gubat sa Kalibotan II, ang sekta, nga adunay kapin sa lima ka milyong mga magtutuo, miadmiter sa tulobagon niini sa “kinabubut-ong pagtabang [sa mga paningkamot sa gubat] sa Gubat sa Kalibotan II.” “Walay paninugdan alang sa tradisyonal nga sugo sa Buddhista nga klarong nagapadayag sa tulobagon niini sa gubat diha sa relihiyoso nga rituwal,” miingon ang Asahi Shimbun.

Apan, dili ba angay nga ang mga relihiyon “matuhop sa kaulaw” tungod sa pag-agda sa daghang mga batan-ong lalaki sa pag-adto sa gubat? Sumala sa Kodansha Encyclopedia of Japan, halos ang tanang Buddhista, “Kristohanon,” ug Shinto nga mga denominasyon sa Hapon nagporma ug Relihiyosong Liga sa 1941 “aron sa paghatag ug espirituwal nga salipdanan alang sa nasod sa panahon sa gubat.”

Dili ikahibulong, naghisgot sa kalibotang imperyo sa bakak nga relihiyon ingong “Babilonyang Bantogan,” ang Bibliya nag-ingon: “Oo, diha kaniya hingkaplagan ang dugo . . . sa tanan nga gipamatay diha sa yuta.” (Pinadayag 18:2, 24) Si Jehova nga Diyos ba, nga Maghahatag sa tawhanong kinabuhi, magapaningil sa mga relihiyonista sa ilang pagkasad-an sa dugo? Ang mao gihapong kapitulo sa Pinadayag detalyadong nagbatbat sa mahitabo sa Babilonyang Bantogan, nga nagaingon: “Dihay usa ka manulondang kusgan nga mipunit ug bato nga ingon sa usa ka dakong galingan ug ngadto sa dagat kini gilabog niya, nga nagaingon: ‘Sa ingon niini kakusog ang bantogang siyudad sa Babilonya igalabog, ug dili na gayod siya igkita pa.”—Pinadayag 18:21.

Kulang ug mga Pari

Ang Buddhistang mga sekta sa Hapon gigukod sa mga suliran sa abandonadong mga templo. Ang mga silingan sa mga templo nga walay mga pari nga nagpuyo nagreklamo sa pagsuroysuroy sa mga bugoy diha sa dapit sa templo ug sa kapeligrohan sa pag-ulbo sa sunog. Ang sekta sa Zen Buddhist Myoshinji midesider sa pag-atiman sa suliran sa pagdispatsar sa mga templo o sa pag-ipon kanila nianang anaa sa duol. Kapin sa 20 porsiento sa 3,500 ka templo sa Myoshinji nga sekta sa tibuok Hapon walay pari nga nagpuyo o kaha wala alagarig mga pari nga anaa sa duol nga mga templo.

Nganong naingon man niini ang kahimtang? “Ang sekta naglisod sa pagkaplag ug mga kapuli sa mga pari nga miretiro,” nagkanayon ang The Daily Yomiuri, “ug ang batan-ong mga pari wala mosugot nga itudlo diha sa mga templo nga wala kaayoy mga tawo.” Ang sekta misulay sa pagbansay ug retiradong mga tawo ingong mga pari apan gibiyaan ang maong laraw. Bisan pag nag-ingon ang Myoshinji nga “dili kini panahon diin ang gidaghanon sa templong naglungtad maoy pamatuod sa kalig-on,” dili-ikalimod nga ang ilang impluwensiya nagakawala.

Makaiikag, ang basahon sa Bibliya nga Pinadayag nagtagna nga ang mga tubig sa Euprates, diin ang tibuok-yuta nga relihiyosong sistema—“Babilonyang Bantogan”—nagalingkod, ‘mahubas.’ (Pinadayag 16:12; 18:2, 9, 11) Unsay gihulagwayan sa mga tubig? “Ang mga tubig nga imong nakita . . . mao ang mga tawo ug mga panon ug mga kanasoran ug mga pinulongan.” (Pinadayag 17:15) Ang pagkahubas sa “mga tubig,” o mga sumusunod, dayag nga nagakahitabo sa Oryental nga gingharian sa Babilonyang Bantogan.

Ang Hingpit nga Solusyon

“Ang migim-aw nga mga hulga nga ato karong giatubang . . . dako kaayo ug epekto nga gawas kon adunay pagasugdang aksiyon karon sa pag-usab niana, sila sa tino mosangpot ug makaparalisar gastoso nga ekonomikanhong mga sangpotanan ug ang pagkahugno sa sosyal ug politikanhong mga institusyon,” nagkanayon ang Worldwatch Institute, sa Washington, D.C., U.S.A. Sa miaging tuig ang tinuig nga taho sa institute nagpasidaan sa makamatay nga mga balod sa init, mga hulaw, ug mga baha nga maoy yanong pagtilaw sa labi pang seryosong mga kalamidad nga modangat sa nadaot nang yuta. Ang mga bahin nga kinahanglang hatagan ug pagtagad mao ang pagkontrolar sa pagdaghan sa populasyon, kaarangan sa enerhiya, balik nga pagpalasang, ug pagsanta sa kagutom. Apan, ang institute nag-ingon nga ang dinaliang ‘globonhong plano sa aksiyon’ ug ‘bug-os nga mga kausaban sa sumbanan sa batasan sa tawo’ gikinahanglan aron mabatonan ang positibong mga resulta.

Kita ba makalaom nga makakita ug globonhong plano nga mohatag ug bug-os nga kausaban sa atong panahon? Oo, apan dili pinaagi sa mga paningkamot sa kang bisan kinsang tawo o grupo sa mga tawo. Nganong dili? Tungod kay ang propetang Jeremias misulat sa kasiglohang miagi: “Ang dalan sa tawo wala diha sa iyang kaugalingon. Kini wala sa tawo nga molakaw aron sa pagtultol sa iyang mga lakang.” Hinunoa, ang Bibliya nagsaad nga si Jehova nga Diyos “magalaglag niadtong nagalaglag sa yuta” ug “magatul-id sa mga butang” alang sa kaayohan sa mga molupyo sa yuta.—Jeremias 10:23; Pinadayag 11:18; Miqueas 4:3, 4.