Kapitulo 3
Ang mga Relihiyon sa Kalibotan Nagahatag bag Matarong nga Pagpanguna?
1. Unsang hinungdanong mga pangutana bahin sa mga relihiyon sa kalibotan ang gipatungha dinhi?
“ANG relihiyon maoy usa sa labing dagkong mga impluwensiya sa kasaysayan,”28 mipahayag ang The World Book Encyclopedia. Apan ang mga relihiyon ba sa kalibotan nahimong tinuod nga impluwensiya alang sa kalinaw ug kasegurohan? Nagtudlo ba sila sa ilang mga sumusunod nga ang inigsoong gugma angay mobuntog sa nasodnong mga utlanan ug rasanhong mga kalainan? Usab, ang mga iglesya ba sa Kakristiyanohan, Katoliko, Protestante, ug Ortodoksa, namatud-an sa ilang pangangkon nga nagasunod kang Jesu-Kristo ingong ang “Prinsipe sa Pakigdait”? O sila ba sa aktuwal nakapasamot sa mga pagdumtanay nga nagapameligro sa kaugmaon sa tawo? Ang pagsusi sa rekord mohatag sa katingalahang tubag.
2. Unsay ginasulti sa nagkalainlaing tinubdan bahin sa talaan sa kasaysayan?
2 Bahin niini, ang Parade Magazine miingon: “Ang kasaysayan nagatudlog mga pagtulon-an niadtong buot makakat-on. Ang usa sa labing pangunang mga pagtulon-an mao nga ang mga panag-away nga gipasukad sa relihiyoso ug sektaryanhong mga kalainan halos kanunay mao ang labing gahi, labing dugay ug labing lisod nga sulbaron.”29 Ug sumala sa gipahayag sa Chicago Tribune: “Ang matag dakong relihiyon nagasangyaw sa kalinaw ug pagkamanagsoon ug kaluoy, apan ang pipila sa labing mapintas ug panatikong mga pagpiot sa kasaysayan gihimo sa ngalan sa Diyos.”30 Nga diha sa hunahuna ang maong mga hitabo sa kasaysayan, ang editor sa mantalaan si C. L. Sulzberger haom nangutana: “Bisan pag mangil-ad ang ulohan, dili ba angay amgohon nga gawas pa sa ubang hinungdan—imperyalismo, rasismo, militarismo—ang relihiyon nahimong sa kanunay labi pang dakong kapeligrohan sa tawhanong kinabuhi?”31
3. Unsang makauulaw nga batasan sa relihiyon ang ginapadayag sa kasaysayan sa atong ika-20ng siglo?
3 Oo, ang kasaysayan namantsahan sa dugo sa panag-away nga gipaluyohan sa relihiyon. Sa ato lamang siglo, panahon ug pagkatapos sa duha ka gubat sa kalibotan, atong nasaksihan ang makauulaw nga buhat sa magkaubang mga relihiyonistang nagpatyanay sa usag usa—ang Katoliko nagpatay sa Katoliko, Protestante nagpatay sa Protestante, Muslim nagpatay sa Muslim, ug uban pa. Ug ang klero sa nagkaatbang nga mga kiliran, bisan pag may samang relihiyon, nagbendisyon sa mga sundalo nga sa dili madugay magpatay sa ilang relihiyosong mga igsoon.
4. (a) Nganong ang mga iglesya sa Kakristiyanohan mao ang labing salawayon? (b) Unsay gikomento sa usa ka editoryal bahin sa gubat?
4 Nahiapil sa labing salawayon bahin niini mao ang mga iglesya sa Kakristiyanohan. Ngano man? Kay sila nagaangkong nagahawas sa Diyos sa Bibliya ug sa iyang Anak si Jesu-Kristo, kinsa miingon: “Pinaagi niini ang tanan makaila nga kamo akong mga tinun-an, kon kamo maghigugmaay sa usag usa.” (Juan 13:35) Apan ang pinakagrabeng mga pagpatyanay nahitabo sa taliwala mismo sa Kakristiyanohan. Sumala sa gipahayag sa usa ka editoryal sa Waterloo Courier sa Iowa: “Ang mga Kristohanon walay pagpanuko bahin sa pagpakiggubat sa ubang Kristohanon. Kon sila nagapanuko pa, dili unta mahitabo ang kadaghanan sa pinakamaukyabong mga gubat sa Uropa. . . . Ang Gubat sa Kalibotan I ug II, nga naghatag sa kinalabwang mga rekord sa pagpatay sa mga Kristohanon sa mga Kristohanon, dili gayod unta mahitabo.”32
5. (a) Unsay tin-awng ginasulti sa Bibliya niadtong tinuod nagaalagad sa Diyos? (b) Unsang pangutana ang pagaatubangon sa mga sakop sa iglesya bahin sa ilang kaugalingong iglesya?
5 Niining bahina, ang Bibliya tin-aw: Kadtong matuod nga nagaalagad sa Diyos gisugo nga “pangitaa ang pakigdait ug sunda kana,” nga “pagasalsalon ang ilang mga pinuti nga mga punta sa daro,” ug dili “makakat-on pa sa gubat.” (1 Pedro 3:11; Isaias 2:2-4) “Kita maghigugmaay sa usag usa; dili sama kang Cain, kinsa naggikan sa usa nga daotan [Satanas nga Yawa] ug nagpatay sa iyang igsoon.” (1 Juan 3:10-12) Apan ang mga sumusunod sa mga relihiyon niining kalibotana nagapadayon sa pagpatay sa ilang mga igsoon, sama kang Cain, ug ang ilang klero nagpaluyo niadtong nagbuhat niana. Busa, kon sakop ka sa usa ka relihiyon, pangutan-a ang imong kaugalingon: ‘Kon ang tanan sa yuta sakop sa akong relihiyon, mohunong ba ang mga gubat ug kining yutaa karon usa na ka dapit nga may tinuod nga kalinaw?’
6. Unsay gipamatud-an sa nabahinbahin ug naggubatay nga kahimtang sa mga relihiyon sa kalibotan?
6 Ang nabahin ug naggubatay nga kahimtang sa mga relihiyon sa kalibotan nagapamatuod nga ang Diyos dili mao ang ilang tigpaluyo. Basin kini katingalahan niadtong nagahunahuna nga maayo ang tanang relihiyon sanglit nagaangkon kining nagahawas sa Diyos. Apan ang Bibliya tin-awng nagapakitang “ang Diyos dili usa ka Diyos sa kasamok kondili sa kalinaw.” (1 Corinto 14:33) Kini nagapakita usab nga adunay matuod nga relihiyon ug bakak nga relihiyon. Ug kini nagapahayag nga ang pagsimba lamang nga gipasukad sa kamatuoran, nga nahigawas sa pagkasalingkapaw, ang gipaluyohan sa Diyos.—Mateo 15:7-9; Juan 4:23, 24; Tito 1:16.
7. (a) Unsang ekspresyon ang gigamit sa Bibliya sa pagbatbat sa mga relihiyon sa kalibotan? (b) Unsang sala ang gipahamtang kanila?
7 Tungod kay ang mga relihiyon sa kalibotan nagdaot sa ilang kaugalingon tungod sa politikanhon, komersiyal, ug sosyal nga ganansiya, ang Bibliya nagahulagway kanila nga sama sa bigaon. Sa pagbatbat sa maong “bigaon,” kini nagaingon: “Nahikaplagan diha kaniya ang dugo sa . . . tanan nga gipamatay sa yuta.” (Pinadayag 17:1-6; 18:24) Oo, gipas-an sa mga relihiyon niining kalibotana ang bug-at nga pagkasad-an sa dugo maylabot sa tanang pinatyanay sa kasaysayan sa kalibotan! Tungod niini sila pagasinglon.
8. Sa unsang paagi ang mga pulong ni Jesus mahitungod sa “mga magtutultol nga buta” mapadapat karong adlawa?
8 Tin-aw, ang bisan unsang relihiyon kansang mga buhat nahisupak sa Bibliya dili gayod molampos sa pag-agak sa katawhan ngadto sa tinuod nga kalinaw ug kasegurohan. Kana ang hinungdan si Jesus miingon mahitungod sa bakak relihiyosong mga pangulo sa iyang adlaw: “Sila mga magtutultol nga buta. Nan, kon ang buta magaguyod ug buta, sa gahong mangahulog silang duha.” (Mateo 15:14) Sa susama, ang mga relihiyon sa kalibotan karong adlawa maoy “mga magtutultol nga buta” kon bahin sa gubat ug sa uban usab nga bahin sa kinabuhi.
Ginatuboy ba sa mga Relihiyon sa Kalibotan ang Maayong Kagawian?
9, 10. (a) Nganong ang pagsunod sa matuod nga mga sukdanan sa moralidad hinungdanon sa kalinaw ug kasegurohan? (b) Sumala sa gitudlo sa Bibliya, unsay nagapauswag sa maong moralidad?
9 Matagamtam ba ni bisan kinsa ang tinuod nga pakigdait uban sa iyang mga silingan o ang tinuod nga kasegurohan kon dili huptan ang matuod nga mga sukdanan sa maayong kagawian o moralidad? Kon walay maong mga sukdanan, ang pagbakak, pangawat, panapaw, ug susamang mga buhat mahimong kasagaran. Sa laing bahin, ang tinuod nga gugma sa silingan angay mopausbaw sa maayong kagawian.
10 Ginapahayag sa Bibliya ang hunahuna sa Diyos bahin sa moralidad niining paagiha: “Siya nga nahigugma sa iyang isigkatawo nakatuman sa kasugoan. Kay ang hugpong sa kasugoan, ‘Dili ka manapaw, Dili ka magpatay, Dili ka mangawat, Dili ka maibog,’ ug ang bisan unsa pang kasugoan, nalangkob niining pulonga, nga mao, ‘Higugmaa ang imong silingan ingon nga imong kaugalingon.’ Ang gugma dili mohimog daotan sa iyang silingan.”—Roma 13:8-10.
11, 12. (a) Ang tawo nga wala magsunod sa moral nga mga sukdanan makalaom ba sa pagtagamtam sa pagpakigdait uban sa Diyos? (b) Kinsay tukmang magabutang sa maong mga sukdanan?
11 Apan, labi pang hinungdanon kay niini, nagtuo ka ba nga ang usa ka tawo mahimong makigdait sa Diyos, nga makasalig sa pagbaton sa Iyang pabor ug panalipod, kon dili niya sundon ang mga sukdanan sa moralidad sa Diyos? Makatahod ka ba sa usa ka Diyos nga dili magbaod sa maong moralidad gikan niadtong nagaangkong nagaalagad kaniya?
12 Nga ibaod sa Diyos nga sundon ang iyang mga sukdanan, kinahanglang tin-awon niya kon unsa ang maong mga sukdanan. Kana gibuhat niya diha sa iyang Pulong, ang Bibliya. (2 Timoteo 3:16, 17) Ang pag-ingong ang matag tawo angay mohimo sa iyang kaugalingong mga sukdanan sa moralidad ug sundon kana dili makataronganon sama ra sa pag-ingong ang matag tawo angay mohimo sa iyang kaugalingong mga balaod sa trapiko ug sundon kana. Nasayod ka kon unsa unyay resulta niana. Ang Bibliya makataronganong nagapakita nga adunay usa ra ka dalan nga mopatungha sa pag-uyon sa Diyos. Sumala sa giingon ni Jesus, ang tanang ubang dalan motultol lamang sa kalaglagan.—Mateo 7:13, 14; Lucas 13:24.
13-15. (a) Unsang mga pangutana mahitungod sa moralidad ang kinahanglang isukna mahitungod sa mga sakop sa kaugalingong iglesya sa usa ka tawo? (b) Unsay ginaingon sa Bibliya nga pagabuhaton sa usa ka sakop sa kongregasyon nga mopadayon sa paglapas sa mga balaod sa Diyos? (c) Kini ginabuhat ba sa mga iglesya?
13 Ang mga iglesya sa Kakristiyanohan, ilabina, nagatuboy ba sa mga sukdanan sa Diyos sa moralidad ug sa ingon nagahatag sa pagpanguna alang sa uban pa sa kalibotan? Unsay ginapadayag sa mga kinabuhi sa daghang sakop sa maong mga iglesya? Sakop ka ba sa usa ka iglesya? Nan suknaa ang imong kaugalingon: ‘Kon ang tanan sa yuta magkinabuhi sama sa mga sakop sa akong relihiyon, matapos ba ang krimen, malimbongong mga buhat sa negosyo, away, ug seksuwal nga imoralidad?’
14 Ang Bibliya nagapasidaang “ang diyutay nga lebadura nagapaalsa sa tibuok minasa” ug “ang daotang mga panagkauban nagadaot sa mapuslanong mga batasan.” (Galacia 5:9; 1 Corinto 15:33) Tungod niini kini nagasugo usab sa mga Kristohanon nga “hunong sa pagpakig-uban ni bisan kinsa nga gitawag usa ka igsoon nga makihilawason o tawong dalo o tigsimbag diyosdiyos o tigpasipala o palahubog o tikasan, nga dili gani makigsalo sa maong tawo. . . . ‘Kuhaa ang tawong daotan gikan sa inyong taliwala.’”—1 Corinto 5:11-13.
15 Tinuod, ang usa ka tawo tingali masayop ug dayon maulian ra. Apan komosta kadtong nagabatasan nianang mga buhata? Kon ang maong mga tawo nagaangkong nagaalagad sa Diyos, sila salingkapaw. Tinong kayugtan mo ang pagkasalingkapaw, ug ang Bibliya nagapakitang kini ug kadtong nagabatasan niini ginadumtan usab sa Diyos. (Mateo 23:27, 28; Roma 12:9) Nan, komosta ang imong relihiyon? Nagasunod ba kini sa sugo sa Bibliya nga “kuhaa” kadtong nagapadayon sa paglapas sa mga sugo sa Diyos ug kadtong wala magpakitag tiunay nga paghinulsol? O nagatugot kining maong mga tawo ang magpabilin nga maayog baroganan, nga sa ingon nagapameligro sa uban? Kini ba sa ngabil nagasunod sa moralidad samtang sa aktuwal wala magpakabana sa buhat nga daotan, o nagakonsentir pa niana?—Mateo 15:7, 8.
16. (a) Unsay ginaingon karon sa daghang klerigo mahitungod sa seksuwal nga kagawian? (b) Unsay ginaingon sa Bibliya mahitungod sa maong kagawian?
16 Dugang ug dugang klerigo nagaingong ang pakighilawas, panapaw, ug homoseksuwalidad dili daotan sa tanang panahon. Apan sila wala mahiuyon sa panghunahuna sa Diyos. Ang iyang Pulong tin-awng nagaingon: “Ayaw kamo palimbong. Ni ang mga makihilawason, ni ang mga tigsimbag diyosdiyos, ni mga mananapaw, ni ang mga lalaking gitipigan alang sa dili-kinaiyanhong mga katuyoan, ni ang mga lalaki nga nagadulog sa mga lalaki, ni ang mga kawatan, ni ang mga tawong dalo, ni mga palahubog, ni mga tigpasipala, ni mga tikasan magapanunod sa gingharian sa Diyos.”—1 Corinto 6:9, 10.
Ang Sangpotanan sa Pagsalikway sa Pulong sa Diyos
17-19. (a) Giunsa pag-isip ni apostol Pablo ang Bibliya? (b) Unsay pag-isip sa daghang klerigo karong adlawa sa Bibliya?
17 Ang paninugdang hinungdan nga ang mga relihiyon niining kalibotana anaa sa nabahin kaayo, gubot nga kahimtang mao nga wala nila panumbalinga ang mga kasugoan sa Diyos nga hikaplagan sa iyang Pulong, ang Bibliya. Sa pagkamatuod, daghang klerigo wala magtuo nga ang Bibliya dinasig nga Pulong sa Diyos. Bisan pa niana, ang dinasig nga apostol Pablo mipahayag: “Ang tibuok Kasulatan gidasig sa Diyos.” (2 Timoteo 3:16) Giawhag usab kita ni Pablo nga tuohan ang Bibliya “dili ingong pulong sa mga tawo, kondili, sumala sa kon unsa kini, ingong ang pulong sa Diyos.” (1 Tesalonica 2:13) Tinong si Jehova nga Diyos, ang Labing Gamhanang Maglalalang sa kahibulongang uniberso, makabuhat sa usa ka basahon ug tinoon nga mahuptan niana ang integridad niana latas sa kasiglohan!
18 Apan, ang New Catholic Encyclopedia nagaingon: “Daghang mga pahayag sa Bibliya yanong dili matuod kon hukman sumala sa modernong kahibalo sa siyensiya ug kasaysayan.”39 Sa pagsulat diha sa U.S. Catholic, ang usa ka pari miingong ang paglalang sa yuta dili mahimong mahitabo sa paagi sa pagkabatbat sa Genesis. Ug bahin sa talaan niini sa paglalang sa tawo, siya miingon: “Ang tawhanong banay wala mosugod nianang paagiha.”40 Miingon ang usa ka Episcopal nga obispo: “Ang Bibliya nasudlan ug mga sayop, mga pagkadili-sibo ug mga panagkasumpaki. Busa hisabtan nganong ang dagkong Kristohanong mga iglesya wala mag-isip sa Bibliya nga dili masalaypon.”41 Sa Inglaterra, ang usa ka Anglikanong obispo nagtumong sa pagkabanhaw ni Kristo ingong “paglansis nga gigamit ang mga bukog.”42
19 Sa ingon, daghang klerigo nagatamay kaha sa Bibliya o wala magtudlo sa ilang mga sumusunod sa pagtahod niana ug pagsunod sa mga balaod nga anaa niana. Kana ang pangunang hinungdan sa makapalisang nga pagkawalay-alamag bahin sa Pulong sa Diyos sa tibuok Kakristiyanohan. Ang relihiyosong komentarista si M. J. McManus misulat niini mahitungod sa mga tigsimba: “Ang pila ka kiling sa relihiyon peligroso kaayong magdaot sa organisadong relihiyon sa katuigang 1980 sama ra sa dakong pagkawalay alamag bahin sa Bibliya.” Siya miingong “ang Bibliya nagapabiling wala mabasa, langyaw nga kasulatan” alang sa kadaghanang tigsimba.43
20, 21. Unsa ang sangpotanan sa pagsalikway sa mga pagtulon-an sa Bibliya?
20 Unsa ba ang sangpotanan nianang tanan? Nakapasundayag ba ang mga relihiyon sa kalibotan nga sila makatamay ra sa mga pagtulon-an sa Bibliya ug bisan pa niana makapatungha sa kalinaw o maayong mga kagawian taliwala sa ilang mga sumusunod? Sa kasukwahi, ang kahimtang nagkagrabe pa sa tibuok yuta. Ang kanasorang may dili-Kristohanong mga relihiyon sa mausbawon nahimong esena sa kagubot, pagbahinbahin, politikanhong kahiwian, ug nagkadaotang mga moral. Apan ang Kakristiyanohan ilabina sa dugay na mao ang kinagrabehang giatake sa krimen, imoralidad, pagkagiyan sa droga, rasanhong panag-away, ug gubat. Natuman ang gitagna sa kasaligang Pulong sa Diyos: “Ilang gisalikway ang pulong mismo ni Jehova, ug unsang kaalama ang ilang nabatonan?”—Jeremias 8:9.
21 Ang pamatuod dili ikalimod. Kini nagapakita nga ang mga relihiyon niining kalibotana dili usa ka matuod nga impluwensiya alang sa kalinaw ug kasegurohan. Ug ilang gipasagdang ang ilang mga sumusunod mawalay alamag bahin sa matuod nga paglaom—ang Gingharian sa Diyos. Nan, unsay ipasabot niining tanan?
Haduol na ang Kataposan sa mga Relihiyon sa Kalibotan
22, 23. Unsay ginaingon sa Bibliya nga mahitabo sa bakak nga mga relihiyon niining kalibotana?
22 Si Jesu-Kristo mipahayag: “Ang matag tanom nga wala itanom sa akong langitnong Amahan pagaibton.” (Mateo 15:13) Ang daotang mga bunga nga gipamunga sa mga relihiyon niining kalibotana nagapamatuod nga sila dili tinanom sa Diyos. Busa, ang Bibliya nagtagna sa umaabot nga pagkalaglag sa tanang bakak nga sistema sa pagsimba.
23 Sa paghisgot niining relihiyosong mga sistema sa simbolong samag-bigaong “Dakong Babilonya,” ang Diyos nag-ingon sa mosunod mahitungod sa tibuok-kalibotang imperyo sa bakak nga relihiyon: “Ang iyang mga sala nagtipun-og na abot sa langit, ug gihinumdoman sa Diyos ang iyang mga buhat sa inhustisya . . . sa usa ka adlaw ang iyang mga hampak moabot, kamatayon ug pagbangotan ug kagutmanan, ug siya bug-os pagaut-oton sa kalayo, tungod kay si Jehova nga Diyos, kinsa naghukom kaniya, maoy kusgan.”—Pinadayag 18:2, 5-8.
24. Sa unsang paagi moabot ang maong kalaglagana, ug gikan diin?
24 Matikding kining kalaglagana moabot uban ang katingad-ang kakalit, sama “sa usa ka adlaw.” Sa katingala ug kahiubos sa daghang tawo, ang bakak nga relihiyon pagalaglagon, pagalumpagon, pinaagi sa politikanhon mismong kanasoran nga sa dugay na maoy iyang gipakighilawasan ingong bigaon.—Pinadayag 18:10-17, 21; 17:12, 16.
25. (a) Sa Pinadayag 18:4, giawhag sa pagbuhat sa unsa ang mga tawong buot sa pag-uyon sa Diyos? (b) Unsay angay magadasig sa usa sa pagbuhat niana?
25 Busa ang balaang awhag mao: “Gumula ka kaniya, akong katawhan, kon dili mo buot makaambit sa iyang mga sala, ug dili mo buot makadawat sa bahin sa iyang mga hampak.” (Pinadayag 18:4) Ang pagbuhat niana nagkahulogang nakita sa usa ang bakak nga relihiyon sumala sa pagkakita niana sa Diyos. Kini nagkahulogang giayran kini sa usa tungod sa dunot nga mga bunga, pagkasalingkapaw, ug pagkamatuotuohon niini. Ang kayugot angay bation tungod kay gidaot sa bakak nga relihiyon ang Diyos atubangan sa katawhan ug tungod kay kini miabag sa pag-antos ug paglupig sa katawhan. (Roma 2:24; Jeremias 23:21, 22) Kon imong ilhon kini, imong kuhaon ang tanang pagpaluyo sa maong mga relihiyon, sa ingon ipasundayag ang bug-os nimong pagpaluyo sa paghukom sa Diyos kanila.
26. (a) Dugang pa, unsay kinahanglang pangitaon sa usa ka tawo aron iyang matagamtam ang kalinaw ug panalipod sa Diyos? (b) Unsang matang sa mga tawo ang pangitaon dihang mangita niadtong nagatuman sa matuod nga pagsimba?
26 Bisan pa niana, ang pagbiya dili sa yano igo. Kinahanglang imong pangitaon ug kaplagon ang matuod, dili-salingkapaw nga pagsimba nga mohatag kanimo sa kalinaw ug sa panalipod sa Diyos inig-abot sa gitagnang kalaglagan. Kadtong nagatuman nianang matuod nga pagsimba maoy mga tawong ‘nakasalsal na sa ilang mga pinuti nga mga punta sa daro, nga dili na makakat-on pa sa gubat.’ (Isaias 2:4) Sila kinahanglang maoy mga tawo nga nagtuo sa Pulong sa Diyos ug nagsunod niana sa ilang kinabuhi, nga nagatugot nga kana mao ang nagagiya sa ilang mga kinabuhi. (Salmo 119:105) Kinahanglang ilang ipakita ang tinuod, dili-salingkapaw nga gugma alang sa ilang isigkatawo. (Juan 13:35; Roma 13:8) Ang mao bang pagsimba nagalungtad karong adlawa? Nakaplagan kana sa milyonmilyon taliwala sa mga Saksi ni Jehova. Sila nailhan sa tibuok kalibotan tungod sa ilang pagsunod sa mga kasugoan sa Diyos nga anaa sa Bibliya. Ug ang kalinaw ug kasegurohang ilang natagamtam karon nagabayaw sa pagkatinuod ug sa gahom sa Pulong sa Diyos.
27. Unsay imong mapanid-an nga laktud pinaagi sa pagtambong sa mga tigom sa mga Saksi ni Jehova diha sa ilang Kingdom Hall?
27 Ang mga Saksi ni Jehova dulot nabalaka mahitungod sa peligrosong kahimtang nga nganha niana giganoy sa bakak nga relihiyon ang katawhan. Sila tim-os nagapaningkamot sa paghatag sa Pulong sa Diyos ug unang dapit sa ilang mga kinabuhi. Gidapit ka sa pagpaniid sa ilang mga tigom diha sa ilang Kingdom Hall ug pagsusi mismo sa imong kaugalingon sa gidak-on sa pagbanaag nila sa espiritu sa Diyos ug pagtagamtam sa kalinaw ug kasegurohang ipatungha niini. Imo usab makita sa unsang paagi sila nagatuon ug nagapadapat kon unsay gikinahanglan sa Diyos niadtong makalabang-buhi sa umaabot nga kalaglagan ug magapuyo sa iyang matarong Bag-ong Kahikayan ilalom sa pagmando sa iyang langitnong Gingharian.
[Kahon sa panid 29]
Dugang ug dugang klerigo nagadawat sa ginatunglo sa Bibliya sama sa seksuwal nga imoralidad, sumala sa ginapakita niining pananglitang mga pangunang-ulohan ug balita:
“Kon Kanus-a Mahimong Maayo ang Butang Daotan ang Klero Mosulti Kanato.” “[Ang Iglesya sa Inglaterra] karon nagahukas sa karaan awtoritaryanhong panagway niini. Ang sekso una sa kaminyoon, uban sa usa o daghang kaparis, . . . sukad karon pagaisipong madawat sa moral.”—Alberta Report.33
“Mga Pastor Walay Timik Bahin sa Sekso Una sa Kaminyoon.” “Ang mga pastor sa Amerika sa pagkasad-an naghilom bahin sa pagwali bahin sa una-kaminyoong sekso . . . Mahadlok sila nga mawad-an sa pipila sa ilang mga sakop sa parokya. Si Isaias may nailhang ingong mga pari. Sa Kapitulo 1 sa iyang basahon, iyang gikutlo ang Ginoo nga miingon bahin kanila, ‘Itago ko ang akong mga mata gikan kaninyo; bisan pag kamo mohimog daghang pag-ampo, ako dili mamati; ang inyong mga kamot napuno sa dugo.’”—Telegraph, North Platte, Nebraska.34
“Pagpanapaw sa Malumong Kahayag.” “Ang Ingles nga klerigo . . . nagpataas sa mga kilay sa iyang gipahayag ang dili na estriktong hunahuna sa Iglesya bahin sa Ikapitong Sugo. . . . ‘Ang atong tinamdan mao nga mahimong mahigugmaon inay mahukmanon,’ matud niya.”—The Sunday Times, Perth, Australia.35
“Ang mga Unitaryan Nagaduso sa mga Kaminyoon sa Homoseksuwal.”—The New York Times.36
“Ang usa ka espesyal nga pundok sa United Church of Canada nagpaluyo sa ordinasyon sa aktibong mga homoseksuwal ingong mga ministro.”—The Toronto Star.37
“Himoong Legal ang Prostitusyon—Kini Mao ang Balaang Solusyon.”—Editoryal sa usa ka Katolikong monsenyor sa Philadelphia Daily News.38
[Mga hulagway sa panid 25]
Ang klero nagmantsa sa ilang mga kamot sa dugo pinaagi sa pagpaluyo sa mga diktador