Babilonya—Sentro sa Bakak nga Pagsimba

“SIYA nahulog na! Ang Babilonya nahulog na, ug ang tanang kinulit nga larawan sa iyang mga diyos gidugmok niya sa yuta!” Unsang matang sa siyudad ang Babilonya nga kabahin niana mitagna si Isaias? Kana hinungdanong ilhanan aron hisabtan nato ang kahulogan sa modernong Dakong Babilonya.​—Isaias 21:9.

Ang karaang Babilonya ilado tungod sa iyang pagsimba sa paganong mga diyos ug mga diyosa. Sa iyang librong Babylonian and Assyrian Religion, si Propesor S. H. Hooke miingon: “Ang Babilonya mao ang siyudad diin si Marduk naghupot ug pangunang dapit taliwala sa ubang mga diyos nga gisimba didto. . . . Sa Babilonya sa panahon ni Nabukodonosor II dihay dili momenos kalim-ag-walo ka templo nga iya sa gitudlo nga mga diyos, nga walay paghisgot sa daghang ubang templo nga wala ikatudlo sa ingon. Busa hisabtan unsa ka dako ang gidula gayod sa paring matang diha sa kinabuhi sa usa ka dakong siyudad.” Giingon nga ang templo ni Marduk sa Babilonya may 55 ka dugang kapelya. Nagapadumdom gayod kini sa daghang templo, mga simbahan, ug mga katedral karong adlawa nga may dugang mga kapelya alang sa ubos-ubos nga mga diyos, mga santos, ug mga Madona!

Ang Babilonya maoy usa ka sentro sa idolatriya sa kulto sa mga diyos. Ang usa ka asoy nagaingon nga ang mga pari ug mga matinuohon “tighatag ug hinobrang pagtagad sa ilang sagradong mga imahen, nga nag-isip sa mga estatwa ingong mga tigpataliwala uban sa mga diyos. Ang mga estatwa naputos sa mahalong mga biste, inadornohan sa mga kulentas, mga pulseras, ug mga singsing; sila nagpahulay sa dagkong mga katre ug gipagawas sa prosisyon sa mamala ug sa tubig nga gibaktas, gipasakay sa mga karwahe ug pribadong mga sakayan.”a Pagkasama gayod sa pagsimba nga gihatag ngadto sa mga diyos, mga santos, ug mga Madona sa modernong Hinduismo, Budhismo, ug Katolisismo, nga niana sila samang nagaprosisyon sa ilang mga imahen agi sa kadalanan ug kasubaan ug dagat!

Ingong dugang panig-ingnan sa kasamahan sa karaang Babilonya ug sa modernong relihiyon, tagda ang mosunod nga kahubitan nga gikuha gikan sa samang ensiklopedia: “Ang matinumanon niyang mga magtutuo nagatawag kaniya pinaagi sa labing tam-is nga mga ngalan: Siya dili lamang diyosa ug senyora kondili maluluy-on usab nga inahan, siya nga nagapamati sa mga pag-ampo, siya nga nagapataliwala . . . siya nga naghatag ug kinabuhi sa uniberso ug sa katawhan.” Itandi kana sa mosunod nga pangadye gikan sa El Santo Rosario (Ang Balaang Rosaryo): “Nagapasalamat kami kanimo, Soberanong Prinsesa, tungod sa mga pabor nga among ginadawat matag adlaw gikan sa imong maluluy-on nga kamot; magmaluluton kaayo, Senyora, aron kami mailalom sa imong panalipod ug landong karon ug sa walay kataposan.”

Kinsa ang ulohan niining kahubitana ug pangadye? Daghan ang mohinapos dihadiha, “Ang Birhen Maria.” Kanang tubaga katunga rang tukma. Ang pangadye gipahinungod kang Maria. Bisan pa niana, sumala sa gipahibalo kanato sa Las Grandes Religiones Ilustradas, ang unang pangutlo maoy kahubitan kang Ishtar, ang “Senyora sa gugma,” ang Babilonyang diyosa sa pertilidad, gugma, ug guerra. Usahay siya ipakita diha sa mga imahen “ingong usa ka inahan nga nagapatutoy sa iyang batang lalaki.”b Lain pang panig-ingnan nga ang modernong relihiyon dili lahi kaayo sa karaang Babilonya!

Makatandi usab kita sa karaang Babilonya sa iyang mga pagtuo sa tawhanong kalag ug sa tinaggutlong mga diyos niini ug, karong adlawa, ang susamang mga pagtuo sa dili-mamatay nga kalag ug sa mga tinaggutlong mga diyos sa modernong relihiyon. Ang ebidensiya nagalig-on sa atong pagsabot nga ang “Dakong Babilonya” maoy nahiangay nga simbolo sa tibuok-kalibotang imperyo sa bakak nga relihiyon ni Satanas.

Babilonya—Hambogirong Kaaway sa Matuod nga Pagsimba

Ang Babilonya mao usab ang hambogirong kaaway sa karaang katawhan ni Jehova, ang Israel, ug usa ka tigtamay sa ilang matuod nga pagsimba. Gilaglag sa Babilonya ang templo sa Jerusalem sa 607 W.K.P., gidala ang tanang bililhong panudlanan sa pagsimba kang Jehova, ug gipasipad-an kadtong mga panudlanana sa panahon sa kombira ni Belsasar.​—Daniel 5:3, 4.

Sa samang paagi, sa modernong panahon ang Dakong Babilonya maoy walay-hunong nga magsusupak sa matuod nga pagsimba. Sa kadaghanang mga hitabo diin gilutos ang mga Saksi ni Jehova, ang klero ang nagpasiugda niana, kadaghanan pinaagi sa ilang mga pakig-alyansa sa politikanhong mga magmamando.

Usa ka tin-awng panig-ingnan sa gidasig-sa-klerong pagsupak mobalik pa sa 1917, ug kining sumbanana gisublisubli. Nianang tuiga ang Internasyonal nga mga Estudyante sa Bibliya, sumala sa pagkaila niadto sa mga Saksi, mipatik sa librong The Finished Mystery. Ang pila ka panid niining libroha gisabot nga subersibo sa Canadianhon ug U.S. nga kaklerohan, kansang kanasoran nalambiggit sa Gubat sa Kalibotan I. Midali sila sa pagpahibalo sa ilang politikanhong mga hinigugma bahin niining basahona. Ang sangpotanan? Sumala ni Propesor Martin Marty, diha sa iyang librong Modern American Religion​—The Irony of It All: “Ang klero mikontra sa Russellites [mga Saksi] ug mihugyaw sa pagkabati nga ang mga sentensiyang tagbayente-kuwatro anyos [tungod sa giingong pagluib sa kagamhanan] ipahamtang sa gihukmang sad-ang mga pangulo sa mga Saksi ni Jehova.”

Apan unsa ang reaksiyon sa klero pila ka bulan sa ulahi dihang ang maong mga pangulo gihukmang dili sad-an sa mga sumbong? “Walay mga paghugyaw gikan sa mga membro sa ortodoksong simbahan.” Ang mga Saksi nag-inusarang mibarog dapig sa mga prinsipyo sa Bibliya “sa punto nga ilang gisupak ang pederal nga gobyerno tungod sa ilang relihiyon.” Ang mga Saksi wala ug dili gayod sa kinabubut-on mahimong tigpaitoy-itoy nga mga kauban sa politikanhong mga magmamando, dili bisan ubos sa pagmandong Nazi sa Alemanya o ubos sa Pasistang pagmando sa Italya, Espanya, ug Portugal.

Babilonya Gibadlong ug Gipakaulawan

Nan, pagkahaom sa dihang ang Pinadayag nag-ingon nga ang Dakong Babilonya “nahubog sa dugo sa mga balaan ug sa dugo sa mga saksi ni Jesus” ug “nakaplagan diha kaniya ang dugo sa mga manalagna ug sa mga balaan ug sa tanan nga gipatay sa yuta.” Ang pagkasad-an sa dugo sa relihiyon sa kalibotan tungod sa aktibong pagsalmot o pasibong pagkonsentir sa mga gubat ug paglutos sa matuod nga mga Kristohanon masubay latas sa kasiglohan.​—Pinadayag 17:6; 18:24.

Ang Dakong Babilonya, ang tibuok-kalibotang imperyo sa bakak nga relihiyon, nagpahimulos sa kaluhoan ug gahom sa tibuok kasaysayan. Apan nagpasidaan ang usa ka manulonda kang Juan nga moabot ang adlaw sa dakong bigaon. Ang asoy nagasugid kanato: “Ug siya misinggit sa makusog nga tingog, nga nag-ingon: ‘Siya nahulog na! Ang Dakong Babilonya nahulog na, ug siya nahimong pinuy-anang dapit sa mga demonyo ug tagoanang dapit sa tanang mahugaw nga gininhawa ug tagoanang dapit sa matag mahugaw ug dulumtanang langgam!’”​—Pinadayag 18:2.

Kanus-a ba mahulog ang Babilonya! O nahulog na ba siya? Sa unsang paagi siya makaagom sa pagkahulog? Ug sa unsang paagi ikaw maapektahan niana? Kini ug langkit nga mga pangutana pagatubagon sa among sunod nga isyu sa Ang Bantayanang Torre.

[Mga Footnote]

[Hulagway sa panid 8, 9]

Ang Dakong Babilonya nagsukad sa karaang Babilonyanhong relihiyon