Nakahinumdom Ka Ba?

Nalingaw ka ba sa pagbasa sa dili pa dugay nga mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

◻ Unsa ang pasukaranan sa malamposong kaminyoon?

Kinahanglan ang mga kapikas magpakita ug mutuwal nga gugma, pagtahod, ug pagkamaunongon, magapabili sa mga hiyas sa usa ug usa ug magtuon sa pagpalabay ug pagpasaylo sa kahuyangan sa usa ug usa.​—5/15, panid 15.

◻ Sa unsang mga bahin nga ang mga kasugoan sa Diyos nga gihatag sa Israel nakatabang kanila sa pagpabiling balaan?

Ang mga kasugoan nakatabang sa mga Israelinhon sa pagpabiling mahinlo sa espirituwal, moral, mental, pisikal, ug seremonyal, ang ulahi nalangkit sa ilang pagsimba.​—6/1, panid 11.

◻ Unsay kahulogan sa ekspresyong “hinlo nga hunahuna”?

“Ang hinlo nga hunahuna” nagkahulogan sa tinuyong singkamot sa atong bahin nga mahinlo sa hunahuna pinaagi sa pagpalandong sa mga butang ‘matuod, matarong, ug maputli’ ug pinaagi sa ‘padayon sa pagpalandong niining mga butanga.’ (Filipos 4:8)​—6/1, panid 16.

◻ Nganong miingon si Jesus nga ang iyang presensiya “sama sa kilat”? (Lucas 17:24)

Si Jesus dinhi nagpakita nga ang pamatuod sa iyang presensiya sa gahom sa Gingharian makita sa dako nga luna, nga makahimo sa tanan nga gustong makakita niana makahibalo sa kamatuoran.​—6/15, panid 8.

◻ Nganong ang Kristohanong pamatasan direktang nalangkit sa Kristohanong gugma?

Ang Kristohanong pamatasan—ang paagi sa atong pakiglabot sa uban, ang atong pamarog, atong taras, atong naandang batasan​—maoy timaan sa kadako sa atong pagtagad sa ubang tawo. Kini nagapakita sa kalalom sa atong gugma alang kanila. (Juan 13:35; 1 Corinto 10:24; 13:4-7)​—6/15, panid 14.

◻ Kanus-a mahitabo ang kasal ni Jesu-Kristo ug sa “iyang asawa” nga 144,000 ka matinumanong dinihogang sumusunod? (Pinadayag 19:7, 8)

Ang kasal mahitabo human sa gubat sa Armageddon ug sa pagtambog sa bung-aw kang Satanas. Nianang panahona mabayaw na ni Jehova ang iyang pagkasoberano pinaagi sa pagkuha gikan sa yuta niadtong naghagit sa iyang pagmando ug pinaagi sa pagwagtang sa daotang impluwensiya ni Satanas ug sa iyang mga demonyo.​—7/1, panid 24.

◻ Sa unsang paagi ang yugo sa pagkatinun-an makahatag kapahulayan, sumala sa gipakita sa mga pulong ni Jesus sa Mateo 11:29, 30?

Sanglit makataronganon si Jesus, makahatag kapahulayan ang pagtrabaho ubos niya ilalom sa samang yugo. Iyang ginatan-aw ang atong mga limitasyon ug mga kahuyangon. Ug unsa ka dakong kapahulayan ang pagsulti sa uban nga sila mahimong mabuhing walay kataposan diha sa Paraiso.​—7/15, panid 20.

◻ Unsa ang “paglalang pag-usab” nga gihisgotan ni Jesus diha sa Mateo 19:28?

Gipakita ni Jesus dinhi nga dunay “paglalang pag-usab” sa mga kahimtang sa yuta aron ang mga butang mahisama sa kahimtang niini diha sa tanaman sa Eden.​—8/1, panid 9.