Mga Pangutana Gikan sa mga Magbabasa
◼ Ang mga manulonda maoy mga espiritu, nga walay materyal nga mga lawas, busa nganong inyo silang gipakita diha sa mga ilustrasyon ingong may mga pako? Dili ba kini relihiyoso lang nga tradisyon?
Kasagarang ihulagway namo ang mga manulonda uban ang mga pako tungod sa simbolikong mga kabatbatan nga makita diha sa Bibliya.
Husto ka sa pag-ingon nga ang espiritung mga linalang walay materyal nga mga lawas uban sa literal nga mga pako—ni mga nawong, mga kamot, mga tiil, o ubang parte sa lawas. Apan, may panahon, sa dihang ang mga manulonda nagpakita sa mga alagad sa Diyos, ang ilang hitsura sama sa normal nga mga tawo, kay sila nasaypan nga ingon.—Genesis 18:2, 22; 19:1; Maghuhukom 6:11-22.
Hinuon, usahay ang mga tawo nakadawat ug mga panan-awon sa mga manulonda ug nagbatbat kanila. Ang propetang si Ezekiel nakakitag “upat ka buhing linalang,” ug sa ulahing panan-awon, iyang gipaila kini sila ingong mga manulonda sa ranggo nga nailhang mga kerubin. (Ezekiel 1:5; 9:3; 10:3) Ang matag usa sa maong mga manulonda may upat ka pako, nga nagpakita sa ilang katakos sa pagsanong nga madali sa bisan unsang direksiyon sa mga sugo sa Diyos. “Sila wala moliso sa dihang sila mipanaw; sila sa matag usa mipanaw sa matul-id sa unahan . . . Diin moadto ang espiritu, sila mangadto didto. Sila wala moliso samtang sila mipanaw.”—Ezekiel 1:6, 9, 12.
Apan ang mga manulonda diha sa panan-awon dili kanunay samag dagway. Ang manulondang mga linalang nga gitawag mga serapin nga nakita ni Isaias unom ug pako. (Isaias 6:1, 2) May mga kalainan pa tali sa mga panan-awon ni Ezekiel. Sa nahauna, ang mga manulonda may mga tiil, mga kamot sa ilalom sa matag usa sa upat ka pako, ug upat ka nawong (sama sa nawong sa usa ka tawo, usa ka leyon, usa ka laking baka, ug usa ka agila). Sa sunod niyang panan-awon, usa sa mga nawong maoy sama sa iya sa kerubin inay sama sa laking baka, tingali nagpaila sa dagkong gahom sa mga kerubin. Sa ulahi pa gayong panan-awon sa mga dekorasyon sa simbolikong templo, si Ezekiel nakakitag mga kerubin nga duha rag nawong, ang usa sa iya sa usa ka tawo ug ang lain sa iya sa usa ka leyon. (Ezekiel 1:5-11; 10:7-17; 41:18, 19) Sa Labing Balaan sa tabernakulo, ingon man sa templo nga gitukod ni Solomon sa Jerusalem, dihay mga kerubin nga tagurhag pako. Kini sila didto sa bulawang tabon sa kaban nga gitawag ang arka sa pakigtugon. Ang duha ka bulawang kerubin nag-atubangay, ug ang duruha tagurhag pako nga nagbuklad ibabaw sa Arka. (Exodo 25:10-22; 37:6-9) Ibabaw sa Arka (ug sa tabon niini) diha sa templo ni Solomon nagbarog ang duha ka dagkong hinal-opan-ug-bulawang mga kerubin, ang matag usa may duha ka nagbuklad nga mga pako.—1 Hari 8:6-8; 1 Cronicas 28:18; 2 Cronicas 5:7, 8.
Si Josephus misulat: “Mahitungod [niadtong] mga kerubin mismo, walay makasulti o makahanduraw kon unsay ilang hitsura.” Busa, ang pila ka eskolar ug mga magdidibuho nagpasukad sa ilang paghulagway sa mga manulonda (ilabina ang mga kerubin) sa giingong karaang mga paghulagway sa mga diyos diha sa porma sa pak-ang mga hayop. Apan ang mas kasaligang giya mao ang komento ni Ezekiel nga kadtong iyang nakita “susama sa yutan-ong tawo.” (Ezekiel 1:5) Busa sa dihang ang langitnong mga manulonda ihulagway diha sa among mga basahon, kasagarang ihulagway namo sila diha sa dagway sa tawo. Ipadayag namo sila uban sa mga pako tungod sa daghang kabatbatan sa Bibliya sa nagkalainlaing mga manulonda ingong may mga pako ug tungod sa mga komento bahin sa mga manulonda nga “nagalupad.”—Pinadayag 14:6; Salmo 18:10.
Sa kataposan, ang panid 288 sa Pinadayag—Haduol na ang Sangkoanan Niini! naghulagway sa pak-ang langitnong linalang, nga may korona sa iyang ulo ug yawi sa iyang kamot. Kini usa ka tin-aw nga paghulagway sa Pinadayag 20:1: “Nakita ko ang usa ka manulonda nga nanaog gikan sa langit nga may yawi sa bung-aw ug usa ka dakong tanikala sa iyang kamot.” Gisabot namo ang maong manulonda nga may yawi nga mao ang hinimayang Jesu-Kristo. Ang ilustrasyon nagpakita kaniya nga may mga pako sa pagpahiuyon sa kamatuoran nga ang mga manulonda nga nakita sa panan-awon kasagarang may mga pako.