Kapitulo 22
Ang Diyos sa “Prinsipe sa Pakigdait” Mahimong “Tanang Butang Ngadto sa Tanan”
WALA magdugay tapos sa iyang pagkabanhaw, ang “Prinsipe sa Pakigdait” miingon ngadto sa usa sa iyang disipulo: “Ako mosaka ngadto sa akong Amahan ug sa inyong Amahan ug sa akong Diyos ug inyong Diyos.” (Juan 20:17) Pinaagi niadtong mga pulonga iyang gidawat nga ang iyang langitnong Amahan mao usab ang iyang Diyos, ang bugtong Usa nga iyang gisimba. Niini nga pagsimba siya naghatag pananglitan alang sa tanang mga linalang sa tibuok nga kalangitan ug yuta.
2 Pagkamaayong panig-ingnan sa “Prinsipe sa Pakigdait” alang sa tanang gihimong hingpit nga katawhan dihang maunongong magpasakop siya sa iyang kaugalingon sa linain nga paagi diha sa Usa nga mao ang bugtong Soberano sa tibuok nga uniberso! Kini ipadayag nga dili-hitupngan sa kataposan sa iyang Usa ka Libo ka Tuig ibabaw sa katawhan, sa dihang napasig-uli na ang pakigdait, kasegurohan, ug kahusay sa tibuok yuta. Diha sa dili-masayop nga tagna, kita gipasaligan niini:
3 “Unya, magaabot ang kataposan, inigtugyan na niya sa gingharian ngadto sa Diyos ug Amahan, tapos niya mawagtang ang tanang kagamhanan ug tanang awtoridad ug gahom. Kay kinahanglang magahari siya hangtod nga ang tanang mga kaaway niya ikabutang na niya diha sa ilalom sa iyang mga tiil. Ug ang kataposang kaaway nga pagalaglagon mao ang kamatayon. Ug sa diha nga mahisakop na ang tanang mga butang ilalom kaniya, nan ang Anak pasakopon usab ilalom kaniya nga mao ang nagapahiluna sa tanang mga butang ilalom kaniya, aron ang Diyos mahimong tanang butang ngadto sa tanan.” (1 Corinto 15:24-26, 28) O sama sa pagkahubad niana sa The Amplified Bible sa ulahing bahin sa bersikulo 28: “Aron nga ang Diyos mahimong tanan ngadto sa tanan—nga mao, ang tanang butang ngadto sa tanan, nga supremo, ug ang nagapalihok ug nagakontrolar nga butang sa kinabuhi.”
4 Dihang itugyan sa “Prinsipe sa Pakigdait” ang Gingharian sa iyang Diyos sa kataposan sa Usa ka Libo ka Tuig nga Pagmando, mahibalo ang mga pomuluyo sa yuta niining aksiyona sa ilang gisagop nga Amahan. Pinaagi kaniya ingong ilang Harianong Sulondan, sila magpasakop usab sa bag-ong bahin ngadto sa Labing Hataas nga Diyos. Karon sa unang higayon sila mohatag ug mahigugmaong pagpasakop direkta kang Jehova, oo, pagsimba, sa bug-os nga katim-os ug kamatuoran, nga dili na magkinahanglan pa sa mga pag-alagad ni Jesus ingong saserdote, dili na bisan diha sa pag-ampo.
5 Niining paagiha ang Labing Hataas nga Diyos sa makausa pa mahimong Hari sa tibuok nga uniberso nga walay harianong hawas alang kaniya sa langit ug sa yuta. Busa ang 144,000 nga kaubang mga hari nga gilukat ni Jesu-Kristo gikan sa yuta moluhod usab atubangan sa supremo Harianong Magmamando ug nga niining dugang kahibalo moila kaniya nga mao ang Soberano sa Uniberso.
Kataposang Pagsulay Diha sa Tanang Katawhan
6 Nagaila kang Jehova ingong Superemong Maghuhukom, nagatinguha si Jesu-Kristo nga ang tanang gikinahanglang pag-uyon sa Diyos mapasundayag diha sa buluhaton nga mahimo ni Jesus sa panahon sa iyang Milenyal nga Pagmando. Sa maong panahon sa pagmando, ang mga tawo nga modumili sa pagsunod sa mga kinahanglanon sa pagkamatarong ug mosupak sa Hari pagalaglagon. Busa, kadtong igatugyan ni Jesu-Kristo ngadto kang Jehova nga Diyos, ang kataposang Maghuhukom, mao ang mga masinundanon nga makabaton sa tawhanong kahingpitan.
7 Niining puntoha panahon nang masulayan ang dumalayong kinaiyahan sa tawhanong debosyon maylabot sa Soberano sa Uniberso, si Jehova nga Diyos. Sama sa kaso ni Job, ang pangutana mao: Nahigugma ug nagasimba ba lamang sila sa Diyos alang sa maayong mga butang nga iyang nahimo alang kanila, o gihigugma ba nila siya tungod sa iyang pagkamao—ang Matarong nga Soberano sa uniberso? (Job 1:8-11) Apan sa unsang paagi ang nahingpit nga katawhan masulayan sa pagkamaunongon sa ilang kasingkasing? Ang Bibliya nagatubag: si Satanas nga Yawa ug ang iyang mga demonyo pagabuhian “sa mubong panahon” gikan sa bung-aw nga niini gibilanggo sila sulod sa usa ka libo ka tuig. (Pinadayag 20:3) Pinaagi sa pagtugot sa Yawa sa pagsulay sa napasig-uling katawhan, ang mga sakop sa nahingpit nga katawhan mapamatud-an maylabot sa ilang tagsatagsang integridad sa Diyos sa hingpit nga diwa.—Itandi sa Job 1:12.
8 Sa miaging pito ka libo ka tuig, nadani ni Satanas nga Yawa ang hingpit nga Adan ug Eva sa pagkasala pinaagi sa paghimog matinguhaon sa kaugalingong dalan sa paglihok. Walay gisulti ang Kasulatan kon unsang mga paagiha sa pagsulay ang ilang gamiton nga itugot ni Jehova kang Satanas ug sa iyang mga demonyo dihang pagawason sila gikan sa bung-aw. Apan walay duhaduha nga may pangdani sa pagkahakog ug sa tinguha sa pagkinaugalingon gikan sa Diyos. Sanglit usa gihapon ka rebelde batok sa pagkasoberano ni Jehova, maningkamot ang Yawa sa paghimo sa mga katawhan nga mga rebelde usab. Wala usab ipadayag kon asa kutob molampos kining gibuhiang panon sa mga demonyo, apan adunay igong rebelyosong mga tawo nga mohatag ug impresyon nga usa ka dakong panon. Ang sala nga mahimo sa kabahin sa bisan kinsang tawhanong linalang, nga karon nahingpit na, ginahimo sa maalamon, ug busa, tinuyo, ug kinabubut-on. Nagkahulogan kini sa pagbulag gikan sa pagsimba sa bugtong tinuod ug buhi nga Diyos ug nagadapig sa kiliran ni Satanas nga Yawa. (Pinadayag 20:7, 8) Busa, maylabot niining mga rebelyoso, si Jehova dili mahimong “tanang mga butang ngadto sa tanan.”
9 Apan, ang mga maunongon, modumili sa pagsunod sa mga pangatarongan ug sa mga kapig-otan sa mga nahisalaag, ug sa mga nasyonalistiko. Sa walay pagpanuko, ang mga maunongon mopili nga si Jehova mahimong “tanang butang ngadto sa tanan” diha sa ilang kaugalingong kahimtang. Alang sa katarongan, ang pagkasoberano ni Jehova kinahanglang hugot nga ipatuman. Busa, ang tanang mga rebelde nga naimpluwensiyahan ni Satanas dinhi sa yuta pagalaglagon sa walay kataposan. Salamat nga nawala na sila! Ang dili-makitang gingharian sa kalalangan kinahanglang mawad-an sa tanang mga rebelde. Busa, aron bug-os nga maputli ang uniberso, si Satanas nga Yawa ug ang tanan niyang mga panon sa demonyo pagalaglagon, wagtangon gikan sa paglungtad. Sa ingon ang langit ug ang yuta mahinloan gikan sa tanang mansa sa kasal-anan. (Pinadayag 20:9, 10) Ang pagkabalaan ni Jehova mokaylap sa tanan. (Itandi sa Zacarias 14:20.) Ang balaang ngalan sa Labing Hataas nga Diyos pagabalaanon sa langit ug sa yuta. Ang tanang mopuyo sa langit ug sa yuta mobuhat sa iyang labawng kabubut-on.
10 Sa walay kataposan makabaton ang atong yuta ug usa ka ngalan nga dili matagamtam sa ubang planeta sa bug-os nga kawanangan, bisan pa nga ang yuta mahimong dili lamang mao ang bugtong planeta nga pagapuy-an. Sa pagkatagsaon, dinhi gibayaw ni Jehova ang iyang pagkasoberano sa uniberso, nga magatukod ug walay kataposan ug unibersohanon legal nga sulondan. Dinhi niining planetaha lamang nga nakig-away ang mga panon ni Jehova sa panahon sa “gubat sa dakong adlaw sa Diyos nga Labing Makagagahom.” Dinhi lamang niining planetaha nga gipadala sa Diyos ang iyang pinalanggang Anak aron mahimong tawo ug namatay aron sa pagtubos sa mga pomuluyo sa planeta gikan sa sala ug kamatayon. Dinhi lamang niining planetaha nga mikuha si Jehova ug 144,000 sa mga pomuluyo niini aron mahimong “mga manununod sa Diyos, apan kaubang mga manununod ni Kristo.”—Roma 8:17.
Mga Serapines, mga Kerubin, ug mga Manulonda
11 Ang Diyos, ang mahimayaong Tuboran sa tanang kalalangan, langitnon ug yutan-on, mahimong “tanang butang” dili lamang ngadto sa 144,000 nga manununod ni Kristo kondili ngadto usab sa uban sa langitnong dapit. Diha sa kapitulo 6 sa basahon ni Isaias, gihatagan kita ug talan-awon sa langitnong hawanan: Didto atong mabasa: “Nakita ko si Jehova, nga nagalingkod sa hataas nga trono ug tinuboy, ug ang iyang sapot nakapuno sa templo. Sa ibabaw kaniya nagatindog ang mga serapines. Ang tagsatagsa may unom ka pako. Sa duha gitabonan ang iyang nawong, ug sa duha gitabonan ang iyang tiil, ug sa duha siya milupad. Ug ang usa misinggit sa usa ug miingon: ‘Balaan, balaan, balaan si Jehova sa mga panon. Ang tibuok nga yuta napuno sa iyang himaya.’”—Isaias 6:1-3.
12 Pagkadako sa ppribilehiyo ni Isaias nga nakakita sa labing balaang Usa sa tibuok nga uniberso nga nagalingkod diha sa iyang trono sa langit nga gialaran sa mahimayaong mga serapines! Pagkatagsaong panan-awon kadto, nga nagapadayag sa halangdong pribilehiyo nga nabatonan niadtong mga serapines, kay siya mao ang Bug-os Balaang Usa kansang pagkabalaan ilang gidawat ug ilang gipamatud-an ang iyang pagkabalaan pinaagi sa pagpasiugda sa tulo ka besis! Ang mga serapines maikagon sa pagtabang sa mga magsisimba ni Jehova nga mahimong balaan sama nga Diyos nga balaan.—Isaias 6:5-7.
13 Sama nga adunay nagkalainlaing mga linalang dinhi sa yuta, nga nagapasundayag sa gahom ni Jehova nga Diyos, dunay laing matang usab sa mga linalang nga espirituhanon. Gipadayag sa Bibliya nga kini sila mao ang mahimayaong mga kerubin, nga tulin kaayong molupad. (Salmo 18:10; itandi sa Hebreohanon 9:4, 5.) Ang Genesis 3:24 nagpakita nga human nakasala si Adan ug Eva batok sa balaang Diyos sa langit pinaagi sa pagkaon sa gidili nga bunga, nagbutang ang Maglalalang sa silangan sa dalan balik sa Paraiso sa kalipay ug mga kerubin nga may dalang “nagsigang espada nga nagatuyoktuyok.” Gihisgotan si Jehova nga “nagalingkod ibabaw sa mga kerubin.” (Salmo 99:1; Isaias 37:16) Busa gipakita siya nga nagalingkod sa ibabaw sa trono sa mga kerubin.
14 Dili pagakalimtan taliwala sa mga panon sa espiritu nga mga linalang mao ang mga manulonda. Milyonmilyon ang ilang gidaghanon. (Daniel 7:9, 10) Taliwala kanila mao ang mga manulonda nga gitudlo sa pag-alagad sa mga magsisimba ni Jehova sa yuta. Mipasidaan si Jesus nga kinahanglang walay mopapandol sa mga magsisimba ni Jehova tungod kay ang “ilang mga manulonda sa langit kanunay nagasud-ong sa nawong sa akong Amahan nga anaa sa langit.” (Mateo 18:10; Hebreohanon 1:14) Sa kataposan sa 40 ka adlaw nga pagpuasa ni Jesus sa kamingawan ug tapos sa iyang madaogong pagsukol sa tulo ka masulayong mga tintasyon nga gitanyag sa Yawa, pagkadakong pribilehiyo kadto sa mga manulonda sa pag-alagad sa pisikal nga mga panginahanglan sa nagniwang, gigutom nga Jesus!—Mateo 4:11.
15 Didto sa langitnong gingharian, ang mahimayaong mga espirituhanong mga pomuluyo mahimong mga igsoong sa usag usa, samtang dinhi sa yuta ang gihingpit nga tawhanong pamilya mahimong mga igsoong lalaki ug babaye sa usag usa. Sila mahimong dagway ug larawan sa Diyos sa samang paagi kang Adan ug Eva, nga lab-as pa gikan sa mamugnaong nga mga kamot ni Jehova nga Diyos, nga sama sa ‘dagway ug larawan’ sa ilang Maglalalang. (Genesis 1:26, 27) Tapos makapasar sa kataposang pagsulay, ang nahingpit na nga katawhan hatagan sa katungod nga mabuhi sa walay kataposan ug sa mahigugmaon sagopon ingong “mga anak sa Diyos,” nga makatagamtam ug mahimayaong kagawasan, ug mahimong bahin sa nahiusang pamilya ni Jehova sa langit ug sa yuta.—Roma 8:21.
16 Pagkadakong kasadya ug kalipay sa iyang bug-os nga persona sa magatan-aw si Jehova nga Diyos nga natuman ang iyang orihinal nga katuyoan—ang dili-hitupngang kalamposan sa paghimo sa tanang mga butang sumala sa iyang determinasyon sa sinugdanan—nga ang tanang mga linalang diha sa dili-mabungkag mahigugmaong nahiusa uban kaniya!
17 Sumala niining tanan, kinsay makapugong sa paghimaya niining katingalahan May-Katuyoan nga Diyos? Nagabayaw sa tukmang paagi sa iyang mga pulong nga gipahayag ngadto sa labaw-tawhanong mga linalang, ang salmista miingon: “Dayega ninyo si Jehova, Oh kamo nga iyang mga manulonda sa langit, nga mga gamhanan sa kalig-on, nga nanagtuman sa iyang pulong, pinaagi sa pagpatalinghog sa tingog sa iyang pulong. Dayega ninyo si Jehova, kamong tanang mga panon niya sa kalangitan, kamong mga alagad niya nga nanagbuhat sa iyang kabubut-on.”—Salmo 103:20, 21.
18 Ang nalipay, dinasig nga salmista mitapos sa basahon sa Salmo niining mga pulonga sa pagtambag: “Dayega ninyo si Jah, kamo nga katawhan! Dayega ang Diyos diha sa iyang balaang puloy-anan. Dayega siya diha sa kalangitan sa iyang gahom. Dayega siya tungod sa iyang mga buhat nga gamhanan. Dayega siya sumala sa iyang labaw nga pagkahalangdon. Dayega siya nga adunay honi sa trompeta. Dayega siya nga adunay salterio ug alpa. Dayega siya nga adunay gagmay nga tambor ug pagsayaw. Dayega siya uban ang mga tulonggon nga kinuldasan ug plawta. Dayega siya uban ang mga piyangpiyang nga mahonihon. Dayega siya nga adunay mga piyangpiyang nga malanog ug tunog. Ipagpadayeg sa tagsatagsa nga adunay gininhawa—si Jah. Dayega ninyo si Jah, kamo nga katawhan!”—Isaias 150:1-6.
19 Ang tibuok nga uniberso mahiusa sa kataposan diha sa hingpit nga bugkos nga mohawid sa walay kataposan, ang bugkos sa usa ka pagsimba sa langitnong Amahan tungod kay ang iyang mga anak nahigugma ug nagasimba kaniya labaw sa tanan. Oo, mahitabo unya nga ang tanang maalamong mga linalang moingon, sama sa gipahayag sa mga serpines: “Balaan, balaan, balaan si Jehova sa mga panon. Ang tibuok nga yuta mapuno sa iyang himaya.” Unya, ang Diyos sa “prinsipe sa Pakigdait” mahimo nga “tanan butang ngadto sa tanan”—hangtod sa kahangtoran.
[Mga Pangutana nga Pagatun-an]
1. Unsay panig-ingnan ang gipakita ni Jesus alang sa tanang mga kalalangan sa langit ug sa yuta?
2, 3. (a) Sa unsang paagi gibatbat sa 1 Corinto 15:24-26, 28 ang linain nga lihok ni Jesus sa pagpasakop sa iyang Amahan? (b) Unsa unya ang dakong resulta niini?
4. (a) Unsay pagsanong sa mga pomuluyo sa yuta sa panig-ingnan sa ilang gisagop nga Amahan? (b) Unsang bag-ong bahin sa pagpasakop ang maglungtad unya?
5. Unsa unyay tinamdan sa 144,000 nga kaubang mga hari ni Jesu-Kristo?
6. (a) Unsay mahitabo sa masinupakong mga tawo sa panahon sa Milenyal nga Pagmando ni Jesus? (b) Unsay kahimtang niadtong igatugyan ni Jesus ngadto sa iyang langitnong Amahan?
7. (a) Unsa ang sulayan human nga ibalik ni Jesus ang Gingharian? (b) Sa unsang paagi sulayan ang nahingpit nga katawhan?
8. (a) Dihang pagawason gikan sa bung-aw, unsay paningkamotang buhaton ni Satanas ug sa iyang mga demonyo? (b) Kadtong magpadala sa pagsulay sa Yawa ug sa iyang mga demonyo mohimog unsang dalan sa paglihok?
9. (a) Unsay mahitabo niadtong dili magpabilin sa integridad kang Jehova nga Diyos? (b) Sa unsang paagi ang dili-makitang gingharian mawad-an sa tanang mga rebelde? (c) Unsang dakong kahimtang ang maglungtad unya sa bug-os nga langit ug yuta?
10. Sa unsang mga paagi ang yuta sa walay kataposan makabaton ug ngalan nga wala mabatoni sa ubang planeta?
11, 12. (a) Unsang matanga sa espirtuhanong mga linalang ang nakita ni Isaias sa panan-awon? (b) Unsay ilang kaikag diha kanato nga mga tawhanon?
13. (a) Unsa pa ang ubang matang sa espirituhanong linalang ang gipadayag kanato sa Bibliya? (b) Sa unsang paagi gibatbat si Jehova maylabot kanila?
14. (a) Unsa pang ubang matang sa espirituhanong mga linalang ang dili angay kalimtan? (b) Pila ang ilang gidaghanon?
15, 16. (a) Ipatin-aw ang samag pamilyang panaghiusa ang maglungtad unya sa langit ug sa yuta. (b) Unsay ganti nga gikan kang Jehova ang ihatag ngadto sa nahingpit nga mga tawo nga malamposong makapasar sa pagsulay? (c) Unsay paglantaw ni Jehova dihang matuman ang iyang orihinal nga katuyoan?
17. Tungod niining tanan, kinsa ang makapugong sa pagbuhat ug unsa, kaharmoniya sa mga pulong sa salmista?
18. Sa unsang paagi gitapos sa salmista ang basahon sa Salmo?
19. (a) Sa unsang bugkos nga mahiusa unya ang uniberso? (b) Tungod niini, unsay ipahayag sa maalamong mga linalang?