BALAAN, MGA
Kadtong kinsa mahinlo, ilabina sa espirituwal o moral nga diwa; kini nagtumong usab sa mga tawo nga gilain alang sa pag-alagad sa Diyos, sa langit man o sa yuta.
Si Jehova mismo, nga kinalabwan sa kahinlo ug pagkamatarong, mao ang Labing Balaang Usa. (Os 11:12) Siya kanunayng gitawag nga “Balaang Usa sa Israel.” (2Ha 19:22; Sal 71:22; 89:18) Gisultihan ni apostol Juan ang mga isigkamembro sa Kristohanong kongregasyon: “Kamo gidihogan sa usa nga balaan.” (1Ju 2:20) Si Jesu-Kristo gitawag nga “kanang usa nga balaan ug matarong” sumala sa Buhat 3:14. Ang mga manulonda ni Jehova sa langit maoy mga balaan, nga bug-os debotado sa pag-alagad sa Diyos, mahinlo ug matarong.—Luc 9:26; Buh 10:22.
Sa Karaang Kapanahonan. Ang mga tawo sa yuta nga gilain alang sa pag-alagad sa Diyos gitawag usab nga “mga balaan.” (Sal 34:9) Ang Israel, nga nailalom sa pakigsaad sa Diyos, nahimong iyang linain nga kabtangan ug, ingong usa ka nasod, balaan ngadto kaniya. Mao nga ang mga indibiduwal sa maong nasod nga nagbuhat ug pagkadili-hinlo o kasaypanan nagdalag kahugawan ug dili pag-uyon ni Jehova nganha sa nasod, gawas kon may gihimong aksiyon sa pagpapha kanila. Ang dalo ug dili-masinugtanong si Acan maoy usa kanila; ang iyang sala nagdalag kasakitan sa Israel hangtod nga siya nasakpan ug gibato hangtod nga namatay.—Jos 7.
Si Aaron, nga gidihogan sa balaang igdidihog nga lana ingong hataas nga saserdote sa nasod, maoy balaan diha sa linain, lapad nga diwa. (Sal 106:16) Tungod niini, ang mga kuwalipikasyon sa iyang katungdanan hataas kaayo. (Lev 21:1-15; matikdi usab ang mga butang nga makadiskuwalipikar sa tanang saserdote diha sa mga bersikulo 16-23; tan-awa ang HATAAS NGA SASERDOTE.) Tungod sa sala sa hataas nga saserdote (pananglitan, ang sayop nga paghukom sa usa ka butang), mahimong sad-an ang katawhan ug kinahanglang tabonan kini pinaagi sa paghalad ug usa ka toreyong baka, ang samang halad nga gikinahanglan alang sa sayop sa tibuok katigoman.—Lev 4:3, 13, 14.
Ang Kristohanong mga Balaan. Ang mga tawo nga may relasyon sa Diyos tungod sa bag-ong pakigsaad maoy binalaan, hininloan, ug linain alang sa bug-os nga pag-alagad sa Diyos pinaagi sa “dugo sa pakigsaad,” ang giulang dugo ni Jesu-Kristo. (Heb 10:29; 13:20) Tungod niana sila nahimong “mga balaan” (“mga santos” diha sa KJ ug sa pipila ka ubang mga bersiyon). Busa, sila wala mahimong “mga balaan,” o “mga santos,” pinaagi sa pagtudlo sa usa ka tawo o sa usa ka organisasyon, apan pinaagi sa Diyos, kinsa nagdala kanila ngadto sa relasyon nga may pakigsaad kaniya pinaagi sa dugo ni Jesu-Kristo. Busa ang termino nga “mga balaan” mapadapat sa tanan nga gihiusa ug gihimong kaubang mga manununod ni Kristo, dili sa pipila lamang nga giisip nga may talagsaong pagkabalaan. Kini usab gipadapat sa Bibliya ngadto kanila sukad pa sa sinugdanan sa ilang binalaan nga pagkinabuhi sa yuta, nga dili na magpaabot pa hangtod nga sila mamatay. Si Pedro nag-ingon nga sila kinahanglang magmabalaan tungod kay ang Diyos balaan. (1Pe 1:15, 16; Lev 11:44) Ang tanang espirituwal nga mga igsoon ni Kristo diha sa mga kongregasyon kanunayng gitawag nga “mga balaan.”—Buh 9:13; 26:10; Rom 1:7; 12:13; 2Co 1:1; 13:13.
Ingong “asawa” ni Kristo, ang tibuok kongregasyon gilarawan ingong nagsul-ob ug magilakon, hinlo, pino nga lino, nga naghawas sa “matarong nga mga buhat sa mga balaan.” (Pin 19:7, 8) Diha sa panan-awon, ang simbolikong politikanhon nga “mapintas nga mananap” ni Satanas nga Yawa nakitang nakiggubat batok kanila samtang sila dinhi pa sa yuta. (Pin 13:3, 7) Tungod niana ang paglahutay sa mga balaan nasulayan pag-ayo, apan sila nagmadaogon pinaagi sa pagsunod sa mga sugo sa Diyos ug sa pagtuo kang Jesus.—Pin 13:10; 14:12.
Ilang paglaom. Sa susamang panan-awon si Daniel nakakita ug usa ka mapintas nga mananap nga nakiggubat batok sa mga balaan sa Diyos; kini gisundan sa usa ka esena sa hukmanan diin “ang Karaan sa mga Adlaw” mihukom dapig sa mga balaan ug sila gihatagan ug Gingharian nga mohangtod sa panahong walay tino, “ang gingharian ug ang pagmando ug ang kahalangdon sa mga gingharian ilalom sa tibuok kalangitan.”—Dan 7:21, 22, 27.
Kini nga “mga balaan” dili maghupot ug harianong awtoridad samtang ania pa sa yuta kondili kinahanglang maghulat nga sila mahiusa kang Kristo didto sa mga langit. (Efe 1:18-21) Sila angay nga “magmadaogon” una. (Pin 3:21; itandi ang Pin 2:26, 27; 3:5, 12.) Sila mag-alagad ingong mga saserdote ug magmando ingong mga hari uban ni Kristo sulod sa iyang Usa ka Libo ka Tuig nga Paghari. (Pin 20:4, 6) Si apostol Pablo nag-ingon nga ang mga balaan magahukom sa kalibotan, ingon man usab sa mga manulonda, dayag nga makig-ambit sa pagpahamtang ug paghukom batok sa mga daotan.—1Co 6:2, 3; Pin 2:26, 27.
Pagsulong sa “Kampo sa mga Balaan.” Sa Pinadayag 20:7-9 gitagna nga si Satanas nga Yawa manguna sa mga nasod sa pagpakiggubat sa ‘kampo sa mga balaan ug sa siyudad nga hinigugma’ sa pagkatapos sa usa ka libo ka tuig nga paghari ni Kristo. Ang tagna dayag nga nagtumong sa usa ka yutan-ong rebelyon batok sa soberanya sa gingharian sa Diyos ibabaw sa yuta, nga maoy pagsulong batok sa “mga balaan.” Niini nga konteksto sila dayag nga mao kadtong napasig-uli nga katawhan nga naghupot sa ilang integridad ngadto sa Diyos ug sa iyang Mesiyanikong Hari.—Tan-awa ang PAGKABALAAN, PAGBALAAN.