Kansang mga Ngalan ang Nahisulat Diha sa “Basahon sa Kinabuhi”?

Tubag sa Bibliya

Ang “basahon sa kinabuhi,” nga gitawag usab ug “linukot nga basahon sa kinabuhi” o “basahon sa handomanan,” naundag mga ngalan sa mga tawo nga may paglaom nga makadawat sa gasa nga kinabuhing walay kataposan. (Pinadayag 3:5; 20:12; Malaquias 3:16) Ang Diyos maoy magpili sa maong mga ngalan base sa pagkamatinumanon sa usa ngadto kaniya.—Juan 3:16; 1 Juan 5:3.

Gitipigan sa Diyos ang matag usa sa maunongon niyang mga alagad diha sa iyang panumdoman, nga samag nagsulat sa ilang mga ngalan diha sa usa ka basahon, sukad sa “pagkatukod sa kalibotan” sa katawhan. (Pinadayag 17:8) Dayag nga ang matinumanong tawo nga si Abel mao ang unang nahisulat sa basahon sa kinabuhi. (Hebreohanon 11:4) Apan dili kini basta lang listahan sa mga ngalan, kay ang basahon sa kinabuhi nagpadayag kanato nga si Jehova maoy usa ka mahigugmaong Diyos kinsa “nakaila sa mga iyaha.”—2 Timoteo 2:19; 1 Juan 4:8.

Mahimo bang mapapas ang mga ngalan diha sa “basahon sa kinabuhi”?

Oo. Ang Diyos miingon bahin sa masinupakong katawhan sa karaang Israel: “Ang bisan kinsa nga nakasala batok kanako, ako siyang papason gikan sa akong basahon.” (Exodo 32:33) Apan kon kita magmatinumanon, magpabilin kita diha sa “linukot nga basahon sa kinabuhi.”—Pinadayag 20:12.