Nahinumdom Ka Ba?

Napamalandong mo ba pag-ayo ang di pa dugayng mga isyu sa Ang Bantayanang Torre? Kon mao, maikag ka sa paghinumdom sa mosunod:

◻ Nganong ang doktrina sa predestinasyon dili-makataronganon?

Kon ang Diyos nahibalong daan ug nagbaod nga makasala si Adan, nan si Jehova nahimong tagmugna sa sala sa dihang iyang gibuhat ang tawo ug siya mahimong maoy hinungdan sa tanang pagkadaotan ug pag-antos. Dili kini uyon sa kamatuoran nga si Jehova maoy usa ka Diyos sa gugma nga nagdumot sa pagkadaotan. (Salmo 33:​5; Proverbio 15:​9; 1 Juan 4:8)​—4/15, mga panid 7, 8.

◻ Ingong katumanan sa Isaias 2:​2-4, unsay ginabuhat sa mga tawo gikan sa daghang nasod?

Samtang nagaganayan sila ngadto sa balay sa pagsimba ni Jehova, naglikay usab sila sa ‘pagkakat-on mahitungod sa gubat’ tungod kay ilang gibutang ang ilang pagsalig sa panalipod sa langitnong mga kasundalohan sa Diyos, nga andam na aron sa paglaglag sa tanang kaaway sa pakigdait.​—4/15, panid 30.

◻ Kinsa ang mga gamhanan sa Diyos nga gihisgotan sa Joel 3:​10, 11?

Mga 280 ka beses diha sa Bibliya, ang matuod nga Diyos gitawag nga “Jehova sa mga panon.” (2 Hari 3:14) Kining maong mga kasundalohan mao ang gamhanang panon sa mga manulonda sa langit, nga andam sa pagbuhat kon unsay ipabuhat ni Jehova.​—5/1, panid 23.

◻ Unsang leksiyon ang atong makat-onan gikan sa pagsugo ni Jehova kang Job nga iampo kadtong nakasala batok kaniya? (Job 42:8)

Sa wala pa mapasig-uli si Job sa usa ka mahimsog nga kahimtang, si Jehova nagsugo nga iyang iampo kadtong nakasala batok kaniya. Kini nagpakita nga si Jehova nagsugo nga atong pasayloon kadtong nakasala batok kanato sa dili pa pasayloon ang atong mga sala. (Mateo 6:​12; Efeso 4:32)​—5/1, panid 31.

◻ Unsay gipasabot ni Santiago sa dihang siya miingon: “Ipabug-os sa pag-agwanta ang buluhaton niini”? (Santiago 1:4)

Ang pag-agwanta adunay trabaho, usa ka “buluhaton.” Ang tinudlong-buluhaton niini mao ang paghimo kanato nga bug-os sa tanang bahin. Busa, pinaagi sa pagtugot sa mga pagsulay nga motapos lag ila nga dili mogamit ug dili-kasulatanhong mga pamaagi sa pagtapos dayon niini, ang atong pagtuo masulayan ug malunsay.​—5/15, panid 16.

◻ Nganong ang Diyos naghulat ug dugay kaayo sa pagsulbad sa mga problema sa tawo?

Ang hunahuna ni Jehova sa panahon lahi gikan sa atoa. Alang sa walay kataposang Diyos, ang yugto gikan sa paglalang kang Adan hangtod karon wala pa gani moabot ug usa ka semana. (2 Pedro 3:8) Apan bisan unsa may atong hunahuna bahin sa panahon, ang matag adlaw nga moagi nagdala kanato nga mas duol pa sa adlaw sa pagbindikar kang Jehova.​—6/1, mga panid 5, 6.

◻ Unsay nagapalihok sa mga Saksi ni Jehova?

Ang pagpanudlo ni Jehova nakapatunghag talagsaong mga tawo, nga gitudloan sa paghigugma sa usag usa ug sa ilang silingan sama sa ilang kaugalingon. (Isaias 54:13) Ang gugma maoy nagpalihok sa mga Saksi ni Jehova sa pagpadayon sa pagsangyaw bisan pa sa pagkawalay-interes ug paglutos sa mga tawo. (Mateo 22:​36-​40; 1 Corinto 13:​1-8)​—6/15, panid 20.

◻ Unsay gipasabot sa mga pulong ni Jesus nga: “Kusganong panlimbasogi ninyo ang pagsulod agi sa sigpit nga pultahan”? (Lucas 13:24)

Ang mga pulong ni Jesus nagpasabot ug pakigbisog, paghimo kutob sa atong maarangan. Ang iyang mga pulong nagpakita usab nga ang pipila hayan magtinguha sa ‘pagsulod sa pultahan’ sa ilang kaugalingong kasayon lamang, sa sayon nga paaging gusto nila. Busa ang matag usa kanato makapangutana, ‘Ako bang gipahinungod ang akong kaugalingon uban ang kakugi ug paningkamot?’​—6/15, panid 31.

◻ Sa unsang paagi ang mga binanhaw “gihukman pinasukad sa mga butang nga nahisulat sa mga basahong-linukot sumala sa ilang mga buhat”? (Pinadayag 20:12)

Kini nga mga basahong-linukot dili mao ang rekord sa ilang kanhing mga buhat; sa dihang sila namatay sila naabsuwelto sa mga sala nga ilang nahimo sa buhi pa sila. (Roma 6:​7, 23) Bisan pa niana, ang binanhawng mga tawo mailalom gihapon sa Adamikong sala. Nan, lagmit gayod nga kining maong linukot nga basahon maghatag ug instruksiyon gikan sa Diyos nga kinahanglang sundon sa tanan aron makabenepisyo sa bug-os gikan sa halad ni Jesu-Kristo.​—7/1, panid 22.

◻ Unsang mga leksiyon alang kanato ang anaa sa sambingay ni Jesus bahin sa maayong silingan nga Samaritano? (Lucas 10:​30-37)

Ang sambingay ni Jesus nagpakita nga ang tinuod nga matul-id nga tawo mao ang usa kinsa dili lamang nagasunod sa mga balaod sa Diyos kondili usab nagasundog sa iyang mga hiyas. (Efeso 5:1) Nagpakita usab kini nga ang pagkamaayong silingan kinahanglang mobuntog sa nasodnon, kultural, ug relihiyosong mga babag. (Galacia 6:10)​—7/1, panid 31.

◻ Unsa ang tulo ka dapit diin masinati nimo ang imong mga anak ug ikatagana nimo ang ginikananong giya?

(1) Tabangi ang imong mga anak sa pagpili ug angayang matang sa sekular nga trabaho; (2) andama sila sa pagsagubang sa emosyonal nga kapit-os diha sa eskuylahan ug sa trabahoan; (3) ipakita kanila kon sa unsang paagi matagbaw ang ilang espirituwal nga mga panginahanglan.​—7/15, panid 4.

◻ Unsay katuyoan kon nganong ang Diyos nagpahulay “sa ikapitong adlaw”? (Genesis 2:​1-3)

Ang Diyos wala mopahulay tungod kay siya gikapoy. Hinunoa, siya mihunong gikan sa buluhaton may kalabotan sa yuta aron tugotan ang iyang binuhat nga mougmad ug modangat sa bug-os nga himaya, sa iyang kadayeganan ug kadungganan.​—7/15, panid 18.

◻ Unsa ang tulo ka paagi nga atong ikapakita ang hustisya?

Una, kinahanglang magpahiuyon kita sa moral nga mga sukdanan sa Diyos. (Isaias 1:17) Ikaduha, kita nagpakita ug hustisya sa dihang tagdon nato ang uban sa paagi nga buot nato nga tagdon kita ni Jehova. (Salmo 130:​3, 4) Ikatulo, atong gipasundayag ang diyosnong hustisya sa dihang makugihon kitang nagabuhat sa pagsangyawng buluhaton. (Proverbio 3:27)​—8/1, mga panid 14, 15.