Kinahanglan Bang Ikaw Anaa sa Dan-ag?
ANG eskren sa TV nabuhi samtang gipunting ang mga kamera sa bantogang maglilingaw. Sa pagpadayag sa propesyonal nga pahiyom, siya misugod sa pagtugtog. Kami namating nalingaw sa honi. Ang kamera gipaduol, nga tungod niana among nakita ang dagway sa iyang nawong ug ang hanas nga mga tudlo samtang gipagawas niya ang honi gikan sa iyang instrumento.
Oo, ang maglilingaw mao ang nagpahimulos sa dan-ag. Apan inigkatapos sa pasundayag, matikdi ang hataas nga listahan sa mga pasidungog sa eskren—ang orkestra, batonero, mga teknisyan sa sound, mga nagpalihok sa kamera, mga direktor, mga prodyuser, mga tigmek-ap, ug daghan, daghan pang uban. Ang tanan kinahanglanon aron molampos ang pasundayag. Ang tanan mapaluyohon.
Ang susamang kahimtang nagalungtad sa Kristohanong kongregasyon. Ang pila ka tawo gamitong labi pang ilado, apan ang uban may dili-iladong mga bahin ingong kasagarang mga magmamantala sa mensahe sa Gingharian. Apan, sila angay bang mobati nga dili kaayo importante tungod kay sila wala diha sa dan-ag? Sila angay bang mapikal kon dili sila mainila?
“Ang Tanan Makabatog Bahin”
Ang usa ka asoy may labot kang Haring David mabutyagon kaayo. Ang Bibliya nagapakitang kas-a siya nangulo sa usa ka pundok sa 400 ka tawo sa usa ka dramatikanhong misyon sa pagluwas. Sila nanglakaw sa pagluwas sa ilang mga pamilya ug mga kabtangan gikan sa mga tulisan. Hinuon, duha ka gatos ang gibilin sa pagbantay sa mga butang. Dihang nahibalik ang pundok nga nagluwas nga madaogon uban sa mga babaye, mga bata, ug mga manggad, dugang pa sa daghang inagaw, mitungha ang usa ka suliran: Kinsay moambit sa mga inagaw sa gubat? Kadto ba lamang nakigbugno ang maisip nga takos sa pag-ambit sa mga inagaw? Gihatag ni David ang usa ka tubag nga naisip nga usa ka legal nga pasiuna, “usa ka hudisyal nga hukom alang sa Israel.” Miingon siya: “Kay sama sa bahin sa usa nga nakigbugno mao usab ang bahin sa usa nga nagbantay sa mga butang. Ang tanan magbaton ug samang bahin.” (1 Samuel 30:24, 25) Si Jehova mao ang nagtultol kang David sa paghimo niadtong hudisyal nga hukom. Ug kadto nagbanaag sa halalom nga apresasyon ni Jehova alang niadtong nagaalagad sa mapaluyohong mga papel.
Apan kini bang prinsipyoha matuod sa Kristohanong kongregasyon? Si apostol Pablo nagatubag pinaagi sa usa ka ilustrasyon. Sa pagtandi sa kongregasyon ngadto sa tawhanong lawas, siya miingon: “Ang mata dili makaingon sa kamot: ‘Ako wala magkinahanglan kanimo.’” Oo, sa lawas sa tawo ang tanang bahin—bisan ang gamay nga tudlo—dunay importanteng obra. Ginapakita sa Diyos ang samang kaalam diha sa pag-organisar sa iyang kongregasyon. “Gibutang sa Diyos ang matag usa diha sa kongregasyon,” nga naghatag sa lainlaing mga tawo sa lainlaing mga responsabilidad.—1 Corinto 12:21, 28.
Busa sa unang siglo ang pila ka Kristohanon nagpahimulos sa usa ka sukod sa pagkainila. Pananglitan, si Pedro dan-ag kaayo. Siya ang tigpamaba sa mga apostol sa makasaysayanhong adlaw sa Pentekostes. (Buhat 2:14) Nakapribilehiyo siya sa pagtabang sa unang Hentil nga mga kinabig nga mahimong mga Kristohanon. (Buhat 10:44-48) Ngani, duha ka basahon sa Bibliya ang nagdala sa iyang ngalan! Apan ang uban ganing apostol halos wala mahisgoti. Si Mateo, Nataniel (Bartolome), Tadeo (Judas, anak ni Santiago), si Simon ang usang madasigon, ug si Santiago, ang anak ni Alpeo (ang gitawag nga Santiago ang Ubos), daklit rang nahisgotan. Bisan pa niana, matinumanon nilang gipaluyohan ang ilang Ginoo sa iyang pagsangyaw ug pagpanudlo nga buluhaton.
Mapaubsanon, Tibuok-Kalag nga Pag-alagad
Ang susamang kahimtang nagalungtad karong adlawa. Sa Kristohanong kongregasyon, si Jehova sa gihapon ‘nagapahimutang sa mga sakop sumala sa iyang gikahimut-an.’ Kini misangpot nga ang pipila labaw nga anaa sa dan-ag kay sa uban. Apan angay unsa ang atong tinamdan bahin sa atong mga pribilehiyo sa pag-alagad, bisan kon unsa man kana? Ang Colosas 3:23, 24 nagapahayag niini niining paagiha: “Bisan kon unsa ang inyong ginabuhat, buhata kana nga tibuok kalag ingong ngadto kang Jehova, ug dili ngadto sa mga tawo, kay kamo nahibalo nga maoy gikan kang Jehova nga inyong madawat ang nahiangay nga ganti.”
Daghang Saksi karong adlawa makakuhag dakong kalipay sa pag-alagad sa mapaubsanon, mapaluyohong mga papel. Pananglitan, palandonga si Edmundsen, usa ka Saksing nag-alagad sa Pietermaritzburg, South Africa. Siya nabawtismohan sa 1946 ug misulod sa bug-os-panahong pag-alagad sa 1950. Siya wala gayod mahaanha sa dan-ag. Bisan pa niana, nakabaton siyag kalipay sa pagkakitang 15 sa iyang mga anak ug mga apo nahimong dedikado, bawtismadong mga Saksi, ug 27 pa sa iyang mga apo ug mga apo-sa-tuhod nagatambong sa mga tigom sa kongregasyon! Ug karong adlawa, bisan pag baldado kay nabungol ug diyutay ug nahalap, siya matinumanong nagasangyaw ingong auxiliary payunir. Aw, sa edad nga 84 siya nagaalagad pang ansiano sa kongregasyon ug nagahatag sa mga pahayag publiko! Bisan pa niana, ang pag-alagad ni Edmundsen, sa kinadak-ang bahin, anaa lamang sa luyo. Apan sama sa kaliboang matinumanong alagad sa Diyos, siya nagahatag ug bililhon, makahuloganong pag-alagad kang Jehova.
Oo, kinahanglan ang pagpaubos sa pag-alagad nga nagapaluyo. Apan kini nagahatag usab kanatog panahon sa pag-ugmad sa atong mga personalidad ug mga kahanas una isangon kanato ang bug-at nga mga responsabilidad. Si Haring Josias nahimong hari sa Juda sa edad otso. (2 Hari 22:1) Apan unsa ba siya ka andam alang niadtong papela? Si Moises, sa laing bahin, gipailalom sa 40 anyos nga pagkadili-inila ingong magbalantay sa Midian una mahimong manluluwas. Sulod niadtong yugtoa, naugmad niya ang mga hiyas sama sa kaaghop. (Numeros 12:3) Nakatuon siya sa paghulat kang Jehova. Ug dihang sa kataposan gitawag siya ni Jehova sa pagpanguna sa Israel sulod sa sunod 40 anyos, siya andam alang sa maong responsabilidad!
Busa ang usa ka tawong mobating ang iyang mga katakos wala gamita sa bug-os diha sa kongregasyon dili kinahanglang mahiubos. Tingali gibati ni Jehova nga kinahanglang ugmaron ang dugang pailob o pagpaubos una hatagag dugang pribilehiyo ang maong tawo. Hinumdomi, usab, ang kinabag-an sa mga alagad ni Jehova nagaalagad sa luyo. Ang Bantayanang Torre maoy usa ka iladong bahin sa programa sa pagtuon sa mga Saksi ni Jehova sulod sa kapin sa siglo. Bisan pa niana ang mga magsusulat niana wala magpaila. Hunahunaa, usab, ang kaliboang nagaalagad sa mga balayng Bethel o ingong mga payunir ug mga misyonaryo. Sila wala diha sa dan-ag. Bisan pa niana sila nagapahimulos sa puliki, magantihong mga kinabuhi ug nakasinatig halalom nga katagbawan nga nagagikan sa paghatag sa ilang kaugalingon sa pagtabang sa uban.—Buhat 20:35.
Ang Sangpotanan Niadtong Mapaubsanong Nagaalagad
Sa orihinal nga 12 ka apostoles, usa lamang ang napakyas—ang traidor nga si Judas Iskariote. Ang uban nagpahimulos sa mahimayaong ganti. Sa Pinadayag 21:10, 14 ang Bibliya nagabatbat sa “balaang siyudad” ingong natukod ibabaw sa 12 ka patukoranang bato. Sa matag usa, ang ngalan sa usa ka apostol sa Kordero nahisulat. Makaiikag, duha sa maong matinumanong mga apostol ginganlag Simon. Ang usang ginganlag Simon Pedro dan-ag kaayo; ang lain, nga gitawag si Simon ang madasigon, dili. (Buhat 1:13) Ngani, diyutay kaayo ang gisulti mahitungod sa maong Simon. Apan ang duha ka Simon nakadawat sa samang ganti—ang pribilehiyo nga mahimong mga patukoranang sakop sa langitnong gobyerno ilalom sa Haring Jesu-Kristo!
Hinuon, dili tanang gibanhawng mga dinihogan magaalagad nga inila ingong “mga batong patukoranan.” Gamiton ni Jehova ang sakop sa iyang gobyerno alang sa bisan unsang katungdanang iyang ihukom nga labing angay kanila. Kitang may paglaom nga mabuhing walay kataposan sa paraiso sa yuta susamang makatino nga ilalom nianang kahikayana ang atong Hari mogamit kanato sa labing maayong paagi nga posible. Uban ang maanindot nga palibot, maunongong mga kauban, nagkadaiyang makapahimuot nga buluhaton, ug walay pagbati sa kapakyasan o kalaay, ang atong mga personalidad ug mga kahanas maugmad sa ilang labing bug-os nga mga katakos!
Kon kaha gitawag sa langitnong ganti o nagpanan-aw sa kinabuhi sa gipatahom nga yuta, magmakontento kita sa atong tinudlong buluhaton sa pag-alagad sa organisasyon ni Jehova ug buhaton kana sa bug-os kalag. Kini ang dalang maalamon ug malipayon. Inay nga magtinguhang ambisyoso nga maanaa sa dan-ag, ugmara ang mapaubsanong tinamdan ni Haring David, kinsa miingon: “Usa ka butang ang akong gipangayo gikan kang Jehova—kini ang akong pangitaon, nga ako makapuyo unta sa balay ni Jehova sa tanang adlaw sa akong kinabuhi, aron sa pagtan-aw sa pagkamaayo ni Jehova ug sa pagtan-aw nga may pagpabili sa iyang templo.”—Salmo 27:4.