KALSIDONYA

Ang modernong bato nga ginganlan niining ngalana maoy usa ka sihag o medyo sihag nga cryptocrystalline nga matang sa kuwarso (quartz) nga gigamit ingong mga pahiyas ug mga mutya. Kini dili sama kagahi sa lunsay nga kuwarso, ug kini makaplagan nga dinaghan diha sa mga lungag sa mga bato sa bolkan. Ang komon nga matang sa kalsidonya dili kaayo sihag ug may mga liyoliyo ug mga puntikpuntik nga sama kaputi sa gatas. Kini lainlain ug mga kolor nga may puti, abohon, dalag, asul, ug kapehon.

Ang batong kalsidonya komon nga gigamit ingong kinulitan nga mga mutya sa karaang kapanahonan. Ang ngalan niini naggikan sa ngalan sa karaang Grego nga siyudad nga gitawag ug Chalcedon (sa Asia Minor), nga usa ka tinubdan kanhi niini nga bato. Ang bugtong teksto sa Bibliya nga naghisgot niining batoha nag-ingon nga ang ikatulong patukoranan sa paril sa Bag-ong Jerusalem maoy kalsidonya (Gr., khal·ke·donʹ).​—Pin 21:​2, 19; tan-awa ang MUTYA UG BILILHONG BATO.