Ang maong mga magkakabayo ug ilang mga kabayo makapahibulong gayod kanato. Ugaling, ang mga kabayo ug mga magkakabayo nga nasaksihan sa magsusulat sa basahong Pinadayag (ang Apokalipsis) kulbahinam nga tan-awon! Sila misteryoso ug makalilisang. Ang maong mga magkakabayo kaylap nailhang mga Magkakabayo sa Apokalipsis.

Handurawa nga karon, nga nagdahunog padulong kanimo, mao ang upat ka batid nga magkakabayo, nga ang usa nagpakayab pag espada! Matikdi ang bulok sa ilang mga kabayo. Ang matag usa maoy lahi. Ang usa ka kabayo puti, ang usa pula, ang usa itom, ug ang usa luspad berdehon-dalag nga bulok. Sila tinuod katingad-anan, misteryosong hulagway.

Sundi ang tulin-ug-lihok nga asoy sa kon unsay nakita sa magsusulat sa Bibliya, si apostol Juan. Siya miingon: “Unya nakita ko ang usa ka maputi nga kabayo, ug ang nagkabayo niini nagdalag pana. Siya gihatagan ug purongpurong, ug siya misakay ingong mananaog sa pagpanaog. . . . Ug ang laing kabayo migula, nga mapula, ug ang nagkabayo niini gihatagan ug gahom sa pagwagtang sa pakigdait gikan sa yuta, ug gihimo nga ang mga tawo magpinatyanay sa usag usa; siya gihatagan ug usa ka dakong espada. . . . Ug didto nakita ko ang usa ka maitom nga kabayo, ug ang nagkabayo niini may timbangan sa iyang kamot, ug nadungog ko ang usa ka tingog . . . nga nag-ingon, ‘Ang usa ka litrong trigo alang sa [suhol sa usa ka adlaw], ug tulo ka litrong sebada alang sa [suhol sa usa ka adlaw]’ . . . Ug didto nakita ko ang usa ka kabayo nga abohon ug bulok, ug ang ngalan sa nagkabayo niini maoy Kamatayon, ug ang Hades nagsunod kaniya. Sila gihatagan ug gahom ibabaw sa ikaupat ka bahin sa yuta, sa pagpatay sa mga tawo pinaagi sa espada, gutom, kamatayon, ug sa mapintas nga mga hayop sa yuta.”​—Pinadayag 6:2-8, An American Translation.

Sukad kining panan-awona unang gisulat, ang kahulogan niini nakapalibog sa dimaihap nga magbabasa. Unsay gihawasan niining misteryosong mga kabayo ug mga magkakabayo niini? Kanus-a nagsugod ang ilang pagsakay? Ang ila bang pagsakay may kalabotan sa kinabuhi karong adlawa? Gihatag ang nagkadaiyang mga katin-awan bahin sa kon unsay gihawasan sa mga kabayo ug sa mga nagkabayo niini, ug kon kanus-a gayod nahitabo ang ilang pagsakay.

Ang kinadak-ang kalainan anaa sa mga hubad sa maputi nga kabayo ug sa nagkabayo niini. Pananglitan, ang New Catholic Encyclopedia nagasaysay nga ang maputi nga kabayo nagahawas sa ‘kadaogan sa ebanghelyo kaha o sa imperyalismo.’

Sa librong Daniel and the Revelation, si Uriah Smith nagahatag niining hubara: “Ang maputi nga kabayo . . . maoy haom nga simbolo sa mga kadaogan sa ebanghelyo sa unang siglo . . . Ang pagkaputi sa kabayo nagkahulogan sa kaputli sa pagtuo nianang panahona.”

Ang The Expositor’s Bible nagaingon: “Sa unang nagkabayo ang kawsa inay ang pagkatawo ni Kristo gipailaila kanato, sa kinasayohang ang-ang sa madaogong pag-uswag niini, ug uban ang saad sa umaabot nga kadaogan niini. . . . Atong masayran nga ang kawsa niini anaa sa kalibotan, nga kining ginghariana anaa sa sulod nato, ug kadtong mosupak niini pagapildihon.” Bisan pa niana, si Woodrow Kroll, sa The Christian Jew Foundation, mibating ang nagkabayo sa maputi nga kabayo mao ang Antikristo.

KINSAY makasulbad sa misteryo sa mga magkakabayo sa Apokalipsis? Sa Bibliya, sa Daniel 2:47, si Jehova nga Diyos gitawag “Tigpadayag sa mga tinago.” Sanglit siya mao ang nagdasig sa Bibliya, apil ang panan-awon sa mga magkakabayo, siya makatagana sa mga tubag nga atong gikinahanglan. Busa, pinaagi sa pagsusi sa iyang gipadayag nga Pulong alang sa impormasyon, kita makabadbad sa kahulogan sa buloknong mga kabayo ug mga magkakabayo niini.​—Amos 3:7; 2 Timoteo 3:16; 2 Pedro 1:21.

Ang unang tulo ka bersikulo sa Pinadayag, o Apokalipsis, nagahatag sa yawi sa pagtabang pagsulbad sa misteryo. Kini nagapakitang kining sunodsunod nga panan-awon may kalabotan sa umaabot nga mga hitabo, nga mao, sa umaabot nga tuig 96 K.P. dihang nakita ni apostol Juan kining mga butanga ug gisulat kini. Kini nahiuyon sa iyang pahayag sa Pinadayag 1:10 nga ang mga butang nakita sa maong mga panan-awon mahitabo lamang inigsugod sa “adlaw sa Ginoo.”​—Itandi ang 1 Corinto 1:8; 5:5.

Uban niini sa hunahuna, atong susihon ang mga kabayo ug mga magkakabayo niini. Sa sinugdan, hinungdanong atong mabatonan ang hustong pagsabot sa maputing kabayo ug ang magkakabayo niini. Unya ang kahulogan sa ubang mga magkakabayo mobagay ra niana.

Gisusi ang mga Hubad

Sa nag-unang artikulo, napahayag nga ang usa ka hubad sa maputi nga kabayo ug sa nagkabayo niini mao nga sila naghawas kaha sa ‘kadaogan sa ebanghelyo o sa imperyalismo.’ Apan ang kalibotan wala makabig ngadto sa ebanghelyo (maayong balita) mahitungod kang Kristo ug sa mga katuyoan sa Diyos labot kaniya. Ug, segurado, ang imperyalismo wala magkabayo sa kadaogan. Hinunoa, kini nagkabungkag, natipaktipak, niining sigloha.

Unsa na man ang hubad nga ang maputi nga kabayo nagahawas sa kadaogan sa ebanghelyo ug sa kaputli sa pagtuo sa unang siglo? Kini wala manumbaling sa kamatuorang ang panan-awon maoy bahin sa mga butang mahitabo sa umaabot. Ug sanglit gisulat ni Juan ang panan-awon ingong binilanggo sa isla sa Patmos sa tuig 96 sa atong Komung Panahon, kini dili mahimong nagahawas sa bisan unsang butang may labot sa unang siglo.

Ang laing katin-awan mao nga ang maputi nga kabayo nagapailaila sa kawsa inay sa pagkatawo ni Kristo ug nga ang iyang Gingharian ‘anaa sa sulod’ nato, nga mao, anaa sa atong mga kasingkasing. Apan ang kawsa ni Jesu-Kristo ug sa Kristiyanidad wala magsugod sa usa ka panahong palaaboton sa pagsulat sa Pinadayag. Hinunoa, ang maong kawsa dayag na kaayo taliwala sa unang-siglong mga Kristohanon una pa mosulat si Juan.

Gawas pa, sa miingon si Jesus nga “ang gingharian sa Diyos anaa sa sulod ninyo,” siya nakigsulti ngadto sa salingkapaw nga relihiyosong mga Pariseo ingong tubag sa usa ka pangutanang ilang gipatungha. Si Jesus wala makigsulti ngadto sa matinuohon niyang mga sumusunod ug magsulti kanilang ang Gingharian maoy butang ‘anaa sa sulod nila’ sa diwa nga anaa sa ilang mga kasingkasing. Hinuon, siya nagsulti ngadto sa walay-pagtuo nga mga Pariseo nga siya, si Jesus, ingong hawas sa umaabot nga Gingharian sa Diyos, presente sa ilang taliwala niadtong higayona.​—Lucas 17:21; tan-awa usab ang The Jerusalem Bible ug The New English Bible.

Unsa na man ang ideya nga ang nagkabayo sa maputi nga kabayo mao ang Antikristo? Sa bisan diin ang Bibliya wala mag-ingong ang Antikristo mohimo nianang mga pagpangdaot nga ikaingong siya “migula sa pagpanaog ug sa paghuman sa iyang pagpanaog,” sama sa giingon mahitungod sa nagkabayo sa maputi nga kabayo. (Pinadayag 6:2) Matin-aw nga si bisan kinsa ang nagsakay sa maputi nga kabayo mogula nga bug-os magapanaog. Dili mapakyas ang iyang pagpanaog. Ang tanan niyang kaaway mangalaglag.

Mga Ilhanan sa Bibliya Motabang sa Pagpaila

Ang dili-masayop nga ilhanan sa nagkabayo sa maputi nga kabayo gihatag sa “Tigpadayag sa mga tinago” sa kaulahian diha sa samang serye sa mga panan-awon. Sa Pinadayag 19:11-16, ang maputi nga kabayo makita na usab, nga sa maong panahon may tin-awng ilhanan sa nagkabayo.

Ang kamatuorang ang maputi nga kabayo kaduhang makita niining matagnaong mga panan-awon nagapailang kini sama rang kabayo ug gihulagway ang nagkadaiyang mga katungdanan o kalihokan sa nagkabayo. Sa ulahing talan-awon, ang nagkabayo ginganlan. Siya gitawag “Matinumanon ug Matuod,” “Ang Pulong sa Diyos,” ug “Hari sa mga hari ug Ginoo sa mga ginoo.”

Ang maong mga ngalan nagatino sa ilhanan sa nagkabayo sa maputi nga kabayo. Kini walay lain kondili ang Ginoong Jesu-Kristo mismo! (Itandi ang Pinadayag 17:14.) Apan sa unsang panahon sa iyang kinabuhi? Kinahanglang kini sa usa ka panahon pagkatapos sa unang siglo, sa gihatag ang panan-awon sa Pinadayag. Matikdi, usab, nga karon ang usa ka harianong purongpurong gihatag kaniya. Busa sa umaabot nga panahon si Jesu-Kristo mosugod sa espesyal nga papel ingong Hari, o Magmamando. Ug nianang katungdanana, siya gihulagway usab ingong usa ka manggugubat nga nasangkapan sa pana, sa pagsakay “nga magapanaog ug sa paghuman sa iyang pagpanaog.”

Nagpadayag usab nga kini kinahanglang umaabot pa mao kining kamatuorana: Sa panahon sa apokaliptikong panan-awon, kapin sa 60 anyos ang milabay na sukad natapos ni Jesus ang yutan-on niyang kinabuhi, nabanhaw gikan sa mga patay, ug nakakayab ngadto sa langit. Sa mibalik siya ngadto sa langit, si Jesus gipahulat sa tuong kamot sa Diyos hangtod nianang umaabot nga panahon dihang ang iyang mga kaaway pagahimoong “tumbanan sa iyang mga tiil.”​—Hebreohanon 10:12, 13.

Misugod ang Pagsakay

Busa ang pagsakay sa maputi nga kabayo mosugod sa umaabot nga panahon dihang si Jesu-Kristo maentrono ingong langitnong Hari sa Gingharian sa Diyos. Sa maong panahon ang Diyos magsugo kaniya uban ang mando: “Pagmando taliwala sa imong mga kaaway.” (Salmo 110:2) Apan kanus-a ba kini mahitabo?

Ang pagpurongpurong kang Jesu-Kristo ingong langitnong Hari gibatbat sa Salmo 45:3-7. Unya sa Hebreohanon 1:8, 9 si apostol Pablo mikutlo gikan niining salmoha ug mipadapat sa mga bersikulo 6 ug 7 ngadto sa Anak sa Diyos, si Jesu-Kristo. Ang detalyadong impormasyon ug Kasulatanhong mga pamatuod nga gipatik sa mga Saksi ni Jehova nagapakita nga ang pagpurongpurong kang Jesu-Kristo sa langit nahitabo sa pagkatapos sa Hentil nga mga Panahon, “ang tinudlong mga panahon sa mga nasod,” sa tuig 1914 K.P.​—Lucas 21:24.a

Busa, ang hubad nga magbutang sa pagsakay sa mga magkakabayo nga mas sayo kay sa tuig 1914 dili mahimong husto. Gawas pa, sanglit ang nagkabayo sa maputi nga kabayo mao ang nag-una, ang nagsunod nga ubang mga kabayo ug mga nagkabayo maghawas sa mga hitabo nga mahitabong dungan, o pagkatapos sa pagsugod sa iyang pagsakay. Busa, ang pagsakay niining upat ka magkakabayo kinahanglang mahitabo sukad ug pagkatapos sa sinugdanan sa “panahon sa kataposan” sa 1914. Maoy sukad niadto nga ang “kataposang mga adlaw” nakitang dayag.​—Daniel 12:4; 2 Timoteo 3:1-5, 13.