TIMBANGAN
Usa ka himan sa pagtimbang ug mga butang. Ang mga tawo kanhi sinati sa yanong balabag nga timbangan. Kini adunay usa ka balabag nga malisoliso sa tunga diha sa usa ka tarugo o kordon, ug sa matag tumoy niini nagbitay ang usa ka platilyo o kaw-it. Ang butang nga timbangon ibutang sa usa ka platilyo (o ibitay sa usa ka kaw-it, sama sa gamayng puyo sa salapi), ug ang espesipikong mga bato sa timbangan ibutang sa pikas tumoy. (Jer 32:10; Isa 46:6; Gen 23:15, 16; Eze 5:1; tan-awa ang SALAPI.) Sa panahon sa gutom, bisan ang pagkaon lagmit timbangon pag-ayo diha sa usa ka timbangan. Ang nagsakay sa itom nga kabayo nga gihubit sa Pinadayag 6:5 nagdalag timbangan “alang sa pagtimbang sa tinapay, aron ilarawan . . . ang lisod nga mga panahon, sa dihang ang mga pagkaon mahal kaayo.”—The Expositor’s Greek Testament, giedit ni W. Nicoll, 1967, Tomo V, p. 390.
Si Jehova nagsugo nga gamiton ang mga timbangan sa matinud-anon ug tukma nga paagi (Lev 19:35, 36), kay ang timbangan nga limbongan maoy dulumtanan kaniya. (Pr 11:1; 16:11; Eze 45:10) Ang mga timbangan mahimong di-tukma kon ang mga balabag niini dili pareho ang gitas-on, o mahimo kining limbongan kon kini mubo ra o himoong mas baga ug mas bug-at ang balabag niini. Usahay ang mga Israelinhon migamit ug limbongan nga mga timbangan (Os 12:7; Am 8:5), ug gidugangan pa nila ang panglimbong pinaagi sa paggamit ug di-tukmang mga bato sa timbangan, nga adunay alang sa pagpalit ug ang lain alang sa pagbaligya.—Pr 20:23.
Ang mga timbangan gihisgotan nga mahulagwayon, sama sa dihang gihisgotan ni Job ang ‘pagbutang sa iyang kagul-anan diha sa timbangan.’ (Job 6:2) Ang pagkagamay sa yutan-ong mga tawo gipasiugda pinaagi sa pag-ingon nga sila mas gaan pa kay sa hinungaw diha sa timbangan (Sal 62:9), ug ang mga nasod gitandi ngadto sa walay pulos nga manipis nga abog diha sa timbangan gikan sa panglantaw ni Jehova, kinsa, pagaingnon pa, nagtimbang sa tanang bungtod diha sa timbangan. (Isa 40:12, 15) Ang timbangan usahay gigamit sa paghawas sa tukmang sukod sa paghukom.—Job 31:6; Dan 5:27.